Efesios 2 - Chayahuita (Shahui)

Inaora nohuanton nichaꞌërinpoasoꞌ

¹ Iráca canpitasoꞌ co noyahuëꞌ nicatomaꞌ, oshahuanamaꞌ. Co Yosë nohuitatomahuëꞌ, chimipi pochin cancantëramaꞌ.

² Coꞌhuara Quisocristo imashatërapomahuëꞌ, sopai huaꞌan natëtomaꞌ, co noyahuëꞌ ninamaꞌ. Inasoꞌ ihuan yaꞌhuërinquë yaꞌhuaton, yaꞌipi sopairoꞌsaꞌ huaꞌanëntarin. Co quënanpirëhuahuëꞌ, isoroꞌpaquë sacatárin minsëinpoaso marëꞌ. Yonquinëmaquë camairinquëmaꞌ niꞌton, co Yosë natëramahuëꞌ.

³ Iráca yaꞌipinpoaꞌ co Yosë natërëhuahuëꞌ. Co noyahuëꞌ yonquiatëhuaꞌ, co noyahuëꞌ ninëhuaꞌ. Canpoara nohuantërëhuasoráchin ninëhuaꞌ. Yanoꞌhuitohuatëhuara, noꞌhuitërëhuaꞌ. Yanoꞌpihuatëhuara, noꞌpirëhuaꞌ. Yaahuëtohuatëhuara, ahuëtërëhuaꞌ. Ina marëꞌ yaꞌipinpoaꞌ anaꞌintinpoasoꞌ yaꞌhuërin.

⁴ Yosëso nipirinhuëꞌ naꞌcon nosororinpoaꞌ. Nosoroatonpoaꞌ, yanichaꞌërinpoaꞌ.

⁵ Oshahuanëhuaꞌ niꞌton, chimipi pochin niꞌpirinpoahuëꞌ, oshanënpoaꞌ inquitërinpoaꞌ. Iporaso huachi Quisocristo imarëhuaꞌ niꞌton, nanpiantarinso pochin Yosë niꞌninpoaꞌ. Anoyacancantërinpoaꞌ noya noya cancantacaso marëꞌ. Nosoroatonpoaꞌ, inaora nohuanton, nichaꞌërinpoaꞌ.

⁶ Iráca Quisocristo paꞌpitopirinahuëꞌ, Yosëri ananpitaantarahuaton, inápaquë quëpantarin. Canpoantaꞌ imarëhuaꞌ niꞌton, inarëꞌquënpoaꞌ nanpiantarëhuaso pochin anoyacancantërinpoaꞌ. Quisocristo yaꞌcoancantërinpoaꞌ niꞌton, ipora chachin inápaquë yaꞌhuarëhuaso pochin Yosë niꞌninpoaꞌ.

⁷ Yosë inaora nohuanton, naꞌcon nosororinpoaꞌ. Quisocristo imapatëhuaꞌ, noya catahuarinpoaꞌ. Aꞌna tahuëri aꞌnapitantaꞌ nicatënënpoaꞌ, Yosë chinotapi: “Ma noyacha Yosëri nosororin paya,” tosapi.

⁸ Nosoroatonpoaꞌ, inaora nohuanton nichaꞌërinpoaꞌ. “Quisocristoíchin anoyacancantërinpoaꞌ,” topatëhuaꞌ, oshanënpoaꞌ inquitatonpoaꞌ, nichaꞌërinpoaꞌ. Co canpoara nanitërëhuahuëꞌ Yosë imacasoꞌ. Ina catahuarinpoaꞌ cancanënpoa quëran natëcasoꞌ.

⁹ Co canpoara nanitërëhuahuëꞌ chaꞌëcasoꞌ. Napoaton co nocantacasoꞌ yaꞌhuërinhuëꞌ. “Casoꞌ noyaco niꞌto, Yosëꞌpaꞌ paꞌsarahuë,” co taꞌcasoꞌ yaꞌhuërinhuëꞌ.

¹⁰ Yosë anoyacancantërinpoaꞌ. Anoyacancantahuatonpoaꞌ, acorinpoaꞌ nóya nicacaso marëꞌ. Quisocristo catahuahuachinpoaꞌ, noya nisarëhuaꞌ. Iráca quëran huarëꞌ yonquirinpoaꞌ ina pochin nicacasoꞌ. Ina marëꞌ nichaꞌërinpoaꞌ.

Quisocristo nanan anoyatërinpoasoꞌ

¹¹ Isontaꞌ iyaroꞌsaꞌ yonquicoꞌ. Iráca co piꞌpian tërantaꞌ Yosë nohuitëramahuëꞌ. Canpitasoꞌ nisha piyapiꞌsanquëmaꞌ niꞌton, cotioroꞌsaꞌ nocaninënquëmaꞌ. “Quiyasoꞌ Yosë piyapinënpitacoi. Canpitasoꞌ co marca tërantaꞌ nonëmaquë niacotëramahuëꞌ,” itërinënquëmaꞌ.

¹² Tëhuënchachin coꞌhuara imashatërapomahuëꞌ, co Quisocristo nohuitëramahuëꞌ. Iráca Yosëri israiroꞌsaꞌ huayonin piyapinënpita nicacasoꞌ niꞌton, “Nichaꞌësaranquëmaꞌ,” itërin. Co inapita pochin niꞌninquëmahuëꞌ. Shimashonënapitarëꞌ anoyatërinsoꞌ shaꞌhuitopirinhuëꞌ, co nitotëramahuëꞌ. Topinan quëran yaꞌhuëramaꞌ. Co Yosëꞌpaꞌ pacamasoꞌ ninaramahuëꞌ. Co piꞌpian tërantaꞌ Yosë nohuitëramahuëꞌ.

¹³ Co Yosë nohuitatomarahuëꞌ, áquë pochin nisapiramahuëꞌ. Iporasoꞌ Quisocristo imatomaꞌ, nohuitërama huachi. Oshanëma marëꞌ huënainën paꞌnin niꞌton, Yosë anohuitërinquëmaꞌ. Yaꞌcaritëramaso pochin ninamaꞌ.

¹⁴ Quisocristo chiminin niꞌton, nanan anoyatërinpoaꞌ. Iráca cotioroꞌsacoi co noyahuëꞌ niꞌnainquëmaꞌ. Nisha piyapinquëmaꞌ niꞌton, inimicoroꞌsa pochin niꞌpirainquëmahuëꞌ. Inasoꞌ chiminaton, paira pochin yaꞌcopirinpoasoꞌ nani chiꞌhuincarin. Iporasoꞌ yaꞌipinpoaꞌ Quisocristo imarëhuasopita aꞌna huëntoínchin ninëhuaꞌ.

¹⁵ Quisocristo nasha nanan quëtërinpoaꞌ. Co huachi iráca pënëntërinsoꞌ yonquicasoꞌ yaꞌhuërinhuëꞌ. Yaꞌipinpoaꞌ Quisocristo imapatëhuaꞌ, nasha huëntonquë ayaꞌconinpoaꞌ. Quisocristo huëntonënquë yaꞌconatëhuaꞌ, co huachi nisha chinotërëhuahuëꞌ. Nisha nisha piyapinpoaꞌ nirihuarahuëꞌ, noya niniꞌtëhuaꞌ yaꞌhuërëhuaꞌ.

¹⁶ Naporahuaton, co huachi Yosë inimicotërëhuahuëꞌ. Quisocristo corosëquë chiminaton, nanan anoyatërinpoaꞌ. Catoꞌ huënton pochin nipirëhuahuëꞌ, Quisocristo imapatëhuaꞌ, noya ninicatëhuaꞌ yaꞌhuërëhuaꞌ. Aꞌna huëntoíchin ninëhuaꞌ.

¹⁷ Quisocristo isoroꞌpaquë oꞌmaton, noya nanan shaꞌhuitërinpoaꞌ. “Yaꞌipinquëmaꞌ nichaꞌësaranquëmaꞌ,” itërinpoaꞌ. Canpitasoꞌ co piꞌpisha tërantaꞌ Yosë nohuitatomarahuëꞌ, áquë pochin nipiramahuëꞌ, nanan anoyatërinquëmaꞌ. Cotioroꞌsacointaꞌ yaꞌcarisha pochin ninaisoꞌ nanan anoyatërincoi.

¹⁸ Quisocristo chiminin niꞌton, yaꞌipinpoaꞌ nanitërëhuaꞌ Tata Yosë nontacasoꞌ. Ispirito Santo catahuarinpoaꞌ niꞌton, ina nontohuatëhuara, noya nataninpoaꞌ.

¹⁹ Napoaton iporasoꞌ iyaroꞌsaꞌ, Yosë nohuitëramaꞌ. Co Yosëꞌpaꞌ paꞌshatërapomarahuëꞌ, nani huëntonënquë ayaꞌconinquëmaꞌ. Yaꞌhuëhuanoꞌsa pochin nisaramaꞌ. Co huachi nisharoꞌsa pochin niꞌninquëmahuëꞌ. Yaꞌipinpoaꞌ Quisocristo imarëhuasopita huiꞌninpita pochachin nóya niꞌninpoaꞌ.

²⁰ Yaꞌipi imarëhuasopita ina naponpoa chachin aꞌna pëi pochin ninëhuaꞌ, naꞌpi quëran nipisoꞌ. Naꞌpi quëran yapëihuatëra, acopoꞌ ihuatahuatëꞌ, simintoꞌton acorëꞌ. Inapochachin canpoantaꞌ Yosë pëinën pochin ninëhuaꞌ. Siminto acopiso pochin, caꞌtanoꞌsaꞌton nanamën aꞌchintërinënpoaꞌ. Ina quëran pënëntonaꞌpiroꞌsantaꞌ noꞌtëquën aꞌchinaꞌpiapi. Naꞌpi quëran yapëihuatëra, pëiꞌ taconorinquë naꞌpi noya noya nininsoꞌ acorëꞌ tantiacaso marëꞌ. Ina acohuatëra, aꞌnapita naꞌpiroꞌsaꞌ noꞌtëquën apanshinëꞌ. Naꞌpi noya noya nininso pochachin Quisocristosoꞌ achinirinpoaꞌ.

²¹ Quisocristo imapatëhuaꞌ, Yosë acoarinpoaꞌ ina pëinën pochin nicacaso marëꞌ. Catahuahuachinpoaꞌ, noya niniꞌtëhuaꞌ yaꞌhuërëhuaꞌ. Aꞌnapitantaꞌ aꞌnaya aꞌnaya Quisocristo imapachinaꞌ, yaꞌconapi antaꞌ. Nóya pëiꞌ Yosë chinotacaso marëꞌ acorëso pochin nisarëhuaꞌ.

²² Canpitantaꞌ Quisocristo imatomaꞌ, yaꞌconamaꞌ. Aꞌnaya aꞌnayanpoaꞌ naꞌpi pochin ninëhuaꞌ pëiꞌ nanicaso marëꞌ. Yaꞌipi imarëhuasopita Yosë pëinën pochin ninëhuaꞌ. Ispirito Santo yaꞌcoancantohuachinpoaꞌ, Yosë chachin canpoarëꞌ yaꞌhuërarin huachi.