Eclesiastés 12 - Chayahuita (Shahui)

Huiꞌnapiꞌsa pënëninsoꞌ

¹ Yosëso nininquën. Huiꞌnapitasënquën chachin ina imaquëꞌ. Co huaꞌquiya quëranhuëꞌ mashotaran. Naporoꞌ, co huachi yashinhuëꞌ yaꞌhuëaran. Inapoaton: “Co huachi yain nanpichináchinhuëꞌ cancantërahuë,” tosaran.

² Coꞌhuara piꞌi aꞌpininso tacopiátërasohuëꞌ, imaquëꞌ. Yoqui, tayoraroꞌsaꞌ, inapitanta coꞌhuara aꞌpinpiso tacopiátërasoihuëꞌ, imaquëꞌ. Iporasoꞌ oꞌnan mëꞌtarinso piquëran chitoro inapaantarin. Inapita noya yaꞌhuëasoi chachin imaquëꞌ.

³ Mashotohuatan, pëi mocarinso pochin nisaran. Naporoꞌ aꞌpairinquënsopita pochin nininsoꞌ, ropatapona huachi. Pëi nonoropitërinso pochin monconpicasoꞌ yaꞌhuëapon. Morinoroꞌsa nitoꞌquiratërinso pochin natëroꞌsanta capa niraꞌpiapon. Inapoaton co huachi noya coshataranhuëꞌ. Huintana quëran costatërëso pochin quënantopiranhuëꞌ, oshaquëran oshaquëran pëtorayataramaꞌ.

⁴ Ina pochin nisahuatan yaꞌcoanaroꞌsanta cachiꞌpaꞌ notëtopisoꞌ, nioncotapon. Inapita nioncotërinso pochin co huachi aquëran natantaranhuëꞌ. Morinonta huënotërinsoꞌ, copi tëninso pochin co huachi nanitaranhuëꞌ noya coshatamasoꞌ. Inairaroꞌsanta yáshin përapirinahuëꞌ, co huachi natanaranhuëꞌ.

⁵ Inapamiachin nanpëhuatan, huëhuëtaran. Iratohuataontaꞌ, aꞌnaroáchin maꞌsha onpoaran. Shinpira yancotërinso pochin motëonta huiritapon. Co huachi chiniatonhuëꞌ, sëquërë tëranta quëquëntaran. Arcapara nara itopiquë ninonënpiranhuë tërantaꞌ, co huachi natëarinhuëꞌ. Nani huachi yaꞌhuëmiatontaranquë yapaꞌsápaton napoaran. Naporaran quëran chiminpatan, naꞌnëroꞌsa noncaropiso natanapi huachi.

⁶ Yosëso nininquën. Ipora chachin ina imaquëꞌ. Coꞌhuara oꞌsërin prata quëran nininso noshitëtara, coꞌhuara huëꞌëta oro quëran nininsonta yaꞌquiara, partinta poso quëran iꞌsha ocoirësoꞌ, coꞌhuara ina pirayan yaꞌpoara, iꞌsha ohuaracasoꞌ porianënta coꞌhuara yaꞌquiara, inapita napopiso pochin, aꞌna tahuëri quëmanta chiminaran. Napoaton coꞌhuara ina tahuëri naniyátërasohuëꞌ, Yosë imaquëꞌ.

⁷ Amocan quëran Yosë nininquën niꞌton, chiminpatan nonënsoꞌ, noꞌpaꞌ niantapon. Ispiritonëntaꞌ, Yosëꞌpaꞌ paantapon. Ina quëtërinquën niꞌton, ina chachin mataantarinquën.

⁸ Inapita yonquiato ca aꞌchinaꞌpico napoantarahuë: ¡Co manta isoroꞌpaquë canamiatarihuahuëꞌ! ¡Topinan quëran yaꞌhuërëhuaꞌ! tënahuë.

^9-14 (-)