Éxodo 9 - Chayahuita (Shahui)

Aꞌnatëráporo anaꞌintacaso marëꞌ pëꞌtahua canio yaꞌconinsoꞌ

¹ Napohuachina Yosëri Moisësë itaantapon: —Paaton copirno nontaantaquëꞌ: “Naporin Yosë: ‘Piyapinëhuëpita chinotinacoso marëꞌ aꞌpaquë paꞌinaꞌ.

^2-3 Coꞌsoꞌ aꞌpahuatanhuëꞌ, yaꞌipi yaꞌhuërama parti, pëꞌtahua canio yaꞌconapon: Cahuarioroꞌsaꞌ, moraroꞌsaꞌ, camiyoroꞌsaꞌ, ohuacaroꞌsaꞌ, ohuicaroꞌsaꞌ, inapita caniotaramaꞌ. Inapoatona chiminaponaꞌ.

⁴ Israiroꞌsa pëꞌtahuapisopitaso nipirinhuëꞌ, co maꞌsha tëranta onpotarahuëꞌ. Napoaton co aꞌnaya tëranta inaquësoꞌ, chiminaponhuëꞌ.

⁵ ¡Tashiraya chachin canpitasoꞌ pëꞌtahuanëma caniopon!’ tënin,” itëquëꞌ, itërin.

⁶ Tahuëririnquë Yosë nohuanton, iquipitoroꞌsa pëꞌtahuanëna paꞌpi chiníquën caniorahuatonaꞌ, chiminapi huachi. Israiroꞌsa pëꞌtahuapisopitaso nipirinhuëꞌ, co aꞌnaya tëranta chimininhuëꞌ.

⁷ Copirnosoꞌ, nitotacaso marëꞌ piyapinënpita aꞌparin. Israiroꞌsa pëꞌtahuatopisopita nicacaiso marëꞌ aꞌparin. Paatona niꞌconpirinahuëꞌ, tëhuënchachin co aꞌnaya tëranta chimininhuëꞌ. Copirnosoꞌ, ina nitotaponahuë tërantaꞌ, co natantochináchinhuëꞌ cancantërin. Ina pochin cancantaton co israiroꞌsa Yosë chinotacaiso marëꞌ yaaꞌparinhuëꞌ.

Saotaro anaꞌintacaso marëꞌ sëncopi canio aꞌparinsoꞌ

⁸ Naquëranchin Yosëri, Moisësë, Aaron, inapita itaantarin: “Paatoma aꞌna ornoquë piꞌpiyan huariano macoꞌ. Ina masahuatomaꞌ, copirno niꞌconcoꞌ. Ina niꞌtonënquë nipatamaꞌ, quëmari Moisësë huariano inápaquë taꞌsaquëꞌ.

⁹ Taꞌsaransoꞌ tomontohuachin, yaꞌipi Iquipito parti yanquëarin. Piyapiroꞌsaꞌ, pëꞌtahuaroꞌsaꞌ, inapita aipi anotarin. Anotohuachina, notohuaroꞌ sëncopirapi huachi,” itërin.

^10-11 Yosëri napotërinso chachin, huariano masahuatona copirno nicapona paꞌpi. Cantonpachinara, Moisësëso huariano inápaquë taꞌsarin. Ina taꞌsarin quëran yaꞌipi iquipitoroꞌsaꞌ, notohuaroꞌ sëncopipi. Pëꞌtahuanënpitanta naporin. Pënotonoꞌsanta pënotatona inachachin nicacaiso marëꞌ copirnori amataantarin. Amatopirinhuëꞌ, inahuanta notohuaroꞌ sëncopiatonaꞌ, co yaꞌnopihuëꞌ.

¹² Napoaponahuëꞌ, Yosë nohuanton co copirno nanitërinhuë Moisësë, Aaron, inapita natëcasoꞌ. Moisësë napotërinso chachin ninin.

Canchisëro anaꞌintacaso marëꞌ ocai anotërinsoꞌ

¹³ Naquëranchin Yosëri, Moisësë itapon: —Tashiraya anoachin capayatahuaton, copirno niꞌcontaton nontaantaquëꞌ: “Naporin Yosë israiroꞌsari chinotërinsoꞌ: ‘Piyapinëhuëpita chinotinacoso marëꞌ aꞌpaquë paꞌinaꞌ.

¹⁴ Co aꞌpahuatanhuëꞌ, iporasoꞌ chini chiníquën anaꞌintaranquën. Catahuarinquënsopita huaꞌanoꞌsaꞌ, piyapinënpita, inapitanta inapotarahuë. Co insonta isoroꞌpaquë ca pochin yaꞌhuërinhuëꞌ. Ina ipora anitotaranquën.

¹⁵ Nohuantërahuë naporini, chini chiníquën canio poꞌmotatënquëma nani yaꞌipinquëma tiquiꞌitënquëmahuëꞌ.

¹⁶ Napoaponahuëꞌ, quëmaso ca nohuanto nanpiaran. Nani acoranquën chiníquën nanantërahuësoꞌ, aꞌnotaꞌhuanquënso marëꞌ. Anaꞌintëranquënsoꞌ nitotohuachinaꞌ, yaꞌipi parti nahuinarahuë huachi.

¹⁷ Napotopiranquënhuëꞌ, co piyapinëhuëpita yaaꞌparanhuëꞌ. Co aꞌpahuatanhuëꞌ,

¹⁸ tashiraya ipora pochin, panca ocai aꞌpataranquën. Iráca quëran huarëꞌ co ina pochin iquipitoroꞌsa niꞌchinpihuëꞌ.

¹⁹ Shaꞌhuitëquë yaꞌipi pëꞌtahuanënaꞌ, pëianaquë poꞌmoinaꞌ. Yaꞌipi maꞌshanënanta aipiran yaꞌhuërinsoꞌ, acoanaráchin poꞌmoinaꞌ. Coꞌsoꞌ inapotohuachinahuëꞌ, ocairi tiquiarin. Piyapiroꞌsaꞌ, maꞌsharoꞌsaꞌ, inapita topinan paꞌsahuachina tiquiarin huachi,’ tënin,” itëquëꞌ, itërin.

²⁰ Yosë camaitërinso Moisësë shaꞌhuihuachina, aꞌnaquën natëtopi. Copirno catahuapisopita huaꞌanoꞌsasoꞌ, Yosë tëꞌhuatopi. Napoaton piyapinënapita pënënpi ama aipiran pacacaiso marëhuëꞌ. Pëꞌtahuanënapitanta acohuana poꞌmopi.

²¹ Aꞌnaquënso nipirinhuëꞌ, co natëtatonahuëꞌ, piyapinënapita co shaꞌhuitopihuëꞌ. Pëꞌtahuanënapitanta co tapapihuëꞌ.

²² Naquëranchin Yosëri, Moisësë camayantarin. —Yaꞌipi Iquipito parti ocai anotacaso marëꞌ tanpaquën inápaquë ihuëquëꞌ. Piyapiroꞌsaꞌ, pëꞌtahuaroꞌsaꞌ, nararoꞌsaꞌ, yaꞌipi inapita paquitacaso marëꞌ inapoquëꞌ.

²³ Huaranën sëꞌquërin quëran chachin Moisësësoꞌ, tanpaquën inápaquë ihuërin. Naporo chachin yaꞌipi Iquipito parti, oꞌcoritarin, huirátarin, ocai anotarin, naporin.

²⁴ Iráca quëran huarëꞌ Iquipito parti co ina pochin niꞌchinpihuëꞌ. Paꞌpi chiníquën huirátahuaton ocai anotarin huachi.

²⁵ Notohuaroꞌ piyapiꞌsaꞌ, pëꞌtahuaroꞌsaꞌ, inapita tiquirin. Sharoꞌsaꞌ, nararoꞌsaꞌ, inapitanta paquitërin.

^26-32 Sharoꞌsa ocairi paꞌpitërin: Rino, sipata, inapita itopiso tapirin. Rinosoꞌ, nani yancon, sipatanta nani huënshara nipirinhuëꞌ, tapirin. Trico, sintino, inapitaso pahuanasoi niꞌton, noya chaꞌëchachinpi. Napoaponahuëꞌ, israiroꞌsa yaꞌhuëpiquësoꞌ, co manta ocai anotërinhuëꞌ. Napoaton copirnori, Moisësë, Aaron, inapita amataantarin. Huëꞌpachinara itapon: —Tëhuënchachin co noyahuëꞌ nicato oshahuanahuëꞌ. Co Yosëso tëhuërinhuëꞌ. Quiya tëhuëraisoꞌ. Co huachi yaꞌcopiaponquëmahuëꞌ, noya paꞌsarama huachi. Ina pochin shaꞌhuitocoꞌ. ¡Ocai, huira, inapita co huachi ahuantëraihuëꞌ! itërin. —Tëhuënchachin Yosë chinotëraisoꞌ, yaꞌipiroꞌpaꞌ huaꞌanëntërin. Ina anitotaꞌhuanquënso marëꞌ ninano quëran pipiso chachin Yosë nontarahuë. Ama huachi ocai, huira, inapita anotacaso marëhuëꞌ nontarahuë. Co mini quëmasoꞌ, Yosë tëꞌhuachátëraranhuëꞌ. Catahuarinënquënsopita huaꞌanoꞌsantaꞌ, co ina tëꞌhuachátërapirinahuëꞌ, Yosë nontarahuë, itërin.

³³ Nani copirno nontohuachinara, ninano quëran pipirin huachi. Pipipon chachin, inápaquë anquirahuaton Yosë nontërin. Nani orahuachina naporo chachin, oꞌnan mëꞌtarin. Huira copi tënin. Ocaintaꞌ, co huachi anotërinhuëꞌ.

³⁴ Inapita copi topirinahuëꞌ, copirnoso co natantochináchinhuëꞌ cancantaantarin. Catahuarinsopita huaꞌanoꞌsantaꞌ, inapochachin cancantaantapi.

³⁵ Yosëri ninorinso chachin copirno ninin. Co israiroꞌsa aꞌpacaso nohuantërinhuëꞌ. Moisësëri israiroꞌsa shaꞌhuitërinso chachin ninin.