Filipenses 1 - Chayahuita (Shahui)

Imapisopita yonquiaton, ninshitërinsoꞌ

¹ Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Iya Timotioroꞌco nanan aꞌpatarainquëmaꞌ. Quisocristo huaꞌanëntërincoi. Inasáchin natërai. Yaꞌipi Quisocristo imaramasopita Piriposëquë yaꞌhuëramasoꞌ, ninshitaranquëmaꞌ. Ansianoꞌsanquëmaꞌ naꞌcon yonquiranquëmaꞌ. Tiaconoꞌsanquëmantaꞌ yonquiranquëmaꞌ.

² Tata Yosë inaora nohuanton, catahuainquëmaꞌ. Asanocancainquëmaꞌ. Sinioro Quisocristontaꞌ inapochachin catahuainquëmaꞌ.

Inapita marëꞌ Yosë nontërinsoꞌ

³ Co naniantëranquëmahuëꞌ. Canpita yonquiatënquëmaꞌ, Yosë nontárahuë. “Piriposëquë yaꞌhuëpisopita noya imarinënquën niꞌton, ‘Yosparinquën, Sinioro,’ ” itërahuë, Yosë nontato.

⁴ Noya cancantato, canpita marëꞌ Yosë nontërahuë.

⁵ Iráca Yosë nanamën aꞌchintohuatënquëmara, aꞌnaroáchin imaramaꞌ. Naporo quëran huarëꞌ catahuaramaco aꞌnapitantaꞌ aꞌchintaꞌhuaso marëꞌ. Iporahuantaꞌ aꞌnapita aꞌchintaramaꞌ Yosë imacaiso marëꞌ. Ina yonquiato, noya cancantërahuë.

⁶ “Quisocristo imasarahuë huachi,” topatamaꞌ, naporo tahuëri chachin Yosë anoyacancantërinquëmaꞌ. Co naniantarinquëmahuëꞌ, tënahuë. Ipora huantaꞌ catahuarinquëmaꞌ noya noya nicacamaso marëꞌ. Quisocristo oꞌmantaquë huarëꞌ catahuarinquëmaꞌ. Naporoꞌ Quisocristo pochachin cancantaramaꞌ.

⁷ Naꞌcon nosororanquëmaꞌ niꞌton, ina pochin noya yonquiranquëmaꞌ. Iráca Quisocristo nanamën aꞌchinpatëra, catahuaramaco. Tashinan pëiquë poꞌmohuachinacorantaꞌ, co naniantëramacohuëꞌ. Inaquëntaꞌ catahuaramaco. Imarahuëso marëꞌ shaꞌhuirapirinaco. Coisëquë quëpapirinacohuëꞌ, co tapanatohuëꞌ, Yosë nanamën noꞌtëquën shaꞌhuitërahuë. Canpitantaꞌ “Yosë catahuarinpoaꞌ,” taꞌtomaꞌ, co tapanaramahuëꞌ. Napoaton canpita yonquiatënquëmaꞌ, noya cancantërahuë. Iyahuëpita pochachin niꞌnanquëmaꞌ.

⁸ Quisocristo nosororinpoaso pochachin carinquëmantaꞌ nosororanquëmaꞌ. Paꞌpi yaniꞌnanquëmaꞌ. Yosë niꞌsárinco noꞌtëquën nontaranquëmaꞌ.

⁹ Canpita marëꞌ ina nontërahuë. “Catahuaquëꞌ, Sinioro, noya noya ninosoroꞌinaꞌ. Quëma nohuanton, nanamën nóya nitochinaꞌ. Catahuaquëꞌ, Sinioro, noꞌtëquën yonquiꞌinaꞌ,” itërahuë Yosë nontato.

¹⁰ Yosë nanamën naꞌcon yonquihuatamaꞌ, noya noya nitotatomaꞌ, noya nisaramaꞌ. Noꞌtëquën yonquihuatamaꞌ, noyápiachin cancantaramaꞌ. Noyasáchin nipatamaꞌ, Quisocristo oꞌmantahuachina, nóya niꞌsarinquëmaꞌ. Co anaꞌintarinquëmahuëꞌ.

¹¹ Quisocristo catahuahuachinquëmaꞌ, noyasáchin nisaramaꞌ. Ina quëran aꞌnapitantaꞌ nicatënquëmaꞌ, Yosë yonquiapi. “Ma noya Yosëri catahuarin niꞌton, noya nipi. Ma noyacha Yosëso paya,” tosapi.

Parisitërin quëran Yosë nanamën nahuininsoꞌ

¹² Maꞌsha onpotopirinacohuëꞌ, inantaꞌ noya, tënahuë. Ina shaꞌhuichinquëmaꞌ. Tashinan pëiquë poꞌmopirinacohuëꞌ, ina marëꞌ naꞌcon naꞌcon piyapiꞌsaꞌ Yosë nanamën natanapi.

¹³ Yaꞌipi sontaroꞌsaꞌ isëquë yaꞌhuëpisopita natanapi. “Paono co mantaꞌ onpopirinhuëꞌ, Quisocristo imarin niꞌton, tashinan pëiquë poꞌmopi,” topi. Yaꞌipi piyapiꞌsaꞌ ina nitotopi.

¹⁴ Tashinan pëiquë poꞌmopirinacohuëꞌ, chiníquën cancantërahuë. Ina natanatonaꞌ, naꞌa imapisopita co huachi aquëtëꞌ tëꞌhuapihuëꞌ. “Quisocristo catahuarincoi quiyantaꞌ,” taꞌtonaꞌ, chiníquën cancantapi. Chiníquën cancantatonaꞌ, Yosë nanamën naꞌcon naꞌcon aꞌchinapi.

^15-17 Aꞌnaquën noya nosororinaco niꞌton, noya cancantatonaꞌ, aꞌchinapi. “Paono tashinan pëiquë yaꞌhuëpirinhuëꞌ, Yosë nohuanton, inaquë poꞌmopi Quisocristo nanamën noꞌtëquën shaꞌhuicaso marëꞌ,” taꞌtonaꞌ, noya aꞌchinapi. Aꞌnaquënso nipirinhuëꞌ, co nosororinacohuëꞌ. Apiratatë pochin nitërinaco. “Quiyasoꞌ noya noya aꞌchinarai,” toconatonaꞌ, co noyahuëꞌ niꞌninaco. “Paono tashinan pëiquë yaꞌhuasoꞌ, quiyasoꞌ aꞌchinpatëira, naꞌcon naꞌcon piyapiꞌsaꞌ paꞌyatatonaꞌ, nataninacoi. Ina quëran Paonori apiratë pochin nicaton, aquë aquëtëꞌ sëtarin,” topi natantërahuë.

¹⁸ Ina niponahuëꞌ, co noꞌhuirahuëꞌ. Co apiratatë pochin ninahuëꞌ. Aꞌnaquën noya cancantatonaꞌ, Quisocristo nanamën aꞌchinapi. Aꞌnaquënsoꞌ co noya cancantaponaraihuëꞌ, aꞌchinapi antaꞌ. Naꞌcon naꞌcon piyapiꞌsari natanapi niꞌton, noya cancantërahuë.

¹⁹ Nani tahuëri ca marëꞌ Yosë nontëramaꞌ. Naporahuaton, Ispirito Santo nani tahuëri catahuarinco. Napoaton co paꞌyanahuëꞌ. Ocoiarinaco nimara. Co casoꞌ nitotërahuëꞌ. Yosëíchin nitotërinsoꞌ. Maꞌsona tërantaꞌ onpotohuachinaco, inantaꞌ noya, tënahuë. Noyasáchin Yosë yonquirinpoaꞌ. Ina marëꞌ noya cancantarahuë.

²⁰ Co nohuantërahuëꞌ piꞌpian tërantaꞌ Yosë naniantaꞌhuasoꞌ. Inasoꞌ noyasáchin yonquirinpoaꞌ niꞌton, co atapanarincohuëꞌ, tënahuë. Coisë ocoiaponco nimara. Tëpaponco nimara. Co ina nitotërahuëꞌ. Co ina yonquirahuëꞌ. Ocoihuachinco, chiníquën cancantato, aꞌchiantarahuë aꞌnapitantaꞌ imacaiso marëꞌ. Tëpahuachinaco, piyapiꞌsaꞌ nicatonaco, naꞌcon naꞌcon Quisocristo yonquiaponaꞌ, tënahuë. Quisocristo natëcaꞌhuasoráchin yonquirahuë.

²¹ Co tëpahuachinacohuëꞌ, Quisocristo natëto noya cancantarahuë. Tëpahuachinacosoꞌ nipirinhuëꞌ, canamiatarahuë.

²² Co chiminpatohuëꞌ, Yosë nanamën aꞌchiantarahuë. Ina quëran naꞌcon naꞌcon piyapiꞌsaꞌ Quisoso imasapi. Napoaton co nitotërahuëꞌ.

²³ ¿Maꞌcha noya noya nicaya? tënahuë yonquiato. Co casoꞌ nitotërahuëꞌ. Aꞌna cancan nohuantërin chiminaꞌhuasoꞌ. Chiminpato, Quisocristoroꞌco yaꞌhuëcontarahuë. Inasoꞌ noya noya.

²⁴ Nipirinhuëꞌ, chiminpato, ¿incha aꞌchintërëꞌponquëmaya? tënahuë yonquiato. Canpita aꞌchintaꞌhuanquëmasoꞌ nohuantërahuë.

²⁵ Napoaton co tëparinacohuëꞌ, tënahuë. Yosë nohuanton nanpihuatosoꞌ, aꞌchiantarahuë. Noya noya Quisocristo imacaso marëꞌ aꞌchinchinquëmaꞌ. Nóya natëtohuatamaꞌ, noya noya cancantaramaꞌ.

²⁶ Ocoihuachinaco, nicaponquëmaꞌ paꞌsarahuë. Paꞌpato, capa cancantarama huachi. “Ma noyacha Quisocristosoꞌ niꞌton, Paono aꞌpairin paya,” tosaramaꞌ.

²⁷ Iporasoꞌ iyaroꞌsaꞌ nóya nicoꞌ. Quisocristo nanamën yonquiatomaꞌ, ina pochachin cancantocoꞌ. Yosë huëntonënquë yaꞌconamaꞌ niꞌton, ina pochin cancantacasoꞌ yaꞌhuërin. Nicaponquëmaꞌ paꞌsamarahuë. Co aꞌnaꞌ nanitapohuëꞌ nimara. Ina niponahuëꞌ, nani tahuëri noya nicoꞌ noya nanan natanchi. Yaꞌipinquëmaꞌ, iyaroꞌsaꞌ, imamiatocoꞌ. Ama aꞌnayanquëma tërantaꞌ nisha yonquicosohuëꞌ. Napopináchin yonquiatomaꞌ, Quisocristo nanamën aꞌchinácoꞌ. Inapohuatamaꞌ, natantohuato, nóya cancantarahuë huachi.

²⁸ Aꞌnaquën co Quisocristo imatonahuëꞌ, noꞌhuiarinënquëmaꞌ, aparisitarinënquëmaꞌ. Noꞌhuipirinënquëmaontaꞌ, ama tëꞌhuatocosohuëꞌ. Chiníquën cancantohuatamaꞌ, yonquiapi. “Ma inacha Yosë imapisopitaso paya. Yosëri catahuarin niꞌton, chaꞌësapi. Co imarëhuasopitasohuëꞌ nipirinhuëꞌ, co nichaꞌësarinpoahuëꞌ,” tosapi. Yosëíchin catahuarinpoaꞌ chiníquën cancantacasoꞌ.

²⁹ Yosë nosoroatonpoaꞌ, noyasáchin yonquirinpoaꞌ. Ina nohuanton, Quisocristo imarëhuaꞌ. Ina quëran imarëhuaso marëꞌ parisitarëhuaꞌ. “Ca marëꞌ chiníquën parisitërin niꞌton, cantaꞌ imarahuëso marëꞌ parisichi,” taꞌtëhuaꞌ, noya cancantahuaꞌ. Inantaꞌ Yosë nohuantërin.

³⁰ Iráca canpitataquë yaꞌhuapo, imarahuëso marëꞌ aparisitërinaco, niꞌnamaꞌ. Ipora huantaꞌ ina marëꞌ parisitarahuë. Canpitantaꞌ imaramaso marëꞌ aparisitarinënquëmaꞌ. Niponahuëꞌ, chiníquën cancantatomaꞌ, imamiatocoꞌ.