Éxodo 12 - Chayahuita (Shahui)

Pascoa cosharo capacaiso marëꞌ aꞌchintërinsoꞌ

¹ Moisësë, Aaron, inapita Iquipitoquë chachin niꞌsoiꞌ, Yosëri shaꞌhuitërin israiroꞌsa shaꞌhuitacaiso marëꞌ:

² “Canpita marësoꞌ iso yoqui, yaꞌnatiirinso yoqui nisarin. Naporahuaton, iso yoqui naꞌcon naꞌcon yonquiaramaꞌ.

^3-5 Yaꞌipi israiroꞌsa nitotacaiso marëꞌ shaꞌhuitocoꞌ. Ipora yoquiráchin shonca tahuëritahuasoꞌ, nani pëiquë yaꞌhuëramasoꞌ, aꞌnara carniroaꞌhuahuë nipon, chipoaꞌhuahuë nipon mainaꞌ. Tëpatona capacaiso marëꞌ nisha acoꞌinaꞌ. Aꞌna piꞌipitërinsoꞌ. Co máquën tëranta tëhuërinsohuëꞌ inapochinaꞌ. Napoaponahuëꞌ, nanicaiso tantiainaꞌ. Aꞌnaquën pëiquë co naꞌashahuëꞌ nipachina, niyaꞌyoranpisoꞌ capini nipatomatatona caꞌinaꞌ.

⁶ Nani pëꞌtahuanëna nisha acohuachinaꞌ, cara tahuëri tapainaꞌ. Tahuëririnquë, piꞌi yayaꞌconahuaso tëpaꞌinaꞌ. Nani tëpahuachinaꞌ, huënainën mainaꞌ.

⁷ Huënaiꞌ mapiso masahuatonaꞌ, yaꞌcoana chinpirinso nararoꞌsaꞌ, pashichinaꞌ.

⁸ Naporo tashi pëꞌtahua tëpapisoꞌ, chinpinan caꞌinaꞌ. Pan co ahuëpocatopinanhuëꞌ poꞌochinaꞌ. Main pacatororë chachin caꞌinaꞌ.

⁹ Ama napoaponahuëꞌ, nanpi caꞌinasohuëꞌ. Co poꞌmopinan tëranta capacaiso yaꞌhuërinhuëꞌ. Chinpinan caꞌinaꞌ. Motën, paꞌinantën, chiꞌchinën, inapitanta chinpinan caꞌinaꞌ.

^10-11 Naporahuaton aꞌmoanpi quëran chachin aꞌnaroáchin caꞌinaꞌ. Sapatënënanta co ocoiaponaraihuëꞌ, huaranëna sëꞌquëpiquëranchin caꞌinaꞌ. Manorahuatona yapaꞌsapiso pochin caꞌinaꞌ. Ama tahuëririnquë capacaiso marëꞌ pëꞌsochinasohuëꞌ. Ca yonquiatomaco pascoa pita nisarama niꞌton, pëꞌsotohuatamasoꞌ, ahuiquitacaso yaꞌhuërin.

¹² Naporo tashi chachin yaꞌipi Iquipito roꞌtë paꞌtato, iquipitoroꞌsa paninanëna tëpaarahuë. Pëꞌtahuaroꞌsanta quëmapi nininso yaꞌnan huaꞌhuatopisopita, tëpaarahuë. Caso Sinioroco niꞌto, naporahuëso chachin nisarin. Iquipitoroꞌsa inapotohuato, mamanshinëna atapanarahuë.

¹³ Canpitaso nipirinhuëꞌ, co tëꞌhuatamaso yaꞌhuërinhuëꞌ. Yaꞌcoana chinpirinso nararoꞌsa huënaiquë pashitëramasoꞌ quënanpato, paninantëramasoꞌ co maꞌsha onpotarahuëꞌ. Topinan naꞌhuëtaranquëmaꞌ.

^14-20 Ipora quëran huarëꞌ canpitasoꞌ, yaꞌipinquëma ca yonquiatomaco, iso pita naꞌhuëcamaso yaꞌhuërin. Huiꞌnamapita, shiparimapita, inapitanta inapoápaiso yaꞌhuërin. Iquipito quëran ocoiranquëmasoꞌ yonquicamaso marëꞌ, inapoaramaꞌ. Canchisë tahuëri huaꞌquiarin. Iso yoquiquëráchin naꞌhuëpomaꞌ. Shonca catapini tahuëri nanihuachin, iꞌhuanahuanquë nispirataramaꞌ. Cato shonca aꞌna tahuëriquë huarëꞌ iꞌhuanahuanquë taꞌhuantapon. Caniaritërinso tahuëri niyontonatomaꞌ, yonquiaramaco. Taꞌhuantërinso tahuërintaꞌ, niyontonatoma yonquiaramaco. Naporo tahuëriꞌsaꞌ, co sacataramahuëꞌ. Cosharo nicacamarëáchin piꞌpian sacataramaꞌ. Insëquë tëranta yaꞌhuëpatamaꞌ, canchisë tahuëri chachin pan co ahuëpocatopinanhuë caꞌsaramaꞌ. Caniaritërin quëran, taꞌhuantaquë huarëꞌ inapoaramaꞌ. Co piꞌpian tëranta pan ahuëpocatërinso tapapomahuëꞌ. Inso tëranta naporo tahuëriꞌsa pan ahuëpocatopinan caꞌpachinaꞌ, Israiro huënton quëran ocoicaso yaꞌhuërin. Nisha piyapiꞌsa tëranta napohuachinaꞌ, inapotamaso yaꞌhuërin, tënin Yosë,” itopi.

Pascoa cosharo caꞌpisoꞌ

²¹ Moisësë, Israiro ansianoꞌsa amatahuaton, itapon: “Yaꞌipi israiroꞌsa shaꞌhuitocoꞌ. Carniroaꞌhuanënahuë nipon, chipoaꞌhuanënahuë nipon macatona tëpaꞌinaꞌ. Pascoa cosharo capacaiso marëꞌ inapochinaꞌ.

²² Tëpahuachina huënainën sënanquë mainaꞌ. Ina quëran isopo naraaꞌhuaya sëꞌpaquën sëꞌtamorahuatonaꞌ, huënaiquë iꞌcomiichinaꞌ. Inapotatonaꞌ, yaꞌcoananëna yonsanquë pashichinaꞌ. Nani pashitohuachina, co huachi inso tëranta pëinëna quëran pipicaisoꞌ, yaꞌhuërinhuëꞌ. Tahuëririnquë huarëꞌ pipiponaꞌ.

²³ Inapotohuatëhuaꞌ, Yosë noya niꞌsarinpoaꞌ. Paninanënpoapita co tëpaponhuëꞌ. Iquipitoroꞌsa pëinënaquëso nipirinhuëꞌ, tëpaton anquëniri paninanëna tëparaꞌpiapon.

²⁴ Canpitaso nipirinhuëꞌ, ipora quëran huarëꞌ Yosë aꞌchintërinpoasopita, natërápamaso yaꞌhuërin.

²⁵ Yosë nani shaꞌhuitërinpoa noꞌpaꞌ quëtiinposoꞌ. Inaquë yaꞌhuëpatamaꞌ, iso pita chachin nani piꞌiquë naꞌhuërápamaso yaꞌhuërin.

^26-27 Huiꞌnamapita maꞌsona tapon pascoa cosharo caꞌnamasoꞌ, natanarinquëmaꞌ. Natanpachinquëmaꞌ, canpitarisoꞌ aꞌchintaramaꞌ: ‘Iso mini pëꞌtahua pascoa tahuëri tëparëhuaꞌ. Yosë noya nicatëhua capacaso marëꞌ inapotërëhuaꞌ. Iráca shimashonënpoapita Iquipitoquë parisitopi. Parisitapirinahuëꞌ, Yosëri nichaꞌëcaso marëꞌ iquipitoroꞌsa paninanënaꞌ tëparin. Canpoaso nipirinhuëꞌ paninanënpoaꞌ, co naporo chiminpihuëꞌ. Ina yonquiatëhua coshatërëhuaꞌ,’ itocoꞌ,” itërin. Moisësë noninsoꞌ tiquihuachina, yaꞌipi Israiro ansianoꞌsa Yosë chinotopi. Isonpi quëran noꞌpaquë huarëꞌ monshorahuatona chinotopi.

²⁸ Ina quëran israiroꞌsasoꞌ, Siniorori Moisësë, Aaron, inapita camairinso chachin nipi.

Shoncaro anaꞌintacaso marëꞌ paninanoꞌsa tëparinsoꞌ

²⁹ Yono tashi nisapasoꞌ, yaꞌipi Iquipitoquë paninanoꞌsa quëmapi nipisoꞌ, Siniorori tëparin. Copirno huiꞌnin paninantërinsontaꞌ, chiminin. Inari paꞌpin huaꞌanëntacaso nani catahuarapirinhuëꞌ, chiminin. Tashinan pëiquë apinaꞌpiroꞌsa paninantopisopitantaꞌ, chiminpi. Pëꞌtahuanëna quëmapi yaꞌnan huaꞌhuatopiso quëran huarëꞌ chiminpi.

³⁰ Naporoꞌ copirnosoꞌ, capayatërin. Ina catahuapisopita huaꞌanoꞌsantaꞌ, capayatopi. Capayatopirinahuëꞌ, nani pëiquë naꞌnëroꞌsaꞌ, noncaromiatopi. Co aꞌna pëiquë tëranta chimipi pahuaninhuëꞌ.

³¹ Napohuachina copirnori, Moisësë, Aaron, inapita amataantarin. Canconpachinara itapon: “Paco huachi yaꞌhuërahuë quëran. Yaꞌipi israiroꞌsanta paatona Yosë chinochinaꞌ.

³² Ohuicanëmaꞌ, ohuacanëmaꞌ, yaꞌipi inapitanta quëpacoꞌ. Iꞌhua quëran huarëꞌ apiramaco niꞌquëhuarëꞌ, paco huachi. Ca marënta Yosë nontoco ama huachi anaꞌinchincosohuëꞌ,” itërin.

³³ Iquipitoroꞌsantaꞌ: “Yaꞌipicoi chiminapoi nimara,” taꞌtonaꞌ, israiroꞌsa amanorapi.

^34-36 Israiroꞌsasoꞌ, Moisësëri camairinso chachin, iquipitoroꞌsa maꞌsha maꞌparapi: Maꞌsha oro quëran, prata quëran, ina quëranpita nipisoꞌ maꞌpatopi. Aꞌmocaisontaꞌ, maꞌpatopi. Inapita natantohuachinara quëtopi. Yosë nohuanton iquipitoroꞌsa co noꞌhuitopihuëꞌ. Maꞌpitaso natanpachinara, quëtopi. Inapotatona iquipitoroꞌsa nanquianapi. Ina quëran pan co ahuëpocatopinanhuë nicacaiso marëꞌ tapapisonta soꞌquëtopi. Acopisorë chachin, quëpacaiso marëꞌ aꞌmopiquë soꞌquëtopi. Soꞌquëtahuatonaꞌ, aꞌnaya aꞌnaya apitëntopi.

Iquipito quëran pipipisoꞌ

³⁷ Israiroꞌsasoꞌ, Namisisi ninano quëran pipirahuatonaꞌ, Socoto parti canconpi. Saota pasa huaranca quëmapiꞌsa chiníquënoꞌsa nipisoꞌ, paꞌsapi. Sanapiꞌsaꞌ, huaꞌhuaroꞌsaꞌ, mashoyaroꞌsaꞌ, inapitaso co pichipihuëꞌ.

³⁸ Notohuaroꞌ ohuicaroꞌsaꞌ, ohuacaroꞌsa inapita quëparapi. Notohuaroꞌ nisha nisha piyapiꞌsantaꞌ, imatapi.

³⁹ Iquipitoroꞌsari yaꞌhuëpi quëran pipicaisoꞌ amanotopi. Napoaton, co caracaiso tëranta anpiaponaraihuëꞌ, pipipi. Napoaton pan co ahuëpocatopinanhuë nicacaiso marëꞌ tapapisoꞌ mapi. Masahuatonaꞌ, huancopi anpipi huachi.

^40-41 Israiroꞌsasoꞌ, catapini pasa cara shonca piꞌipi Iquipitoquë yaꞌhuëpi. Iquipitoquë yaꞌnan paꞌpiso tahuëri naniso chachin, inatopa quëran pipirapi. Sontaroꞌsa Yosëri camairinso pochin, pipipi huachi.

⁴² Pipipiso tashiꞌ, yaꞌipi tashi Yosëso israiroꞌsa aꞌpaiton niꞌsárin. Iquipito quëran ocoicaso marëꞌ naporin. Napoaton ina yonquiatonaꞌ, pascoa tashi nanihuachina, co inso Israiro quëmapi tërantaꞌ, huëꞌëcaso yaꞌhuërinhuëꞌ.

^43-51 (-)