Génesis 10 - Chayahuita (Shahui)

Noi shinpita napopisoꞌ

¹ Iporasoꞌ, Simo, Camo, Cahuito, inapita shinpita napopiso shaꞌhuichinquëmaꞌ. Pacon paꞌninso piquëran huiꞌnahuanatona naꞌantapisoꞌ, shaꞌhuichinquëmaꞌ. Simo, Camo, Cahuito, inapitaso nani shaꞌhuirahuëso chachin, Noi huiꞌninpita.

² Cahuito huiꞌninpitasoꞌ, isopita: Comiri, Macoco, Matai, Capano, Toparo, Misico, Tirasi, inapita.

³ Comiri huiꞌninpitantaꞌ: Asiquinasi, Nipato, Tocarama, inapita.

⁴ Capano huiꞌninpitantaꞌ: Inisi, Tarsis, Quitimo, Notanimo, inapita.

⁵ Ina nápo Cahuito huiꞌninpita, shinpita inapita yaꞌhuëpi. Inapitasoꞌ, marë yonsanoꞌsa parti, yaꞌhuëpi. Inatohua ninanoroꞌsa ocoirahuatonaꞌ, aꞌnaya aꞌnaya nacionënaquë, aꞌna huënton aꞌna huënton, nisha nisha yaꞌhuëpi. Inahuara noꞌpanënaquë yaꞌhuëpi. Naporahuatonaꞌ, inahuara nonpiso nananquë nonatonaꞌ, yaꞌhuëpi.

⁶ Camo huiꞌninpitanta isopita: Coso, Misiraimo, Oto, Canaan, inapita.

⁷ Coso huiꞌninpitantaꞌ: Sipa, Apira, Sapota, Naama, Sapitica, inapita. Naama huiꞌninpitantaꞌ: Sipa, Titan, inapita.

⁸ Cososoꞌ, aꞌna huiꞌnin yaꞌhuëtërin antaꞌ, inasoꞌ, Nimoroto itopi. Inaꞌton chini chiníquën nanantaton, isoroꞌpaquë huaꞌan yaꞌconin.

⁹ Nimorotoso Siniorori catahuarin niꞌton, paꞌpi míso inantërin. Napoaton piyapiꞌsa nonpachinara paꞌyatopi napocaisoꞌ: “Siniorori Nimoroto catahuarin niꞌton, míso inantërin. Inapochachin quëmanta catahuainquën,” topi.

¹⁰ Nimoroto huaꞌanëntërinso noꞌpaquë, ninanoroꞌsa panca panca nipisopita, isopita yaꞌhuërin: Papiri, Irico, Acato, Carini, inapita. Inapita ninanoroꞌsasoꞌ, Sinaro parti yaꞌhuëpi.

¹¹ Ina parti quëran Asoronta pipirahuaton, ninanoroꞌsa ocoirin: Ninihui, Niopoto-iri, Cara, inapita itopisoꞌ.

¹² Naporahuaton, Nisin ninanonta ocoirin. Inasoꞌ, panca ninanoꞌ. Ninihui, Cara, inapita ninanoroꞌsa huáncana yaꞌhuërin.

^13-14 Misraimo shinpitasoꞌ: Notoroꞌsaꞌ, anamoroꞌsaꞌ, niapiroꞌsaꞌ, napotoroꞌsaꞌ, patrosoroꞌsaꞌ, casonoroꞌsaꞌ, capotoroꞌsaꞌ, inapita. Capotoroꞌsa quëran huiristinoꞌsa pipipi.

¹⁵ Canaansoꞌ, paninan huiꞌnahuanpachina, Siton itërin. Ina quëran huiꞌnahuaantahuachina, Iti, itërin.

^16-18 Canaan shinpitanta isopita: Quiposoroꞌsaꞌ, amororoꞌsaꞌ, quiriquiroꞌsaꞌ, iporoꞌsaꞌ, arasiroꞌsaꞌ, siniroꞌsaꞌ, arapatiroꞌsaꞌ, simariroꞌsaꞌ, amatiroꞌsaꞌ, inapita. Ina piquëran Canaan huëntonoꞌsa niquë niquë yanquëëpi.

¹⁹ Cananoꞌsa noꞌpaꞌ huaꞌanëntopisoꞌ, Quiraro parti huarëꞌ icanin. Siton ninano quëraontaꞌ, Casa ninanoquë huarëꞌ icanin. Naporahuaton, Sotoma, Comora, Atoma, Sipoin, inapita ninanoroꞌsataquëchin noꞌpaꞌ mapi. Nasa ninanoquë huarëꞌ noꞌpaꞌ huaꞌanëntopi.

²⁰ Ina nápo Camo huiꞌninpita, shinpita inapita yaꞌhuëpi. Aꞌnaya aꞌnaya nacionënaquë, aꞌna huënton aꞌna huënton, nisha nisha yaꞌhuëpi. Inahuara noꞌpanënaquë yaꞌhuëpi. Naporahuatonaꞌ, inahuara nonpiso nananquë nonatonaꞌ, yaꞌhuëpi.

²¹ Cahuito iin mashonënsoꞌ, Simo itopi. Inantaꞌ, huiꞌninpita yaꞌhuëtërin: Ipiri huiꞌninpitasoꞌ, Simo shinpita nipi.

²² Simo huiꞌninpita isopita yaꞌhuëpi: Iramo, Asoro, Arapasato, Noto, Aramo, inapita.

²³ Aramonta huiꞌninpita isopita yaꞌhuëpi: Osi, Ori, Quitiri, Masi, inapita.

²⁴ Arapasatontaꞌ, Saro paꞌpin. Sarontaꞌ, Ipiri paꞌpin.

²⁵ Ina quëran Ipirinta cato huiꞌninpita yaꞌhuëtërin: Aꞌnasoꞌ, Piriqui itopi. Naporo tahuëriꞌsa piyapiꞌsa itohua itohua yanquëëpi niꞌton, ina pochin ninihuanin. Iyaꞌhuainta Cotano itopi.

^26-29 Cotanosoꞌ, iso nápo huiꞌninpita yaꞌhuëtërin: Aromota, Siripi, Asaromapi, Quira, Atoramo, Osaro, Tiquira, Oparo, Apimairo, Sipa, Opiro, Apira, Copa, inapita.

³⁰ Inapitaso Misa parti yaꞌhuërahuatonaꞌ, Sipari parti huarëꞌ yaꞌhuëpi. Ina partisoꞌ, motopiroꞌsaráchin niconin. Cortaniiꞌ quëran, piꞌi pipirinso parti yaꞌhuërin.

³¹ Ina nápo Simo huiꞌninpita, shinpita, inapita yaꞌhuëpi. Aꞌnaya aꞌnaya nacionënaquë, aꞌna huënton aꞌna huënton, nisha nisha yaꞌhuëpi. Inahuara noꞌpanënaquë yaꞌhuëpi. Naporahuatonaꞌ, inahuara nonpiso nananquë nonatonaꞌ, yaꞌhuëpi.

³² Ina nápo Noi huiꞌninpita quëran pipipi. Nisha nisha huënton nipisopita. Nisha nisha shimashonëna quëran pipitonaꞌ, nisha nisha parti noꞌpaꞌ huaꞌanëntopi. Pacon paꞌninso piquëran itohua itohua yanquëpi. Yanquërahuatonaꞌ, nisha nisha nacionoꞌsa isoroꞌpaquë yaꞌhuërinso ocoipi.