Éxodo 24 - Chayahuita (Shahui)

Yosë israiroꞌsarëꞌ anoyatërinsoꞌ

¹ Ina quëran Siniorori, Moisësë itapon: —Naquëranchin Aaronëꞌquën nanpëintaquëꞌ. Iporasoꞌ huiꞌninpitanta huëntaꞌinaꞌ. Natapo, Apio, inapita huëntaꞌinaꞌ. Naporahuaton canchisë shonca Israiro ansianoꞌsantaꞌ, quëntaquëꞌ. Iso Sinai motopiquë nisarahuë niꞌton, huëntacoꞌ. Inahuaso napoaponahuëꞌ, ama coꞌchachin yaꞌcariꞌinacosohuëꞌ. Aquëchamiachin isonatonaꞌ, noꞌpaquë huarëꞌ monshopi quëran chinochinaco.

² Quëmasáchin yaꞌcariarancosoꞌ. Aꞌnapitaso quëmarëꞌ huëntaponahuëꞌ, aquëmiachin quëran chinotarinaco. Aꞌnapita israiroꞌsantaꞌ, co imaquintainënso yaꞌhuërinhuëꞌ, itërin.

³ Napotohuachina Moisësësoꞌ, paꞌsahuaton yaꞌipi Yosë camaitërinsoꞌ, israiroꞌsa shaꞌhuitoonin. Ina natanahuatonaꞌ: —Noyapaꞌ. Yaꞌipi Yosë camaitërinso nisarai, itopi.

⁴ Ina quëran Yosë pënëntërinsoꞌ ama naniantacaiso marëhuëꞌ yaꞌipi ninshitërin. Tahuëririnquë aꞌcayan capayatahuaton, motopi nanimarinꞌpaꞌ, aꞌnara artaro ninin. Naporahuaton shonca cato naꞌpiroꞌsaꞌ, Yosë marëꞌ ahuanirin. Shonca cato huënton israiroꞌsanta yaꞌhuërin niꞌton, inanapo ahuanirin.

⁵ Ina quëran caraya Israiro huiꞌnapiꞌsa camairin tororoꞌsa Yosë marëꞌ tëpacaisoꞌ. Nani tëpahuachinara, aꞌnaquënso artaro aipi oshanëna marëꞌ yaꞌipi ahuiquitopi. Aꞌnaquëontaꞌ, piꞌpian ahuiquitopi. Inaso nanan anoyatopiso marëꞌ itopisoꞌ.

⁶ Tororoꞌsa tëpapisoꞌ huënainën mapi. Inasoꞌ Moisësëri, napoinchin tasonoꞌsaquë manin. Napoinchinso nipirinhuëꞌ, artaro aipi taꞌsatërin.

⁷ Ina quëran, Yosërëꞌ anoyatopiso quirica chiníquën nontërin. Yaꞌipi israiroꞌsa natanacaiso marëꞌ naporin. Nani natanpachinara: —Yaꞌipi cancanëhuëi quëran Sinioro camaitërinso natëarai, topi.

⁸ Naporoꞌ Moisësësoꞌ, tasonoꞌsaquë huënaiꞌ yaꞌhuërinsoꞌ, manin. Masahuaton, yaꞌipi israiroꞌsa taꞌsatërin. Nani taꞌsatohuachina itapon: —Iso huënaiꞌ paꞌnin niꞌton, Yosë canpoarëꞌ anoyatërinso anitotërinpoaꞌ. Ina marëꞌ nanamën ninshitërahuësoꞌ nani shaꞌhuitëranquëmaꞌ. Ina natëhuatëhuaꞌ, Yosë noya niꞌsarinpoaꞌ, itërin.

⁹ Ina quëran Moisësë, Aaron, Natapo, Apio, inapita motopiꞌpaꞌ pantapi. Canchisë shonca ansianoꞌsantaꞌ, inatohua pantapi.

¹⁰ Inaquë pantahuachinara, Israirori chinotërinso Yosë chachin quënanpi. Noyápiachin nininquë toꞌquëtërin. Sapiro naꞌpiraꞌhua huënaratërinquë pochin toꞌquëtërin. Aꞌninquëchin piꞌiroꞌtë pochin yaꞌnorin.

¹¹ Yosë chachin nicaponaraihuëꞌ isopita huaꞌanoꞌsa co chiminpihuëꞌ. Yosërëꞌ anoyatopiso yonquiatonaꞌ, caꞌpi, oꞌopi, napopi. Ina quëran naquëranchin nohuaraimantapi.

Moisësë motopiquë paantarinsoꞌ

¹² Siniorori Moisësë itaantapon: —Iso Sinai motopiquë nisarahuë niꞌton, huënantaton ninaco. Inaquë cato naꞌpitëaꞌhua quëchinquën. Inaquë pënëntërahuësoꞌ, camaitërahuësoꞌ, inapita nani ninshitërahuë. Ina quëran israiroꞌsa aꞌchintaramaꞌ, itërin.

^13-14 Itohuachina Moisësësoꞌ, Cosoirë chachin pacacaiso marëꞌ huanipi. Naporo ansianoꞌsa itapon: —Oꞌmaꞌhuai huarëꞌ isëquëranchin ninatacoi. Aaron yaꞌhuëarin. Orinta yaꞌhuëarin. Inapita yaꞌhuapi niꞌton, catahuarinquëmaꞌ. Aꞌnaquëma nanan yaꞌhuëtohuachinquëmaꞌ, inapita shaꞌhuitoco catahuainquëma anoyatocoꞌ, itërin. Inapo shaꞌhuitahuaton cato chachin motopiꞌpaꞌ pantapi.

¹⁵ Moisësëso motopi huancorintë Cosoi acorahuaton, inaora pantarin. Pantápaton pomosoontarin. Naporoꞌ chitorori yaꞌipi noyá imotërin.

¹⁶ Sinioro huënaráchin huënaráchin aꞌpininsoꞌ, Sinai motopi aꞌpintimarin. Saota tahuëri chitorori imotërin. Tahuëririnquësoꞌ, Siniorori Moisësë përarin.

¹⁷ Israiroꞌsantaꞌ, Sinioro huënaráchin huënaráchin aꞌpininsoꞌ, quënanpi. Panca pën nënëhuachina, maꞌsha aꞌnaroáchin ahuiquitërinso pochin motopi huiꞌnimotënquë yaꞌnorin.

¹⁸ Moisësëso chitoro iꞌcopirinquë yaꞌconahuaton, motopi huiꞌnimotënꞌpaꞌ pantarin. Catapini shonca tahuëri tashirë chachin inatohua yaꞌhuërarin.