Éxodo 17 - Chayahuita (Shahui)

Naꞌpi quëran iꞌsha pipirinsoꞌ

¹ Yaꞌipi israiroꞌsa Sin inotëro quëran pipiantapi. Yosëri camairinso natëtonaꞌ, oshaquëran paꞌsapi. Paꞌsápatona Rihuitin parti canconpi. Napoaponahuëꞌ, co iꞌsha yaꞌhuëantarinhuëꞌ oꞌocaisoꞌ.

² Napoaton Moisësë noncarotaantapi: —¡Iꞌsha quëtocoi oꞌoi! itopi. —¿Maꞌmarëta caso noncarotaramaco? Inapohuatamara, canpitaso Yosë chachin tëniantaramaꞌ, itërin.

³ Itopirinhuëꞌ, israiroꞌsasoꞌ co natëpihuëꞌ. Napishinhuë yamorotonaꞌ, Moisësë itaantapi: —¡Maꞌmarëta Iquipito quëran ocoirancoi! ¡Quëma ocoirancoi niꞌton, yamoro quiyasoꞌ tëpaponcoi! Huiꞌnahuëipita, pëꞌtahuanëhuëipita yaꞌipicoi yamoro tëpaponcoi, itopi.

⁴ Napotohuachinara, Moisësëso chiníquën Yosë nontërin. —¿Maꞌta Sinioro isopita onpochi? ¡Co huaꞌquiya quëranhuëꞌ naꞌpiquëtaponaco! itërin.

^5-6 —Caraya ansianoꞌsa shaꞌhuitëquë imainën. Inapitarëꞌquën chachin israiroꞌsa naꞌhuëtahuatomaꞌ, Oripi motopiquë pacoꞌ. Huaranënta iꞌ ahuëiranso quëpaquëꞌ. Inaquë carinquën panca naꞌpi aipi ninaranquën. Canconpatan, ina naꞌpi ahuëquëꞌ. Nani ahuëhuatan, piyapiꞌsa oꞌocaiso marëꞌ aꞌnaroáchin iꞌsha pipiarin, itërin Yosëri. Napotërinso chachin Moisësësoꞌ, Israiro ansianoroꞌsari nicasoi naꞌpi ahuërin. Inapohuachina, notohuaroꞌ iꞌsha pipirin huachi.

⁷ Moisësëri ina roꞌtë apoyatërin: “Miripa” itërin. Miripasoꞌ, noꞌhuitatona noncaropiquë tapon naporin. Inaquë israiroꞌsaꞌ, Moisësë noncarotopi niꞌton, ina pochin nohuitërin. Naporahuaton Masa itopi antaꞌ, Masasoꞌ, “co natëtopiquëhuëꞌ”, tapon naporin. “Co ipora Yosë aꞌpairinpoahuëꞌ,” topi niꞌton, ina pochin nohuitërin.

Amaricoroꞌsarëꞌ niahuëpisoꞌ

⁸ Amaricoroꞌsari, israiroꞌsa ahuëcaiso marëꞌ huëcapaipi. Rihuitinquë niahuëpi.

⁹ Naporoꞌ Moisësësoꞌ, piyapinën Cosoi itopisoꞌ camairin: —Amaricoroꞌsa ahuëamaso marëꞌ israiroꞌsa huayonahuaton quëpaquëꞌ. Caso nipirinhuëꞌ, motopiquë pantato Yosë huaranën quëpaarahuë, itërin.

¹⁰ Cosoisoꞌ, Moisësë camaitërinso natëton amaricoroꞌsa ahuëcaso marëꞌ paꞌnin. Yaꞌhuërëꞌ Moisësë, Aaron, inapitaso Cosoi catahuacaiso marëꞌ panënꞌpaꞌ nanpëpi. Aꞌna Israiro ansiano Ori itopisonta quëpapi.

¹¹ Moisësë tanpaquën ihuëpachina, israiroꞌsa canatapi. Aꞌpamahuachinasoꞌ, amaricoroꞌsa canatapi.

¹² Tanpaquën ihuërápaton canotërin niꞌton, Aaron, Ori, inapitari huënsëcaso marëꞌ naꞌpi acotopi. Naporahuaton catoari chachin tanpaquën achinipi niꞌton, co huachi aꞌpamarinhuëꞌ. Piꞌi yaꞌconaquë huarëꞌ co aꞌpamarinhuëꞌ.

¹³ Inapohuachina, Cosoiri amaricoroꞌsa minsërin huachi.

¹⁴ Ina quëran Yosëri, Moisësë itapon: —Quirica masahuaton, amaricoroꞌsapitarëꞌquëma niahuëramasoꞌ, inaquë ninshitëquëꞌ. Ama insonta naniantacaso marëhuëꞌ ninshitëquëꞌ. Cosointa shaꞌhuitëquëꞌ. Naporin Yosë: “Ca nohuanto amaricoroꞌsaꞌ, taꞌhuantaponaꞌ. Napoaton co huachi inso tëranta inapita yonquiapihuëꞌ,” tënin, itëquëꞌ.

¹⁵ Ina yonquiaton Moisësësoꞌ, Yosë chinotacaso marëꞌ aꞌnara artaro ninin. Ina artaro aninihuanaton: “Siniorosoꞌ pantiranëhuë,” itërin. “Sinioro catahuarincoi inimicoroꞌsa minsërai,” taꞌton, ina pochin aninihuanin.

¹⁶ Ina quëran taantarin: “Sinioro pantiranën sëꞌquëárahuë niꞌton, Yosëri amaricoroꞌsa shinpita ahuërápon,” tënin.