Éxodo 19 - Chayahuita (Shahui)

Israiroꞌsa Sinaiquë canconpisoꞌ

^1-2 Israiroꞌsa Rihuitin quëran pipirahuatonaꞌ, Sinai inotëro parti canconpi. Canconahuatonaꞌ, Sinai motopi notënanquë chachin chinotopi. Iquipito quëran pipipisoꞌ, nani cato yoqui nisahuaton aꞌna tahuëriraꞌ nisarin. Naporoꞌ inatopa canconpi.

³ Inaquë nisoi, Yosëri Moisësë përarin: —Iso motopiquë nanpëintaquëꞌ, itërin. Itohuachina, Moisësë motopi huiꞌnimotënꞌpaꞌ nanpëontarin. Inaquë Yosëri itapon: —Apira nani maꞌsha shaꞌhuitaranquën. Yaꞌipi shaꞌhuitaranquënsoꞌ, Cacopo shinpita israiroꞌsa itopisoꞌ shaꞌhuitëquëꞌ:

⁴ Nani niꞌnama iquipitoroꞌsa anaꞌintërahuësoꞌ. Canpitaso noya aꞌpaiatënquëma yaꞌhuërahuëquë huarëꞌ quënanquëmaꞌ. Panca onian anpiantënquë huaꞌhuin aꞌmitahuaton quëparin. Inapochachin carimantaꞌ, noya quënanquëmaꞌ.

⁵ Yaꞌipi isoroꞌpaquë nisha nisha piyapiꞌsa cari huaꞌanëntërahuë. Napoaton canpitasoꞌ, yaꞌipi camaitërahuëso natëcoꞌ. Maꞌsona taꞌtëhua canpitarëꞌco anoyatërahuësonta coꞌsoꞌ naniantohuatamahuëꞌ, noya niꞌsaranquëmaꞌ. Aꞌnapita piyapiroꞌsa quëran, noya noya niꞌsaranquëmaꞌ.

⁶ Carinquëma huaꞌanëntaranquëmaꞌ. Canpitaso corto huaꞌanoꞌsa nicacamaso marëꞌ acoranquëmaꞌ. Piyapinëhuëpita nicacamaso marëꞌ acoranquëmaꞌ. Nisha nisha piyapiꞌsa anohuitaramaco huachi. Yaꞌipi inapita israiroꞌsa shaꞌhuitëquëꞌ, itërin.

⁷ Itohuachina, Moisësë nohuaraimarahuaton, Israiro ansianoꞌsa amatërin. Nani huëꞌpachinara, yaꞌipi Siniorori shaꞌhuitërinsoꞌ shaꞌhuitërin.

⁸ Ansianoꞌsaso paꞌsahuatonaꞌ, yaꞌipi israiroꞌsa Yosë naporinso shaꞌhuitopi. Ina natanahuatonaꞌ: —Noyapaꞌ. Maꞌsona Yosë camaitërinso nisarai, topi. Napohuachinara, Moisësë naquëranchin motopiquë paantarahuaton, napopisoꞌ Sinioro shaꞌhuitontarin.

⁹ Nani shaꞌhuitohuachina, Siniorori itapon: —Natanquë shaꞌhuichinquën: Nontaranquënsoꞌ piyapiꞌsari natanacaiso marëꞌ chitoro yaráchin nininquë yaꞌnotaranquën. Ina natanpachinaꞌ, natëmiataponën huachi, itërin. Itohuachina, naquëranchin Moisësëri israiroꞌsa aꞌpanitopisoꞌ, Sinioro shaꞌhuitaantarin.

^10-11 Naporoꞌ Siniorori itapon: —Paꞌmaton israiroꞌsa shaꞌhuitomaquëꞌ: Casáchin yonquiꞌinaco. Naporahuaton pëꞌsainatona noya nitapainaꞌ. Ipora tahuëri, tashirayanta inapoꞌinaꞌ. Ina tashiraya ca Sinioroco chachin oꞌmararahuë. Sinai motopi huiꞌnimotënꞌpaꞌ oꞌmararahuë. Yaꞌipi israiroꞌsanta chitoroquë oꞌmarahuësoꞌ, niꞌsapi.

¹² Caraya Israiro quëmapiꞌsa shaꞌhuitëquë motopi nanimarinquë huiꞌshatonaꞌ, tahuichinaꞌ. Naporahuaton, shaꞌhuitëquë ama inso tëranta ina aquëtë naꞌhuëtacaiso marëhuëꞌ. Inso tëranta ina aquëtë naꞌhuëhuachin, tëpacaiso yaꞌhuërin.

¹³ Napoaponahuëꞌ, aquëranchin naꞌpiquëhuë nipon, pëꞌchinanquëhuë nipon, tëpamaso yaꞌhuërin. Piyapihuë nipon, maꞌshahuë nipon naꞌhuëhuachin, onpopionta tëpamaso yaꞌhuërin. Carniro pomon irininso natanai huarëꞌ, nanitapi motopiꞌpaꞌ nanpëcaisoꞌ, itërin.

¹⁴ Napotohuachina, Moisësëso paꞌmarin. Paꞌmarahuaton Yosëíchin yonquicaiso marëꞌ, israiroꞌsa shaꞌhuitomarin. Shaꞌhuitohuachina, aꞌmopisonta pëꞌsapi.

¹⁵ Naporahuaton itaantarin: —Tashiraya aquëtëran Sinioro oꞌmararin. Ama piꞌpian tëranta saꞌama cariapomarahuëꞌ, noya ninacoꞌ, itërin. Itohuachina, israiroꞌsa pëꞌsainahuatonaꞌ, cara tahuëri pochin co saꞌina yaꞌcaripihuëꞌ.

¹⁶ Moisësë naporinso chachin naporo tahuëri nanihuachina, tashiramiachin chiníquën oꞌcoritaton, huirátarin. Yaráton chitoro nininso motopi imotërin. Naporahuaton carniro pomon chiníquën pihuipisoꞌ natanpi. Ina natanatonaꞌ, yaꞌipi israiroꞌsa yaꞌhuëpiquë paꞌyanpi. Paꞌyanatona ropa ropatapi.

¹⁷ Napohuachina, Moisësëri israiroꞌsa yaꞌhuëpi quëran ocoirin. Ocoirahuaton, Yosë nacapicaiso marëꞌ motopi nanimarinꞌpaꞌ quëparin.

¹⁸ Pën huáncana Yosë oꞌmarin. Conainta panca orno pochin tomontárin. Panca ocohua paꞌninso pochachin, yaꞌipi motopi nacon nacóntarin.

¹⁹ Carniro pomon pihuipisontaꞌ, chini chiníquën yacanaꞌpiarin natanpi. Moisësëri nontohuachina, Yosëriso huira tënëntërinso pochin aꞌpanirin.

²⁰ Siniorosoꞌ oꞌmaton, Sinai motopi huiꞌnimotënꞌpaꞌ nohuaraimarin. Ina quëran inatopa panantacaso marëꞌ, Moisësë përaantarin. Napotohuachina Moisësë nanpëantarin.

²¹ Inaquë Yosëri itaantapon: “Paꞌmantaton israiroꞌsa shaꞌhuitomantaquëꞌ: ‘Ama Sinioro yanicatomaꞌ, huiꞌshapiso naꞌhuëtocosohuëꞌ. Ina naꞌhuëtohuatamasoꞌ, naꞌcon naꞌconquëma chiminapomaꞌ,’ itëquëꞌ.

²² Corto huaꞌanoꞌsaíchin noya yaꞌcariarinaco. Napoaponahuëꞌ, inahuanta casáchin yonquiainaco huarëꞌ napoapi. Ama chiminacaiso marëhuëꞌ inapocaiso yaꞌhuërin, itërin.

²³ Napotohuachina Moisësëri itapon: —Israiroꞌsasoꞌ, nani nitotopi. Quëma camaitëranso chachin motopi nanimarinquë nani huiꞌsharai niꞌton, co ina aquëtë huëꞌsapihuëꞌ,” itërin.

²⁴ Itopirinhuë Siniororisoꞌ itaantarin: —Onpopionta paꞌmaquëꞌ. Ina quëran Aaron quëntaquëꞌ. Israiroꞌsasoꞌ, co huiꞌsharamaso naꞌhuëtacaso yaꞌhuërinhuëꞌ. Co aꞌnapita corto huaꞌanoꞌsa tëranta, huëntacaiso yaꞌhuërinhuëꞌ. Huëntahuachinasoꞌ, ataꞌhuantarahuë, itërin.

²⁵ Itohuachina, Moisësëso paꞌmarahuaton israiroꞌsa yaꞌipi shaꞌhuitomarin.