Éxodo 16 - Chayahuita (Shahui)

Cosharo inápa quëran aꞌpaimarinsoꞌ

¹ Israiroꞌsa Iquipito quëran pipipisoꞌ nani aꞌna yoqui patoma nisarin. Naporoꞌ inapitasoꞌ, Irimo quëran paantarapi huachi. Paꞌsahuatonaꞌ, Sin inotëro parti canconpi. Inasoꞌ inotëroꞌ, Irimo quëran, Sinai motopiquë huarëꞌ nincanin.

² Inaquë chachin israiroꞌsaꞌ, naquëranchin Moisësë, Aaron, inapita noꞌhuiantapi:

³ “Canpitaso co quëꞌyatoncoirahuëꞌ, inotëro parti tana tiquiincoiso marëꞌ quënancoi. ¡Iquipitoquë chachin Yosë tëparincoi naporini, noya noya niitonhuëꞌ! Inaquëso noya coshatatoi, natërai. Naꞌa nosha yaꞌhuërin,” itopi.

^4-5 Naporo Yosëri, Moisësë itapon: “Ca nohuanto cosharoꞌ, inápa quëran oꞌnan pochin anotimapon. Nani tahuëri paꞌsahuatonaꞌ, macacaiso yaꞌhuërin. Pëꞌyainpichin macaponaꞌ. Pancasomaria tahuëriso nipirinhuëꞌ, cato tahuëri marëꞌ machinaꞌinaꞌ. Inapotato inpitasona natërinacosoꞌ, inpitasona co yanatërinacosohuëꞌ, nohuitarahuë,” itërin.

⁶ Napohuachina, Moisësë, Aaron, inapitari israiroꞌsa itaponaꞌ: —Sinioro chachin Iquipito quëran ocoirinquëmasoꞌ, iꞌhuanahuanquë nitotaramaꞌ.

⁷ Tashirayanta tashíramiachin Sinioro huënaráchin huënaráchin aꞌpininsoꞌ, niꞌsaramaꞌ. Pinoramasoꞌ nani nataninquëmaꞌ. Quiya mini noꞌhuipiramacoihuëꞌ, Sinioro nohuanton pipirama niꞌton, ina pinorama huachi, itopi.

⁸ Ina quëran Moisësë taantarin: —Iꞌhuanahuanquë Sinioro, nosha quëtarinquëma capamaso marëꞌ. Tashiramiachintaꞌ, huaꞌhuayátërahuë cosharo quëtarinquëmaꞌ. Nani nataninquëma pinoramaso niꞌton, napotarinquëmaꞌ. Quiya mini noꞌhuipiramacoihuëꞌ, Sinioro nohuanton pipirama niꞌton, ina pinorama huachi, itërin.

⁹ Ina quëran Moisësëri Aaron itapon: —Pinopisoꞌ nani natanin niꞌton, shaꞌhuitëquë israiroꞌsaꞌ, Sinioro niꞌtonënquë niyontoinaꞌ, itërin.

¹⁰ Aaroni israiroꞌsa nontaso chachin, inotëro parti notëtopirinahuëꞌ, chitoroquë Sinioro huënaráchin huënaráchin aꞌpininsoꞌ, quënanpi.

¹¹ Naporoꞌ Yosëri Moisësë itapon:

¹² —Israiroꞌsa pinorinacosoꞌ nani natanahuë. Napoaton shaꞌhuitëquëꞌ: “Sinioro napotërinpoaꞌ: ‘Iꞌhuanahuanquë nosha caꞌsaramaꞌ, tashiramiachintaꞌ, cosharo yaꞌhuapon. Natëaquë huarëꞌ coshataramaꞌ. Inapotohuatënquëmaꞌ, ca Sinioroco ninahuësoꞌ nitotarama huachi, tënin,’ itëquëꞌ,” itërin.

¹³ Naporoꞌ iꞌhuaraya chachin, nisha ocoron canquirin. Huaꞌhuayátërahuë huëcatona yaꞌhuëpiso nani chachin yaꞌsotiirin. Tahuëririnquënta tashíramiachin niꞌpirinahuëꞌ, yaꞌhuëpiso nani chachin noꞌpaꞌ imotërinsoꞌ, maꞌsha poroncayo pochin quënanpi.

¹⁴ Poroncayo tomontohuachina, shipihuaninso pochin noꞌpaquë quëparitërin.

¹⁵ Co nohuitatonaraihuëꞌ, israiroꞌsasoꞌ inahua capini ninatanapi: “¿Maꞌta isosoꞌ?” tosapi. Napohuachinara, Moisësëri itapon: —Iso mini cosharo Yosë aꞌpatimarinpoasoꞌ.

¹⁶ Aꞌnaya aꞌnayama capamaso marëꞌ cato quiro pochin masaramaꞌ. Co naꞌcon naꞌcon macacamaso yaꞌhuërinhuëꞌ. Ina pochin Sinioro camaitërin, itërin.

¹⁷ Itohuachina, israiroꞌsaso ina inachachin nipi. Aꞌnaquën naꞌa mapi. Aꞌnaquënsoꞌ, piꞌpian mapi.

¹⁸ Ina quëran tantiahuachinara, niquëtopi niꞌton, co insonta yaꞌsotërinhuëꞌ. Naporahuaton co insonta pahuantërinhuëꞌ. Napopináchin mapi huachi.

¹⁹ Ina quëran Moisësëri pënëantarin: —Cosharo manamasoꞌ, ama tashiraya marëꞌ tapacosohuëꞌ, itërin.

²⁰ Moisësëri napotopirinhuëꞌ, aꞌnaquënso co natëtatonaraihuëꞌ, cosharo mapiso tahuëririnquë capacaiso marëꞌ tapapi. Tapapirinahuëꞌ, paꞌpi notohuaroꞌ shonataton anarin huachi. Napohuachina Moisësëri, chiníquën noꞌhuirin.

²¹ Nani tahuëri tashíramiachin, aꞌnaya aꞌnaya cosharo mapi. Nani yono piꞌirahuasoꞌ, piꞌiri piꞌcahuachina soquirin.

²² Napoaponahuëꞌ, pancasomaria tahuëriso cato tahuëri marëꞌ machinapi. Catapini quiro pochin aꞌnaya aꞌnaya mapi. Inanapo mapi niꞌton, Israiro huaꞌanoꞌsasoꞌ, Moisësë shaꞌhuitapona paꞌpi.

²³ Shaꞌhuitohuachinara Moisësëri itapon: —Ina mini Yosë nohuantërinsoꞌ: Tashiraya sahuato nisarin. Sinioro marëꞌ chinotacaso tahuëri. Cosharo manamasoꞌ, ipora chachin anpicoꞌ. Maꞌsona aꞌitamaso nininsopitantaꞌ, aꞌitochancoꞌ. Tashiraya marëpita inapotocoꞌ, itërin.

²⁴ Moisësë camaitërinso chachin nipachinara, tahuëririnquë capacaiso marëꞌ tapapisoꞌ, co manta shonatërinhuëꞌ. Naporahuaton co anarinhuëꞌ.

²⁵ Naporoꞌ Moisësëri itaantapon: —Taparamasoꞌ, caꞌco huachi. Iporasoꞌ, sahuato. Sinioro marëꞌ chinotacaso tahuëri. Ipora tahuërisoꞌ, co huachi aipiran cosharo quënanaramahuëꞌ.

²⁶ Saota tahuëri nanitarama macacamasoꞌ. Canchisëinquënso nipirinhuëꞌ, sahuato niꞌton, co yaꞌhuëarinhuëꞌ, itërin.

²⁷ Inaso napopirinhuëꞌ, aꞌnaquënso naporo tahuëri cosharo macapona paꞌpi. Paꞌpirinahuëꞌ, co manta quënanpihuëꞌ.

²⁸ Napohuachina Siniorori, Moisësë itapon: —Nani pënënpirahuëꞌ. Nani aꞌchintopirahuëꞌ. ¿Onporo huarëta natëponaco?

²⁹ Nani acotëranquëma aꞌna tahuëriraꞌ chinotamasoꞌ. Napoaton pancasomaria tahuëri nanihuachin, cato tahuëri marëꞌ cosharo quëtëranquëmaꞌ. Ina niꞌton, sahuato nanihuachin, ama yaꞌhuërama quëran pipicosohuëꞌ, itërin.

³⁰ Naporo huarëꞌ israiroꞌsaꞌ, canchisë tahuëri nanihuachina chinotopi.

³¹ Israiroꞌsasoꞌ, cosharo mapiso nohuitatonaꞌ, “mana,” itopi. Inasoꞌ huiríchin, conantroraya pochin ninin. Naporahuaton cachita ninoiquë cayontopinan pochin cashi cashin ninin.

Piꞌpian mana tapacaso camaitërinsoꞌ

³² Ina quëran Moisësëri israiroꞌsa camairin: —Iso pochin Yosë camaitërin: “Iquipito quëran ocoirahuatënquëmaꞌ, inotëro parti quësaranquëmaꞌ. Naporoꞌ cosharo quëtëranquëmasoꞌ shiparimapitanta nohuitacaiso marëꞌ, tapacoꞌ. Cato quiro pochin yaꞌconinsoꞌ, mana masahuatoma tapacoꞌ,” tënin, itërin.

^33-34 Aaronta camairin: —Cato quiro pochin mana masahuaton, yonshaquë poꞌmoquëꞌ. Ina quëran Yosërëꞌquënpoa anoyatërëhuaso caposonën notënanquë acoaran. Aꞌna tahuëri shiparinpoapita nohuitacaiso marëꞌ inaquë tapaaran, itërin. Itohuachina, Yosëri Moisësë camairinso chachin, Aaronsoꞌ ninin.

³⁵ Catapini shonca piꞌi pochin israiroꞌsaꞌ, mana caꞌpi. Cananoꞌsa yaꞌhuëpiquë notënanquë canconai huarëꞌ manasáchin caꞌpi.

³⁶ Mana tantiacaiso marëꞌ israiroꞌsasoꞌ, comiri itopisoquë tantiapi. Inaquëso cato quiro pochin yaꞌconin. Shonca comiri quëran aꞌnara ipa itopisoꞌ icanin.