Ezequiel 1 - Chayahuita (Shahui)

Yosë huënaráchin huënaráchin yaꞌnotërincosoꞌ

^1-3 Caso Isiquiro corto huaꞌanco. Tatahuësoꞌ, Posi itopi. Papironiaꞌpaꞌ cantaꞌ, quëparinaco. Aꞌna tahuëri aꞌnapita quëpapisopitarëꞌco chachin Quiparoiꞌ itopisoꞌ yonsanꞌpaꞌ nisarai. Inaquë nicasoco aꞌnanaya huaꞌnarëso pochin piꞌiroꞌtë niiꞌsohuatohuachina, Yosë yaꞌnorin niꞌnahuë. Coaquin copirno quëpi quëran huarëꞌ nani aꞌnatërápo piꞌipi, catapini yoqui nisarin. Naporahuaton nani cara shonca piꞌipitarin Napocotono copirno yaꞌconinsoꞌ. Naporoꞌ Siniorosoꞌ chiníquën nanantaton, aꞌnotërincosopita nicaꞌhuaso marëꞌ catahuarinco.

^4-5 Huaꞌnarëso pochin norti parti quëran panca ihuan huëꞌsarin niꞌnahuë. Naporahuaton panca chitoro quëran pën pipiarin niꞌnahuë. Oꞌcoriroꞌsa pochin huënaratërarin. Yaꞌipi ina chitoro tahuitërinsoꞌ, panca huënaratarin. Pën huënaratërinso huancanantaꞌ, huaꞌna huënaratërinso pochin yaꞌnorin. Ina huancanachintaꞌ, catapini maꞌsharoꞌsa piyapi pochin niꞌtopisoꞌ, yaꞌnorin.

⁶ Aꞌnaya aꞌnaya catapini catapini yaꞌpirahuanpi. Catapini catapini chachin anpiantëhuanpi.

⁷ Paꞌhuëquënpitasoꞌ, noꞌtënanconpi. Toroaꞌhua pochin tasërahuan nantëtopi. Nantëquënpitantaꞌ, shaꞌpi huaꞌna noyá soꞌnarëso pochin yaꞌnopi.

^8-9 Naporahuatona piyapi pochin tanpatatona imirahuanpi. Anpiantëna pëꞌnacha yaꞌhuëtopi. Anpiantënëna quëran nicariraꞌpiapi. Paꞌpachinara co niquë tahuërëpihuëꞌ. Noꞌtëquën paꞌpi.

¹⁰ Yaꞌpirinënapitaso iso pochin yaꞌnopi: Notëtopi quëransoꞌ, piyapi pochin niꞌtopi. Inchinan parti quëransoꞌ, paꞌpini pochin niꞌtopi. Ahuënan quëraontaꞌ, toro pochin niꞌtopi. Pinëna quëransoꞌ, panca onian pochin niꞌtopi.

¹¹ Anpiantëna anquipisoꞌ, inapa poꞌtontapi. Cato quëran anpiantëna capini nicaripi. Cato quëran chachin nonëna nipaꞌshintopi.

¹² Yaꞌipiya noꞌtëquën iratopi. Paꞌpachinara, co nitahuërëtopihuëꞌ. Insëquësona Siniorori chiníquën nanantaton quëpahuachina, inataquëchin paꞌpi.

¹³ Maꞌsharoꞌsa pochin nipisopitasoꞌ, pënaya huënaratërinso pochin yaꞌnopi. Yanatëtë huënin huënintohuatëra, huënaratërin. Inapoatonaꞌ, itohuaran itohuaran niyaꞌcontapiso pochin nisapi. Pënsoꞌ chiníquën huënaratarin. Ina quëran oꞌcoriroꞌsanta pipirantapi.

¹⁴ Inapitasoꞌ paꞌpachinara, oꞌcoriroꞌsa pochin co osharapihuëꞌ. Paꞌsahuatonaꞌ, huënantapi. Inaporápi.

¹⁵ Ina maꞌsharoꞌsa nirarahuë quëran niꞌpirahuëꞌ, aꞌnaya aꞌnaya huanipiso pirayan aꞌnara tahuinan noꞌpaquë yaꞌhuërin.

¹⁶ Catapini tahuinan chachin napopináchin nipi. Topacio itopisoꞌ paꞌton naꞌpi quëran nipinan pochin huënaratopi. Naporahuatona niyaꞌcontëraꞌpiapiso pochin yaꞌnopi

¹⁷ Co tahuërëaponaraihuëꞌ, catapini parti quëran chachin nanitopi pacacaisoꞌ.

¹⁸ Tahuinanoꞌsasoꞌ, panca masho nisahuaton, huëhuëpiro yaꞌnorin. Naporahuaton yaꞌipi tahuirinso nani chachin yaꞌpirahuanaꞌpiapi.

¹⁹ Maꞌsharoꞌsa paꞌpachinara, tahuinanoꞌsanta paꞌsapi. Inapatontahuachinara, inahuanta inapatopi.

²⁰ Yosëri chiníquën nanantaton insëchinsona aꞌpahuachina, inaquë paꞌsapi. Noꞌpa quëran niotëhuachinara, tahuinanoꞌsanta niotëpi. Tahuinanoꞌsanta inapitarë chachin nipinan niꞌton, napopi.

²¹ Maꞌsharoꞌsa paꞌpachinara tahuinanoꞌsanta paꞌsapi. Chiniconpachinara, inapitanta chiniconpi. Noꞌpa quëran niotëhuachinara, inapitanta niotëpi. Tahuinanoꞌsanta inapitarë chachin nipinan niꞌton, napopi.

²² Motëna aipisoꞌ, aꞌtanamën pochin nininsoꞌ yaꞌnorin. Potiriamia huënaratërinso pochin huënaratërin.

²³ Aꞌtanamën pochin nininsoanaquë, ina maꞌsharoꞌsaso anpiantëna anquipi quëran, itohuara capini nicaripi. Cato anpiantëna quëranso napoaponahuëꞌ, nonëna nipaꞌshintopi.

²⁴ Paꞌpachinara anpiantëna quëran tënëntopisonta natanahuë. Naꞌpihuanquë pamatohuachina, tënëntërinso pochin irinin. Yosë yaꞌipi nanitaparinso nonpachina, yaꞌcaninso pochin natanahuë. Naporahuaton panca sontaroꞌsa huënton paꞌpachinara, tënëntërinso pochin natanahuë. Chiniconpachinara, anpiantëna aꞌpamapi.

²⁵ Motëna aipi, aꞌtanamën pochin nininso yaꞌhuërin. Ina aipi quëran paꞌpi chiníquën tënëntërinsoꞌ natanahuë.

²⁶ Ina tënëntërinquë chachin aꞌnara huaꞌanëntacaso shira pochin niꞌnahuë. Sapiro itopisoꞌ paꞌton naꞌpi quëran nipinan pochin niꞌnahuë. Inaquë huënsërinsontaꞌ, aꞌnara piyapi pochin yaꞌnorinso niꞌnahuë.

^27-28 Sëꞌnamën pëtëtëransoꞌ, huaꞌna soquihuachina huënaratërinso pochin yaꞌnorin. Naporahuaton pën huënaratohuachina aꞌpiánahuaninso pochini, tahuitërin. Yaꞌhuërëꞌ sëꞌnamën pëꞌnatëransoꞌ, pën nënë nënëtárinso pochin yaꞌnorin. Piꞌi piꞌcatasoꞌ oꞌnanpachina yahuaꞌtan yaꞌnorinso pochini yaꞌipi tahuirapitërin. Ina pochin huënarataton Yosë noya noya nininsoꞌ yaꞌnotërinco. Ina nicato isonahuë. Isonahuë quëran noꞌpaquë huarëꞌ monshomarahuë.