Éxodo 15 - Chayahuita (Shahui)

Yosë cantanën cantapisoꞌ

¹ Inapotaton Siniorori nichaꞌëpachina, Moisësëso yaꞌipi israiroꞌsapitarë chachin Yosë cantanën cantapi. Cantatonaꞌ, itaponaꞌ: “Sinioro nichaꞌërinpoa niꞌton, cantahuaꞌ. Inimiconënpoapitaso huëꞌpirinahuëꞌ, inari paꞌpi huëhuëpiro nitaton, minsërin. Sontaroꞌsaꞌ, cahuarioroꞌsaꞌ, yaꞌipi marëquë tiquiitërin.

² Sinioroso chini chiníquën nanantaton achinirinpoaꞌ. Ina tëhuënchinsoꞌ nichaꞌërinpoaꞌ: ‘Ma noyacha inaso paya,’ itatëhua cantahuaꞌ. Tatanënpoarinta chinotërin. Napoaton paꞌyatahuaꞌ.

³ Chini chiníquën niꞌton, inimicoroꞌsa tiquirin. Inasoꞌ, Sinioro itërëhuaꞌ.

⁴ Toronanoꞌsaꞌ, copirno sontaronënpita, inapita marëri imotërin. Sontaro huaꞌanoꞌsanta chiníquën nanantopirinahuëꞌ, Quëhuai marëquë tiquiitërin.

⁵ Naꞌpi pochin marë huancanai nicotaitomapi. Anpo anpo nininquë paꞌmapi.

⁶ Sinioro. Ma noyacha ninan paya. Chini chiníquën nanantaton, inimicoroꞌsa paꞌsa paꞌsatëran.

⁷ Inimicoroꞌsa chinitopirinënhuëꞌ, quëmariso nipincatatë pochin ataꞌhuantëran. Shinpitë ahuiquitërëso pochin noꞌhuitaton anaꞌintëran.

⁸ Quëmari pihuitë pochin nitohuatana, marë nipatomairin. Iꞌ tachitaton, cato paira pochin ninin.

⁹ Inimicoroꞌsaso yonquipi: ‘Paꞌahua imatëhua icantahuaꞌ. Icantatëhua sahuëni quëran tiquiaꞌahuaꞌ. Maꞌshanëna osërëtatëhuaꞌ, nipatomatahuaꞌ,’ topirinahuëꞌ.

¹⁰ Quëmarisoꞌ chiníquën pihuihuatana, cosharo miꞌtërëso pochin marëri miꞌtërin huachi. Iꞌ nisoꞌnantërinsoꞌ huáncana nininquë promo pochin nicotaitomapi.

¹¹ Co insonta Sinioro quëma pochin nininhuëꞌ. Quëmasáchin noya noyanquën. Chini chiníquën nanantëran. Anaꞌintacaso marëꞌ paꞌpi huëhuëpiro nininsopita maꞌsha aꞌnoran. Napoaton yaꞌipiya quëran chinochinën.

¹² Chiníquën nanantëranso aꞌnoton, inimicoroꞌsa anaꞌintëran. Noꞌpari oꞌhuarinso pochin nitohuachina, capa nipi huachi.

¹³ Paꞌpi nosoromiatërancoi niꞌton, nichaꞌërancoi. Chiníquën nanantaton quëparancoi. Yaꞌhuëcaꞌhuaiso marëꞌ huayonanquë chachin quëparancoi.

¹⁴ Nisha nisha nacionquë yaꞌhuëpisopita, paꞌyanaponaꞌ. Naporanso natantohuachina napoaponaꞌ. Huiristinoꞌsa huaꞌhua iquitopiso pochin, cancantaponaꞌ.

¹⁵ Itomo capitanoꞌsantaꞌ, paꞌyanënaquë niiri iꞌco iꞌcopitapon. Moapo huaꞌanoꞌsasoꞌ, ropa ropataponaꞌ. Cananoꞌsanta co huachi chiníquën cancantaponahuëꞌ.

¹⁶ Catahuacoi Sinioro. Nisha nisha nacionoꞌsa tëꞌhuachina huachi. Naꞌpi co pacaritërinsohuë pochin, quëma nohuanton niinaꞌ. Piyapinënpitacoi noꞌpanëna naꞌhuëtaꞌhuai huarëꞌ napoꞌinaꞌ.

¹⁷ Sinioro quëmasoꞌ noyasáchin ninan. Huaꞌanëntëranquë chachin quëpacoi. Yaꞌhuëmiatamaso marëꞌ motopi nani huayonan. Chinotiinënquënso pëi quëmari chachin ninan, inaquë quëpacoi yaꞌhuëmiachi.

¹⁸ Sinioronënpoaso nipirinhuëꞌ, huaꞌanëntomiatapon. Co onporonta pipiarinhuëꞌ,” topi.

Marianta cantarinsoꞌ

¹⁹ Iquipito copirnosoꞌ, sontaronënpitarë chachin, israiroꞌsa imarin. Aꞌnaquën toronanoꞌsaquë. Aꞌnaquëontaꞌ, cahuarioroꞌsaquë imarin. Imatona marëquë yaꞌconpi. Yaꞌconpachinara, Yosë nohuanton marë inachachin niantarin. Napoaton yaꞌipiya chimiitopi. Israiroꞌsaso nipirinhuëꞌ, noya pëntonpi. Yaniro paꞌtatonaꞌ, noya pëntonpi.

²⁰ Naporoꞌ aꞌna sanapinta huanirin, Maria itopisoꞌ. Inasoꞌ, Yosë yonquirinso shaꞌhuinaꞌpi. Aaron oshinpain. Pantirita piꞌniaton, Yosë cantanën cantararin. Yaꞌipi israironoꞌsanta yorantapi. Naporahuatona Yosë marëꞌ nansarapi.

²¹ Maria cantaton tapon: “Yosë nichaꞌërinpoa niꞌton, cantahuaꞌ. Inimicoroꞌsaso huëꞌpirinahuëꞌ, Yosëri paꞌpi huëhuëpiro nitaton, minsërin. Sontaroꞌsaꞌ, cahuarioroꞌsaꞌ, yaꞌipi marëquë tiquiitërin huachi,” tënin.

Yosëri iꞌsha anoyaitërinsoꞌ

²² Nani cantahuachinara, Moisësëri, israiroꞌsa camairin inotëro parti pacacaiso marëꞌ. Ina inotërosoꞌ, Shor inotëro itopi. Cara tahuëri iratopirinahuëꞌ, co manta iꞌsha quënanpihuëꞌ.

²³ Napoyan quëran iꞌshana quënanaponaraihuëꞌ, main niꞌton, co nanitopihuëꞌ oꞌocaisoꞌ. Napoaton israiroꞌsari ina iꞌshana apoyatopi: “Mara” itopi. Marasoꞌ, main tapon naporin.

²⁴ Napoaton Moisësë noꞌhuiantapi. Naporahuaton: “¿Maꞌta iporasoꞌ oꞌorëꞌ?” nitopi.

²⁵ Moisësëso nipirinhuëꞌ, Yosë nontërin. Inari catahuacaso marëꞌ nontohuachina, aꞌnara naraꞌhuaya aꞌnotërin. Ina masahuaton iꞌshaquë tëꞌyaitohuachina noyaitërin huachi. Inaquë Yosëri israiroꞌsa natëtonoꞌsa nicacaiso marëꞌ tënirin. Naporahuaton onpopinsona nicacaisoꞌ Yosëri pënënin:

²⁶ “Caso Sinioroco. Canpitaso chinotëramaco. Casáchin nanitërahuë anoyatacasoꞌ. Nonahuësopita nóya natancoꞌ. Noya natanatomaꞌ, nohuantërahuëso nicoꞌ. Camaitërahuësopita natëtoma noya nipatamaꞌ, carinquëmanta noya niꞌsaranquëmaꞌ. Noya nicatënquëma canpitasoꞌ, catahuaaranquëmaꞌ. Iquipitoroꞌsasoꞌ, nisha nisha quëran anaꞌintërahuë. Canpitaso co ina pochin anaꞌintaponquëmahuëꞌ,” itërin.

²⁷ Ina quëran paantarahuatonaꞌ, Irimo parti canconpi. Inaquësoꞌ, shonca cato iꞌsha noꞌpa quëran pipirinso yaꞌhuërin. Naporahuaton canchisë shonca palmeraroꞌsa yaꞌhuërin. Inaquë noya iꞌsha yaꞌhuërin niꞌton, nëꞌmëtë pëinëna ótënatonaꞌ, huaꞌquimiachin inaquë yaꞌhuëpi.