Deuteronomio 9 - Chayahuita (Shahui)

Inaora nohuanton catahuarinsoꞌ

¹ Naquëranchin Moisësëri israiroꞌsa nontaantarin: “Natanco israiroꞌsanquëmaꞌ: Nani nanirin Cortaniiꞌ pëntontatomaꞌ, chini chiníquën nacionoꞌsa yaꞌcontatoma minsëamasoꞌ. Inaquë inápa pairahuan ninanoroꞌsa yaꞌhuëpirinhuëꞌ, canpitari yaꞌcontatoma minsëaramaꞌ.

² Inaquë yaꞌhuëpisopitasoꞌ, panca piyapiroꞌsa nipi. Panca piyapi Anaco itopisoꞌ shinpita pochin niconpi. Canpitaso napopisoꞌ nani natantëramaꞌ: ‘Panca piyapi Anaco shinpitasoꞌ, co insoari tëranta minsëarinhuëꞌ,’ topi.

³ Iporasoꞌ Sinioro chachin quëchitaton, quëpararinpoa nitotocoꞌ. Inasoꞌ, pën nani maꞌsha ahuiquitërinso pochin ina nacionoꞌsa atapanahuaton, ataꞌhuantarin. Napoaton canpitarisoꞌ aꞌnaromaráchin, aꞌpapomaꞌ. Aꞌnapitaso nipirinhuëꞌ, tiquiapomaꞌ. Sinioro nani shaꞌhuitërinquëmaso chachin nisarin.

⁴ Sinioro nohuanton nani inapita aꞌpahuatamaꞌ: ‘Noya ninëhuaso marëꞌ Sinioro catahuarinpoa inapita aꞌpatëhuaꞌ, noꞌpanëna matërëhuaꞌ,’ ama tocosohuëꞌ. Co ina marëꞌ aꞌparinhuëꞌ. Paꞌpi co noyahuëꞌ nipi niꞌton, aꞌparin.

⁵ Tëhuënchachin co canpita noya ninamaso marëꞌ, inapita noꞌpanëna masaramahuëꞌ. Inapita co noyahuëꞌ nipiso marëꞌ, aꞌpararin. Naporahuaton, shimashonëmapita: Apraan, Isaco, Cacopo, inapita shaꞌhuitërinsoꞌ yonquiaton inapotarin.

⁶ Yonquicamaso marëꞌ naquëranchin shaꞌhuichinquëmaꞌ. Co canpita noya ninamaso marëꞌ ina noyaroꞌpaꞌ quëtarinquëmahuëꞌ. Canpitaso co natantochináchinhuëꞌ cancantërama niꞌton, co quëtiinquëmaso nipirinhuëꞌ,” itërin.

Sinai motopiquë mamanshi moshapiso ayonquiantarinsoꞌ

⁷ Naquëranchin Moisësëri israiroꞌsa nontaantarin: “Inotëro parti paasëmaꞌ, Sinioro tëhuëtëramasoꞌ ama naniantocosohuëꞌ. Iquipito quëran pipirama quëran isëquë canquiama huarëꞌ co natantochináchinhuëꞌ cancantëramaꞌ. Ina pochin cancantatoma Sinioro tëhuëtëramaꞌ.

⁸ Sinai motopiquë niꞌsëma Sinioro anoꞌhuitëramaꞌ. Ina marëꞌ noꞌhuitomiataton shiataꞌhuantërinquëmaꞌ.

⁹ Caso naꞌpitëaꞌhuaroꞌsa maꞌpataꞌhuaso marëꞌ inatohua paantarahuë. Ina naꞌpitëaꞌhuaroꞌsaquë Siniororëꞌquënpoa anoyatërëhuaso ninshitërin. Ina maꞌpacaꞌhuaso marëꞌ catapini shonca tahuëri tashirë chachin co manta coshatërahuëꞌ, co manta oꞌorahuëꞌ, naporahuë.

¹⁰ Inaquë Sinioro cato naꞌpitëaꞌhuaroꞌsa inari chachin ninshitërinsoꞌ quëtërinco. Niyontonëhuaso tahuëri motopi quëran nontërinpoaso chachin inaquë ninshitërin. Pën huáncana quëran naporo pënëninpoaꞌ.

¹¹ Shaꞌhuitëranquëmaso chachin catapini shonca tahuëri tashirë chachin naꞌhuërin piquëran, cato naꞌpitëaꞌhuaroꞌsa quëtërinco. Canpoarë anoyatërinso chachin ninshitaton, quëtërinco.

¹² Ina quëtahuatonco: ‘Manóton nohuaramarahuaton, piyapiꞌsa nimaquëꞌ. Inapitasoꞌ Iquipito quëran ocoipiranhuëꞌ, paꞌpi co noyahuëꞌ nisapi. Pënënahuësopita naniantatonaꞌ, aꞌnaroáchin pëshonpi huachi. Huaꞌna asoquirahuatona moshacaiso marëꞌ mamanshi nipi,’ itërinco.

^13-14 Ina tosahuaton, taantarin: ‘Israiroꞌsa niꞌsápato: “Tëhuënchachin pasopitasoꞌ co natantochináchinhuëꞌ cancantopi,” tënahuë. ¡Ama manta tëquësohuëꞌ! ¡Apiramiachin tiquichinaꞌi! Inapotohuato, co huachi incari tëranta inapita yonquiarinhuëꞌ. Quëma shiparinpita quëran tëhuëchinsoꞌ noya noya nacion ocoiarahuë,’ itërinco.

¹⁵ Motopi quëran nohuaramahuatora, cato naꞌpitëaꞌhuaroꞌsa quëmarahuë. Inaquë Yosërëꞌquënpoa anoyatërëhuasoꞌ, nani ninshitërin. Naporoꞌ motopiquësoꞌ, pën tënëntárin.

¹⁶ Yaꞌhuëarëhuaquë canquimahuatora, co Sinioro natëtomarahuëꞌ oshahuanamasoꞌ niꞌquimarahuë. Pënëninquëmaso aꞌporahuatomaꞌ, mamanshi, toroaꞌhua pochin nonanatomaꞌ, moshararamaꞌ.

¹⁷ Ina niꞌsahuato, cato chachin naꞌpitëaꞌhuaroꞌsa quëmarahuësoꞌ, tëꞌyatërahuë. Tëꞌyatato canpita niꞌtonëmaquë paꞌpaarahuë,” itërin.

Israiroꞌsa marëꞌ Yosë nontërinsoꞌ

¹⁸ Naquëranchin Moisësëri israiroꞌsa nontaantarin: “Inapoatoma oshahuanamaso marëꞌ, naquëranchin isonahuato Sinioro nontërahuë. Iꞌhua naporahuëso chachin, catapini shonca tahuëri tashirë chachin co manta coshatërahuëꞌ, co manta oꞌorahuëꞌ. Panca tëhuëatoma Sinioro anoꞌhuitopiramahuëꞌ, canpita marëꞌ ina nontërahuë.

¹⁹ Paꞌpi noꞌhuitënquëmaꞌ yaataꞌhuantërinquëmaso marëꞌ, canta panca paꞌyanahuë. Napopirahuëꞌ nontohuatora, natanahuatonco co ataꞌhuantërinquëmahuëꞌ.

²⁰ Aaronta paꞌpi noꞌhuiton Siniorori yatëpapirinhuëꞌ, ina marënta nontërahuë niꞌton, co tëparinhuëꞌ.

²¹ Ina quëran toroaꞌhua nonanamasoꞌ manahuë. Ina marëꞌ oshahuanama niꞌton, pënquë tëꞌyatërahuë. Naporahuaton pëꞌsanahuë. Noꞌmo noꞌmoshin nipachina, motopi quëran iꞌsha oꞌmarinquë opoitërahuë.

²² Tapiraquënta tëhuëramaꞌ. Masaquë, Quiporo-atapaquë, inaquëpitanta tëhuëatoma Sinioro anoꞌhuitëramaꞌ.

²³ Catisë Parniaquëntaꞌ, Sinioro camaitërinso co natëamaso nohuantëramahuëꞌ: ‘Noꞌpaꞌ quëtaranquëmaquë yaꞌconco huachi,’ itërinquëmaꞌ. Itopirinquëmahuëꞌ: ‘Co nimara Yosë catahuarinpoahuëꞌ,’ toconatomaꞌ, co natëramahuëꞌ.

²⁴ Yaꞌnan nohuitëranquëma quëran huarëꞌ, canpitaso co natantochináchinhuëꞌ cancantëramaꞌ. Ina pochin cancantatomaꞌ, co Sinioro natëramahuëꞌ.

^25-26 Mamanshi moshatoma oshahuanamaso marëꞌ Sinioro yaataꞌhuantërinquëmaꞌ. Ina niꞌton, naquëranchin iꞌhua naporahuëso pochin, catapini shonca tahuëri tashirë chachin isonahuë. Isonahuato chiníquën Sinioro nontërahuë: ‘Sinioro, ama piyapinënpita ataꞌhuantëquësohuëꞌ. Chiníquën nanantaton, inapitaso Iquipito quëran ocoiran. Inapotaton huaꞌanëntëran niꞌton, ama ataꞌhuantëquësohuëꞌ.

²⁷ Tëhuënchachin inapitasoꞌ, co natantochináchinhuëꞌ cancantatonaꞌ, co noyahuëꞌ nipi. Naꞌcon oshahuanpirinahuëꞌ, ama ina yonquiquësohuëꞌ. Piyapinënpita Apraan, Isaco, Cacopo, inapitaso natërinën. Ina yonquiquëꞌ.

²⁸ Israiroꞌsa ataꞌhuantohuatan, iquipitoroꞌsa pinotënën: “Siniorori noꞌpaꞌ quëtacasoꞌ shaꞌhuitopirinhuëꞌ, co nanitërinhuëꞌ inaquë poꞌmocasoꞌ. Naporahuaton co quëꞌyamantatonhuëꞌ, isëran ocoiaponahuë inotëro parti ataꞌhuantërin,” itaponën.

²⁹ Israiroꞌsasoꞌ, quëma piyapinënpita nipi. Chiníquën nanantaton, Iquipito quëran ocoiran niꞌton, huaꞌanëntëran,’ itërahuë,” itërin.