Éxodo 1 - Chayahuita (Shahui)

Israiroꞌsa Iquipitoquë parisitopisoꞌ

^1-4 Iráca Cacopo huiꞌninpitarë chachin Canaan parti yaꞌhuëpirinahuëꞌ, ina quëran Iquipito parti yaꞌhuëcaiso marëꞌ paꞌpi. Inapitasoꞌ, israiroꞌsa itopi antaꞌ. Saꞌinaꞌ, huiꞌninapitarë chachin paꞌpi. Cacopo huiꞌninpitasoꞌ, isopita: Nopino, Simion, Nihui, Cota, Isacaro, Saporono, Mincamin, Tano, Nipitari, Caro, Asiri, inapita.

⁵ Inapitaso huiꞌninpitarë chachin, canchisë shonca yaꞌpi icanpi. Aꞌnara Cacopo huiꞌnin Cosi itopisoꞌ, naporo nani Iquipitoquë yaꞌhuërarin.

⁶ Huaꞌqui yaꞌhuapona pochin Cosisoꞌ, iinpitarë chachin taquipi.

⁷ Napoaponahuëꞌ, naꞌa huiꞌninapita yaꞌhuëtopi niꞌton, huaꞌqui quëran paꞌpi notohuaroꞌ naꞌapi. Yaꞌipi Iquipito noꞌpaquë yanquëatona yaꞌhuëpi.

⁸ Huaꞌqui quëran nasha copirno Iquipitoquë huaꞌanëntërin. Cosisoꞌ, nani iráca chiminin niꞌton, naporinso co nitotërinhuëꞌ. Napoaton co israiroꞌsa nosoroatonhuëꞌ, piyapinënpita itapon:

⁹ “Niꞌcoꞌ. Israiroꞌsaso canpoa quëran naꞌcon naꞌcon naꞌatonaꞌ, chini chiníquënoꞌsa nisapi huachi.

¹⁰ Iporaso ama aquëtë naꞌacaiso marëhuëꞌ, paꞌahua maꞌsona tëranta onpotatëhua yaꞌcopiaꞌahuaꞌ. Coꞌsoꞌ inapotohuatëhuahuëꞌ, aquëtë chachin naꞌaponaꞌ. Inimicoroꞌsa yaahuëpachinënpoaꞌ, ina inahuanta catahuatohuachinaꞌ, minsëarinënpoaꞌ. Inapoatona patohuachinënpoaꞌ, co huachi piyapihuanarëhuahuëꞌ,” itërin.

¹¹ Ninapotatonaꞌ, chiníquën asacatopi. Sacato huaꞌanoꞌsa acorahuatonaꞌ, inapitari chiníquën camaipi. Huaraon copirno cosharo tapacaso marëꞌ ninanoroꞌsa aocoipi. Piton, Namisisi, inapita itopisoꞌ.

¹² Inapotatona aparisitopirinahuëꞌ, naꞌcon naꞌcon naꞌantapi. Napoaton iquipitoroꞌsari paꞌpi tëꞌhuatopi.

^13-14 Tëꞌhuatatonaꞌ, israiroꞌsa chiníquën aparisitopi. Co pahuëraponaraihuëꞌ asacatopi. Natricho nicacaiso marëꞌ noꞌpaꞌ atoꞌcapi. Iminënaquënta ahuëanaquëranchin chiníquën asacatopi. Napotopi.

Israiroaꞌhuaroꞌsa tëpacaiso marëꞌ copirno camaitërinsoꞌ

¹⁵ Naporo tahuëriꞌsa Iprio sanapiꞌsa huaꞌhua iquitohuachinara, cato sanapiꞌsari catahuarin. Ina sanapiꞌsasoꞌ: Poa, Sihuira, inapita itopi. Copirnori inapita përasahuaton, itapon:

¹⁶ —Israironoꞌsa huaꞌhua iquitohuachinaꞌ, noya niꞌcoꞌ. Sanapiaꞌhuaya nipachin, noya nanpiꞌin. Quëmapiaꞌhuaso nipirinhuëꞌ, ¡tëpacoꞌ! itërin.

¹⁷ Napotopirinhuëꞌ, inapitaso Yosë naꞌcon naꞌcon tëꞌhuatatonaꞌ, co quëmapiaꞌhuaroꞌsa tëpapihuëꞌ.

¹⁸ Napohuachina, copirnori amataantarahuaton: —¿Onpoatomata co quëmapiaꞌhuaroꞌsa tëparamahuëꞌ? itërin.

¹⁹ —Coꞌta israironoꞌsasoꞌ, co iquipitoronoꞌsa pochinhuëꞌ. Chiníquënoꞌsa niꞌton, coꞌhuara quiya canshátërasocoihuëꞌ, inahuara huaipi, itopi.

^20-21 Inapoatona israiroꞌsasoꞌ, aquë aquëtë naꞌatona chini chiníquën nisapi. Poa, Sihuira, inapitanta Yosë natëtona noya nipi niꞌton, inari catahuarin naꞌa huaꞌhuina yaꞌhuëtopi.

²² Huaraonso nipirinhuëꞌ, piyapinënpita itapon: “Israiroaꞌhuaroꞌsa quëmapiaꞌhuaya nasitohuachin, iꞌquë tëꞌyaitoco chimiichin. Sanapiaꞌhuaroꞌsaso nipirinhuëꞌ, noya nanpiꞌinaꞌ,” itërin.