Gálatas 2 - Chayahuita (Shahui)

Quisoso caꞌtanoꞌsanënpitarëꞌ ninontopisoꞌ

¹ Shonca catapini piꞌipi quëran naquëranchin Quirosarinquë paantarahuë. Pirnapi caꞌtaninco. Titontaꞌ quëparai.

² Yosë ayonquirinco pacaꞌhuasoꞌ niꞌton, paꞌnahuë imapisopita nontaꞌhuaso marëꞌ. Ansianoꞌsarachin niyontonpachinara, shaꞌhuitërahuë. “Casoꞌ nisha piyapiꞌsaꞌ aꞌchintohuato, Quisocristoíchin imacaisoꞌ yaꞌhuërin, tënahuë. Iráca pënëntërinsoꞌ imacaisoꞌ co aꞌchintërahuëꞌ,” itërahuë. “Co noꞌtëquën aꞌchinanhuëꞌ,” itërinaco naporini, topinan quëran aꞌchinchitënquëmahuëꞌ, tënahuë yonquiato. Ansianoꞌsaso nipirinhuëꞌ “Noya aꞌchinan,” itërinaco.

³ Titontaꞌ nisha piyapi nipirinhuëꞌ, inatohuaꞌ quëparahuë. Co marca yaꞌhuëtopirinhuëꞌ, ansianoꞌsari noya niꞌpi. “Marca niacotëquëꞌ,” co itopihuëꞌ.

⁴ Aꞌnaquën cotioroꞌsaso nipirinhuëꞌ, “Quiyantaꞌ imarai,” taponaraihuëꞌ, co Quisocristoráchin imapihuëꞌ. Iráca pënëntërinsontaꞌ imapi. Yashaꞌhuirapitonacoi, niyontonpiso pëiquë yaꞌconpi Quisocristo imatoi naporaisopita nicacaiso marëꞌ. “Iráca pënëntërinsontaꞌ natëcasoꞌ yaꞌhuërin,” taꞌtonaꞌ, yaanishacancantërinacoi nisha nisha natëcaꞌhuaiso marëꞌ.

⁵ Napotopirinacoihuëꞌ, co piꞌpian tërantaꞌ nohuantëraihuëꞌ. “Quisocristoíchin anoyacancantërinpoaꞌ,” itërai. Canpitantaꞌ noꞌtëquën yonquicamasoꞌ nohuantërai. Napoaton nisha aꞌchintohuachinacoira, co mantaꞌ natëraihuëꞌ.

⁶ Ansiano huaꞌanoꞌsasoꞌ nipirinhuëꞌ, co nisha shaꞌhuitërinacohuëꞌ. Chiníquën nanantopirinahuëꞌ, co tëꞌhuatërahuëꞌ. Napopináchin Yosë niꞌninpoaꞌ.

^7-8 “Noꞌtëquën aꞌchinan,” itërinaco. Pitrori aꞌchintohuachina, Yosë nohuanton, naꞌa cotioroꞌsaꞌ Quisocristo imasapi. Carintaꞌ aꞌchintohuato, Yosë nohuanton, naꞌa piyapiꞌsaꞌ, nisha nisha niponaraihuëꞌ, imasapi inahuantaꞌ. Napoaton ansianoꞌsantaꞌ noya nontërinaco. “Yosëri Pitro acorin cotioroꞌsaꞌ aꞌchintacaso marëꞌ. Quëmaso nipirinhuëꞌ acorinquën nisha piyapiꞌsaꞌ aꞌchintacaso marëꞌ,” itërinaco.

⁹ Santiaco, Pitro, Coansha, inapitasoꞌ chini chiníquën nanantopi niꞌton, shaꞌhuitërinacoi. “Yosë naꞌcon catahuarinquën. Ina acorinquën nisha piyapiꞌsaꞌ aꞌchintacaso marëꞌ,” taꞌtonaꞌ, sëꞌquërinaco. Pirnapintaꞌ sëꞌquëpi. “Canpitasoꞌ nisha piyapiꞌsaꞌ aꞌchintocoꞌ. Quiyaso nipirinhuëꞌ cotioroꞌsaꞌ aꞌchintarai,” itohuachinacoira, “Noyahuaꞌ,” itërai.

¹⁰ “Ama saꞌahuaroꞌsaꞌ naniantocosohuëꞌ. Imapisopita aꞌchintocoꞌ maꞌsha quëtacasoꞌ,” itërinacoi. “Coꞌchi naniantaraihuë paya. Nosororai quiyarintaꞌ,” itërahuë.

Paonori Pitro pënëninsoꞌ

¹¹ Ina quëran Pitro Antioquiaquë paꞌpachina, Quisocristoíchin anoyacancantërinpoasoꞌ nitotaponahuëꞌ, tëhuërin. Napoaton niyontonpiquë chachin pënënahuë. Ina shaꞌhuichinquëmaꞌ nitotocoꞌ.

¹² Inaquë nisha piyapiꞌsaꞌ yaꞌhuëpi. Aꞌnaquën Quisocristo imapi. Inapitasoꞌ co cotio piyapihuëꞌ niꞌton, yaꞌipi cosharoꞌ caꞌpi. Cotioroꞌsantaꞌ inaquë yaꞌhuëpisopita Quisoso imapachinara, co huachi cosharoꞌ aꞌpopihuëꞌ. Napopináchin coshatopi. Pitrontaꞌ inapitarëꞌ coshataton, co maꞌsha aꞌporinhuëꞌ. Ina quëran aꞌnapita cotioroꞌsaꞌ Quirosarin quëran canquipi. Santiaco imarinsopita inahuasoꞌ. “Quiyantaꞌ Quisocristo imarai,” taponaraihuëꞌ, iráca pënëntopisoꞌ yonquiatonaꞌ, maꞌsha aꞌpopi. Inapita huëꞌpachinara, Pitro co huachi nisha piyapiꞌsarëꞌ coshatërinhuëꞌ. Marca paꞌyatopisopita tëꞌhuataton, nisha coshatërin.

¹³ Yaꞌhuëhuanoꞌsantaꞌ cotioroꞌsaꞌ nipisopita Pitro nicatonaꞌ, nisha coshatopi. Pirnapintaꞌ Pitrorë chachin nisha coshatërin. Quisocristo nanamën nitotaponaraihuëꞌ, co noꞌtëquën imapihuëꞌ.

¹⁴ Ina niꞌsahuato, yaꞌipi piyapi niꞌtërantapaiquë Pitro chiníquën pënënahuë. “Cotio piyapinquën niponahuëꞌ, Quisocristo imaton, iráca pënëntërinsoꞌ naniantëran. Nisha piyapiꞌsarëꞌquën coshataponahuëꞌ, iporasoꞌ naquëranchin maꞌsha aꞌpoantaran. Ina pochin nicaton, piyapiꞌsaꞌ anishayonquiaran. ‘Co Quisocristoíchin nichaꞌërinpoahuëꞌ nimara. Iráca pënëntërinsontaꞌ natëcasoꞌ yaꞌhuërin,’ taꞌtonaꞌ, nonanarinënquën. ¿Nisha piyapiꞌsantaꞌ cotioroꞌsa pochin yaatarantëran ti?

Quisocristo natëhuatëhuaꞌ, Yosë nichaꞌërinpoasoꞌ

¹⁵ Canpoasoꞌ huaꞌhuatërëhua quëran huarëꞌ cotioroꞌsanpoaꞌ ninëhuaꞌ. Co nisha piyapinpoahuëꞌ. ‘Co oshahuanoꞌsanpoahuëꞌ,’ nitërëhuaꞌ.

¹⁶ Napopirëhuahuëꞌ, Moisësë pënëntërinsoꞌ natëhuatëhuaꞌ, co ina marëꞌ Yosë noya niꞌsarinpoahuëꞌ. Quisocristoíchin imapatëhuaꞌ, noya niꞌsarinpoaꞌ. Napoaton canpoantaꞌ Quisocristo natërëhuaꞌ oshanënpoaꞌ inquitinpoaso marëꞌ. Co inso tërantaꞌ pënëntërinsoꞌ natërinso marëꞌ Yosëꞌpaꞌ paꞌsarinhuëꞌ. Quisocristoráchin nichaꞌërinpoaꞌ.

¹⁷ ‘Quisocristo nichaꞌësarinpoaꞌ,’ taꞌtëhuaꞌ, imarihuarahuëꞌ, iráca pënëntërinsoꞌ imaantahuatëhuaꞌ, ¿Quisocristo napoahuarëꞌ aoshahuaninpoaꞌ ti? Co onporontaꞌ ina pochin yonquicasoꞌ yaꞌhuërinhuëꞌ.

¹⁸ Iráca pënëntërinsoꞌ nani naniantërëhuaꞌ. Naquëranchin ina yonquiantahuatëhuaꞌ, co Yosë natëarihuahuëꞌ. Quisocristoíchin yonquicasoꞌ yaꞌhuërin.

¹⁹ Iráca cantaꞌ pënëntërinsoꞌ imapirahuëꞌ, co nanitërahuëꞌ noꞌtëquën natëcaꞌhuasoꞌ. Co ina imato noya cancantërahuëꞌ. Oshahuanato, chimipi pochin cancantërahuë. Napoaton iráca pënëntërinsoꞌ naniantërahuë Yosëíchin yonquicaꞌhuaso marëꞌ.

²⁰ Quisocristo corosëquë chiminin. Ina imato, cantaꞌ corosëquë chiminahuëso pochin ninahuë. Iráca yonquirahuësoꞌ naniantërahuë. Napoaton co huachi oshahuanacaꞌhuasoꞌ yaꞌhuërinhuëꞌ. Iporasoꞌ Quisocristoíchin yonquirahuë. Co huachi caora nohuanto maꞌsha ninahuëꞌ. Quisocristo yaꞌcoancantërinco niꞌton, catahuarinco noya nicaꞌhuasoꞌ. ‘Nani tahuëri Yosë huiꞌnin chachin catahuarinco,’ taꞌto, noya cancantërahuë. Inasoꞌ paꞌpi nosororinco. Nosoroatonco, yaꞌhuërënamëhuë chiminin.

²¹ Inaora nohuanton, Yosë nosoroatonpoaꞌ, huiꞌnin aꞌpaimarin chiminacaso marëꞌ. Co ina naniantërahuëꞌ. Inasáchin imarahuë niꞌton, Yosë noya niꞌsarinco huachi. Iráca pënëntërinsoꞌ natërëhuaso marëꞌ noya niꞌninpoaꞌ naporini, topinan quëran Quisocristo chimiintonhuëꞌ,” itërahuë.