Ezequiel 36 - Chayahuita (Shahui)

^1-21 (-) (Aꞌna tahuëri Sinioro nontatonco: “Israiroꞌsa yaꞌhuëpiquë chachin yaꞌhuëaponaꞌ, co noyahuëꞌ nipi. Inapoatona noꞌpaꞌ quëtërahuëso tapipi. Napopiso marëꞌ noꞌhuirahuë. Anaꞌintato nisha nisha noꞌparoꞌsaquë aꞌparahuë. Napoaponahuëꞌ, insëquësona paꞌpiquë piyapiꞌsa naponin yonquirapirinaco: ‘Isopitaso Sinioro piyapinënpita nipirinahuëꞌ, yaꞌhuëpiso noꞌpa quëran ocoipi,’ topi. Napoatona piyapiꞌsa co noyahuëꞌ yonquirapirinaco niꞌton, sëtërahuë,” itërinco.)

Israiroꞌsa noya noya acoantarinsoꞌ

^22-23 Napoaton Siniorosoꞌ israiroꞌsa nontaꞌhuasoꞌ camairinco: “Sinioro naporin: ‘Canpitasoꞌ co nichaꞌëahuanquëmasoꞌ inashitëramahuëꞌ. Napoaponahuëꞌ, canpita naꞌin quëran nisha nisha parti quëparinëmaquë, piyapiꞌsa naponin yonquirapirinaco. Inapoatona tëhuarinaco. Napoaton napopisoꞌ acopitaꞌhuaso marëꞌ nichaꞌësaranquëmaꞌ. Inapotohuatënquëmaꞌ, nisha nisha piyapiꞌsasoꞌ Sinioroco niꞌto, chiníquën nanantërahuëso nitotapi: “Israiroꞌsasoꞌ, noꞌtën Yosë chachin chinotopi,” tëcaponaꞌ. Ca Sinioroco niꞌto, shaꞌhuitëranquëmaso chachin nisarahuë.

²⁴ Carima yaꞌipi inapita noꞌparoꞌsa quëran ocoiaranquëmaꞌ. Nisha nisha piyapiꞌsa yaꞌhuëpi quëran ocoirahuatënquëmaꞌ, ayontonaranquëmaꞌ. Inapotatënquëmaꞌ, yaꞌhuëramaso noꞌpaquë chachin quëpaantaranquëmaꞌ.

²⁵ Canpitaso mamanshiroꞌsa moshatomaꞌ, nëꞌhuëtërinso pochin ninamaꞌ. Napoatoma co noyahuëꞌ nipiramahuëꞌ. Naporamasoꞌ, inquitaranquëmaꞌ. Nëꞌmëtë nëꞌhuëtërinsoꞌ, noyaiquë pëꞌsarëso pochin nitaranquëmaꞌ.

²⁶ Nasha cancan quëtahuatënquëmaꞌ, ispiritonta nasha chachin ayaꞌcoancantaranquëmaꞌ. Naꞌpi pochin co natantochináchinhuëꞌ cancantopiramahuëꞌ, natëtochináchin cancan quëtaranquëmaꞌ.

²⁷ Ispiritonëhuë chachin ayaꞌcoancantaranquëma niꞌton, pënëntërahuësopita natëaramaꞌ. Nanamëhuënta natëaramaꞌ.

²⁸ Shimashonëmapita noꞌpaꞌ quëtërahuëquë yaꞌhuëapomaꞌ. Canpitaso piyapinëhuëpita nisaramaꞌ. Canta Yosënëmaco, nisarahuë.

²⁹ Oshanëma inquitahuato, ama huachi inachachin nisápamaso marëhuëꞌ catahuaranquëmaꞌ. Ca nohuanto notohuaroꞌ trico naꞌapon niꞌton, co huachi tanarotaramahuëꞌ.

³⁰ Ca nohuanton nararoꞌsaꞌ, sharoꞌsaꞌ, inapitanta naꞌcon naꞌcon nitapon. Ama aꞌnapita nacionoꞌsa niꞌtonënquë, tanarotatoma taparo nicamaso marëhuëꞌ, napoarahuë.

³¹ Naporoꞌ co noyahuëꞌ ninamasoꞌ, nishinahuën ninamasoꞌ, inapita yonquiatoma tapanapomaꞌ.

³² Ama ninonpintocosohuëꞌ. Co canpita noya ninamaso marëꞌ ina pochin acoaranquëmahuëꞌ. Canpitaso co noyahuëꞌ ninama niꞌton, tapanamaso yaꞌhuërin.

³³ Caso Sinioroco shaꞌhuitaranquëmaꞌ: Canpitasoꞌ, oshahuanatoma nëꞌhuëtërinso pochin nipiramahuëꞌ, carinquëma inquitaranquëmaꞌ. Inapotohuatënquëmaꞌ, yaꞌhuëramaso ninanoroꞌsaquë yaꞌhuëantapomaꞌ. Inapitasoꞌ iráca tapitopirinënquëmahuëꞌ, anoyataantaramaꞌ.

³⁴ Iráca yaꞌhuëramaquësoꞌ, inimiconëmapitari tananhuantárin acopi. Inapotopirinahuëꞌ, inaquëranchin iminahuatoma shaꞌtaantapomaꞌ. Inapohuatamaꞌ, yaꞌipi naꞌhuëroꞌsari níraponaꞌ.

³⁵ Ina nicatonaꞌ: “Iso noꞌpaso tananhuantápirinhuëꞌ. Iporasoꞌ shaꞌtantatona noya noya acopi. Itinquë nararo yaꞌhuërinso pochin yaꞌnorin. Ninanonënapitanta ataꞌhuantatona tapitopirinahuëꞌ, iporasoꞌ naquëranchin noya niacorapitonaꞌ, yaꞌhuëantarapi,” taponaꞌ.

³⁶ Naporoꞌ yaꞌhuëramaso yaꞌcari yaꞌhuërapisopitasoꞌ: “Yaꞌhuëpiso noꞌpaꞌ tapitopirinahuëꞌ, tëhuënchachin Siniorori anoyataantarin. Paquiiri paꞌpitatë pochin nitopirinhuëꞌ, naquëranchin shaantarëso pochin nitaantarin,” tosapi. Ca Sinioroco naporahuë niꞌton, ina chachin nisarin.

³⁷ Naporahuaton maꞌmarë tëranta nontohuatamaco, aꞌnaroáchin catahuararanquëmaꞌ. Ca nohuanton notohuaroꞌ naꞌasaramaꞌ. Panca huënton ohuicaroꞌsa pochin nisaramaꞌ. Ca Sinioroco shaꞌhuitaranquëmaꞌ.

³⁸ Ninanonëmapita ataꞌhuantatona tapitopirinëmahuëꞌ, paꞌpi notohuaroꞌ yaꞌhuëantapomaꞌ. Quirosarinquë pita tahuëri nanihuachin, paꞌpi notohuaroꞌ ohuicaroꞌsa Sinioro chinotatona tëpacaiso marëꞌ quëpaapi. Inapochachin ninanonëmaquë naꞌapomaꞌ. Inapotohuatënquëmaꞌ, naní quëran ca Sinioroco ninahuësoꞌ nitotaponaꞌ,’ tënin,” itërinco.