Éxodo 20 - Chayahuita (Shahui)

Shonca nanan pënëntërinsoꞌ

¹ Yosë chachin pënëntaton naporin:

² “Ca Sinioroco huaꞌanëntaranquëmaꞌ. Iquipitoquë chiníquën asacatopirinënquëmahuëꞌ, nani ocoiranquëma huachi. Apira noya natëamacoso marëꞌ shaꞌhuichinquëma natancoꞌ.

³ Casáchin Yosëco niꞌto, casáchin chinotoco.

⁴ Ama manta nonanpisoꞌ nicatoma moshacosohuëꞌ: Inápaquë yaꞌhuërinsoꞌ, isoroꞌpaquë, acoporoquë, marëquë, co inaquëpita yaꞌhuërinso nonanatomaꞌ, moshacamaso yaꞌhuërinhuëꞌ. Ama manta mamanshi chinotocosohuëꞌ.

⁵ Ama monshorahuatoma inapita moshacosohuëꞌ. Ama piꞌpian tëranta chinotocosohuëꞌ. Casáchin Sinioroco niꞌto, aꞌpitëranquëmaꞌ. Co natëhuatamacohuëꞌ, anaꞌintaranquëma huachi. Huiꞌnamapita, shiparimapita, huiꞌnama shinpitaquë huarëꞌ anaꞌintarahuë.

⁶ Nosoroatomaco pënënanquëmasopita natëhuatamaso nipirinhuëꞌ, carinquëmanta nosoroaranquëmaꞌ. Shiparimanta nosoroarahuë. Huaranca shimapita huënton yaꞌhuëaquë huarëꞌ nosoroato catahuarahuë.

⁷ Ama topinan quëran chinotocosohuëꞌ. Topinan quëran chinotohuatamaco, oshahuanaramaꞌ. Maꞌsona shaꞌhuihuatamaꞌ, ama nonpinatomaꞌ: ‘Yoscoarëꞌ,’ tocosohuëꞌ, anaꞌintotënquëmaꞌ.

⁸ Nani simana aꞌna tahuëriraꞌ yonquiamacoso marëꞌ chinotocoꞌ.

⁹ Saota tahuëri noya sacatocoꞌ.

¹⁰ Tahuëririnquëso napoaponahuëꞌ, ca yonquiamacoso marëꞌ chinotaramaꞌ. Co naporoso sacataramahuëꞌ. Co huiꞌnamapita tëranta sacatarinhuëꞌ. Piyapinëmapita, pëꞌtahuanëmapita inapitanta co sacatacaiso yaꞌhuërinhuëꞌ. Co nisha piyapiroꞌsa tërantaꞌ, yacaparimasopita asacataramahuëꞌ.

¹¹ Saota tahuëri quëran yaꞌipi acorahuësopita tënirahuë. Inápaquë, isoroꞌpaquë, marëquë, inaquëpita yaꞌhuërinso tënirahuë. Tahuëririnquë chinotërahuë. Napoaton, ina tahuëri noya nicato, chinoto tahuëri acorahuë: Naporo tahuëri chinotatomaꞌ, casáchin yonquico.

¹² Tatama noya nicatoma natëcoꞌ. Mamamanta natëcoꞌ. Natëhuatamaꞌ, naꞌcon catahuaranquëmaꞌ. Canaan noꞌpaꞌ quëtohuatënquëmaꞌ, huaꞌqui inaquë noya yaꞌhuaramaꞌ.

¹³ Ama piyapi tëpacosohuëꞌ.

¹⁴ Nimapatamaꞌ, ama nitëhuananpitocosohuëꞌ.

¹⁵ Ama manta ihuatocosohuëꞌ.

¹⁶ Ama piyapi nonpinapicosohuëꞌ.

¹⁷ Ama aꞌnapita maꞌshanën noyapatocosohuëꞌ: Saꞌinaꞌ, piyapinënapita, toronënaꞌ, moranënaꞌ, inapita co noyapatamaso yaꞌhuërinhuëꞌ. Co maꞌshanëna tëranta noyapatamaso yaꞌhuërinhuëꞌ,” itërin Yosëri israiroꞌsa pënënaton.

Israiroꞌsa paꞌyanpisoꞌ

¹⁸ Noninsoꞌ, huiratërinsoꞌ, carniro pomon pihuipisoꞌ, inapita natanahuatonaꞌ, israiroꞌsasoꞌ paꞌpi tëꞌhuatopi. Oꞌcoriꞌ, pën, conaiꞌ, inapitanta quënanatonaꞌ, paꞌpi paꞌyanpi. Paꞌyanatona co nohuantopihuëꞌ yaꞌcaritacaisoꞌ.

¹⁹ Napoaton Moisësë, itopi: —Ama huachi Yosëso nonchincoisohuëꞌ. Chiminpatoi. Quëmari natanaton shaꞌhuitocoi natëi, itopi.

²⁰ —Ama paꞌyancosohuëꞌ, Yosë oꞌmarin tëniinquëmaso marëꞌ. Ina pochin yaꞌnotërinquëmaꞌ, ina tëꞌhuatatoma ama oshahuanamaso marëhuëꞌ, itërin.

²¹ Israiroꞌsasoꞌ, aquëranchin notëapi. Naporoꞌ Moisësësoꞌ, Yosë noninsoꞌ natanacaso marëꞌ chitoro yara yaráchin nininquë yaꞌconin. Inaquë piyapiꞌsa shaꞌhuitacaso marëꞌ Yosëri nani maꞌsha pënënarin.

Onpoinsona artaro nicacasoꞌ shaꞌhuirinsoꞌ

²² Siniorori, Moisësë itapon: “Apira shaꞌhuitaranquënsoꞌ, israiroꞌsa shaꞌhuitëquëꞌ: ‘Nani inápa quëran nontëranquëmasoꞌ natanamaꞌ.

²³ Ama mamanshi ca pochin chinotamaso marëꞌ nicosohuëꞌ. Oro, prata, co inapita quëran nicacaso yaꞌhuërinhuëꞌ.

²⁴ Chinotamacoso marëꞌ artaro yanipatamaꞌ, noꞌpa quëran nicoꞌ. Inaquë oshanëma marëꞌ pëꞌtahuanëmaꞌ tëparamasoꞌ, yaꞌipi ahuiquitocoꞌ. Nanan anoyatërëhuaso marënta tëparamasoꞌ, inaquë chachin piꞌpian ahuiquitocoꞌ. Insëquësona chinotamacoso huayonahuëquë inapohuatamaꞌ, noya niꞌsaranquëmaꞌ. Oꞌmarahuato, nani maꞌsha ninamaquë catahuamiataranquëmaꞌ.

²⁵ Naꞌpi quëran yanipatamasoꞌ, ama patëtopinan naꞌpi quëran nicosohuëꞌ. Huaꞌnaquë naꞌpi patëtohuachinara, co huachi artaro marëꞌ noyahuëꞌ.

²⁶ Naporahuaton, ina nipatamaꞌ, ama nanpënahuan nicosohuëꞌ. Piyapiꞌsa máquëma tëranta co noya imotëramasohuëꞌ niꞌchinquëmaꞌ, tënin,’ itëquëꞌ,” itërin.