Génesis 1 - Chayahuita (Shahui)

Yosë nani maꞌsha acorinsoꞌ

¹ Yosë nani maꞌsha acorinso shaꞌhuichinquëmaꞌ: Iráca co manta yaꞌhuërinhuëꞌ. Yosëíchin yaꞌhuërin. Caniaritapon, piꞌiroꞌtëꞌton acorin. Ina quëran isoroꞌpantaꞌ, acorin.

² Naporoꞌ isoroꞌpasoꞌ, co ipora pochin nishátërarinhuëꞌ. Yaꞌipi marësáchin ninin, paꞌpi anpotërin. Tashiri noyá iꞌcopitërin. Naporo chachin Yosë ispiritonënsoꞌ, iꞌ aipi yanpo yanpónantarin.

³ Naporoꞌ Yosë tapon: “¡Tashinantërinso niiꞌsohuanchin huachi!” tënin. Topachina, niiꞌsohuantërin huachi.

⁴ Niiꞌsohuantërinso nóya nicaton, nisha acorin. Tashintaꞌ, nisha acorin.

⁵ Niiꞌsohuantërinsosoꞌ: “Tahuëri,” itërin. Tashinaontaꞌ: “Tashiꞌ,” itërin. Tashirahuaton tahuëriantahuachina, iꞌhuaraya huarëꞌ aꞌna tahuëriraꞌ, nanirin huachi.

⁶ Ina quëran Yosë taantarin: “¡Niquë niquë iꞌ yaꞌhuëcaso marëꞌ yaꞌcopinamën yaꞌhuëꞌin!” tënin. Topachina, inachachin yaꞌhuërin huachi.

⁷ Yosëri iꞌ yaꞌcopinamën nipachina, ina aipi iꞌ yaꞌhuërin. Inaanaquëntaꞌ, iꞌ yaꞌhuërin.

⁸ Nani acohuachina, inápaquë yaꞌhuërinsosoꞌ: “Piꞌiroꞌtëꞌ,” itërin. Tashiantarahuaton tahuëriantahuachina, iꞌhuaraya huarëꞌ cato tahuëri nanirin huachi.

⁹ Ina quëran Yosë taantarin: “¡Yaniroꞌpaꞌ yaꞌnocaso marëꞌ piꞌiroꞌtëanaquë iꞌ yaꞌhuërinsoꞌ, inaquëráchin niyontoꞌin!” tënin. Topachina, inachachin yaꞌhuërin huachi.

¹⁰ Yaniroꞌpasoꞌ: “noꞌpaꞌ,” itërin. Iꞌ niyontoninsosoꞌ: “marë,” itërin. Yaꞌipi acorinsopita noyasáchin nisarin niꞌnin. Ina nicaton,

¹¹ Yosë taantarin: “¡Nisha nisha sharoꞌsa papoinaꞌ! Nisha nisha panpatororoꞌsanta nisha nisha yaꞌpirihuanpisoꞌ, papoinaꞌ. ¡Nisha nisha nararoꞌsanta nisha nisha nitopisopita noꞌpaquë papoinaꞌ!” tënin. Topachina, inachachin yaꞌhuërin huachi.

¹² Ina nohuanton nisha nisha sharoꞌsaꞌ, panpatororoꞌsaꞌ, nararoꞌsaꞌ, inapita isoroꞌpaquë paporin. Acorinsopita nicaton: “¡Ma nóyacha acorahuë paya!” tënin.

¹³ Tashiantarahuaton tahuëriantahuachina, iꞌhuaraya huarëꞌ cara tahuëri nanirin huachi.

^14-15 Ina quëran Yosë taantarin: “¡Aꞌpininsopita piꞌiroꞌtëquë yaꞌhuëꞌin. Tahuëri, tashi aꞌpintacaso marëꞌ yaꞌhuëꞌin. Inapita aꞌpinpachina, tahuëri, tashiꞌ, nisha nisha acoarin. Naporahuaton yoquiroꞌsaꞌ, piꞌipiroꞌsaꞌ, inapitanta piyapiroꞌsa nitotapi huachi!” tënin. Topachina, inachachin yaꞌhuërin huachi.

¹⁶ Tahuëri aꞌpinacaso marëꞌ panca masho acorahuaton, tashinta aꞌpinacaso marëꞌ huaꞌhuishin miachin acorin. Tayoraroꞌsanta acorin.

^17-18 Yosëri inapita isoroꞌpaꞌ aꞌpintacaso marëꞌ piꞌiroꞌtëquë acorin. Tahuëri, tashi aꞌpintarin. Acorinsopita nicaton: “¡Ma nóyacha acorahuë paya!” tënin.

¹⁹ Tashiantarahuaton tahuëriantahuachina, iꞌhuaraya huarëꞌ catapini tahuëri nanirin huachi.

²⁰ Ina quëran Yosë taantarin: “¡Nisha nisha maꞌsharoꞌsa iꞌquë yaꞌhuëcaiso marëꞌ yaꞌhuëꞌin! Nisha nisha samiroꞌsanta yaꞌhuëꞌin. ¡Naporahuaton, nisha nisha inairaroꞌsa yanponacaiso marëꞌ yaꞌhuëꞌin!” tënin. Topachina, inachachin yaꞌhuërin huachi.

²¹ Panca maꞌsharoꞌsa nisha nisha nipisopita, marëquë yaꞌhuëcaiso marëꞌ acorin. Nisha nisha samiroꞌsantaꞌ, acorin. Anpiantëhuanoꞌsantaꞌ, acorin. Acorinsopita nicaton: “¡Ma nóyacha acorahuë paya!” tënin.

²² Iꞌquë yaꞌhuëcaiso nipisopita noya yonquirapiton iso pochin shaꞌhuitërin: “¡Naꞌamiatatoma marëroꞌsaquë yaꞌhuëcoꞌ!” itërin. Naporahuaton anpiantëhuanoꞌsantaꞌ, shaꞌhuitërin: “¡Naꞌamiatatoma canpitanta isoroꞌpaquë yaꞌhuëcoꞌ!” itërin.

²³ Tashiantarahuaton tahuëriantahuachina, iꞌhuaraya huarëꞌ aꞌnatërápo tahuëri nanirin huachi.

²⁴ Ina quëran Yosë taantarin: “¡Nisha nisha maꞌsharoꞌsa yaꞌhuëꞌin! Tananquë yaꞌhuëcaiso nipisopita, pëꞌtahuacaiso nipisopita, niohuaratacaiso nipisopita. ¡Inapita yaꞌhuëꞌin!” tënin. Topachina, inachachin yaꞌhuërin huachi.

²⁵ Inapita maꞌsharoꞌsaꞌ, yaꞌipi Yosëri acorin. Acorinsopita nicaton: “¡Ma nóyacha acorahuë paya!” tënin.

²⁶ Naporo tahuëri chachin tapon: “¡Iporaso huachi piyapi niahuaꞌ! Inaso canpoa pochachin nisarin. Chiníquën nanantaton, samiroꞌsaꞌ, anpiantëhuanoꞌsaꞌ, inapita huaꞌanëntarin. Maꞌsharoꞌsa pëꞌtahuacaiso nipisopita, tananquë yaꞌhuëcaiso nipisopita, niohuaratërinsopita, yaꞌipi inapitanta huaꞌanëntarin,” tënin.

²⁷ Yosëri piyapi acoapon, inaora pochachin acorin. Aꞌnara quëmapi, aꞌnara sanapi. Inaíchin ninin.

²⁸ Noya yonquirapiton iso pochin shaꞌhuitërin: “Nóya yaꞌhuëcoꞌ. Naꞌa huaꞌhuasha yaꞌhuëchinquëmaꞌ. Shiparimapita naꞌatonaꞌ, yaꞌipi parti yaꞌhuëꞌinaꞌ. Yaꞌipi huaꞌanëntocoꞌ. Samiroꞌsaꞌ, maꞌsharoꞌsaꞌ, anpiantëhuanoꞌsaꞌ, niohuaratërinsopita, inapita huaꞌanëntocoꞌ,” itërin.

²⁹ Napotahuaton, itaantarin: “Niꞌquëꞌ. Nisha nisha sharoꞌsa apapotërahuë nitërinso capamaso marëꞌ. Notohuaroꞌ nisha nisha nararoꞌsanta nitërinso caꞌquëꞌ, iroquëꞌ.

³⁰ Maꞌsharoꞌsaꞌ, anpiantëhuanoꞌsaꞌ, niohuaratërinsopita, inapitaso nipirinhuëꞌ, panpatoro acotërahuë capacaiso marëꞌ” itërin. Napotohuachina, inachachin nipi huachi.

³¹ Naporoꞌ Yosëri yaꞌipi acorinsopita nicaton: “¡Ma nóyacha yaꞌipi acorahuë paya!” tënin. Tashiantarahuaton tahuëriantahuachina, iꞌhuaraya huarëꞌ saota tahuëri nanirin huachi.