Efesios 6 - Chayahuita (Shahui)

Huaꞌhuaroꞌsantaꞌ pënëninsoꞌ

¹ Canpitantaꞌ apiaꞌhuaroꞌsaꞌ, pënënanquëmaꞌ. Tatamaꞌ natëcoꞌ. Mamamantaꞌ natëcoꞌ. Quisocristo imaramaꞌ niꞌton, inapita natëcamasoꞌ yaꞌhuërin.

^2-3 Yosë quiricanën quëran pënëninpoaꞌ. “Tatamaꞌ noya nicatomaꞌ, natëcoꞌ. Mamamantaꞌ natëcoꞌ. Natëhuatamaꞌ, Yosë naꞌcon catahuarinquëmaꞌ. Huaꞌquiꞌ noya yaꞌhuaramaꞌ,” tënin quiricanënquë. Ina pochin nicacasoꞌ Yosë naꞌcon naꞌcon nohuantërin.

⁴ Canpitantaꞌ iyaroꞌsaꞌ, huiꞌnamaꞌ noya pënëncoꞌ. Ama apira apira noꞌhuicosohuëꞌ. Apira apira noꞌhuihuatamaꞌ, co natantochináchinhuëꞌ cancantaponaꞌ. Co noyahuëꞌ nipachinaꞌ, sanoanan quëran pënëncoꞌ noya nicacaiso marëꞌ. Yosë nanamën noya aꞌchintocoꞌ Quisocristo imainaꞌ.

Sacatoroꞌsaꞌ pënëninsoꞌ

⁵ Patron marëꞌ sacatohuatamaꞌ, noya nicatomaꞌ, natëcoꞌ. Ama nonpintocosohuëꞌ. Quisocristo marëꞌ sacatarëso pochin cancantatomaꞌ, noya sacatocoꞌ.

⁶ Aꞌnaquënsoꞌ patroni niꞌpachinaꞌ, chiníquën sacatërin. Co niꞌpachinahuëꞌ, chiroton co sacatërinhuëꞌ. Canpitaso nipirinhuëꞌ patron co niꞌpirinquëmaontaꞌ, noya sacatocoꞌ Quisocristo noya niꞌinquëmaꞌ. Yosë natëtomaꞌ, yaꞌipi cancanëma quëran noya nicoꞌ.

⁷ Co piyapi marëáchin sacataramahuëꞌ. Sinioro imaramaꞌ niꞌton, ina marëꞌ sacataramaꞌ. Napoaton yaꞌipi cancanëma quëran sacatocoꞌ.

⁸ Noya nipatëhuaꞌ, Yosëꞌpaꞌ acanaarinpoaꞌ. Maꞌhuanoꞌsahuë nipon, piyapinënpitahuë nipon, yaꞌipinpoaꞌ noꞌtëquën shaꞌhuitarinpoaꞌ. Insosona noya nipachin, acanararin. Ina yonquiatomaꞌ, noya nicoꞌ.

⁹ Patronoꞌsaquëmantaꞌ, piyapinëmapita noya nontocoꞌ. Ama noꞌhuiana quëran camaitocosohuëꞌ. Yosë niꞌsarinquëmaꞌ canpitantaꞌ. Inasoꞌ inápaquë yaꞌhuaton, huaꞌanëntërinpoaꞌ. Napopianáchin niꞌninpoaꞌ. Co maꞌhuanoꞌsaꞌ noya noya niꞌninhuëꞌ.

Yosë catahuarinpoaꞌ sopai minsëcaso marëꞌ

¹⁰ Nani iyaroꞌsaꞌ pënënanquëmaꞌ. Yosë imatomaꞌ, nani tahuëri ina nontocoꞌ achinicancainquëmaꞌ. Inasoꞌ chini chiníquën nanantaton, yaꞌipi nanitaparin niꞌton, catahuarinquëmaꞌ.

¹¹ Sopai huaꞌan noyá nitotërin nonpinacasoꞌ. Nani tahuëri yanonpintërinpoaꞌ. Yosëso nipirinhuëꞌ chini chiníquën nanantaton, yacatahuarinpoaꞌ. Ina nontohuatëhuaꞌ, catahuarinpoaꞌ sopai minsëcasoꞌ. Sontaroꞌsaꞌ aꞌmopiso pochin nininsoꞌ Yosë quëtërinpoaꞌ ama sopai minsëinpoaso marëhuëꞌ.

¹² Inimiconënpoaꞌ co piyapi pochin quënanëhuahuëꞌ. Sopai huaꞌansoꞌ yaminsërinpoaꞌ. Naꞌa sopairoꞌsantaꞌ inápaquë yaꞌhuatonaꞌ, yacamairinënpoaꞌ. Co quënanpirëhuahuëꞌ, yonquinënpoa quëran yacamairinënpoaꞌ co noyahuëꞌ nicacaso marëꞌ. Iporasoꞌ notohuaroꞌ piyapiꞌsaꞌ tashi pochin cancantatonaꞌ, sopai natëpi. Inari camairin niꞌton, paꞌpi co noyahuëꞌ yonquipi.

¹³ Sopai chiníquën sacatarin minsëinpoaso marëꞌ. Napoaton Yosë nontocoꞌ catahuainquëmaꞌ. Sontaroꞌsaꞌ aꞌmopiso pochin nininsoꞌ Yosë quëtërinquëmaꞌ. Ina masahuatomaꞌ, aꞌmocoꞌ sopai minsëcaso marëꞌ. Noya nitaparëso pochin nicoꞌ. Inapoatomaꞌ, chinitocoꞌ.

¹⁴ Napoaton chiníquën cancantatomaꞌ, panca sintoronquë nitonpotopiso pochin noꞌtën nanan naꞌcon nohuantocoꞌ. Ina imatomaꞌ, noꞌtëquën noncoꞌ. Co piꞌpisha tërantaꞌ nonpinacasoꞌ yaꞌhuërinhuëꞌ. Huaꞌna coton aꞌmopiso pochin noyasáchin nicoꞌ Yosë catahuainquëmaso marëꞌ.

¹⁵ Shoꞌshorahuan sapatëꞌ pochin nininsoꞌ poꞌmohuachinara, co toꞌcoitopihuëꞌ, noya noya iratopi. Inapochachin canpitantaꞌ Yosë nanamën shaꞌhuitocoꞌ aꞌnapitantaꞌ nitochinaꞌ. Noya nanan yonquihuatëhuaꞌ, sano cancantarihuaꞌ.

¹⁶ Sontaroꞌsaꞌ iscoto quëpapi nipaꞌshintacaiso marëꞌ. Inimicoroꞌsaꞌ panca shinërë masahuatonaꞌ, yaquiꞌ noya orotërinsoꞌ nininquë pashitahuatonaꞌ, iꞌchinpitopi. Iꞌchinpitahuatonaꞌ, pëꞌchinanquë aquë tëꞌyatopi. Napoaton sontaroꞌsaꞌ iscoto quëpapi nipaꞌshintacaiso marëꞌ. Ina quëran inimicori tëꞌyanantohuachina, shinërë inaquë tacopiquirin. Panca shinërë orotërarinso pochachin sopai apira apira yanonpintërinpoaꞌ Yosë naniantacaso marëꞌ. Napoaton naꞌcon Yosë yonquicoꞌ. “Yosë niꞌsárinco. Co onporontaꞌ naniantarincohuëꞌ,” topatamaꞌ, achinicancanarinquëmaꞌ. Co piꞌpian tërantaꞌ sopai natëaramahuëꞌ. Iscoto quëpapiso pochin Yosësoꞌ noya yaꞌcopiarinpoaꞌ.

¹⁷ Sontaroꞌsaꞌ co casco huaꞌna quëran nininsoꞌ yancopihuëꞌ naporini, aꞌnaroáchin inimiconënpitari motën acochitonahuëꞌ. Inapochachin canpoantaꞌ co Yosë anoyacancantërinpoahuëꞌ naporini, co chaꞌëitërihuahuëꞌ. Yosë quiricanëntaꞌ yaꞌhuëtërinpoaꞌ. Ispirito Santo nohuanton, ninshitërinënpoaꞌ sopai minsëcaso marëꞌ. Napoaton nani tahuëri ina nontatomaꞌ, yonquicoꞌ. Sontaroꞌsari sahuëninëna quëran inimico minsëpi. Inapochachin canpoantaꞌ Yosë quiricanën quëran sopai minsëarihuaꞌ.

¹⁸ Apira apira Yosë nontocoꞌ. Maꞌsha onpohuatamantaꞌ, ina nontocoꞌ catahuainquëmaꞌ. Noya yonquiatomaꞌ, chiníquën nontocoꞌ. Ispirito Santo catahuarinpoaꞌ cancanënpoa quëran huarëꞌ noya nontacasoꞌ. Ama amiatomahuëꞌ, niꞌsácoꞌ ama aꞌnanaya sopai minsëinquëmaso marëhuëꞌ. Yaꞌipi imarëhuasopita marëꞌ Yosë nontocoꞌ.

¹⁹ Ca marëntaꞌ Yosë nontocoꞌ catahuainco nanamën noya aꞌchinchi. Chiníquën cancantato, aꞌchinchi. Yosësoꞌ yanichaꞌëpirinpoahuëꞌ, naꞌa piyapiꞌsasoꞌ co nitochátërapihuëꞌ.

²⁰ Quisocristo chachin aꞌparinco aꞌchintaꞌhuaso marëꞌ. Ina marëꞌ tashinan pëiquë poꞌmorinaco. Poꞌmopirinacohuëꞌ, Yosë nontocoꞌ ama tëꞌhuaisohuëꞌ. Chiníquën cancantato, aꞌninquëchin aꞌchintaꞌhuasoꞌ yaꞌhuërin.

Piquëran huarëꞌ shaꞌhuirinsoꞌ

²¹ Iya Tiquico yaꞌipi naporahuësoꞌ shaꞌhuitarinquëmaꞌ nitotamaso marëꞌ. Inasoꞌ naꞌcon nosoroato, iyahuë pochin niꞌnahuë. Sinioro nanamën noya aꞌchinarin.

²² Canpitataquë aꞌpaarahuë onpohuinsona yaꞌhuëraisoꞌ shaꞌhuitinquëmaso marëꞌ. Ina natanpatamaꞌ, chiníquën cancantaramaꞌ.

²³ Quisocristo imaramaꞌ niꞌton, iyaroꞌsaꞌ, Tata Yosë asanocancainquëmaꞌ. Nosoroꞌinquëmaꞌ. Catahuainquëmaꞌ shaꞌhuitërinpoasoꞌ noya natëcamaso marëꞌ. Sinioro Quisocristontaꞌ inapochachin catahuainquëmaꞌ.

²⁴ Quisocristo huaꞌanëntarinpoaꞌ. Ina nosoromiatohuatamaꞌ, inaora nohuanton, Yosë noya catahuainquëmaꞌ, tënahuë. Amen. Nani ninshitëranquëma huachi. Paono