Éxodo 4 - Chayahuita (Shahui)

¹ Yosëri napotopirinhuëꞌ, Moisësëso taantarin: —Israiro huaꞌanoꞌsa yaꞌnotërancoso shaꞌhuitohuato, co natëtaponahuëꞌ: “Co ipora yaꞌnotopirinquënhuëꞌ, napoaran,” taꞌtonaꞌ, co natëponacohuëꞌ, itërin.

² Napotohuachina, Yosëri natanin: —¿Maꞌta sëꞌquëaran? itërin. —Pitananëhuë taꞌa, itërin Moisësëri.

³ —Noꞌpaquë tëꞌyatëquëꞌ, itërin Yosëri. Tëꞌyatohuachina, Yosë nohuanton yaꞌhuan taranin. Ina tëꞌhuataton Moisësëso pashi tënin.

⁴ Taꞌarapirinhuëꞌ, Yosëri itapon: —Huinamën quëran maantaquëꞌ, itërin. Moisësëri huinamën quëran mapachina, pitana chachin taraantarin. Naporoꞌ Yosëri itapon:

⁵ Israiro huaꞌanoꞌsa niꞌtonënquë inapotëquëꞌ. Huaranën yaꞌhuan taraninso niꞌpachinaꞌ, yaꞌnotëranquënso natëtapi huachi: “Shimashonënpoapita Apraan, Isaco, Cacopo, inapitari Yosë chinotërin. Inari Moisësë yaꞌnotërin,” tosapi.

^6-8 Inapopiranhuëꞌ co natëhuachinënhuëꞌ, aꞌna yaꞌhuërëꞌ aꞌnotaantaquëꞌ: “Imiranën aꞌmoransoanaquë poꞌmoquëꞌ,” itërin. Poꞌmohuachina: “Ocoiquëꞌ,” itaantarin. Ocoihuachina, chana caniori imirinquë manin niꞌnin. Naquëranchin Yosëri shaꞌhuitaantarin: “Inaquë chachin poꞌmoantaquëꞌ,” itaantarin. Poꞌmoantaton, ocoihuachina, noyataantarin. Naporoꞌ Yosëri itërin: —Yaꞌnan aꞌnotëranso nicaponaraihuë co natëhuachinënhuëꞌ, naquëranchin aꞌnotaantahuatan, natëarinën huachi, itërin.

⁹ Ina quëran taantarin: —Inapita aꞌnotopiranhuë co natëhuachinënhuëꞌ, Niroiquë paꞌsahuaton iꞌsha maquëꞌ. Noꞌpaquë opohuatan, naporo chachin huënaiꞌ taranin, itërin.

¹⁰ Yaꞌipi inapita Yosëri shaꞌhuitopirinhuëꞌ, Moisësësoꞌ: —¡Maꞌcha Sinioro napotaranquën paya! Co caso noya nonaꞌpicohuëꞌ. Icotëmiachinco. Napoaton co insonta yanatërincohuëꞌ. Huaꞌhuatapo quëran huarëꞌ inaporahuë, taantarin.

¹¹ —Coꞌta inaso nani nitotërahuë. Ca nohuanto aꞌnaquën noya nonpi. Ca nohuanton chachin aꞌnaquënsoꞌ, co nonpihuëꞌ. Ca nohuanton aꞌnaquën noya quënantopi. Ca nohuanton chachin aꞌnaquënsoꞌ, somarayapi.

¹² Napoaton, Iquipitoquë noya paquëꞌ. Noya nonacasosoꞌ, carinquën catahuaranquën. Maꞌsona taꞌcasontaꞌ, anitotaranquën, itërin.

¹³ Napotopirinhuëꞌ, Moisësëso taantarin: —¡Maꞌcha Sinioro napotaranquën paya! Aꞌna piyapi aꞌpaquë taꞌa, itërin.

¹⁴ Naporinso marëꞌ Yosëri noꞌhuiton itapon: —¡Coꞌta inatohua iya masho Aaron itopiso yaꞌhuëarin! Inanta Nihui huënton quëmapi. Inaso míso nonin. Nani ayonquirahuë niꞌton, huëꞌsarin nacapiaponquën. Quënanpachinquën capa cancantarin.

^15-16 Yaꞌipi camairanquënsoꞌ, ina shaꞌhuitëquëꞌ. Inari quëma yaꞌhuërënamën israiroꞌsa nontarin. Quëma ca yaꞌhuërënamëhuë nonsaranso pochin, inanta quëma yaꞌhuërënamën nonsarin. Carinquëma catahuaponquëma nonacamasoꞌ. Maꞌsona nicacasonta anitotaranquëmaꞌ.

¹⁷ Huaranënta quëpaquëꞌ. Shaꞌhuitëranquënsopita nicaton, ina quëran huëhuëpiro nininsopita aꞌnoaran, itërin.

Moisësë Iquipitoquë paantarinsoꞌ

¹⁸ Ina quëran Moisësë miꞌsën pëinënquë panantarin. Cancontarahuaton itapon: —Iquipitoquë yapaato nontaranquën. Onpoácaitaꞌ quëmopinëhuëpita, taꞌto yapaꞌsarahuë, itërin. —Noyapaꞌ. Yosë catahuainquën noya paquëꞌ, itërin miꞌsëni.

¹⁹ Nani miꞌsën nontaponahuëꞌ, co paꞌshátërasohuëꞌ, Yosëri yaꞌnotaton: “Paquë huachi Iquipitoquë. Iráca yatëparinquënsopita nani chiminpi,” itërin.

²⁰ Napotohuachina, moranënquë saꞌin, huiꞌninpita, inapita aꞌmitëahuaton Iquipitoquë paantarin. Shaꞌhuitërinso chachin Yosë huaranëontaꞌ, quëparin.

²¹ Coꞌhuara Iquipitoquë canshátërasohuëꞌ, Yosëri nani shaꞌhuitërin: —Iquipitoquë canpatan, copirno niꞌtonënquë huaranën quëran nani maꞌsha paꞌpi huëhuëpiro nininsopita niquëꞌ. Inanta chiníquën nanantërahuësoꞌ, nitotacaso marëꞌ inapoquëꞌ. Ca nohuanto co natëponquënhuëꞌ. Co natëtënquënhuëꞌ co israiroꞌsa yaaꞌpaponhuëꞌ.

²² Naporoꞌ quëmari napotëquëꞌ: Naporin Yosë: “Caso Yosëco. Israiroꞌsa nosororahuë. Inapitasoꞌ paninan huiꞌnahuë pochin niꞌnahuë.

²³ Napoaton inapita aꞌpacaso marëꞌ camayaranquën. Aꞌparan naporini, paꞌsahuatona chinochitonacohuëꞌ. Co aꞌparanhuë niꞌquëhuarëꞌ, quëma huiꞌnan paninantëranso tëparahuë, tënin Yosë,” itëquëꞌ, itërin.

²⁴ Paasoi huancopi iꞌhuatohuachinara, huëꞌëcaiso marëꞌ tapatopi. Inaquë Yosëri huëcapairahuaton, Moisësë yatëparin.

^25-26 Naporo chachin Sihuirari, cosoroaꞌhua naꞌpi quëran nipisoꞌ masahuaton, huaꞌhuin marca acotërin. Ina shaꞌhuëchin masahuaton, soꞌin taparonën caritërin. Inapotahuaton itapon: “Tëhuënchachin quëmasoꞌ, huaꞌhuahuë huënainën quëran paꞌpoyarinquën huachi,” itërin. Sihuira naporinso niꞌsahuaton, co huachi Yosëri Moisësë yatëparinhuëꞌ.

Moisësë, Aaronë chachin israiroꞌsa nontopisoꞌ

²⁷ Naporo chachin Yosëri Aaron itapon: —Inotëro parti paꞌsahuaton Moisësë nacapiconquëꞌ, itërin. Yosë natëton Aaron paꞌnin. Yosë motopinën itopiquë paꞌnin. Inaquë Moisësë quënanahuaton, sëꞌquërin. Noya ninontopi.

²⁸ Naporoꞌ Moisësëri, Yosëri chiníquën nanan quëtërinsoꞌ shaꞌhuitërin. Maꞌpitasona nicacaso yaꞌhuërinsoꞌ. Maꞌpitasona shaꞌhuitacaso yaꞌhuërinsoꞌ, inapita iin shaꞌhuitërin.

²⁹ Ina quëran cato chachin paꞌsahuatonaꞌ, Israiro ansianoꞌsa ayontonpi.

³⁰ Niyontonpachinara, Aaroni huaꞌanoꞌsa shaꞌhuitërin: —Yosë Iquipito quëran ocoinpoaso marëꞌ nani Moisësë acorin, itërin. Naporahuaton Yosëri camairinso chachin, ansianoꞌsari natëcaiso marëꞌ Moisësënta sacai nininsopita ninin.

³¹ Ansianoꞌsasoꞌ, yaꞌipi natëpi. Parisitapirinahuë Yosëri yacatahuarinso natanahuatonaꞌ, noꞌpaquë huarëꞌ monshorahuatonaꞌ, Yosë chinotopi huachi.