Éxodo 2 - Chayahuita (Shahui)

Moisësë huaꞌhuatërinsoꞌ

¹ Naporo tahuëriꞌsa aꞌnara Nihui huënton quëmapi saꞌarin. Saꞌionta ina huënton sanapi chachin.

² Sanapiso cayoantarahuaton, quëmapiaꞌhuaya huairin. Huaꞌhuin noyápiachin nicaton, cara yoqui pëinënquë poꞌorin.

³ Napoaponahuëꞌ, co huachi onpo poꞌocasohuë niꞌton, otënahuan iꞌmë shishinamatënan quëran ninin. Iꞌquë yanpona marëꞌ noyá toꞌniquëtërin. Inaquë huaꞌhuin acorahuaton, aꞌtanapitërin. Inapotahuaton, Niroiꞌ yonsan shiꞌshinamatëroquë ayanponapirin.

⁴ Oshinso nipirinhuëꞌ, yoꞌyoaꞌhuain niꞌca marëꞌ inaquë acorin. Yaꞌcariya naꞌpiton: “¡Onpoꞌin taꞌma paꞌ!” taꞌton, niꞌsárin.

⁵ Co huaꞌquiya quëranhuëꞌ huaraon huiꞌnin nanon nininsoꞌ, amapon paꞌsarin. Piyapinënpita sanapiꞌsa nipisopitarë chachin yonsan paꞌtasoiꞌ, otënahuan iꞌmësoꞌ shiꞌshinamatëroquë yanpoitarin quënanin. Ina niꞌsahuaton aꞌnara piyapinën macacaso camairin. Napotohuachina, quëshirin.

⁶ Iꞌsoatohuachina, quëmapiaꞌhuaya naꞌnëárin quënanin. Naꞌnërinsoꞌ natanahuaton, nosororin. Paꞌyataton tapon: “¡Isosoꞌ, Israiroaꞌhua!” tënin.

^7-8 Naporoꞌ oshin huëꞌnin. Huëꞌsahuaton, tapon: —Nohuantohuatan, Israiro sanapi shoꞌshoihuan nininsoꞌ iso huaꞌhuasha nocomatiinquënso marëꞌ përai, itërin. —Inta nipachin quëshico, itërin. Itohuachina, aꞌshin macapon paꞌnin.

⁹ Quëshihuachina, huaraon huiꞌnini itapon: —Iso huaꞌhuasha nocomatoco. Ina marëꞌ pahuërëꞌinquën, itërin. Napotohuachina, huaꞌhuin masahuaton, nocomatërin.

¹⁰ Nani chinotonaꞌhua nipachina, huaraon huiꞌninquë quëpatërin. Inari huaꞌhuin pochin nicaton aninihuanin: Moisësë, itërin. Iquipito nananquë: “Iꞌ quëran ocoirahuësoꞌ,” tapon naporin.

Moisësë Iquipito quëran taꞌarinsoꞌ

¹¹ Moisësëso copirno pëinënquë huiꞌnapitahuaton, mashotërin huachi. Aꞌna tahuëri aꞌnapita israiroꞌsa yonquiaton, paꞌnin nicapon. Nani naꞌa piꞌipi Iquipitoquë yaꞌhuëhuanoꞌsari chiníquën asacatopi niꞌton, parisitápi quënanconin. Aꞌnanaya niꞌpirinhuëꞌ, aꞌnara Israiro quëmapi quënanin. Co manta onpoyapirinhuëꞌ Iquipito quëmapiri ahuëaton, yatëpararin.

¹² Moisësëri nosoroaton: “Cari iꞌhuërëchi,” taꞌton, yaꞌipi yonquitërin. Co inso tëranta quënanpachinahuëꞌ, Iquipito quëmapi ahuëaton tëparin. Inapotahuaton inotëquë paꞌpitërin.

¹³ Tahuëririnquë inaquë chachin paantarahuaton, cato Israiro capini niahuërapi quënancoantarin. Napoaton ahuëtonaꞌpi itapon: —¡Ama canpita capini niahuëcosohuëꞌ! itërin.

¹⁴ Napotopirinhuëꞌ, ahuëtonaꞌpiriso itapon: —¡Co insonta camaiancoso marëꞌ nanan quëtërinquënhuëꞌ! Co coisë pochin nicamaso yaꞌhuërinhuëꞌ. Iꞌhuara Iquipito quëmapi tëparanso pochin ¿ca yaꞌhuërëꞌ yatëpaantamaranco ti? itërin. Ina natanahuaton, Moisësë paꞌyanin: “Iquipito quëmapi tëparahuësoꞌ nani yaꞌipi nitotopi,” tënin yonquinënquë.

¹⁵ Naporinso chachin huaraontaꞌ, Moisësëri Iquipito quëmapi tëparinsoꞌ nitotërin. Napoaton yonitona tëpacaiso marëꞌ piyapinënpita camairin. Moisësëso nipirinhuëꞌ, Matian parti taꞌarin. Inaquë canconahuaton, chinotacaso marëꞌ aꞌna poso pirayan huënsëconin.

¹⁶ Chinotasoꞌ, canchisë nanoꞌsa canquipi. Iꞌsha macatona ohuicanënapita oꞌshitacaiso marëꞌ canquipi. Inapitasoꞌ Nihuiro huiꞌnipita. (Nihuirosoꞌ, Quitoro itopi antaꞌ.) Inasoꞌ, Matianquë corto huaꞌan yaꞌconin.

¹⁷ Napoaponahuëꞌ, aꞌnapita ohuica aꞌpainaꞌpiroꞌsanta canquipi. Inapitari nanoꞌsa noꞌhuitona aꞌparapi. Aꞌparapirinahuëꞌ, Moisësëri paꞌpoyarin. Inari chachin iꞌsha masahuaton, ohuicanënapita oꞌshitërin.

¹⁸ Yaꞌhuëpiquë canconpachinara, paꞌpinari natanin: —¿Onpoatomata iporasoꞌ tahuëriachin huëntaramaꞌ? itërin.

^19-20 —Aꞌnapita ohuica aꞌpainaꞌpiroꞌsa noꞌhuirapirinacoihuëꞌ, aꞌnara Iquipito quëmapi paꞌpoyarincoi. Inari chachin iꞌshanta masahuaton, ohuicaroꞌsa oꞌshitërin, itopi. —¿Inapo huachi? ¡Paatoma shaꞌhuitoco canpoarë coshachin! itërin paꞌpinari.

²¹ Coshatapona pochin, Nihuirori yacapacaso marëꞌ Moisësë shaꞌhuitërin. Natanahuaton nohuantërin. Co huaꞌquiya quëranhuëꞌ huiꞌnin Sihuira itopisoꞌ, acoantërin huachi.

²² Sihuira huaꞌhuanpachina, Moisësëri aninihuanin: Cohuirison itërin. Cohuirisonsoꞌ: “Nishaco nipirahuëꞌ isëquë yacapatërahuë,” tapon naporin.

Yosëri israiroꞌsa yanichaꞌërinsoꞌ

²³ Napoyan quëran Iquipito copirno chiminin huachi. Aꞌna yaꞌhuërëꞌ yaꞌcoantaponahuëꞌ, inanta israiroꞌsa co nosororinhuëꞌ. Inachachin asacatapi. Chiníquën parisitatonaꞌ, naꞌnë naꞌnë́rantapi. Napoatona Yosë nontopi huachi: “Catahuacoi Sinioro. Chiníquën parisitarai. Nichaꞌëcoi,” itopi. Napopisoꞌ Yosëri natanin.

^24-25 Piyapinënpita parisitopisoꞌ niꞌsahuaton, naꞌnëpisonta natanin. Naporoꞌ iráca shimashonënapitarëꞌ anoyatërinsoꞌ, yonquirin. Apraan, Isaco, Cacopo, inapitarëꞌ anoyatërinso yonquiaton, yacatahuarin huachi.