Ezequiel 2 - Chayahuita (Shahui)

Pënëntaꞌhuaso marëꞌ acorincosoꞌ

¹ Ina quëran noninsoꞌ natanahuë: “Piyapinquën nipiranhuëꞌ, huaniquë nonchinquën,” itërinco.

^2-3 Nontasonco chachin Yosë ispiritonën yaꞌcoancantërinco niꞌton, ahuanirinco. Ina quëran nontaantatonco: “Piyapinquën nipiranhuëꞌ, israiroꞌsa nontacaso marëꞌ aꞌpaaranquën. Inapitasoꞌ co natëtonoꞌsahuëꞌ nicatonaꞌ, co yanatërinacohuëꞌ. Shimashonënapita pochachin niꞌtonaꞌ, ipora tahuëriquë huarënta co yanatërinacohuëꞌ.

^4-5 Huiꞌninapitanta co natantochináchinhuëꞌ cancantopirinahuëꞌ, inapita pënënacaso marëꞌ aꞌpaaranquën. Paꞌpatan, ‘Sinioro pënënatënquëma naporin,’ tosaran. Napotopiranhuë tëranta co aꞌna natëponënhuëꞌ nimara. Ama ina naꞌcon naꞌcon yonquiquësohuëꞌ. Co natëtopirinahuëꞌ, co inapita naniantatorahuë pënëntonaꞌpiroꞌsa quëran pënënahuëso tëhuënchinsoꞌ yonquiꞌinaꞌ.

⁶ Piyapinquën nipiranhuëꞌ, ama inapita tëꞌhuatëquësohuëꞌ. Maꞌsona itohuachinëontaꞌ, ama tëꞌhuaquësohuëꞌ. Nahuanoꞌsaꞌ, yonpincaroꞌsaꞌ, inapita huáncana yaꞌhuëaranso pochin cancantaran. Inapopiranhuëꞌ, maꞌsona itohuachinën ama tëꞌhuaquësohuëꞌ. Noꞌhuitatona nishinahuën niꞌtohuachinantaꞌ, ama tëꞌhuatëquësohuëꞌ. Co natantochináchinhuëꞌ cancantopirinahuëꞌ, ama tëꞌhuatëquësohuëꞌ.

⁷ Carinquën shaꞌhuitohuatënquën shaꞌhuitëquëꞌ. Co natantochináchinhuëꞌ cancantopi niꞌton, co aꞌna natëponënhuëꞌ nimara.

⁸ Shaꞌhuitaranquënsoꞌ noya natanquëꞌ. Ama quëmasoꞌ inapita pochin cancantëquësohuëꞌ. Iporasoꞌ nahuërahuaton iso quëtaranquënsoꞌ caꞌquëꞌ,” itërinco.

⁹ Napotohuachincora niꞌpirahuëꞌ, aꞌnara soꞌnanpi quiricaquë ninshitopisoꞌ, ihuëtarinco niꞌnahuë.

¹⁰ Oporiantohuachincora niꞌpirahuëꞌ, sëtatona oshaapisoꞌ, co napion ancantatonaꞌ, ¡maꞌhuántacha ninai paya! topisoꞌ, parisitatona tarëtopisoꞌ, inapita catoran chachin ninshitopinan yaꞌhuërin.