Éxodo 10 - Chayahuita (Shahui)

Posaro anaꞌintacaso marëꞌ sëquërëꞌ yaꞌconinsoꞌ

¹ Yosëri Moisësë itaantapon: “Paaton copirno niꞌcoantaquëꞌ. Nani maꞌsha nanitapato paꞌpi huëhuëpiro nininsopita acoarahuë ina anaꞌintaꞌhuaso marëꞌ. Ca nohuanton inasoꞌ, catahuarinsopita huaꞌanoꞌsarë chachin co natantochináchinhuëꞌ cancantapi.

² Iquipitoroꞌsa inapotohuato, huiꞌnamapita, shaꞌhuitohuatamaꞌ nitotapi huachi. Shiparimapitanta nitotaponaꞌ. Iquipitoroꞌsaso chinitapirinacohuëꞌ, cariso nipirinhuëꞌ, mona poꞌmotato paꞌpi huëhuëpiro nininsopita anaꞌintaꞌhuaso marëꞌ acorahuë: ‘Tëhuënchachin inaso Sinioro, israiroꞌsanpoa chinotërëhuasoꞌ,’ taꞌcamaso marëꞌ napotarahuë,” itërin.

³ Yosëri napotërinso chachin Moisësë, Aaron, inapita copirno nicapona paꞌpi. Quënanconahuatonaꞌ, itaponaꞌ: “Naporin Yosë: ‘¿Onporo huarëta tëꞌhuatatonco natëponco? Piyapinëhuëpita chinotinacoso marëꞌ aꞌpaquë paꞌinaꞌ.

⁴ Coꞌsoꞌ aꞌpahuatanhuëꞌ, tashiraya chachin yaꞌhuëramaso roꞌtëquë, Yosë, sëquërëꞌ aꞌpatarinquëmaꞌ. Chitoro pochin anoantarinquëmaꞌ.

⁵ Yaꞌipi yaꞌhuëramaso parti naꞌatarinquëmaꞌ. Sharoꞌsaꞌ, nararoꞌsaꞌ, inapita iꞌhua ocai chaꞌëtërinsoꞌ, pëꞌyatarinquëma huachi.

⁶ Yaꞌipi Iquipito roꞌtë yanquëëtarin. Quëma pëinënquë, catahuarinënquënsopita huaꞌanoꞌsa pëinënaquë, piyapinënpita pëinënaquënta yaꞌcontarin. Tatamaꞌ, shimashonëma co inapita tëranta inapochin niꞌchinpihuëꞌ,’ tënin,” itoonpi. Itahuatona paꞌpachinara,

⁷ catahuapisopita huaꞌanoꞌsari copirno itaponaꞌ: “¡Ama huachi ina quëmapi aquëtë huarëꞌ aparisitápainpoaso nohuantahuasohuëꞌ! ¡Nani yaꞌipi yaꞌhuërëhuaso noꞌpaꞌ, Yosëri tapiarin huachi! Aꞌpaquë huachi paaton israiroꞌsapitarë chachin Yosë chinochin,” itopi.

⁸ Napotohuachina Moisësë, Aaron, inapita amataantarahuaton itapon: —Noyapaꞌ, paatoma nipachin Yosë chinotocoꞌ. Napoaponahuëꞌ: ¿Inpitata paꞌsaramaꞌ? inaꞌton shaꞌhuitoco, itërin.

⁹ —Yaꞌipicoi pacaꞌhuaiso yaꞌhuërin: Huiꞌnapiꞌsaꞌ, mashoyaroꞌsa inapita paꞌsapi. Huiꞌnahuëipita huaꞌhua nipiso quëran huarëꞌ, quëpaarai. Ohuicanëhuëipita, ohuacanëhuëipita, inapitanta quëpaꞌhuaiso yaꞌhuërin. Yosë marëꞌ panca pita nisarai niꞌton, yaꞌipi inapita quëpaꞌhuaiso yaꞌhuërin, itërin.

¹⁰ Napotopirinhuëꞌ, copirnoso taantarin: —¡Naporinchi paya! Yosë chinotëraiso catahuarincoi. Yaꞌipi huiꞌnahuëipitarëꞌcoi chachin pacapoi ¿topiramahuë ti? ¡Co napoaramahuëꞌ! ¿Coꞌta yataꞌananpitomaco napoaramaꞌ?

¹¹ Napopiramahuëꞌ, co yaꞌipinquëma pacamaso yaꞌhuërinhuëꞌ. Tëhuënchachin Yosë yachinotohuatamaꞌ, quëmapimasáchin pacoꞌ, itërin. Itahuaton, piyapinënpita camairin Moisësë, Aaron, inapita iquianan quëran aꞌpacaisoꞌ.

¹² Aꞌpapirinahuëꞌ, Yosëriso Moisësë itapon: “Huara sëꞌquëran quëran, sëquërëroꞌsa huëcacaiso marëꞌ camaiquëꞌ. Huëꞌpachinaꞌ, yaꞌipi Iquipito roꞌtëquë nararoꞌsaꞌ, sharoꞌsaꞌ, inapita ocai chaꞌëtërinso pëꞌyainaꞌ,” itërin.

^13-14 Moisësësoꞌ, Yosë natëton anquirin. Anquihuachina, naporo chachin Yosë nohuanton ihuan huëꞌsarin huachi. Piꞌi pipirin parti quëran huëꞌsarin. Yaꞌipi tahuëri, yaꞌipi tashi ihuantarin. Ina ihuani chachin sëquërëꞌ quënin. Huaꞌhuayátërahuë niꞌton, yaꞌipi Iquipito roꞌtë imotërin. Iráca quëran huarëꞌ co ina nápo sëquërëꞌ niꞌchinpihuëꞌ. Aꞌna tahuërinta co huachi ina pochin yaꞌhuëantaponhuëꞌ.

¹⁵ Sëquërësáchin niꞌton, co huachi noꞌpaꞌ quënanpihuëꞌ. Yaꞌipi sharoꞌsaꞌ, yaꞌipi nitopisoꞌ, inapita pëꞌyarin. Ocai quëran chaꞌëpirinahuëꞌ, sëquërëri pëꞌyamiatërin huachi.

¹⁶ Copirnori aꞌnaroáchin Moisësë, Aaron, inapita amataantarahuaton: “Tëhuënchachin co Yosë natëtohuëꞌ oshahuanahuë. Canpitanta co natëtënquëmahuëꞌ, tëhuërahuë.

¹⁷ Oshahuanpirahuëꞌ, ama ina yonquicosohuëꞌ. Onpopionta Yosë nontoco sëquërëroꞌsa aꞌpachincoi. Coꞌsoꞌ paꞌpachinahuëꞌ, tëpaponcoi quiyasoꞌ,” itërin.

^18-19 Ina natanahuatonaꞌ, copirno pëinën quëran pipipi. Pipirahuaton Moisësë copirno marëꞌ Yosë nontërin. Napohuachina Yosë nohuanton panca ihuan paantarin. Piꞌi yaꞌconinso parti quëran huëꞌsahuaton, yaꞌipi sëquërëꞌ quiquirin. Quëhuaiꞌ marëꞌpaꞌ tëꞌyaitërin. Co aꞌnaya tëranta Iquipitoquë acorinhuëꞌ.

²⁰ Napoaponahuëꞌ, Yosë nohuanton copirno co natantochináchinhuëꞌ cancantërin. Ina pochin cancantaton co israiroꞌsa yaaꞌparinhuëꞌ.

Iscono anaꞌintacaso marëꞌ tashitopisoꞌ

²¹ Naquëranchin Yosëri, Moisësë camayantarin: “Tanpaquën inápaquë ihuëquëꞌ. Naporahuaton, yaꞌipi Iquipito roꞌtëquë tashitacaiso marëꞌ camaiquëꞌ. Ca nohuanton carichináchin tashiapon,” itërin.

^22-23 Yosë natëton Moisësë tanpaquën ihuëpachina, yaꞌipi Iquipitoquë tashitopi. Cara tahuëri naporin. Paꞌpi tashi niꞌton, iquipitoroꞌsa co nanitopihuëꞌ niquënanacaisoꞌ. Co pacacasonta nanitopihuëꞌ. Israiroꞌsa yaꞌhuëpiquëso nipirinhuëꞌ, inachachin tahuëri nisarin.

²⁴ Naporoꞌ copirnosoꞌ, Moisësë amataantarin. Huëꞌpachina itapon: —Paco nipachin Yosënëma chinotocoꞌ. Huaꞌhuaroꞌsanta quëpacoꞌ. Napoaponahuëꞌ, ama ohuacanëmaꞌ, ohuicanëmaꞌ, inapitaso quëpacosohuëꞌ, itërin.

^25-26 —Co naporinhuëꞌ. Ohuacanëhuëipita, ohuicanëhuëipita, inapitanta quëpaꞌhuaiso yaꞌhuërin. Co nitochátëraraihuëꞌ onposona Yosë marëꞌ tëpaꞌhuaisoꞌ. Canconpatoi, inaquë Yosë shaꞌhuitaponcoi. Naporahuaton, canpitanta pëꞌtahuanëma quëtamacoiso yaꞌhuërin. Yosë chinotatoi tëpaꞌhuaiso marëꞌ quëtaramacoi, itërin.

²⁷ Naquëranchin Yosë nohuanton copirno co natantochináchinhuëꞌ cancantërin. Napoaton co israiroꞌsa aꞌpacaso nohuantërinhuëꞌ.

²⁸ Ina pochin cancantaton Moisësë itapon: —¡Paquë huachi! ¡Ama huachi onporo tëranta huëcapaiantacosohuëꞌ! ¡Naquëranchin quënaantahuatënquën atëpataranquën huachi! itërin.

²⁹ Napotohuachina Moisësënta tapon: —Noyapaꞌ. Quëma naporanso chachin mini nisarin. Co huachi niquënanarihuëꞌ, itërin.