Gálatas 3 - Chayahuita (Shahui)

Iráca nanan naniantatëhuaꞌ, nasha nananáchin imahuaꞌ

¹ Co noꞌtëquën iyaroꞌsaꞌ yonquiramahuëꞌ. ¿Intaꞌ ahuaꞌyantatënquëmaꞌ, anishacancantërinquëmaꞌ? tënahuë yonquiato. “Quisocristo corosëquë patanantopi. Canpoa marëꞌ chiminin,” itërainquëmaꞌ. Aꞌninquëchin quënanëso pochachin shaꞌhuitohuatënquëmara, natanamaꞌ. “Ina pochin chiminaton, oshanënpoaꞌ inquitërinpoaꞌ,” taꞌtomaꞌ, Quisocristo imaramaꞌ.

² Isoíchin yanitotërahuë. ¿Maꞌtaꞌ imaramaꞌ niꞌton Ispirito Santo yaꞌcoancantërinquëmaꞌ? Iráca pënëntërinsoꞌ natëhuatamaꞌ, ¿Ispirito Santo yaꞌcoancantërinquëmaꞌ ti? ¡Coꞌta, Quisocristo nanamën natanatomaꞌ natëhuatamaꞌ, yaꞌcoancantërinquëmaꞌ! “Noꞌtëquën nontërinpoaꞌ,” taꞌtomaꞌ, natëramaꞌ. Ina imapatamaꞌ, Ispirito Santo yaꞌcoancantatënquëmaꞌ, naꞌcon catahuarinquëmaꞌ.

³ ¿Onpoatomataꞌ iporasoꞌ co huachi noꞌtëquën yonquiramahuëꞌ? Naquëranchin iráca pënëntopisoꞌ yanatëantaramaꞌ. Yaꞌnan imapomaꞌ, co canpitaora nanitëramahuëꞌ Yosë huëntonënquë yaꞌconacamasoꞌ. Ispirito Santo ayaꞌconinquëmaꞌ. Ipora huantaꞌ co canpitaora nanitaramahuëꞌ noya noya imacamasoꞌ.

⁴ Imaramaso marëꞌ Ispirito Santo naꞌcon catahuapirinquëmahuëꞌ. Quisocristo naniantohuatamaꞌ, topinan quëran catahuarinquëmaꞌ. Napoaponahuëꞌ, co Quisocristo naniantaramahuëꞌ, topirahuëꞌ.

⁵ “Quisocristoíchin anoyacancantërinco,” topatamaꞌ, Ispirito Santo yaꞌcoancantërinquëmaꞌ. Inapotohuachinquëmaꞌ, achinicancaninquëmaꞌ. Catahuarinquëmaꞌ niꞌton, nani maꞌsha nanitaparamaꞌ. Co iráca pënëntërinsoꞌ natëramaso marëꞌ catahuarinquëmahuëꞌ.

⁶ Isontaꞌ yonquicoꞌ: iráca Apraan Yosë natërin. “Noꞌtëquën nontërinco. Sacaiꞌ nininsontaꞌ nanitaparin,” topachina, Yosëri noya niꞌnin.

⁷ Iporasoꞌ canpoantaꞌ: “Yosë noꞌtëquën nontërinpoaꞌ niꞌton, imasarahuë,” topatëhuaꞌ, Apraan pochin cancantarihuaꞌ. Ina pochin cancantohuatëhuaꞌ, Yosë noya niꞌsarinpoaꞌ. Inantaꞌ iyaroꞌsaꞌ nitotocoꞌ.

⁸ Co cotioroꞌsaráchin Yosëri nohuantërinhuëꞌ. Nisha piyapiꞌsantaꞌ imapachinaꞌ, noya niꞌsarin. Noya nicaton, co oshanëna marëꞌ anaꞌintarinhuëꞌ. Iráca iso noya nanan ninoton, Apraan itapon: “Nisha nisha piyapiꞌsantaꞌ quëma pochin cancantohuachinaꞌ, naꞌcon catahuaarahuë,” itërin Yosëri. Quiricanën quëran naporin.

⁹ Apraan Yosëri shaꞌhuitërinsoꞌ topinan natëcharinso marëꞌ Yosëri naꞌcon catahuarin. Inapochachin canpoantaꞌ Quisocristo nanamën topinan natëcharëhuaso marëꞌ catahuarinpoaꞌ.

¹⁰ Moisësë iráca pënëntërinsoꞌ yaimapatamaꞌ, anaꞌintinquëmasoꞌ yaꞌhuërin. Co yaꞌipi natëramahuëꞌ niꞌton, Yosë anaꞌintarinquëmaꞌ. Iráca quiricanën quëran naporin: “Co yaꞌipimiáchin natëhuatamacohuëꞌ, chiníquën anaꞌintaranquëmaꞌ. Parisitopiquë aꞌparanquëmaꞌ,” tënin.

¹¹ “Pënëntërinsoꞌ natëto chaꞌësarahuë,” co taꞌcasoꞌ yaꞌhuërinhuëꞌ. Ina pochin cancantohuatëhuaꞌ, co Yosë noya niꞌsarinpoahuëꞌ. Quiricanën quëran noꞌtëquën shaꞌhuitërinpoaꞌ: “Cancanënpoa quëran huarëꞌ natëtohuatëhuaꞌ, Yosë noya niꞌsarinpoa niꞌton, noya nanpimiatarihuaꞌ,” tënin quiricanënquë.

¹² Catoꞌ nanan yaꞌhuërin. Co cato chachin imacasoꞌ yaꞌhuërinhuëꞌ. Iráca pënëntërinsoꞌ natëhuachinaꞌ, inasáchin natëcasoꞌ yaꞌhuërin. Moisësë shaꞌhuitërinpoaꞌ: “Noꞌtëquën natëcasoꞌ yaꞌhuërin. Noꞌtëquën natëhuatëhuaꞌ, noya nanpimiatarihuaꞌ,” tënin. Ina nanan imapatamaꞌ, co Quisocristo nanamën imaramahuëꞌ.

¹³ Co nanitërëhuahuëꞌ noꞌtëquën natëcasoꞌ niꞌton, anaꞌintinpoasoꞌ yaꞌhuërin. Quisocristoso nipirinhuëꞌ nichaꞌërinpoaꞌ. Canpoaꞌ yaꞌhuërënamënpoaꞌ chiminin. Ina, Yosëri anaꞌintërin. Quiricanën quëran naporin: “Piyapi paꞌpi co noyahuëꞌ nipachina, naraquë achinpirahuatëꞌ, chiníquën anaꞌintërëꞌ. Nani Yosëri aꞌporin,” tënin quiricanënquë. Canpoasoꞌ anaꞌintinpoasoꞌ yaꞌhuëpirinhuëꞌ, naraquë chachin Quisocristo apatanantohuachinara, oshanënpoa marëꞌ parisitërin. Inaquë parisitaton, nichaꞌërinpoaꞌ.

¹⁴ “Yosë noꞌtëquën nontërinco,” tënin Apraan. Ina tëninso marëꞌ Yosëri noya niꞌnin. Nisha piyapiroꞌsarintaꞌ imacaiso marëꞌ Quisocristo chiminin. Ina natëhuachinara, Yosëri noya niꞌnin. Yaꞌipinpoaꞌ Quisocristo imapatëhuaꞌ, Ispirito Santo yaꞌcoancantarinpoaꞌ. Iráca Yosë shaꞌhuirinso pochachin yaꞌcoancantarinpoaꞌ.

Yosë shaꞌhuirinsoꞌ

¹⁵ Niꞌcochi iyaroꞌsaꞌ. Iso pochin shaꞌhuichinquëmaꞌ yonquicamaso marëꞌ. Maꞌsha mapatëra, quirica quëtërinënpoꞌ. Quëtohuachinënpora, huaꞌani nininën acorahuaton, huiꞌsharin. Ina quëran co insontaꞌ nanitërinhuëꞌ canpiacasoꞌ. Co aquëtëꞌ ninshitacasoꞌ yaꞌhuërinhuëꞌ. Naporahuaton, co tapicasoꞌ yaꞌhuërinhuëꞌ. Yaꞌnan ninshitërinsoráchin yaꞌhuëmiatarin.

¹⁶ Inapochachin iráca Yosëri nontaton, Apraan shaꞌhuitërin: “Caora nohuanto, nóya catahuaranquën. Quëma shipariontaꞌ catahuarahuë yaꞌipi piyapiꞌsaꞌ anoyacancantacaso marëꞌ,” itërin. Aꞌnaíchin shiin yonquiaton, naporin. Quisocristo ninoton, napotërin.

¹⁷ Iráca Apraanëꞌ anoyataton, itapon: “Aꞌna tahuëri quëma shiparin yaꞌhuëhuachin, yaꞌipi piyapiꞌsaꞌ anoyacancantarin. Caora nohuanto, nichaꞌësarahuë. Noꞌtëquën nontaranquën. Co onporontaꞌ naniantarahuëꞌ,” itërin Yosëri. Ina quëran catapini pasa cara shonca piꞌipi naꞌhuëhuachina, cotioroꞌsaꞌ pënënin nani maꞌsha natëcaiso marëꞌ. Pënënpirinhuëꞌ, Apraanëꞌ iráca anoyatërinsoꞌ co naniantërinhuëꞌ. Yosëri nani shaꞌhuitohuachina, co onporontaꞌ nonpininhuëꞌ.

¹⁸ Iráca Yosëri shaꞌhuitërin. “Caora nohuanto, piyapiꞌsaꞌ nichaꞌësarahuë,” itërin. Iráca pënëntërinsoꞌ natëtëꞌ chaꞌëcasoꞌ yaꞌhuërin naporini, co inaora nohuanton Yosë nichaꞌëitonpoahuëꞌ.

¹⁹ ¿Maꞌmarëtaꞌ nipachin pënëntërinso nanan yaꞌhuërin? Co topinan quëran cotioroꞌsaꞌ pënëninhuëꞌ. Oshahuanëhuasoꞌ anitotinpoaso marëꞌ pënënin. Quisocristo nasitaquë huarëꞌ pënëntërinsoachin yaꞌhuërin imacaisoꞌ. Quisocristo nasitohuachina, iráca Apraan shaꞌhuitërinso chachin oꞌmarin. Yosë pënëntohuachina, anquëniroꞌsaꞌ aꞌpaimarin Moisësë shaꞌhuitacaso marëꞌ. Ina quëran Moisësëri piyapiꞌsaꞌ shaꞌhuitërin.

²⁰ Nipirinhuëꞌ, Apraan nontohuachina, co anquëni aꞌpaimarinhuëꞌ. Co piyapi tërantaꞌ aꞌparinhuëꞌ shaꞌhuitacaso marëꞌ. Inaora chachin noꞌtëquën shaꞌhuitërin.

Maistro pochin nininsoꞌ

²¹ Ina pochin niꞌquëhuarëꞌ Moisësë pënëntërin niꞌton, ¿Yosëri Apraan shaꞌhuitërinsoꞌ tapirin ti? Co naporinhuëꞌ. Pënëntërinsoꞌ noya noya nicaton, anoyacancantërinpoaꞌ naporini, ina natërëhuaso marëꞌ Yosë noya niꞌitonpoahuëꞌ.

²² Nipirinhuëꞌ, co insontaꞌ nanitërinhuëꞌ noꞌtëquën natëcasoꞌ. Yaꞌipinpoaꞌ oshahuanëhuaꞌ. Ina marëꞌ anaꞌintinpoasoꞌ yaꞌhuërin, tënin Yosë quiricanën quëran. Napoaton Quisocristoráchin nanitaparin anoyacancantinpoasoꞌ. Inasáchin imapatëhuaꞌ, Yosë noya niꞌsarinpoaꞌ.

²³ Coꞌhuara Quisocristo imacasoꞌ tahuëri naniyatërasohuëꞌ Moisësë pënëntërinsoꞌ huaꞌanëntatë pochin nitërinpoaꞌ ama aquëtëꞌ oshahuanacaso marëhuëꞌ. Oncorapirinpoaso pochin nitërinpoaꞌ. Quisocristo nasitaquë huarëꞌ pënëntërinsoachin yaꞌhuërin ama Yosë naniantacaso marëhuëꞌ.

²⁴ Niꞌcochi. Huaꞌhuaroꞌsaꞌ co yonquipihuëꞌ niꞌton, naꞌcon pënënacasoꞌ yaꞌhuërin. Inapochachin iráca Moisësë naꞌcon pënëninpoaꞌ. Maistro pochin pënëninpoaꞌ oshahuanëhuasoꞌ ayonquiinpoaso marëꞌ. Co pënëntërinsoꞌ natëcasoꞌ nanitërëhuahuëꞌ niꞌton, Quisocristo huachi yonquiarëhuaꞌ. Ina imapatëhuaꞌ, anoyacancantarinpoaꞌ.

²⁵ Iporasoꞌ nani Quisocristo oꞌmarin niꞌton, co huachi maistro pochin nininsoꞌ nohuantarihuahuëꞌ.

²⁶ Iporasoꞌ Quisocristo imapatëhuaꞌ, huiꞌninpita pochin Yosë niꞌninpoaꞌ.

²⁷ Yaꞌipinpoaꞌ Quisocristo natëhuatëhuaꞌ, huëntonënquë chachin ayaꞌconinpoaꞌ. Yaꞌconpatëhuara, “Quisocristoíchin imasarahuë huachi,” taꞌtëhuaꞌ, aporihuanëhuaꞌ. Nasha aꞌmorëso pochin ninëhuaꞌ niꞌton, Quisocristo pochin yonquiarihuaꞌ.

²⁸ Yosësoꞌ co nisha nisha yonquirinpoahuëꞌ. Aꞌnaquënpoaꞌ cotio piyapinpoaꞌ, aꞌnaquëontaꞌ nisha piyapiꞌsaꞌ. Aꞌnaquëontaꞌ patronoꞌsaꞌ, aꞌnaquënsoꞌ piyapinënpita. Aꞌnaquën sanapiꞌsaꞌ, aꞌnaquënpoaꞌ quëmapinpoaꞌ nipirëhuahuëꞌ, yaꞌipinpoaꞌ Quisocristo imapatëhuaꞌ, aꞌna huëntoínchin pochin ninëhuaꞌ.

²⁹ Quisocristo imapatëhuaꞌ, Apraan shinpitanpoaꞌ ninëhuaꞌ canpoantaꞌ. Apraan shaꞌhuitërinso pochachin naꞌcon catahuarinpoaꞌ.