Éxodo 33 - Chayahuita (Shahui)

Naquëranchin paantapisoꞌ

^1-2 Siniorori naquëranchin Moisësë itaantarin: —Israiroꞌsa Iquipito quëran nani ocoiran. Iporasoꞌ noꞌpaꞌ quëtaꞌhuanquëmasoꞌ nininquë quëpaquë huachi. Inaquësoꞌ, co manta pahuaninhuëꞌ. Nani Apraan, Isaco, Cacopo inapita shaꞌhuitërahuë shinpita ina noꞌpaꞌ quëtaꞌhuasoꞌ. Ina marëꞌ anquëninëhuë aꞌpararahuë noꞌtëquën pacacamaso marëꞌ aꞌnotarinquën. Inaquësoꞌ, cananoꞌsaꞌ, amororoꞌsaꞌ, itiroꞌsaꞌ, huirisiroꞌsaꞌ, iporoꞌsaꞌ, quiposoroꞌsaꞌ, inapita yaꞌhuëapi. Yaꞌhuëapirinahuëꞌ, cari ocoiarahuë.

^3-6 Napoaponahuëꞌ, caso co israiroꞌsaroꞌco paꞌsarahuëꞌ. Inapitaroꞌco paꞌpatosoꞌ, co natëtochináchinhuëꞌ cancantopi niꞌton, huancopi tiquihuato. Iporasoꞌ oro quëran nitapapisopita ocoiꞌinaꞌ. Ina piquëran yonquiarahuë maꞌsona onpotaꞌhuasoꞌ, tënin Yosë, itëquëꞌ, itërin. Ina natantatonaꞌ, israiroꞌsa panca sëtopi. Chiníquën Yosëri pënënin niꞌton, sëtopi. Naporahuaton nitapapisopita Sinai motopi quëran huarëꞌ ocoirahuatonaꞌ, co huachi pëꞌpëpihuëꞌ.

Yosë nontacaiso marëꞌ nëꞌmëtë pëi yaꞌhuërinsoꞌ

⁷ Moisësëri Yosë nontacaiso nëꞌmëtë pëi masahuaton, yaꞌhuëpiso aquëchamiachin, ótënconin. Ina nëꞌmëtë pëisoꞌ nohuitaton itapon: “Yosë nontacaso nëꞌmëtë pëiꞌ,” itërin. Aꞌnaquën Yosë nontacaso nohuantohuachina, inaquë paꞌsarin. Inaso napotëranquëmaso chachin, yaꞌhuëpisoꞌ aquëcha acopi.

⁸ Moisësë inatopa paꞌpachina, yaꞌipi israiroꞌsa nëꞌmëtë pëinëna yaꞌcoananënaquë huanipi. Inaquë yaꞌconaquë huarëꞌ notërápi.

⁹ Moisësë inaquë yaꞌconaton Yosërëꞌ ninontahuachina, chitoro naporopi nininso yaporitimarin. Yaporitimaton yaꞌcoanaquë chiniimarin.

¹⁰ Israiroꞌsasoꞌ, chitoro yaꞌcoanaquë chinirinso niꞌpi. Ina niꞌpachinara, aꞌnaya aꞌnaya yaꞌcoananënaquë isonahuatona Yosë chinotopi.

¹¹ Yosëso Moisësë yanontohuachina, inaora chachin nontërin. Nipayarëhuasoꞌ nontërëso pochin ninin. Nani ninontohuachinara, Moisësëso yaꞌhuëpiquë huëantarin. Piyapinën Cosoi itopisoso nipirinhuëꞌ, co onporonta ina quëran pipichininhuëꞌ. Cosoisoꞌ, Non huiꞌnin. Naporoꞌ inasoꞌ, co saꞌayátërarinhuëꞌ.

Moisësë Yosë pinëínchin quënantërinsoꞌ

¹² Aꞌna tahuëri Moisësëri, Sinioro itapon: —Niꞌquë Sinioro, israiroꞌsa quëpaꞌhuaso marëꞌ shaꞌhuitopirancohuëꞌ, co caora nanitërahuëꞌ. Naporahuaton co shaꞌhuitërancohuëꞌ, inëꞌcosona pacaꞌhuasoꞌ. Napoaponahuëꞌ, nani shaꞌhuitëranco natërancosoꞌ. Napoaton: “Nosororanquën,” itëranco.

¹³ Tëhuënchachin napohuatan, yonquiransopita anitotoco. Ina nitotohuato, noya noya natëaranquën. Israiroꞌsasoꞌ, quëma piyapinënpita. Ama ina naniantëquësohuëꞌ, itërin.

¹⁴ —Carinquën chachin caꞌtanaranquën niꞌton, sano cancantaran, itërin Siniorori.

¹⁵ Napoaponahuëꞌ, Moisësëso taantarin: —Coꞌsoꞌ quëma chachin caꞌtanpatancoihuëꞌ, isëquëranchin quëparichi.

¹⁶ Quëma chachin caꞌtanpatancoi, yaꞌipi iso parti yaꞌhuëpisopita, nohuitarinacoi. Piyapinënpitacoi nicatoi nishatëraisonta nitotapi. Inapotohuatancoi, naporo huarëꞌ co aꞌnapita nacionoꞌsa pochin nisaraihuëꞌ, itërin.

¹⁷ —Natëranco niꞌton, nosororanquën. Napoaton caꞌtanaranquëmaꞌ, itërin Yosëri.

¹⁸ —Quëmasoꞌ, huënaráchin huënaráchin yaꞌnoran. Napoaton co napion yaniꞌnanquën. Niꞌinquën topirahuë, itërin Moisësëri.

¹⁹ —Noya niꞌnahuësopita nosoromiatërahuë. Napoaton naꞌhuëtohuatënquën, noya noya ninahuëso niꞌsaran. Naporoꞌ nininëhuë shaꞌhuiarahuë. Caora nohuanto piyapiꞌsa nosororahuë. Co noyahuëꞌ nipirinahuëꞌ, nosoroato catahuarahuë.

²⁰ Napoaponahuëꞌ, yaꞌpirahuëso co niꞌsaranhuëꞌ. Inso tëranta niꞌpachinco chiminapon, itërin Yosëri.

²¹ Ina quëran napotaantarin: —Niꞌquëꞌ, ca pirayan aꞌnara natëtë yaꞌhuërin, inaquë huaniton ninataquëꞌ.

²² Huënaráchin huënaráchin yaꞌnoto naꞌhuëtasënquën chachin, ina natëtë nanintërinquë, acoaranquën. Naporahuaton imirahuë quëran ina nanin paꞌcopitarahuë.

²³ Nani naꞌhuëhuato, imirahuë chiꞌhuincatarahuë. Naporo pinëhuëíchin niꞌsaran. Yaꞌpirahuëso nipirinhuëꞌ, co niꞌcaso yaꞌhuërinhuëꞌ, itërin Yosëri Moisësë nontaton.