Gálatas 4 - Chayahuita (Shahui)

¹ Niꞌcochi. Maꞌhuan chiminpachina, yaꞌipi maꞌshanënpita, coriqui, inapita ayananpirin. Huiꞌnin mashotohuachina, inari yaꞌhuërëtërin. Huaꞌhuataponso nipirinhuëꞌ, co aꞌnaroáchin maninhuëꞌ. Inaora maꞌshanënpita nipirinhuëꞌ, piyapinën pochin nicaton, co aꞌnaroáchin huaꞌanëntërinhuëꞌ.

² Huiꞌnapitaquë huarëꞌ aꞌnapitari aꞌpairin. Huaꞌhuasha niꞌton, natëcasoꞌ yaꞌhuërin. Ina quëran huiꞌnapitohuachina, yaꞌipi huaꞌanëntarin. Paꞌpin shaꞌhuirinso tahuëri chachin nanihuachin, huaꞌanëntarin.

³ Inapochachin canpoantaꞌ coꞌhuara Quisocristo nanamën nitochatërarihuahuëꞌ, huaꞌhuaroꞌsa pochin yonquirëhuaꞌ. Nani maꞌsha natëtacasoꞌ yonquiconëhuaꞌ. Maꞌsha aꞌpocasoꞌ, maꞌsha nicacasoꞌ, inapita shaꞌhuitërinënpoaꞌ. Inasáchin yonquipirëhuahuëꞌ.

⁴ Ina quëran tahuërinën nanihuachina, Yosëri huiꞌnin aꞌpaimarin. Sanapi quëran nasitaton, piyapi chachin ninin. Cotio quëmapi niꞌton, iráca pënëntërinsoꞌ natëcasoꞌ yaꞌhuërin.

⁵ Iráca pënëntërinsoꞌ natëtoi, piyapinën pochin nipiraihuëꞌ, Quisocristo nichaꞌëinpoaso marëꞌ oꞌmarin. Ina imarëhuaꞌ niꞌton, iporasoꞌ huiꞌninpita pochin Yosë niꞌninpoaꞌ.

⁶ Huiꞌnin pochachin nicatonpoaꞌ, Ispirito Santo ayaꞌcoancantërinpoaꞌ. Ina quëran Yosë nontohuatëhuaꞌ, Ispirito Santo nohuanton, “Tata” itërëhuaꞌ.

⁷ Napoaton co huachi pënëntërinsoꞌ huaꞌanëntërinpoahuëꞌ. Huiꞌninpita pochin Yosë niꞌninpoaꞌ niꞌton, naꞌcon catahuarinpoaꞌ. Inaora nohuanton, yaꞌipi shaꞌhuitërinpoasoꞌ acotarinpoaꞌ.

Iráca pënëntopisoꞌ co natëcasoꞌ yaꞌhuërinhuëꞌ

⁸ Iráca co Yosë nohuitëramahuëꞌ. Nisha nisha maꞌsha, mamanshi, inapita tëꞌhuatatomaꞌ, mosharamaꞌ, co inapita yonquicasohuëꞌ nipirinhuëꞌ.

⁹ Iporasoꞌ Yosë nohuitëramaꞌ. Inantaꞌ huiꞌninpita pochin nicatënquëmaꞌ, noya nohuitërinquëmaꞌ. Nani nichaꞌëpirinquëmahuëꞌ, ¿maꞌmarëcha naquëranchin iráca pënëntërinsoꞌ, aꞌnapita piyapiꞌsaꞌ natëtopisoꞌ, inapita natëtomaꞌ, tëꞌhuachinachin cancantantaramaꞌ? tënahuë. Inapita natëapomarahuëꞌ, co ina marëꞌ noyápiachin cancantëramahuëꞌ.

¹⁰ Cotioroꞌsa pochin sahuato tahuëri chinotëramaꞌ, yoquiaꞌhuarai tahuëriꞌsantaꞌ, chinotantaramaꞌ. Nani piꞌipi nisha nisha niyontonpiso tahuëriꞌsaꞌ naꞌhuëramaꞌ. “Ina marëꞌ Yosë noya niꞌninpoaꞌ,” topiramahuëꞌ, co ina marëꞌ noya niꞌninquëmahuëꞌ.

¹¹ Noꞌtëquën iyaroꞌsaꞌ aꞌchintopiranquëmahuëꞌ, naniantëramaꞌ nimara, tënahuë. “Topinan quëran aꞌchintërahuë nimara,” taꞌto sëtërahuë.

¹² Cantaꞌ iráca yaꞌipi pënëntërinsoꞌ natëpirahuëꞌ, Quisocristo imacaꞌhuaso marëꞌ co huachi ina yonquirahuëꞌ. Ca pochin cancantatomaꞌ, canpitantaꞌ, iyaroꞌsaꞌ, “Co iráca pënëntërinsoꞌ nichaꞌësarinpoahuëꞌ,” taꞌtomaꞌ, Quisocristoíchin imaco huachi. Iráca nicapënquëmaꞌ paꞌpatëra, co noꞌhuiramacohuëꞌ, noya nontëramaco.

¹³ Yaꞌnan aꞌchintapënquëmaꞌ, caniorahuë. Canioto, huaꞌquiꞌ yacapatënquëmaꞌ, aꞌchintëranquëmaꞌ. Ina nitotëramaꞌ.

¹⁴ Chiníquën caniopirahuëꞌ, co nocanamacohuëꞌ. Noya natanamaco. “Anquëni pochin Yosë nanamën aꞌchintërancoi,” itëramaco. Quisocristo noninso pochachin natanamaco.

¹⁵ Aꞌchintohuatënquëmara, paꞌyatëramaꞌ. Naꞌcon nosororamaco. Nanitëramaꞌ naporini, yaꞌpirama chachin quëchitomacohuëꞌ. ¿Onpoatomataꞌ iporaso nisha yonquiramaꞌ?

¹⁶ Noꞌtëquën pënënanquëmaꞌ niꞌton, ¿noꞌhuiramaco ti?

¹⁷ Nisha aꞌchinaꞌpiroꞌsaso canpitataquë paatonaꞌ noyásha nontopirinënquëmahuëꞌ, co tëhuënchachin yacatahuarinënquëmahuëꞌ. Yaocoiarinënquëmaꞌ inapita paꞌyatamaso marëꞌ. “Ama Paono natëcosohuëꞌ,” itërinënquëmaꞌ.

¹⁸ Noyasha yonquiatonaꞌ, aꞌchinpachinaꞌ, aꞌchinaꞌpi paꞌyatacasoꞌ yaꞌhuërin. Nipirinhuëꞌ, co noyahuëꞌ yonquiatonaꞌ, aꞌchinpachinaꞌ, co paꞌyatacasoꞌ yaꞌhuërinhuëꞌ. Canpitataquë yaꞌhuasoco, nóya nontëramaco. Iporantaꞌ co yaꞌhuëpirahuëꞌ, noya yonquirapico, topirahuëꞌ.

¹⁹ Naꞌcon iyaroꞌsaꞌ nosororanquëmaꞌ. Huiꞌnahuëpita pochachin niꞌnanquëmaꞌ. Niꞌcoꞌ. Sanapi yahuaihuachina, chiníquën parisitërin. Inapochachin cantaꞌ naꞌcon yonquiatënquëmaꞌ, chiníquën parisitarëso pochin cancantërahuë. Canpitantaꞌ Quisocristo pochachin cancantacamasoꞌ naꞌcon nohuantërahuë. Quisocristoráchin imapatamaꞌ, oshaquëran ina pochachin cancantaramaꞌ. Ina marëꞌ naꞌcon yonquiáranquëmaꞌ.

²⁰ Maꞌcha inatohuaꞌ acoꞌincoya, topitërarahuë. ¡Inaquë yaꞌhuërahuë naporini, ninontërëhuaꞌ noya noya niitonhuëꞌ! Aquë yaꞌhuëramaꞌ niꞌton, “¿Maꞌtaꞌ onpochi anoyataꞌhuasoꞌ marëꞌ nicaya?” tënahuë yonquiato.

Acara, Sara inapita pochin nipisoꞌ

²¹ Natanco iyaroꞌsaꞌ Moisësë pënëntërinsoꞌ yanatëramasopita. ¿Co yaꞌipi Moisësë ninshitërinsoꞌ natanamahuëꞌ ti?

²² Apraan catoꞌ huiꞌnin yaꞌhuëtërin. Aꞌnasoꞌ cosonanën huaꞌhuin. Aꞌnaso nipirinhuëꞌ saꞌin chachin huaꞌhuin, tënin.

²³ Cosonanënsoꞌ aꞌnapita sanapiꞌsaꞌ pochin huaꞌhuanin. Saꞌin chachinso nipirinhuëꞌ Yosë nohuanton, huaꞌhuanin. Coꞌhuara huaꞌhuayantëraponhuëꞌ, Yosëri itërin: “Ca nohuantonëhuëquë huaꞌhuanaran,” itërin. Yosëri catahuarin niꞌton, huaꞌhuanin.

^24-25 Iso catoꞌ sanapiꞌsaꞌ yonquiatomaꞌ, nitotocoꞌ. Catoꞌ sanapiꞌsaꞌ yaꞌhuërin. Inapochachin catoꞌ anoyatërinso yaꞌhuërin. Aꞌnasoꞌ iráca pënëntërinsoꞌ, itopi. Aꞌnasoꞌ nipirinhuëꞌ, Quisocristo quëran anoyatërinpoasoꞌ. Iráca pënëntërinsosoꞌ cosona pochin ninin, Acara itopisoꞌ. Iráca cotioroꞌsaꞌ Arapia parti paꞌtopi. Ina parti paꞌtasoiꞌ, Moisësë pënëntërin. Sinai motopiquë canconpachinara, pënëntërin nani maꞌsha natëcaisoꞌ. “Co noꞌtëquën natëhuatëhuahuëꞌ, Yosë anaꞌintarinpoaꞌ,” taꞌtonaꞌ, tëꞌhuatopi. Ipora huantaꞌ cotioroꞌsasoꞌ Quirosarinquë yaꞌhuatonaꞌ, pënëntërinsoꞌ nanan imasapi. “Anaꞌintohuachinpoaꞌ,” taꞌtonaꞌ, tëꞌhuarëꞌnaꞌ yaꞌhuapi.

²⁶ Apraan saꞌinso nipirinhuëꞌ co ina pochinhuëꞌ. Soꞌini noya noya niꞌnin. Co huaꞌanën pochin camairinhuëꞌ. Inapochachin inápaquë nasha Quirosarin yaꞌhuërin. Inatohuaꞌ co nisha nisha natëcasoꞌ yaꞌhuërinhuëꞌ. Quisocristo imapatëhuaꞌ, Sara huaꞌhuin pochin ninëhuaꞌ.

²⁷ Iráca Yosë quiricanënquë ninshitaton, naporin: “Co huaꞌhuanaꞌpinquënhuëꞌ niponahuëꞌ, nóya cancantëquëꞌ. Co huaꞌhuanaton iquitaponahuëꞌ, capa cancantëquëꞌ. Aꞌnaꞌton soꞌyaton, huaꞌhuanin. Quëmaso nipirinhuëꞌ, naꞌcon naꞌcon amiparinpita yaꞌhuëtarinquën. Ina marëꞌ capa cancantëquëꞌ,” itërin.

²⁸ Apraan huiꞌnin chachin Isaco itopisoꞌ. Yosë nohuanton, yaꞌhuëtërin. “Noꞌtëquën Yosë nontërinco,” topachina, ina nohuanton, Isaco nasitërin. Canpoantaꞌ Quisocristo imapatëhuaꞌ, Yosë nohuanton, huëntonënquë yaꞌconarihuaꞌ. Huiꞌninpita pochin niꞌninpoaꞌ.

²⁹ Apraan huiꞌninpitasoꞌ co noyahuëꞌ niniꞌtonaꞌ, yaꞌhuëpi. Ispirito Santo nohuanton, Isaco nasitërin. Cosonaꞌ huaꞌhuinso nipirinhuëꞌ, apiraton Isaco aparisitërin. Inapochachin ipora huantaꞌ iráca pënëntërinsoꞌ nanan imapisopita aparisitërinënpoaꞌ.

³⁰ Cosonaꞌ huaꞌhuinso nipirinhuëꞌ, co yaꞌhuëmiatërinhuëꞌ. Inaꞌton nasitaponahuëꞌ, Yosë co nohuantërinhuëꞌ paꞌpin maꞌshanënpita huaꞌanëntacasoꞌ. Apraan nontaton, itapon: “Isaco yaꞌipi huaꞌanëntapon. Napoaton cosonasoꞌ, huaꞌhuinë chachin aꞌpaquëꞌ paꞌinaꞌ,” tënin.

³¹ Napoaton iyaroꞌsaꞌ Quisocristo nanamën imapatëhuaꞌ, co pënëntërinsoꞌ nanan imacasoꞌ yaꞌhuërinhuëꞌ. Yosësoꞌ co patron pochin piyapitërinpoahuëꞌ. Huëntonënquë chachin ayaꞌconinpoaꞌ niꞌton, huiꞌnin pochachin niꞌninpoaꞌ.