Éxodo 14 - Chayahuita (Shahui)

Quëhuai marë pëntontopisoꞌ

^1-2 Ina quëran Yosëri Moisësë itapon: “Israiroꞌsa shaꞌhuitëquë ayaimatonaꞌ, Pi-airo ninanoaꞌhua notënanquë chinochinaꞌ. Inaso ninanoaꞌhua, Paaro-sion ninanoaꞌhua notënanquë chachin yaꞌhuërin. Inantaꞌ, Quëhuai marë aquëtëran yaꞌhuërin. Ina yaꞌcariꞌ, aꞌna ninanoaꞌhuanta yaꞌhuërin. Inasoꞌ, Miquitoro itopi. Ina ninanoaꞌhuanta piꞌi pipirinso parti quëran Pi-airo yaꞌyoranin.

³ Inapohuatamaꞌ, Iquipito copirno yonquiaton: ‘Israiroꞌsa inotëro parti chihuëatona ayaimantapi,’ tapon.

⁴ Ca nohuanton co natantochináchinhuëꞌ cancantaton, imaquiarinquëmaꞌ. Napoaponahuë imaquihuachinquëmaꞌ, sontaronënpita huëntonënë chachin ataꞌhuantarahuë. Inapotohuato, Sinioroco ninahuëso yaꞌipi iquipitoroꞌsa nitotapi,” itërin. Yosë camaitërinso chachin israiroꞌsa nipi.

⁵ Inapoasoi Iquipito copirnosoꞌ, israiroꞌsa taꞌarapiso shaꞌhuitopi. Ina natanahuaton, nisha cancantërin huachi. Catahuapisopita huaꞌanoꞌsantaꞌ, nisha cancantopi: “¡Maꞌhuantacha canpoaso ninëhua paya! ¿Maꞌmarëcha israiroꞌsa aꞌparëhua nicaya? iporapo huachi ¿Inta canpoa marëꞌ sacatapon?” nitopi.

⁶ Inapochin yonquiaton, ahuëtacaso toronanën tapacaiso marëꞌ piyapinënpita camairin. Inaquë yaꞌconahuaton, yaꞌipi sontaronënpita quëparin.

⁷ Yaꞌipi toronanoꞌsa Iquipitoquë yaꞌhuërinsoꞌ, quëparapi. Huaꞌanoꞌsantaꞌ, saota pasa toronan noya noya nininsopitaquë paꞌsapi. Aꞌnaya aꞌnaya toronanquë aꞌnara sontaro huaꞌan paꞌsarin.

⁸ Sinioro nohuanton copirno co natantochináchinhuëꞌ cancantaton, israiroꞌsa imasarin. Chiníquën nanantatona pipipisoꞌ nani nicaponahuëꞌ, imasarin.

⁹ Iquipitoroꞌsasoꞌ, yaꞌipi sontaronënpitarë chachin israiroꞌsa imasapi. Aꞌnaquën toronanoꞌsaquë, aꞌnaquënso cahuarioroꞌsaquë imasapi. Paꞌsahuatonaꞌ, Quëhuai marë yonsanquë notëonpi. Chinotacaiso marëꞌ Yosëri shaꞌhuitërintaquë yaꞌcarionpi.

¹⁰ Yaꞌcaritapiso quënanatonaꞌ, israiroꞌsaso paꞌpi paꞌyanpi. Paꞌyanatonaꞌ, chiníquën Yosë nontopi: “Sinioro catahuacoi,” itopi.

¹¹ Moisësënta itaponaꞌ: “¡Maꞌmarëta Iquipito quëran ocoirancoi! Iso inotëroquë quiyasoꞌ tëpaponacoi. Iquipitoquësoꞌ poꞌoroꞌ yaꞌhuëpirinhuëꞌ. Ina quëran ocoyatoncoi panca tëhuëran.

¹² Coꞌta inaquë chachin: ‘Tananpitocoi iquipitoroꞌsa marëꞌ sacachii,’ itërainquën. Isëquë quiyasoꞌ chiminapoi. Iquipitoroꞌsa marëꞌ sacatarai naporini, noya noya niitonhuëꞌ,” itopi.

^13-14 Napotopirinahuëꞌ, Moisësëriso itapon: —¡Ama paꞌyancosohuëꞌ! ¡Chiníquën cancantocoꞌ! Sinioro chachin nichaꞌërinpoasoꞌ, ipora niꞌsaramaꞌ. Inari canpita yaꞌhuërënamën ahuëtaton, iquipitoroꞌsa minsëarin. Napoaton co huachi onporo tëranta inapita quënanaramahuëꞌ, itërin.

¹⁵ Naporoꞌ Siniorori Moisësë itapon: —Co catahuaꞌhuanquënso marëꞌ nontaancoso yaꞌhuërinhuëꞌ. Israiroꞌsa pacacaiso tëhuënchinsoꞌ, camaiquëꞌ.

¹⁶ Quëmanta huaranën ihuëtaton, marë patomaiquëꞌ. Yaniro paꞌtatonaꞌ, piyapinëhuëpita pëntonacaiso marëꞌ inapotëquëꞌ.

^17-18 Ca nohuanton iquipitoroꞌsa co natantochináchinhuëꞌ cancantatonaꞌ, imaponëmaꞌ. Napoaponahuëꞌ, cari ataꞌhuantarahuë. Copirno, sontaronënpita, toronanënapita, inapitarë chachin minsëarahuë. Inapotohuato, yaꞌipi iquipitoroꞌsa nitotapi: “Tëhuënchachin israiroꞌsa Yosënënasoꞌ, chini chiníquën nanantërin,” tosapi.

^19-20 Moisësëri camaihuachina, israiroꞌsa Quëhuai marë parti paꞌsapi. Iquipito sontaroꞌsarintaꞌ, aquëran imaquiapi. Naporoꞌ Sinioro anquëninëonta quëchitëraponahuëꞌ, Israiro huënton aquëchitahuaton, piquëran niacorin. Chitoro naporopi nininsonta inapochachin ninin. Inapoatonaꞌ, cato huëntoni chachin huancanapipi. Israiroꞌsasoꞌ, chitorori pën pochin niꞌton, noya pacacaiso marëꞌ aꞌpintërarin. Iquipitoroꞌsaso nipirinhuëꞌ, yaráton chitoro pochin nicaton, co manta aꞌpintërinhuëꞌ. Napoaton yaꞌipi tashi imapirinahuëꞌ, co nanitopihuë israiroꞌsa icantacaisoꞌ.

²¹ Moisësë marë parti huaranën ihuërin. Ihuëpachina, Yosë nohuanton naporo tashi piꞌi pipirin parti quëran, panca ihuan huëꞌnin. Yaꞌipi tashi chiníquën ihuantohuachina, marë patomairin huachi. Patomairin niꞌton, panca ira pochin yaniro yaꞌnorin.

²² Ahuënan quëran iꞌ paira pochin nisarin, inchinan quëraontaꞌ, napopin chachin niꞌton, inataquëchin israiroꞌsa pëntonapi huachi.

²³ Iquipito copirnontaꞌ, sontaronënpitarë chachin israiroꞌsa imapi. Toronanënapita, cahuarionënapita, inapitarë chachin huancanaquë huarëꞌ imapi.

²⁴ Imasapirinahuë tahuëri yaꞌcari nisapasoꞌ, Yosëri iquipitoroꞌsa maꞌsha onpotacaso yonquirin. Naporopi chitoro pën pochin yaꞌnorin quëran, panca maꞌsha onpotërin. Napoaton iquipitoroꞌsa panca paꞌyanpi.

²⁵ Naporahuaton, toronanoꞌsa tahuinamën atachitërin. Atachitohuachina co huachi nanitopihuë manocaisoꞌ. Naporoꞌ iquipitoroꞌsaꞌ, noncacá topi: “¡Huëco israiroꞌsa patahuaꞌ! ¡Sinioro chinotopisoꞌ, ahuëarinpoa huachi!” topi.

²⁶ Naporoꞌ Yosëri, Moisësë itapon: “Huaranën marë parti ihuëantaquëꞌ. Naquëranchin marë inachachin niantaꞌin. Iquipitoroꞌsa imaquiarinëmasoꞌ, toronanënaꞌ, cahuarionënaꞌ, inapitarë chachin imochin,” itërin.

²⁷ Moisësë Yosë natëton, huaranën ihuërin. Nani tahuëri nisahuachina, marësoꞌ inachachin niantarin huachi. Iquipitoroꞌsaso taꞌarapirinahuëꞌ, iiri imotërin.

²⁸ Yaꞌipi sontaroꞌsaꞌ, toronanënaꞌ, cahuarionënaꞌ, inapitarë chachin iiri imotërin huachi. Co aꞌnaya tëranta chaꞌërinhuëꞌ.

²⁹ Israiroꞌsaso nipirinhuëꞌ, noya pëntonpi. Ahuënan quëran inchinan quëran iꞌ paira pochin ninin niꞌton, inataquëchin noya pëntonpi.

³⁰ Ina pochin naporo tahuëri Yosëri israiroꞌsa nichaꞌërin. Iquipitoroꞌsari huaꞌqui huaꞌanëntopirinahuëꞌ, nichaꞌërin. Iquipito sontaroꞌsa chimiitopisosoꞌ, marë yonsaiquë yanpoáporin niꞌpi.

³¹ Siniorori chiníquën nanantaton iquipitoroꞌsa anaꞌintërin. Ina niꞌsahuatonaꞌ, israiroꞌsasoꞌ Yosë tëꞌhuatopi: “Tëhuënchachin Yosë catahuarinpoaꞌ. Moisësëntaꞌ, ina natëton catahuarinpoaꞌ,” taꞌtona natëtopi huachi.