Ezequiel 18 - Chayahuita (Shahui)

Aꞌnaya aꞌnaya oshanëni naꞌintarinsoꞌ

^1-2 Aꞌna tahuëri Sinioro nontatonco: “Israiroꞌsa yaꞌhuëpiquë nonpachinara, ipora huanta naporapi: ‘Paꞌpina tëhuëpiso marëꞌ huiꞌninpita parisitopi,’ tosápi. Ama huachi ina pochin noinasohuëꞌ.

³ Ca Sinioroco nanpiárahuë niꞌton, noꞌtëquën shaꞌhuitaranquëmaꞌ. Ipora quëran huarëꞌ co huachi israiroꞌsanquëmaꞌ, ina pochin nonsaramahuëꞌ.

⁴ Yaꞌipi piyapiroꞌsa cari huaꞌanëntërahuë. Mashoroꞌsanta huiꞌninarë chachin huaꞌanëntërahuë. Insosona co noyahuëꞌ nicaton oshahuanpachin, inasoꞌ chiminapon.

⁵ Noya ninaꞌpisoꞌ, noꞌtëquën yonquiaton noyasáchin ninin.

⁶ Co motopiaꞌhuaroꞌsaquë mamanshi moshacaso marëꞌ maꞌsha acopisoꞌ caꞌpatërinhuëꞌ. Co inapitari catahuacaso ninarinhuëꞌ. Co saꞌina caꞌpatërinhuëꞌ. Saꞌin inachintërinso quënanpachina, co tëcaririnhuëꞌ.

⁷ Co aꞌnapita aparisitërinhuëꞌ. Nihuipisopitari: ‘Pahuërëaꞌhuanquënsoꞌ nitotacaso marëꞌ, iso maꞌsha quëchinquën,’ itatona quëtopirinahuëꞌ, ayantaantarin. Co insonta ihuarinhuëꞌ. Piyapiꞌsa tanahuachinara, aꞌcarin. Capa aꞌmocaiso nipachina, quëtërin.

⁸ Coriqui aꞌnanpachinarantaꞌ, co naꞌcon naꞌcon ananpërinhuëꞌ. Co aꞌnapita maꞌsha onpotërinhuëꞌ. Noya coisë pochin nicaton, aꞌnaya aꞌnaya noꞌtëquën shaꞌhuirapirin.

⁹ Pënëntërahuëso chachin nisarin. Yaꞌipi camaitërahuësopita noꞌtëquënáchin natërin. Naporin. Naponaꞌpisoꞌ, noya quëmapi. Naporinso marëꞌ inaso nanpipon. Ca Sinioroco shaꞌhuitaranquëmaꞌ.

^10-11 Ina pochin quëmapi niponahuëꞌ, huiꞌninsoꞌ noꞌhuitëraya nisahuaton tëpaton. Co paꞌpin naporinsopita nininhuëꞌ. Motopiaꞌhuaroꞌsaquë mamanshi moshacaso marëꞌ maꞌsha acopisoꞌ caꞌpatërin. Saꞌina caꞌpatërin.

¹² Popriyaroꞌsa co nosoroatonhuëꞌ, aparisitërin. Ihuatërin. Nihuipisopitari: ‘Pahuërëaꞌhuanquënsoꞌ nitotacaso marëꞌ, iso maꞌsha quëchinquën,’ itatona quëtohuachinara, co ayantaantarinhuëꞌ. Mamanshiroꞌsa chinotërin. Co costarahuësopitahuëꞌ ninin.

¹³ Coriqui aꞌnanpachinarantaꞌ, naꞌcon naꞌcon ananpërin. Ina pochin nipachinaꞌ, co nanpicaso yaꞌhuërinhuëꞌ. Yaꞌipi inapita co costapirahuëꞌ, naporinso marëꞌ onpopionta chiminapon. Inaora tëhuënënquë napoapon.

¹⁴ Ina pochin quëmapi niponahuëꞌ, huiꞌnahuanpachina, huiꞌninsoꞌ nishatërin. Paꞌpin naporinsopita nicaponahuëꞌ, co ina pochin nininhuëꞌ.

¹⁵ Co motopiaꞌhuaroꞌsaquë mamanshi moshacaso marëꞌ maꞌsha acopisoꞌ caꞌpatërinhuëꞌ. Israiroꞌsa nisha nisha mamanshi chinotopi. Inasoꞌ, co inapita chinotërinhuëꞌ. Co saꞌina caꞌpatërinhuëꞌ.

¹⁶ Co aꞌnapita aparisitërinhuëꞌ. Nihuipisopitari: ‘Pahuërëaꞌhuanquënso nitotacaso marëꞌ, iso maꞌsha quëchinquën,’ itatona yaquëtopirinahuëꞌ, co nohuantërinhuëꞌ. Co insonta ihuarinhuëꞌ. Piyapiꞌsa tanahuachina aꞌcarin. Capa aꞌmocaiso nipachina, quëtërin.

¹⁷ Co aꞌnapita maꞌsha onpotërinhuëꞌ. Coriquinën aꞌnanpachinarantaꞌ, co naꞌcon naꞌcon ananpërinhuëꞌ. Pënëntërahuëso chachin nisarin. Yaꞌipi camaitërahuësopita noꞌtëquënáchin natërin. Naporin. Naporinsosoꞌ, nanpipon. Co paꞌpin oshanën marëꞌ chiminacaso yaꞌhuërinhuëꞌ.

¹⁸ Paꞌpinsoꞌ aꞌnapita aparisitërin, ihuatërin, yaꞌhuërinquë co noyahuëꞌ ninin, naporin. Inapoaton oshahuanin niꞌton, chiminacaso yaꞌhuërin.

¹⁹ Ina yonquiatoma canpitasoꞌ: ‘¿Onpoatonta co noyahuëꞌ ninaꞌpi huiꞌninsoꞌ paꞌpin oshanën marëꞌ co anaꞌintëranhuëꞌ?’ itapomaco. Huiꞌninso noyasáchin nicaton, noꞌtëquën natërinco. Pënëntërahuësopita yaiꞌpi natërin. Napoaton nanpicaso yaꞌhuërin.

²⁰ Insosona oshahuaninsoꞌ, inaora chachin chiminacaso yaꞌhuërin. Co paꞌpin oshanën marëꞌ huiꞌnin anaꞌintacaso yaꞌhuërinhuëꞌ. Inapochachin huiꞌnin oshanën marëntaꞌ, co paꞌpin anaꞌintacaso yaꞌhuërinhuëꞌ. Noya nipisopitasoꞌ, noya nipiso marëꞌ noꞌtëquën acanapo. Co noyahuëꞌ ninaꞌpintaꞌ, co noyahuëꞌ nininso marëꞌ noꞌtëquën anaꞌintaꞌhuaso yaꞌhuërin,” itërinco.

Sinioro, noya coisë pochin nininsoꞌ

²¹ Ina quëran Sinioro taantarin: “Co noyahuëꞌ ninaꞌpinta oshanën aꞌporahuaton, yaꞌipi pënëntërahuësoꞌ natëhuachin, co chiminaponhuëꞌ. Noyasáchin nicaton noꞌtëquën natërincoso marëꞌ, nanpipon.

²² Iꞌhua paꞌpi co noyahuëꞌ nipirinhuëꞌ, yaꞌipi naporinso naniantarahuë. Noya nisarin niꞌton, ina marëꞌ nanpipon.

²³ Co noyahuëꞌ nipisopita chiminacaisosoꞌ, co nohuantërahuëꞌ. Co noyahuëꞌ nipiso naniantatonaꞌ, noya niinaꞌ. Napohuachina tëhuënchachin nanpiponaꞌ. Ca Sinioroco shaꞌhuitaranquëmaꞌ.

²⁴ Noya ninaꞌpinta noya nisarinso aꞌporahuaton, co noyahuëꞌ nininsoꞌ, noꞌhuípiro nininsoꞌ, inapita niantahuachin: ‘Onpopionta inasoꞌ, Siniorori nanpicasoꞌ quëtapon nimara,’ ¡ama tocosohuëꞌ! Noya nininsopita co huachi yonquiarahuëꞌ. Co casáchin cancantatoncohuëꞌ, oshahuaninso marëꞌ chiminapon.

²⁵ Napohuatora canpitasoꞌ: ‘Siniorosoꞌ, co noyahuëꞌ nisarin,’ tëcapoma aꞌna nimara. Napopiramahuëꞌ, ¡canpita mini tëhuënchinsoꞌ co noꞌtëquën yonquiatomahuëꞌ, co noyahuëꞌ nisaramaꞌ!

²⁶ Noya ninaꞌpi nipirinhuëꞌ, noya nisarinso aꞌporahuaton co noyahuëꞌ nipachin, co noyahuëꞌ nininsopitari naꞌintarin niꞌton, chiminapon.

²⁷ Napoaponahuëꞌ, co noyahuëꞌ nipisopita tërantaꞌ, co noyahuëꞌ nipiso aꞌporahuatona noya nipachinaꞌ, chaꞌësapi.

²⁸ ‘Tëhuënchachin co noyahuëꞌ ninahuëso marëꞌ Yosë anaꞌintincoso yaꞌhuërin,’ tëcaton co noyahuëꞌ nininsoꞌ aꞌpohuachin, co chiminaponhuëꞌ, tëhuënchachin nanpipon.

²⁹ Ina natanatona israiroꞌsasoꞌ: ‘Sinioro co noyahuëꞌ nisarin,’ tëcaponaꞌ. ¡Caso mini noya nisarahuë! ¡Canpita tëhuënchinsoꞌ co noꞌtëquën yonquiatomahuëꞌ, co noyahuëꞌ nisaramaꞌ!

³⁰ Carimasoꞌ, aꞌnaya aꞌnayanquëma noꞌtëquën yonquirapiranquëmaꞌ. Noya nipatamaꞌ, noya niꞌsaranquëmaꞌ. Co noyahuëꞌ nipatamasoꞌ, anaꞌintaranquëmaꞌ. Ca Sinioroco shaꞌhuitaranquëmaꞌ. Yaꞌipi co noyahuëꞌ ninamasopita aꞌpochinaco huachi. Ama canpitaora tëhuënëmaquë taꞌhuantamaso marëhuëꞌ inapocoꞌ.

^31-32 Paꞌpi co noyahuëꞌ nicatoma naꞌcon tëhuëtëramaco. Naporamasoꞌ, aꞌpoco huachi. Nasha cancan yaꞌhuëchinquëmaꞌ. Ispiritonta nasha chachin yaꞌhuëchinquëmaꞌ. ¡Canpitaso israiroꞌsanquëma co chiminamaso yaꞌhuërinhuëꞌ! ¡Co caso nohuantërahuë inso tëranta chiminacasoꞌ! ¡Co noyahuëꞌ ninamasoꞌ aꞌpohuatamaꞌ, nanpiaramaꞌ! Ca Sinioroco shaꞌhuitaranquëmaꞌ,” tënin.