Filemón 1 - Chayahuita (Shahui)

Tashinan pëi quëran ninshitaton aꞌpatërinsoꞌ

¹ Iya Pirimon, ca Paonoco ninshitaranquën, niꞌquëꞌ. ¿Noya quëmantaꞌ yaꞌhuaran? Noya cantaꞌ yaꞌhuarahuë. Quisocristo nanamën aꞌchinahuëso marëꞌ tashinan pëiquë poꞌmorinaco. Iya Timotioroꞌco nanan aꞌpatarainquën. Nosororainquën iyasha. Quëmantaꞌ catahuarancoi aꞌchinaꞌhuaiso marëꞌ.

² Imoya Apiantaꞌ yonquiato, ninshitaranquëmaꞌ. Arquipontaꞌ yonquirai. Yosë nanamën aꞌchinpatora, inantaꞌ naꞌcon catahuarincoi. Parisitaponahuëꞌ, noya ahuantërin. Yaꞌipi imapisopita quëma pëinënquë niyontonpisoꞌ naꞌcon yonquirai. Iso quirica nontëquëꞌ inapitantaꞌ natainaꞌ.

³ Tata Yosë inaora nohuanton, naꞌcon catahuainquëmaꞌ. Asanocancainquëmaꞌ. Sinioro Quisocristontaꞌ inachachin catahuainquëmaꞌ.

Imarinso marëꞌ noya cancantërinsoꞌ

^4-5 Nani tahuëri iyasha quëma marëꞌ: Yosë nontërahuë. Quisocristo noya natëran. Naporahuaton, yaꞌipi imapisopita nosororan, natantërahuë. Ina marëꞌ “Yosparinquën Sinioro,” itërahuë.

⁶ Quisocristo imaton, aꞌnapitantaꞌ catahuaran imacaiso marëꞌ. Napoaton ina yonquiato, Yosë nontërahuë: “Catahuaquëꞌ Sinioro Quisocristo imaton, noya noya yonquiꞌin. Yaꞌipi ina yonquirincoisoꞌ nitochin,” itërahuë.

⁷ Yaꞌipi imapisopita nosoroaton, quëmari achinicancanan. Noya noya cancantapi. Ina natantahuato iyasha, cantaꞌ nóya cancantërahuë. Achinicancananco cantaꞌ.

Onisimo marëꞌ nontërinsoꞌ

⁸ Iporasoꞌ piꞌpian shaꞌhuichinquën maꞌsona noya nicamasoꞌ. Quisocristo acorinco nanamën aꞌchinaꞌhuaso marëꞌ. Chiníquën nanan quëtërinco niꞌton, nohuantërahuë naporini, camaiꞌtënquënhuëꞌ. Nipirinhuëꞌ co nohuantërahuëꞌ.

^9-10 Nani casoꞌ mashotërahuë. Quisocristo imarahuëso marëꞌ tashinan pëiquë poꞌmorinaco. Napoaton iyasha nosoroatanco, Onisimontaꞌ nosoroquëꞌ, tënahuë. Tashinan pëiquë yaꞌhuasoco, inasoꞌ niꞌquirinco. Co huiꞌnahuë chachinhuëꞌ nipirinhuëꞌ, pënënpatëra, inantaꞌ Quisocristo imarin niꞌton, huiꞌnahuë pochin niꞌnahuë.

¹¹ Iráca Onisimo paꞌanan asacatacaso marëꞌ. Huaꞌanëntopiranhuëꞌ, co noya catahuarinquënhuëꞌ. Taꞌananpirinquën. Iporaso nipirinhuëꞌ Quisocristo imaton, noya catahuarinco. Quëmantaꞌ noya catahuaarinquën huachi, tënahuë.

¹² Noya catahuapirincohuëꞌ, apira aꞌpataranquën. Naꞌcon nosoropirahuëꞌ, quëma piyapinën niꞌton, nani shaꞌhuitërahuë yaꞌhuëranquë panantacaso marëꞌ. Ca pochachin cancantaton, noya niꞌquëꞌ.

¹³ Isëquë quëparitacasoꞌ nohuantopirahuëꞌ, aꞌpataranquën. Quisocristo nanamën aꞌchinahuëso marëꞌ tashinan pëiquë yaꞌhuarahuë. Quëmantaꞌ isëquë yaꞌhuaran naporini, catahuaitoncohuëꞌ, tënahuë. Onisimo quëma yaꞌhuërënamën pochin catahuarinco niꞌton, co yaaꞌpaporahuëꞌ, aꞌpataranquën.

¹⁴ Isëquë quëparitacasoꞌ nohuantopirahuëꞌ, co quëma nohuantomaranhuëꞌ taꞌto, aꞌpataranquën.

¹⁵ Yosë nohuanton, taꞌananpirinquën nimara Quisocristo nohuitacaso marëꞌ, tënahuë. Co huaꞌquiꞌ patërinquënhuëꞌ. Iporasoꞌ paahuamantarinquën inaquë yaꞌhuëmiatacaso marëꞌ.

¹⁶ Quëma marëꞌ sacatopirinhuëꞌ, ama huachi piyapinën pochin niꞌquësohuëꞌ. Piyapinën niponahuëꞌ, iporasoꞌ noya noya niꞌquëꞌ. Quisocristo imarin niꞌton, iyanpo pochachin nosoroquëꞌ. Carisoꞌ naꞌcon nosororahuë. Quëmasoꞌ aquëtë huarëꞌ naꞌcon naꞌcon nosoroquëꞌ, tënahuë.

¹⁷ Canposoꞌ Quisocristo imatëꞌ, noya nipayarëꞌ. Napoaton Onisimo cantonpachinquën, noya nontëquëꞌ. Ca nosororancoso pochin inantaꞌ nosoroquëꞌ.

¹⁸ Tëhuëhuachinhuë nipon, nihuihuachinquënhuë nipon, shaꞌhuitoco carinquën pahuërëꞌinquën.

¹⁹ Caora imirahuë quëran noꞌtëquën ninshitaranquën. Tëhuënchachin pahuërëaranquën. Isontaꞌ iyasha yonquiquëꞌ. Co aꞌchintëranquënhuëꞌ naporini, co Yosë anoyacancanchitënquënhuëꞌ. Napoaton quëmantaꞌ nihuirancoso pochin nipiranhuëꞌ, co mantaꞌ maꞌparanquënhuëꞌ, tënahuë.

²⁰ Napoaton iyasha ninshitaranquën. Quisocristo imaran niꞌton, Onisimo nosoroquëꞌ. Noya nontohuatan, cantaꞌ nóya cancantarahuë. Inapoaton, achinicancanco topirahuëꞌ.

²¹ “Yosë natëton, Onisimo noya nontarin,” taꞌto, ninshitaranquën. Piꞌpian shaꞌhuitopiranquënhuëꞌ, quëmarisoꞌ naꞌcon naꞌcon catahuaaran, tënahuë.

²² Naporahuaton, quëma pëinënquë aꞌna patoana tapatoco. Ca marëꞌ Yosë nontëramaꞌ niꞌton, ocoiarinaco nimara, tënahuë. Tashinan pëi quëran pipihuato, nicaponquën paꞌsarahuë.

Tiquiapon pochin shaꞌhuirinsoꞌ

²³ Iya Ipapërasë saludos aꞌpatarinquën. Inantaꞌ Quisocristo imarin niꞌton, tashinan pëiquë yaꞌhuarin.

²⁴ Marco, Aristarco, Timasë, Nocasë, inapitantaꞌ yonquiatënënquën, saludos aꞌpatarinënquën. Inapitasoꞌ catahuarinaco Yosë nanamën aꞌchinacasoꞌ.

²⁵ Inaora nohuanton, Sinioro Quisocristo noya catahuainquëmaꞌ. Nani huachi. Paono