Eclesiastés 3 - Chayahuita (Shahui)

Nani maꞌsha nicacaso marëꞌ tahuërinën yaꞌhuërinsoꞌ

¹ Yaꞌipi maꞌsha isoroꞌpaquë ninëhuasoꞌ, tahuërinën yaꞌhuëtërin. Maꞌpitaso nicacasoꞌ nohuantërëhuasopitantaꞌ, oranën yaꞌhuëtërin:

² Huaꞌhuatacaso tahuëri. Chiminacaso tahuëri. Shaꞌtacaso tahuëri. Shaꞌtërësonta huaꞌtaantacaso tahuëri.

³ Maꞌsha onpotacaso tahuëri. Nonëntacaso tahuëri. Maꞌsha ninësoꞌ, oquicaso tahuëri. Oquirësonta anoyataantacaso tahuëri.

⁴ Naꞌnëcaso tahuëri. Huinacaso tahuëri. Sëtacaso tahuëri. Pita nicacaso tahuëri.

⁵ Naꞌpira inquicaso tahuëri. Inquirësoꞌ, yontoantacaso tahuëri. Ipocaso tahuëri. Tananpitacaso tahuëri.

⁶ Maꞌsha yonicaso tahuëri. Ayatacaso tahuëri. Tapacaso tahuëri. Tëꞌyatacaso tahuëri.

⁷ Oshacaso tahuëri. Osharësonta pipitaantacaso tahuëri. Taꞌtápaso tahuëri. Nonacaso tahuëri.

⁸ Nosorocaso tahuëri. Noꞌhuitacaso tahuëri. Quira nicacaso tahuëri. Nanan anoyatacaso tahuëri.

Nanpisëhua noya ancantacaso yaꞌhuërinsoꞌ

⁹ Sacatoráchin cancantatëhua co napion cancantopirëhuahuëꞌ. ¡Co manta tëhuënchachin canarëhuahuëꞌ!

¹⁰ Ina pochin Yosë acoatonpoaꞌ, cahuario panca pëꞌpëto aꞌmitëtërëso pochin nitërinpoaꞌ.

¹¹ Inari chachin tahuërinën nanihuachin, yaꞌipi maꞌsha noyápiachin acorin. Piyapinpoanta yonquínahuan acorinpoaꞌ. Iráca quëran huarëꞌ tahuëri yaꞌhuërinso yonquiatëhuaꞌ, aꞌna tahuërinta yaꞌhuëantacasoꞌ, piꞌpian anitotërinpoaꞌ. Co yaꞌipi Yosë naporinsopita nitotacasoꞌ nanitërëhuahuëꞌ.

^12-13 Napoaton nanpisëhuasoꞌ, noya ancatatëhua yaꞌhuëcaso yaꞌhuërin. Sinioro nani quëtërinpoaꞌ, capacasoꞌ, oꞌocasoꞌ, sacatatë canacasoꞌ, inapita acotërinpoa niꞌton, noya ancantahuaꞌ.

¹⁴ Nani maꞌsha Yosë acorinsopitasoꞌ, ina chachin yaꞌhuëmiatarin. “Iso pahuantërin niꞌton, acochi. Isoso yaꞌsotërin niꞌton, machi,” co taꞌcaso yaꞌhuërinhuëꞌ. Ina pochin Yosëri acorin. Tëꞌhuatatëhua ina chinotacaso marëꞌ naporin.

¹⁵ Ipora yaꞌhuërinsopita nani iráca quëran huarëꞌ yaꞌhuërin. Aꞌna tahuërinta ina chachin nisápon. Yosë nohuanton iráca napopisopitantaꞌ, naquëranchin yaꞌhuëantapon.

Yaꞌipi, noꞌpa chachin niantacaiso yaꞌhuërinsoꞌ

¹⁶ Isoroꞌpaquë nanpipo pochin, nisha nisha co noyahuëꞌ nipisoꞌ niꞌnahuë. Aꞌnaquën co noyahuëꞌ nipi niꞌton, coisëroꞌsari noꞌtëquën anaꞌintacaiso nipirinhuëꞌ, co anaꞌintopihuëꞌ.

¹⁷ Napoaponahuëꞌ, isoroꞌpaquëso maꞌsha nicacaiso tahuërinën yaꞌhuëtëraꞌpiarin. Ina yonquiato co huachi aquëtë sëtërahuëꞌ. Noya nipisopita, co noyahuëꞌ nipisopita, tahuërinën nanihuachin, Yosëri coisë pochin nicaton maꞌsona onpotacasoꞌ, noꞌtëquën shaꞌhuitapon.

¹⁸ Naporahuaton isoroꞌpaquë nanpisëhua chachin Yosë tëniarinpoaꞌ. Canpoantaꞌ, maꞌsharoꞌsa pochachin niconëhuasoꞌ nitotacaso marëꞌ tëniarinpoaꞌ.

¹⁹ Tëhuënchachin piyapinpoanta maꞌsharoꞌsa pochin niconëhuaꞌ: Inapita niipiso pochin canpoanta niitëhua nanpirëhuaꞌ. Inapita chiminpiso pochin canpoantaꞌ, chiminëhuaꞌ. Co canpoasoꞌ maꞌsharoꞌsa quëran naꞌcon naꞌcon paꞌtërëhuahuëꞌ. Napoaton nani maꞌsha yaꞌhuërinsopita, topinan quëran yaꞌhuërin.

²⁰ Yaꞌipi inaquëráchin paꞌsarëhuaꞌ. Amocan quëran yaꞌipi ninin. Naporahuaton amocan chachin yaꞌipi niantacaiso yaꞌhuërin.

²¹ “Piyapinpoa chiminpatëhuaꞌ, ispiritonënpoasoꞌ inápaquë pantarin. Yaꞌhuërëꞌ maꞌsharoꞌsa ispiritonënsoꞌ, paꞌpi acoporoquë paꞌmarin. Ina caso noꞌtëquën nitotërahuë,” taꞌcasoꞌ, ¡co insonta nanitërinhuëꞌ!

²² Napoaton piyapinpoa isoroꞌpaquë nanpisëhua chachin, sacatërëhuaso marëꞌ noya coshatahuaꞌ, noya oꞌoahuaꞌ, nohuantërëhuasopita maꞌpatahuaꞌ, napoaꞌahuaꞌ. Inayara canpoasoꞌ acanatë pochin Yosë quëtërinpoaꞌ. Chiminpatëhuaꞌ, yaꞌipi patarihuaꞌ. Ina piquëran maꞌsona isoroꞌpaquë onporapisoꞌ aꞌnotiinënpoaso marëꞌ co insonta quësarinpoahuëꞌ.