Gálatas 1 - Chayahuita (Shahui)

Carasiaquë imapisopita quirica aꞌpatërinsoꞌ

¹ Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristo acorinco nanamën aꞌchinaꞌhuaso marëꞌ. Co piyapiꞌsaꞌ inahuara nohuanton aꞌparinacohuëꞌ aꞌchinaꞌhuaso marëꞌ. Co inapita acorinacohuëꞌ. Tata Yosë chachin acorinco. Ina nohuanton, Quisocristo nanpiantarin huachi. Nani nanpiantohuachina, ina chachin nanan quëtërinco aꞌchinaꞌhuaso marëꞌ.

² Yaꞌipicoi isëquë imaraisopitaroꞌcoi chachin nanan aꞌpatarainquëmaꞌ. Canpitantaꞌ Carasia parti yaꞌhuëramasopita imaramaꞌ niꞌton, ninshitaranquëmaꞌ.

³ Inaora nohuanton, Tata Yosë catahuainquëmaꞌ. Asanocancainquëmaꞌ. Sinioro Quisocristontaꞌ inachachin catahuainquëmaꞌ.

⁴ Oshanënpoaꞌ inquitinpoaso marëꞌ Quisocristo chiminin. Inaora nohuanton, yaꞌhuërëtërinpoaꞌ. Notohuaroꞌ piyapiꞌsaꞌ co noyahuëꞌ yonquipi. Ama inapita pochin cancantacaso marëhuëꞌ chiminaton, anoyacancantërinpoaꞌ. Tata Yosë nohuanton, nichaꞌërinpoaꞌ.

⁵ “¡Ma noyacha Tata Yosëso paya!” itahuaꞌ. Ama onporontaꞌ ina naniantahuasohuëꞌ. Amen.

Quisocristoíchin imacasoꞌ yaꞌhuërinsoꞌ

⁶ Yosë ayonquirinquëmaꞌ imacamaso marëꞌ. Quisocristo inaora nohuanton nosoroatënquëmaꞌ, catahuarinquëmaꞌ niꞌton, imaramaꞌ. Imapiramahuëꞌ, aꞌnaroáchin ina naniantatomaꞌ, nisha nanan yaimaramaꞌ. Ina yonquiato, paꞌyanahuë.

⁷ Co aꞌna nanan, iyaroꞌsaꞌ, yaꞌhuërinhuëꞌ chaꞌëcaso marëꞌ. Quisocristoíchin anoyacancantërinpoaꞌ. Ina imapatëhuaꞌ, oshanënpoaꞌ inquitarinpoaꞌ. Inasáchin yonquipiramahuëꞌ, aꞌnapita huëcatonaꞌ, nisha nanan aꞌchintarinënquëmaꞌ. Napoaton nisha nisha yonquiaramaꞌ. Yanonpintërinënquëmaꞌ. “Co Quisocristoráchin yonquicasoꞌ yaꞌhuërinhuëꞌ,” itërinënquëmaꞌ.

⁸ Quiyantaꞌ nisha nanan aꞌchinai naporini, Yosë anaꞌinchitoncoihuëꞌ. Anquëni tërantaꞌ nisha nanan aꞌchinin naporini, Yosëri anaꞌinchitonhuëꞌ. “Quisocristoíchin nichaꞌërinpoaꞌ,” itëranquëmaꞌ.

⁹ Iráca inachachin shaꞌhuitërainquëmaꞌ. Iporasoꞌ naquëranchin shaꞌhuitantaranquëmaꞌ. “Quisocristoíchin anoyacancantërinpoaꞌ,” taꞌtomaꞌ, imaramaꞌ. Inso tërantaꞌ nisha nanan aꞌchintohuachinquëmaꞌ, Yosëri chiníquën anaꞌinchin, tënahuë.

¹⁰ Co piyapiꞌsaꞌ noya nicainacoso marëꞌ aꞌchinahuëꞌ. Yosë noya nicaincoso marëꞌ aꞌchinahuë. Piyapiꞌsaꞌ paꞌyatinacoso marëꞌ naꞌcon naꞌcon yonquirahuë naporini, co Quisocristo natëitohuëꞌ.

Paono yaꞌnan imarinsoꞌ

¹¹ Noꞌtëquën iyaroꞌsaꞌ shaꞌhuitaranquëmaꞌ. Iráca quëran huarëꞌ co piyapi yonquirinsoꞌ aꞌchintëranquëmahuëꞌ.

¹² Quisocristo chachin nanamën anitotërinco. Co aꞌna piyapi shaꞌhuitërincohuëꞌ. Co insontaꞌ ina nanamën aꞌchintërincohuëꞌ. Inaora chachin anitotërinco.

¹³ Iráca naporahuësoꞌ nani natantëramaꞌ. Coꞌhuara Quisocristo imashatërapohuëꞌ, cotio nanan imarahuë. Ina imato, Quisocristo imapisopita noꞌhuirahuë. Chiníquën aparisitërahuë. Ataꞌhuantaꞌhuasoꞌ yonquipirahuëꞌ.

¹⁴ Cotioroꞌsaꞌ napopisoꞌ chiníquën imato, inasáchin yonquirahuë. Carëꞌ napopináchin piꞌipitopisoꞌ noya natëpirinahuëꞌ, casoꞌ naꞌcon naꞌcon natërahuë. Nani maꞌsha shimashonëhuëpita aꞌchinpisoꞌ yanatëpirahuëꞌ.

^15-16 Yosë nosoroatonco, nohuantërinco huiꞌnin imacaꞌhuaso marëꞌ. Coꞌhuara nasichátërapohuëꞌ, yonquirinco nanamën aꞌchinaꞌhuaso marëꞌ. Inaora nohuanton, nosororinco niꞌton, huiꞌnin anohuitërinco nisha piyapiꞌsaꞌ pënënaꞌhuaso marëꞌ. Ina marëꞌ acohuachincora, co piyapiꞌsaꞌ paaparahuëꞌ aꞌchintinacoso marëꞌ.

¹⁷ Caꞌtanoꞌsaꞌ Quirosarinquë yaꞌhuëpirinahuëꞌ, co inatohuaꞌ paꞌnahuëꞌ nontaꞌhuaso marëꞌ. Inapitaꞌton acopirinhuëꞌ, Yosë nani shaꞌhuitërinco niꞌton, co inapita tërantaꞌ natanconahuëꞌ. Co huaꞌqui quëranhuëꞌ Arapia parti paato, Quisocristo nanamën yonquiarahuë. Ina quëran Tamascoquë paantarahuë.

¹⁸ Cara piꞌipi quëran Quirosarinquë paꞌnahuë Pitro nohuitaꞌhuaso marëꞌ. Cato simana pochin pëinënquë yacaparahuë.

¹⁹ Naporoꞌ Santiacontaꞌ nohuitërahuë. Quisocristo iin inasoꞌ. Inapitasáchin nontërahuë. Aꞌnapita caꞌtanoꞌsasoꞌ co niꞌnahuëꞌ.

²⁰ Yosë niꞌsárinco, noꞌtëquën ninshitaranquëmaꞌ. Co nonpintaranquëmahuëꞌ.

²¹ Ina quëran Siria parti paꞌnahuë aꞌchinapo. Sirisia partintaꞌ paꞌnahuë.

²² Cotia parti yaꞌhuëpisopitaso nipirinhuëꞌ co nohuichatërarinacohuëꞌ. Inatohuaꞌ naꞌa Quisocristo imapisopita yaꞌhuëpirinahuëꞌ, co nohuitërinacohuëꞌ.

²³ Topinan natantërinaco. “Iráca Paono aparisitërinpoaꞌ. Yatëpapirinpoahuëꞌ, iporasoꞌ inantaꞌ imarin. Quisocristo nanamën aꞌchinarin huachi,” topi, natantopi.

²⁴ Ina natantahuatonaꞌ, “¡Ma noyacha Tata Yosësoꞌ niꞌton, Paonontaꞌ imarin paya!” topi.