Ezequiel 33 - Chayahuita (Shahui)

Aꞌpaitonaꞌpi, maꞌsona nicacaso yaꞌhuërinsoꞌ

¹ Aꞌna tahuëri Sinioro itaantarinco:

² “Quëmasoꞌ piyapinquën nipiranhuëꞌ, israiroꞌsa shaꞌhuitacaso marëꞌ nanan quëtaranquën: Ca nohuanton aꞌna noꞌpaꞌpaꞌ quira nisahuachinaꞌ, yaꞌhuëhuanoꞌsaso aꞌnara sontaro aꞌpaitonaꞌpi nicacaso marëꞌ huayonapi.

³ Inasoꞌ inimicoroꞌsa huëꞌsarin quënanpachin, piyapiꞌsa niyátainpichin yaꞌhuëcaiso marëꞌ pomonquë shaꞌhuitarin.

⁴ Inso tëranta aꞌpaitonaꞌpi pomon pihuirinsoꞌ natanaponahuëꞌ, co natëtohuachinhuëꞌ, inimicoroꞌsari huëꞌsahuaton tëpapon. Napohuachin, inaora tëhuënënquë chiminapon.

⁵ Pomon pihuipisoꞌ natanaponahuëꞌ, co natëtërinhuëꞌ. Napoaton inaora tëhuënënquë chiminapon. Co insonta ina marëꞌ nonsarinhuëꞌ. Natëtërin naporini, chaꞌëitonhuëꞌ.

⁶ Aꞌpaitonaꞌpisoꞌ, inimicoroꞌsa huëꞌsarinso nicaponahuëꞌ, co pomon pihuirinhuëꞌ. Inapitaso canquirahuatona inso tëranta tëpahuachinaꞌ, inasoꞌ, inaora oshanën marëꞌ chiminapon. Napoaponahuëꞌ ina chimininso marëꞌ, aꞌpaitonaꞌpintaꞌ anaꞌintaꞌhuaso yaꞌhuërin.

⁷ Piyapinquën nipiranhuëꞌ, carinquën acoranquën israiroꞌsa pënënacaso marëꞌ. Aꞌpaitonaꞌpi pochin nisaran. Quëmaso inapita yonquirapirahuësoꞌ, nitotahuaton pënënaran.

^8-9 Aꞌna piyapi co noyahuëꞌ nipachin, chiminacaso shaꞌhuitaranquën. Napotohuatënquën, co noyahuëꞌ nininsoꞌ aꞌpocaso marëꞌ quëmari shaꞌhuitaran. Shaꞌhuitopiranhuë co natëhuachinquënhuëꞌ, inasoꞌ oshanën marëꞌ chiminapon. Inapohuachin, co quëma naꞌintarinquënhuëꞌ. Shaꞌhuitacaso nipirinhuëꞌ, co shaꞌhuitohuatansohuëꞌ, inaso oshanën marëꞌ chiminapon. Napoaponahuëꞌ, ina chimininsoꞌ, quëma naꞌintarinquën,” itërinco.

Aꞌnaya aꞌnaya oshanëni naꞌintarinsoꞌ

¹⁰ Naquëranchin Sinioro nontatonco: “Quëmasoꞌ piyapinquën nipiranhuëꞌ, nanan quëtaranquën israiroꞌsa pënënacaso marëꞌ. Napotëquëꞌ: ‘Canpitaso nonpatamara naporamaꞌ: “Quiyasoꞌ oshahuanatoi panca tëhuërai. Inapoatoi panca pëꞌpëtëraiso pochin nisarai. Napoaton nanpichinapoi chachin chanatërëso pochin nisarai. ¿Onporahuatoicha noya nicatoi yaꞌhuëꞌi nicaya?” tënamaꞌ.

¹¹ Napopiramahuëꞌ, caso Sinioroco niꞌton, noꞌtëquën shaꞌhuitaranquëmaꞌ. Co caso nohuantërahuë co noyahuëꞌ nipisopita chiminacaisoꞌ. Co noyahuëꞌ nipiso aꞌporahuatona nanpicaisoꞌ nohuantërahuë. Israiroꞌsanquëmaꞌ, co noyahuëꞌ ninamasopita aꞌpocoꞌ. Ama chiminacamaso nohuantocosohuëꞌ,’ tënin Sinioro, itëquëꞌ,” itërinco.

¹² Naquëranchin Sinioro israiroꞌsa shaꞌhuitaantarin: “Aꞌna quëmapi noya niponahuëꞌ oshahuanpachin, iꞌhua noya nininsoari co nichaꞌësarinhuëꞌ. Aꞌna piyapinta co noyahuëꞌ niponahuëꞌ, co noyahuëꞌ nininsoꞌ aꞌpohuachin, iꞌhua co noyahuëꞌ nininsoari co naꞌintaponhuëꞌ. Co ina marëꞌ chiminaponhuëꞌ. Ina pochachin noya ninaꞌpinta oshahuaantahuachin, iꞌhua noya nininsoari, nanpirápasoꞌ co catahuaponhuëꞌ.

¹³ Aꞌna piyapi noya nininsoꞌ: ‘Quëmasoꞌ noya ninanso marëꞌ nanpipon,’ itërahuë. Inaso napoaponahuëꞌ, napotërahuësoꞌ yonquiaton: ‘Co anaꞌintaponcohuëꞌ,’ tosarin. Ina tëcaton co noyahuëꞌ niantarin. Napohuachin, iꞌhua noya nininsopita co huachi yonquiarahuëꞌ. Co noyahuëꞌ nininso marëꞌ chiminacaso yaꞌhuërin.

¹⁴ Yaꞌhuërëꞌ aꞌna piyapinta co noyahuëꞌ nininso marëꞌ: ‘Quëmasoꞌ chiminamaso yaꞌhuërin,’ itërahuë. Inaso napoaponahuëꞌ, oshahuaninso aꞌporahuaton, noyasáchin nisarin.

¹⁵ Maꞌsha aꞌnantohuachin: ‘Iꞌhuërëtaꞌhuanquënso nitotacaso marëꞌ, iso maꞌsha quëchinquën,’ itatona quëtopisoꞌ, ayantërin. Ihuatërinsontaꞌ, huaꞌanën chachin quëtaantarin. Pënëntërahuësopita piyapiꞌsari natëhuachinaꞌ, inapitari ananpirin. Yaꞌipi inapita noꞌtëquën natëton, co noyahuëꞌ nininsopita aꞌporin. Naporin. Naponaꞌpisoꞌ, co chiminaponhuëꞌ, tëhuënchachin nanpipon.

¹⁶ Iporasoꞌ noyasáchin nicaton noꞌtëquën yonquirin niꞌquëhuarëꞌ, nanpipon. Iꞌhua co noyahuëꞌ nicaton oshahuaninsoꞌ, co huachi piꞌpian tëranta yonquiapohuëꞌ.

¹⁷ Ina yonquiatoma canpitaso israiroꞌsaꞌ: ‘Siniorosoꞌ co noyahuëꞌ nisarin,’ tapomaꞌ. Napopiramahuëꞌ, canpita mini tëhuënchinsoꞌ, co noyahuëꞌ nisaramaꞌ.

¹⁸ Quëmapi noya nisarin niponahuëꞌ, ina aꞌporahuaton co noyahuëꞌ nipachin, naporinso marëꞌ chiminacaso yaꞌhuërin.

¹⁹ Co noyahuëꞌ ninaꞌpinta niponahuëꞌ, co noyahuëꞌ nininsoꞌ aꞌporahuaton noya nipachin, naporinso marëꞌ nanpipon.

²⁰ Naporahuëso marëꞌ canpitasoꞌ: ‘Sinioro co noꞌtëquën nisarinhuëꞌ,’ taantaramaꞌ. Napopiramahuëꞌ, carimaso aꞌnaya aꞌnayanquëmaꞌ, noya nipatamaꞌ acanaponquëmaꞌ. Co noyahuëꞌ nipatamasoꞌ, anaꞌintaranquëmaꞌ,” itërin.

Quirosarin ninano canapisoꞌ

^21-22 Quëninacoisoꞌ, nani shonca cato piꞌi, shonca yoqui, aꞌnatërápo tahuëri nisarin. Naporoꞌ aꞌnara quëmapi Quirosarin quëran taꞌairinso canquirin. Ina canquicaso aꞌna tashiíchin pahuanahuasoꞌ, Sinioro yaꞌnotërinco. Naporonta chiníquën nanantaton, maꞌsona aꞌnotërincoso niꞌcaꞌhuaso marëꞌ catahuaantarinco. Tahuërihuachina, quëmapi taꞌairinsoꞌ nicaponco huëcaso chachin, Sinioro nohuanton noya noantarahuë. Naporo quëran huarëꞌ co huachi nëꞌhuërahuëꞌ. Cantiirahuatonco, inimicoroꞌsari Quirosarin minsëpisoꞌ shaꞌhuitiirinco.

Israiroꞌsa oshahuanpisoꞌ

²³ Naquëranchin Sinioro nontaantatonco:

²⁴ “Israiroꞌsa ninanonënapita inimiconënapitari ataꞌhuantërin. Inaquë quëparitopisopitaso napopi: ‘Apraansoꞌ inaoraíchin niponahuëꞌ, yaꞌipi iso noꞌpaꞌ huaꞌanëntërin. Aquëtë huarëꞌ canpoasoꞌ, naꞌaquënpoa nichinapon chachin iso noꞌpaꞌ huaꞌanëntarihuaꞌ,’ toconpi.

^25-26 Napopiso marëꞌ quëmari ca Sinioroco naporahuësoꞌ shaꞌhuitëquëꞌ: ‘Canpitaso maꞌsha tëpahuatamara, co huënainën inquitapomarahuëꞌ caꞌnamaꞌ. Mamanshiroꞌsa mosharamaꞌ. Piyapiꞌsa tëparamaꞌ. Maꞌsha nohuantohuatamara, aꞌnaroáchin huaꞌna ohuararamaꞌ. Co costarahuësohuëꞌ, ninamaꞌ. Yaꞌipinquëma nitëhuananpitëramaꞌ. Naporamaꞌ. ¿Inapoapomarahuëꞌ, iso noꞌpaꞌ huaꞌanëntapoma ti?’ tënin Sinioro,” itërinco.

²⁷ Naporahuaton Sinioro taantarin: “Aꞌnaquënsoꞌ, ninanoroꞌsa tapipiquë yaꞌhuërapi. Yaꞌhuëapirinahuëꞌ, inapitanta tëpaponaꞌ. Ninanoroꞌsa aipiran yaꞌhuëpisopitantaꞌ, niꞌniroꞌsari capon. Aꞌnaquënso natëtëanaroꞌsaquë, motopi naninoꞌsaquë, inaquëpita yaꞌhuëapi. Inapitanta chiníquën canioroꞌsa quëran chiminaponaꞌ. Ca Sinioroco noꞌtëquën shaꞌhuitaranquëmaꞌ.

^28-29 Ca nohuanton iso noꞌpaꞌ tapimiataponaꞌ. Napoaton tanahuantápon. Noya noꞌpaꞌ huaꞌanëntatomaꞌ: ‘Ma noyacha noꞌpahuanai paya,’ tënamasoꞌ, tapitaranquëmaꞌ. Israiro motopiroꞌsaquë yaꞌhuëpisopitanta tanahuantápon. Co huachi insonta inataquëchin naꞌhuëaponhuëꞌ. Paꞌpi co noyahuëꞌ nicatoma oshahuanamaso marëꞌ ina pochin noꞌpanëma acotaranquëmaꞌ. Naporo huarëꞌ ca Sinioroco ninahuësoꞌ, nitotaramaꞌ,” tënin.

³⁰ Cantaꞌ, Sinioro nontatonco itaponco: “Israiroꞌsaso yonquiatënënquën, ninano pairapipiso pirayan, pëi yaꞌcoanaroꞌsa pirayan, inaquëpita ninontatona napopi: ‘Sinioro Isiquiro quëran anitotërinpoasoꞌ, huëco paꞌahua natanhuan,’ niitopi.

³¹ Ninapotatonaꞌ, huëcapairahuatënën quëma notënanquë huënsëipi. Yáinapopi niꞌton, napopi. Shaꞌhuitëransopita natanpirinahuëꞌ, co nohuantopihuëꞌ natëcaisoꞌ. Huaino cantahuachinara, yonquinëna quëran nitotopi. Inapochachin inahuanta nonansopita yonquinëna quëran nitotopitërapi. Cancanëna quëranso napoaponahuëꞌ, coriquisáchin cancantopi.

³² Inapitasoꞌ, arpa piꞌniaton huaino míso cantarinso pochin cancantërinën. Natanpirinënhuëꞌ, co natërinënhuëꞌ.

³³ Co natëpirinënhuëꞌ, yaꞌipi shaꞌhuiransopita nanipon. Naporo huarëꞌ: ‘Tëhuënchachin Isiquiro Yosë nohuanton noꞌtëquën pënënpirinpoahuëꞌ,’ taponaꞌ,” itërinco.