Ezequiel 34 - Chayahuita (Shahui)

Co noyahuëꞌ huaꞌanoꞌsa yonquiaton pënëninsoꞌ

¹ Aꞌna tahuëri Sinioro nontaantatonco:

² “Quëmasoꞌ piyapinquën nipiranhuëꞌ, Israiro noꞌpaquë co noyahuëꞌ huaꞌanoꞌsa maꞌsona yonquirapirahuësoꞌ, shaꞌhuitëquëꞌ: ‘¡Maꞌhuantacha Israiro huaꞌanoꞌsanquëma nisarama paya! Canpitasoꞌ, canpitaora niaꞌpairamaꞌ. Aꞌpaitoroꞌsasoꞌ, ohuicanënpita aꞌpaicaiso yaꞌhuërin. Inapochachin canpitantaꞌ, aꞌpaitonaꞌpi pochin Yosë acorinquëmaꞌ, israiroꞌsa aꞌpaicamaso marëꞌ.

³ Canpitaso nipirinhuëꞌ, co aꞌpairamahuëꞌ. Topinan shoꞌshoinëna oꞌotatë pochin nitëramaꞌ. Inapita anporonëna quëran huaita nicatoma aꞌmoramaꞌ. Amoshin nipisopita tëpatoma caꞌnamaꞌ.

⁴ Sanpatopisopita co catahuaramahuëꞌ. Caniaꞌpi nipisopita co nonënamahuëꞌ. Paꞌhuëna yaꞌpanpisopitantaꞌ, co nonëntatoma tonpotëramahuëꞌ. Chihuëpisopita co yonitoma quënantaramahuëꞌ. Ayapisopitantaꞌ, co yoniramahuëꞌ. Co nosoroatomarahuëꞌ, ahuëanaquëranchin aꞌpairamaꞌ.

⁵ Piyapinëhuëpitasoꞌ ohuicaroꞌsa pochin nipi. Co huaꞌanëna yaꞌhuëtopisohuë pochin inahuara paꞌsápi. Napoápatona yanquëëpi. Niꞌniroꞌsari pëꞌyatë pochin nitërin.

⁶ Motopiroꞌsaꞌ, motopiaꞌhuaroꞌsaꞌ, inaquëpita paꞌsahuatona yanquëëpi. Yaꞌipi isoroꞌpaquë chihuëatonaꞌ, paꞌsápi. Napoápirinahuëꞌ, co macari tëranta yonicaso yonquirinhuëꞌ.

⁷ Napoaton canpita huaꞌanoꞌsanquëma nontaranquëmasoꞌ, natancoꞌ.

⁸ Ca Sinioroco niꞌton, noꞌtëquën shaꞌhuitaranquëmaꞌ. Ohuicanëhuëpita co huaꞌanëhuanhuëꞌ nipiso marëꞌ nisha nisha niꞌniroꞌsari pëꞌyapi. Huaꞌanënpita yaꞌhuëtaponaraihuëꞌ, co inahuari aꞌpaipihuëꞌ. Inahuasoꞌ, inahuarasaꞌ niaꞌpayatë pochin niconpi.

^9-10 Huaꞌanoꞌsanquëmaꞌ. Carima canpitasoꞌ, piyapinëhuëpita aꞌpaiamaso marëꞌ acoranquëmaꞌ. Ina marëꞌ acopiranquëmahuëꞌ, co piyapinëhuëpita aꞌpairamahuë niꞌton, natanco shaꞌhuichinquëmaꞌ: Caso Sinioronëmaco nipirahuëꞌ, inimiconëhuëpita pochin niꞌnanquëmaꞌ. Naꞌa ohuicanëhuëpita aꞌpaicamaso marëꞌ acoranquëmaꞌ. Acopiranquëmahuëꞌ, ayatëramaco niꞌton, canpita pahuërëamacoso yaꞌhuërin. Inapita aꞌpaicaso marëꞌ acopiranquëmahuëꞌ, ama canpitaorasaꞌ niaꞌpairápamaso marëhuëꞌ, ocoiranquëmaꞌ. Ocoiatënquëma ohuicanëhuëpita, osërëtaranquëmaꞌ. Ama capatoma pëꞌyarápamaso marëhuëꞌ napotaranquëmaꞌ,’ itëquëꞌ,” itërinco.

Noya huaꞌanën pochin nininsoꞌ

¹¹ Naquëranchin Sinioro taantarin: “Ca Sinioroco shaꞌhuitaranquëmaꞌ. Huaꞌanoꞌsanquëmaꞌ. Canpitaso piyapinëhuëpita co noya aꞌpairamahuë niꞌton, cari chachin aꞌpaiarahuë huachi.

¹² Noya huaꞌanënsoꞌ, ohuicanënpita yanquëëhuachina, co napion cancantërin. Inapochachin cantaꞌ, piyapinëhuëpita nichaꞌëantaꞌhuaso marëꞌ co napion cancantarahuëꞌ. Inapitasoꞌ paꞌpi tashirotaton huiraitërinso tahuëri itohua itohua yanquëëpi.

^13-14 Nisharoꞌsa noꞌpanëna parti quëpapirinahuëꞌ, cari ocoiantarahuë. Yontoantarahuato, yaꞌhuëpiso noꞌpaquë chachin quëantararahuë. Israiro noꞌpaquëso noya yaꞌhuëchináchin naꞌa motopiroꞌsaꞌ, iꞌsharoꞌsaꞌ, inapita yaꞌhuërin. Inaquë noya noya pastoroꞌsa yaꞌhuërin. Inaquë noya coshataponaꞌ, chinotaponaꞌ, napoaponaꞌ. Inaquë yaꞌhuëantacaiso marëꞌ quëantararahuë.

^15-16 Caora chachin ohuicanëhuëpita aꞌpaiarahuë. Nani coshatohuachinaꞌ, chinotacaiso marëꞌ quëpaantarahuë. Chihuëpisopita yonisarahuë. Ayapisopitantaꞌ, maantarahuato quëantararahuë. Paꞌhuëna yaꞌpanpachinaꞌ, tonpotarahuë. Caniaꞌpi nipisopitantaꞌ, nonënarahuë. Amonënoꞌsaꞌ, chiníquënoꞌsaꞌ, inapita quëran huarëꞌ noya aꞌpaiarahuë. Yaꞌipi inapita noꞌtëquën aꞌpaiarahuë. Ca Sinioroco shaꞌhuitaranquëmaꞌ.

^17-18 Isontaꞌ, ca Sinioroco chachin shaꞌhuitaantaꞌinquëmaꞌ: Ohuicanëhuëpita pochin ninamasopita natanco: Aꞌna tahuëri carima noꞌtëquën shaꞌhuitaranquëmaꞌ. Aꞌnaquëmasoꞌ, ohuica pochin nicatoma co onpopinchin chiniramahuëꞌ. Aꞌnaquëmantaꞌ, carniro pochin, chipo pochin, inapita pochin nicatoma chiníquënoꞌsa ninamaꞌ. Chiníquënoꞌsanquëmasoꞌ, noya noya pasto caꞌnamaꞌ. ¡Co caꞌnamasosoꞌ, co toꞌpi toꞌpichitomahuëꞌ! Noyaiꞌ nininsoꞌ oꞌoramaꞌ. ¡Co oꞌoramasosoꞌ, co toꞌmoitatoma nëꞌhuëichitomahuëꞌ!

¹⁹ Ohuicanëhuëpitasoꞌ, pasto toꞌpi toꞌpitëramasoꞌ, caꞌpi. Iꞌshanta anëꞌhuëitëramasoꞌ, oꞌopi.

²⁰ Naporamaso marëꞌ aꞌna tahuëri noya coisë pochin nicato, amonënoꞌsa anaꞌintarahuë. Nansëyaroꞌsaso nipirinhuëꞌ, catahuararahuë. Ca Sinioroco napotaranquëmaꞌ.

²¹ Amonënquëmasoꞌ, ohuicanëhuëpita co onpopinchin chinipisopitahuëꞌ, panirahuatoma aꞌparamaꞌ. Pomonëma quëran ohuanahuatoma nitaꞌatëramaꞌ.

²² Inapotopiramahuëꞌ, cari ohuicanëhuëpita nichaꞌësarahuë. Co huachi ihuarápaiso yaꞌhuëaponhuëꞌ. Ca chachin noya coisë pochin nicato paꞌpoyapo.

²³ Ca nohuanto piyapinëhuë Tapi itërahuësoꞌ, huënantapon. Inaíchin yaꞌipi ohuicanëhuëpita noya aꞌpaiapon.

²⁴ Ohuicanëhuëpitasoꞌ, casáchin chinotaponaco. Piyapinëhuë Tapi itërahuësoari huaꞌanën nisarin. Ca Sinioroco shaꞌhuitaranquëmaꞌ.

²⁵ Noya yaꞌhuëcaiso marëꞌ inapitaroꞌco anoyatarahuë. Ca nohuanton niꞌniroꞌsa ayapon. Ama ohuicanëhuëpita apicaiso marëhuëꞌ napoapon. Inapohuato tananoꞌsaquë topinan huëꞌëponaꞌ. Co manta tëꞌhuatapihuëꞌ.

²⁶ Huaꞌanëntaꞌhuaso marëꞌ motopi acorahuësoꞌ tahuirinquë, ohuicanëhuëpita acoarahuë. Cari chachin catahuaarahuë niꞌton, nohuantasoi chachin oꞌnan yaꞌhuëtaponaꞌ.

²⁷ Nararoꞌsantaꞌ, notohuaroꞌ nitapon. Shaꞌpisopitanta huaꞌhuayátërahuë macaponaꞌ. Napoatona ohuicanëhuëpitasoꞌ, yaꞌhuëpiquë chachin co tëꞌhuarëꞌna yaꞌhuëaponahuëꞌ. Nisha nisha parti piyapinëhuëpita asacatacaiso marëꞌ quëpapirinahuëꞌ, cari nichaꞌësarahuë. Inapotohuato, ca Sinioroco ninahuësoꞌ nitotapona huachi.

²⁸ Co huachi nisha piyapiroꞌsari huaꞌanëntapihuëꞌ. Co niꞌniroꞌsari tëranta caponahuëꞌ. Co incari tëranta aꞌpayanaponhuë niꞌton, co huachi tëꞌhuarëꞌna yaꞌhuëaponahuëꞌ.

²⁹ Noꞌpanënaquë shaꞌtohuachinaꞌ, noya noyatapon. Co huachi tarëtapihuëꞌ. Co inso nacionquë yaꞌhuëpisopitari tërantaꞌ, piyapinëhuëpita yonquiatona tëhuaponahuëꞌ.

^30-31 Naporoꞌ inapitantaꞌ, israiroꞌsa piyapinëhuëpita niꞌton, yacatahuarahuëso nitotaponaꞌ. Naporahuaton Sinioroco niꞌto, Yosënëna ninahuësoꞌ, nitotaponaꞌ. Israiroꞌsanquëmaꞌ, canpitaso ohuicanëhuëpita pochin ninamaꞌ. Pastonëhuëquë chachin soꞌsopiso pochin ninamaꞌ. Caso nipirinhuëꞌ, Yosënëmaco. Ca Sinioroco shaꞌhuitaranquëmaꞌ,” tënin.