Ezequiel 3 - Chayahuita (Shahui)

¹ Naporoꞌ shaꞌhuitatonco: “Quëmasoꞌ piyapinquën nipiranhuëꞌ, iso ninshitopisoꞌ caꞌquëꞌ. Ina caꞌsahuaton israiroꞌsa pënënacaso marëꞌ paquëꞌ,” itërinco.

² Napotohuachincora nahuërahuë niꞌton, inanta quirica aꞌcarinco.

³ Ina quëran itaantaponco: “Iso ninshitopisoꞌ natëaquë huarëꞌ caꞌquëꞌ,” itërinco. Napotohuachincora, ninoiꞌ pochin cashi cashin caꞌnahuë.

⁴ Naporo chachin itaantarinco: “Paaton israiroꞌsa yonquirahuëso shaꞌhuitonquëꞌ.

⁵ Co sacai nanan nonpisopita yaꞌhuëpiquë aꞌparanquënhuëꞌ. Israiroꞌsa yaꞌhuëpiquë aꞌpaaranquën.

⁶ Co notohuaroꞌ nacionoꞌsaꞌ, sacai nanan nonpiquë aꞌpaaranquënhuëꞌ. Inaquë aꞌparanquën naporini, co natananchitonhuëꞌ. Napoaponahuëꞌ, inapitataquë aꞌpaaranquën naporini, inapitaso natëitënënquënhuëꞌ.

⁷ Israiroꞌsaso nipirinhuëꞌ, co nohuantapihuëꞌ natëinënsoꞌ. Ca chachionta co nohuantopihuëꞌ natëinacoso niꞌton, napotarinën. Yaꞌipi inapitasoꞌ, co natantochináchinhuëꞌ cancantopi.

⁸ Co natëpirinënhuëꞌ, ca nohuanton quëmarinta inapita pochachin cancantaton pënënaran.

⁹ Tiamanti naꞌpisoꞌ paꞌpi taríton. Ina tarítërinso pochin quëmanta acoaranquën. Naꞌpi tarítërinso pochin acoaranquën niꞌton, ama inapita tëꞌhuatëquësohuëꞌ. Co natantochináchinhuëꞌ cancantopi niꞌton, pënënpatan nishinahuën niꞌtaponaꞌ. Napopirinahuë tërantaꞌ, ama tëꞌhuatëquësohuëꞌ,” itërinco.

¹⁰ Ina quëran itaantarinco: “Apira shaꞌhuitohuatënquën noya huëratëhuanaton natanquëꞌ. Naporahuaton yonquinën quëran nitotëquëꞌ.

¹¹ Israiroꞌsa yaꞌhuëpi quëran quëpisoꞌ, niꞌcontaquëꞌ. Pënënpatan co aꞌna natëponënhuëꞌ nimara. Napoaponahuëꞌ: ‘Sinioro pënënatënquëma naporin,’ itonquëꞌ,” itërinco.

¹² Naporo chachin Yosë ispiritonën otërinco. Pinëhuë quëranso napoaponahuëꞌ, panca ocohua paꞌpachina irininso pochin natanahuë. Sinioro yaꞌnotërinco quëran niotëhuachina naporin.

¹³ Maꞌsharoꞌsa pochin nipisopita anpiantënëna quëran yanponapona nicaripisoꞌ, tahuinanoꞌsa inahua pirayan yaꞌhuërinsoꞌ, inapita naporin. Panca ocohua irininso pochin irinpi.

¹⁴ Yosë ispiritonën otërahuatonco, ina quëran ocoirinco. Napotohuachincora, sëtërahuë, noꞌhuitërahuë, naporahuë. Sinioro chiníquën nanantaton quëpahuachincora naporahuë.

¹⁵ Israiroꞌsa yaꞌhuëpi quëran quëpisopitasoꞌ, Quiparoiꞌ yonsanquë, Tira-pito ninano itopiquë yaꞌhuëpi. Inaquë acohuachincora, canchisë tahuëri inapitarëꞌco yaꞌhuërahuë. Napoaporahuëꞌ, co nitotërahuë maꞌsona nicaꞌhuasoꞌ. Maꞌsha taꞌcahuasontaꞌ, co nitotërahuëꞌ.

Aꞌpaitonaꞌpi pochin nicacaꞌhuaso marëꞌ Yosë acorincosoꞌ

¹⁶ Canchisë tahuëri nanihuachina Sinioro nontaantatonco:

¹⁷ “Quëmasoꞌ piyapinquën nipiranhuëꞌ, aꞌpaitonaꞌpi pochin nicamaso marëꞌ carinquën acoranquën. Maꞌsona israiroꞌsa yashaꞌhuitohuato, nanan quëtaranquën inapita niyátainpichin yaꞌhuëcaiso marëꞌ shaꞌhuitaran.

¹⁸ Aꞌnaquën co noyahuëꞌ nininso marëꞌ: ‘Isosoꞌ, chiminacaso yaꞌhuërin,’ tosarahuë. Napotohuato, quëma nanan quëtaranquën co noyahuëꞌ nininsoꞌ aꞌpocaso marëꞌ shaꞌhuitaran. Natëhuachinquën co chiminaponhuëꞌ. Co shaꞌhuitohuatansohuëꞌ, tëhuënchachin chiminapon. Napoaponahuëꞌ, chimininso marëꞌ quëma naꞌintarinquën.

¹⁹ Shaꞌhuitopiranhuëꞌ inachachin nisápachinsoꞌ, inasoꞌ oshanën marëꞌ chiminapon. Quëmaso napoaponahuëꞌ, ina chimininsoꞌ, co naꞌintarinquënhuëꞌ.

²⁰ Aꞌna tahuëriso nipirinhuëꞌ, aꞌnaquën noya nicacaso noꞌquiponahuëꞌ, amirahuaton co noyahuëꞌ nisarin. Tënihuato cá quëran aꞌpotochináchin cancantarin. Inapoasoꞌ co quëmari shaꞌhuitohuatanhuëꞌ, chiminapon. Huaꞌqui noya nipirinhuë tërantaꞌ, co ina marëꞌ nichaꞌësarahuëꞌ. Oshanën marëꞌ chiminacaso yaꞌhuërin. Quëmaso napoaponahuëꞌ co shaꞌhuitëranhuë niꞌton, ina chimininsoꞌ, naꞌintarinquën.

²¹ Quëmaso co napoatonhuëꞌ, ina piyapi shaꞌhuitëran. Napotëran niꞌton, co huachi oshahuanpachinhuëꞌ, co chiminaponhuëꞌ. Shaꞌhuitëransoꞌ natërin niꞌton, noya chaꞌësarin. Ina marëꞌ quëmanta noya chaꞌësaran,” itërinco.

Yosë anëꞌhuërincosoꞌ

^22-25 Inaquë chachin Sinioro sëꞌhuarahuatonco itaponco: “Huanirahuaton canonquë paquëꞌ. Inaquë yonquirahuëso shaꞌhuichinquën,” itërinco. Napotohuachincora, inatohua paꞌnahuë. Inaquë nipatëra, Quiparoiꞌ yonsanquë quënanahuëso pochachin, Yosë huënaráchin huënaráchin yaꞌnorinsoꞌ niꞌnahuë. Ina nicato isonahuë. Isonahuë quëran noꞌpaquë huarëꞌ monshomarahuë. Yosë ispiritonënso napoaponahuëꞌ, yaꞌcoancantatonco ahuanirinco. Ina quëran Sinioro nontatonco: “Paaton pëinënquë nioncorapiquëꞌ. Niꞌquëꞌ. Ama israiroꞌsarëꞌquën paꞌsápamaso marëhuëꞌ, noninoꞌsaquë tonpoarinën.

²⁶ Naporahuaton ca nohuanton nënëranën piracotënquë chinpiapon niꞌton, co nonsaranhuëꞌ. Inapitasoꞌ co natantochináchinhuëꞌ cancantopirinahuëꞌ, co nanitaranhuëꞌ pënënamasoꞌ.

²⁷ Napoaponahuëꞌ, maꞌsona yashaꞌhuitohuatënquën noya noantaran. Naporoꞌ quëmarintaꞌ: ‘Sinioro pënënatonpoa naporin,’ itaran. Insosona yanatanpachinquën noya natanapon. Insosona co yanatanpachinquënhuëꞌ, co natanaponhuëꞌ. Co natantochináchinhuëꞌ cancantopi niꞌton, napoaponaꞌ,” itërinco.