Esdras 3 - Chayahuita (Shahui)

Sinioro chinotaantapisoꞌ

¹ Pascoa yoqui quëran canchisë yoqui nanihuachina, israiroꞌsaso imënamëaꞌhuaroꞌsa pita naꞌhuëpi. Naporoꞌ yoquiquë yaꞌhuëpi quëran huëꞌsahuatonaꞌ, Quirosarinquë niyontonpi. Yaꞌipiya quëran niyontonpi co pahuanpihuëꞌ.

² Naporoꞌ corto huaꞌansoꞌ, Cosoi itopi. Inaso paꞌpin, Cosata itopi. Saratiro huiꞌnin Soropapiro itopisonta huaꞌan yaꞌconin. Ina cato huaꞌanoꞌsa quëmopinënpitarë chachin Sinioro chinotacaiso marëꞌ artaro nipi. Iráca Moisësësoꞌ Sinioro piyapinën niꞌton, pënëntaton ninshitërin. Ina camaitërinso chachin maꞌsha tëpatonaꞌ, oshanëna marëꞌ inaquë yaꞌipi ahuiquitopi.

³ Naporoꞌ artaro nicaponaꞌ, noyá acochanpi. Inaquë yaꞌhuëantapisopita tëꞌhuatatonaꞌ, ina pochin acopi. Inapoatona nani tashiramiachin nani iꞌhuaraya maꞌsha tëpapisoꞌ, Sinioro chinotacaiso marëꞌ yaꞌipi ahuiquitopi.

⁴ Naporahuaton pënëntërinsoꞌ quiricaquë camaitërinso chachin, imënamëaꞌhuaroꞌsa pita naꞌhuëpi. Ina pitaquënta nani tahuëri maꞌsharoꞌsa tëpatonaꞌ, oshanëna marëꞌ yaꞌipi ahuiquitopi. Onposona nani tahuëri ahuiquitacaiso camaitërinso chachin nipi.

⁵ Nani tahuëri oshanëna marëꞌ ahuiquitahuatonaꞌ, nani yoquiaꞌhuaraiꞌ pitaquënta inapopi. Nisha nisha Sinioro marëꞌ pita naꞌhuëcaiso yaꞌhuërinquëntaꞌ, inapopi. Inaquë chachin inahuara nohuanton Sinioro maꞌsha quëshihuachinara, ahuiquitopi.

⁶ Naporoꞌ yoqui yaꞌnatiirinso tahuëri quëran huarëꞌ, oshanëna marëꞌ maꞌsha tëpapisoꞌ yaꞌipi ahuiquitacaiso caniaritopi. Sinioro chinotacaso pëiꞌ co nishátëraponaraihuëꞌ, artaronën nipiquë inapotopi.

⁷ Ina quëran pëinaꞌpiroꞌsaꞌ, nontë camayoroꞌsaꞌ, inapita pahuërëpi. Cosharoꞌ, huino, tomaꞌ, inapitanta Tiro piyapiroꞌsa quëtopi. Siton piyapiroꞌsanta inapotopi. Inapitasoꞌ Nipano motopi quëran nonara ocoiatonaꞌ, marë quëpatomacaisoꞌ camaipi niꞌton, inapotopi. Siro copirno camaitërinso chachin nipi.

Sinioro chinotacaso pëi niantapisoꞌ

⁸ Soropapiro, Cosoi, corto huaꞌanoꞌsaꞌ, nihuiroꞌsaꞌ, yaꞌipi huënantapisopita, inapita Sinioro chinotacaso pëi niantacaisoꞌ caniaritaantapi. Canquintapi quëran huarëꞌ nani aꞌna piꞌi cato yoqui nisarin. Nihuiroꞌsa cato shonca naꞌcon piꞌipitopisoꞌ, huaꞌanoꞌsa pochin sacato camaitacaiso marëꞌ acopi.

⁹ Yaꞌipi sacato camaitacaiso marëꞌ isopita huaꞌanoꞌsa yaꞌhuëpi: Cosoi corto huaꞌan, Catomiri, Inatato, inapita huiꞌninpita, quëmopinënpita, inapita. Inapitasoꞌ Nihui huënton israiroꞌsaráchin.

¹⁰ Yosë chinotacaso pëi simintonën acoasoiꞌ, capa cancantatona Sinioro chinotopi. Corto huaꞌanoꞌsa Sinioro chinotai marëꞌ aꞌmopisoꞌ, aꞌmopi. Ina aꞌmosahuatonaꞌ, huanipi quëran Tronpitaroꞌsa pihuipi. Asahua quëran pipipisopita nihuiroꞌsantaꞌ, huaꞌna shari shariroꞌsa piꞌnipi. Napopi. Inapitaso iráca Tapi copirno camaitërinso chachin nipi.

¹¹ “Yosparinquën Sinioro,” itatonaꞌ, Yosë cantanën cantapi: “Sinioroso noya niꞌton, chinotahuaꞌ. Israiroꞌsanpoa nosororinpoasoꞌ, co nitiquiaponhuëꞌ,” topi. Inapoatona capa cancantopi. Capa cancantatona nonca, nonca charapi: “¡Ma noyacha Siniorosoꞌ! ¡Ina catahuarinpoa niꞌton, ina chinotacaso pëi simintonën nani acoarëhuaꞌ!” topi.

¹² Naꞌa corto huaꞌanoꞌsaꞌ, nihuiroꞌsaꞌ, ansianoroꞌsaꞌ, inapita masho masho nipisopitasoꞌ, iráca yaꞌhuërinsonta niꞌpi niꞌton, sëtopi. Inaso ataꞌhuantopirinahuëꞌ, inaquë chachin acoantarapi nicatonaꞌ, chiníquën naꞌnëpi. Inapitasoꞌ naꞌnëpirinahuëꞌ, naꞌcon naꞌcon capa cancantatonaꞌ: “Yai, yai,” charapi.

¹³ Napopi niꞌton, co natantochináchinhuëꞌ noncaropi. Aquë quëran huarëꞌ napopiso yaꞌcanin.