Deuteronomio 8 - Chayahuita (Shahui)

Yosëri nosoroaton aꞌpairinsoꞌ

¹ Naquëranchin Moisësë israiroꞌsa nontaantarin: “Yaꞌipi Yosë camaitërinsopita nani ipora shaꞌhuitaranquëma niꞌton, natëcoꞌ. Inapohuatamaꞌ, notohuaroꞌ naꞌasaramaꞌ. Naporahuaton, shimashonënpoa noꞌpaꞌ quëtacasoꞌ shaꞌhuitërinquë yaꞌhuëpisopita minsëaramaꞌ.

² Catapini shonca piꞌi inotëro parti paꞌtasëmaꞌ, Sinioro nohuanton nisha nisha maꞌsha onporamaꞌ. Inapotatënquëmaꞌ, natëtochináchin cancantamaso marëꞌ napotërinquëmaꞌ. Onpopinsona cancantëramasoꞌ, nitotacaso marëꞌ tënirinquëmaꞌ. Naporahuaton: ‘¿Tëhuënchachin taꞌma natërëꞌponaco to?’ taꞌton napotërinquëmaꞌ. Inaso nipirinhuëꞌ, co patërinquëmahuëꞌ. Ama ina naniantocosohuëꞌ.

³ Ina nohuanton aꞌna tahuëri tana acorinquëmaꞌ. Napoaponahuëꞌ, ina piquëranso capamaso marëꞌ mana aꞌpatiimarinquëmaꞌ. Inanpi cosharoso co nohuitopiramahuëꞌ, quëtërinquëmaꞌ. Co shimashonëmapitari tëranta nohuitopihuëꞌ: ‘Co cosharoriáchin, piyapi ananpirinhuëꞌ. Yaꞌipi Yosë noninsoꞌ natëhuachin tëhuëchinsoꞌ, nanpiarin,’ taꞌcamaso marëꞌ inanpi cosharo quëtërinquëmaꞌ.

⁴ Catapini shonca piꞌipi paꞌsápomarahuëꞌ, co aꞌmoramaso mocarinhuëꞌ. Co nantëma tëranta pomatërinhuëꞌ.

⁵ Napoaton: ‘Siniorosoꞌ nóya niꞌton, huiꞌnanpo nosorohuatëra, pënënëso pochin, pënëninpoaꞌ,’ tocoꞌ.

⁶ Napoaton Sinioronënpoasoꞌ Yosë niꞌton, noya nicatoma camaitërinsopita natëcoꞌ. Aꞌchintërinquëmasopitantaꞌ, ina inachachin nicoꞌ.

⁷ Sinioro chachin noyaroꞌpaquë ichiyaꞌconapënquëmaꞌ. Inaquësoꞌ, notohuaroꞌ iꞌsharoꞌsa yaꞌhuërin. Iꞌshanaroꞌsaꞌ, huinanoꞌsaꞌ, inapitanta motopiroꞌsaquë yaꞌhuërin. Motopianaroꞌsaquëntaꞌ, yaꞌhuërin.

⁸ Trico, sipata, inapita noya noyatërin. Oparoroꞌsaꞌ, iquiraroroꞌsaꞌ, inapita yaꞌhuërin. Cranata huayoroꞌsaꞌ, oripo nararoꞌsaꞌ, inapitanta noyatërin. Ninointa co pahuaninhuëꞌ.

⁹ Inaquësoꞌ, co manta cosharo pahuantarinquëmahuëꞌ. Ina noꞌpaquësoꞌ, co maꞌsha tëranta pahuantarinquëmahuëꞌ. Huaꞌnamia naꞌpiroroꞌsaquë quënanaramaꞌ. Copri huaꞌnantaꞌ, motopinënpitaquë ocoiaramaꞌ.

¹⁰ Napoaton nani coshatatoma natëhuatamaꞌ, Sinioro chinotocoꞌ. Chinotatomaꞌ: ‘¡Ma noyacha Yosëso niꞌton, noyaroꞌpaꞌ quëtërinpoa paya!’ tocoꞌ,” itërin.

Yosë yonquirápaiso marëꞌ pënëninsoꞌ

¹¹ Naquëranchin Moisësë israiroꞌsa nontaantarin: “Sinioronënpoasáchin Yosëso niꞌton, niꞌcona ina naniantotamaꞌ. Niꞌcona camaitërinsopita, pënëntërinsopita, inapita naniantotamaꞌ. Inapita ipora tahuëri shaꞌhuitaranquëmaꞌ.

¹² Inaquë yaꞌhuëapoma pochin natëaquë huarëꞌ coshataramaꞌ. Naporahuaton noya pëiroꞌsa nisarama yaꞌhuëcamaso marëꞌ.

¹³ Ohuacanëmaꞌ, ohuicanëmaꞌ, inapita notohuaroꞌ naꞌasarin. Maꞌsha paꞌanatoma naꞌcon naꞌcon coriqui, oro, inapita canaramaꞌ. Ina quëran naꞌcon naꞌcon maꞌsha paꞌanaramaꞌ.

¹⁴ Ina pochin nipatamaꞌ, niꞌcona nocantotamaꞌ. Iquipitoquë canpitasoꞌ, asacatatënënquëma aparisitërinënquëmaꞌ. Inapotápirinënquëmahuëꞌ, Sinioro inaquëran ocoirinquëmaꞌ. Napoaton ama ina naniantocosohuëꞌ.

¹⁵ Paꞌpi huëhuëpiro inotëro partitaquëchin quëninpoaꞌ. Inaquë notohuaroꞌ yaꞌhuanoꞌsaꞌ, yonpincaroꞌsaꞌ, inapita yaꞌhuërin. Inaquë co manta iꞌsha yaꞌhuërinhuëꞌ. Napoaponahuëꞌ, oꞌocahuaso marëꞌ natëtë quëran, iꞌsha ocoirin.

¹⁶ Ina chachin mana quëtërinpoa capacaso marëꞌ. Inaso cosharoꞌ, shiꞌmashonënpoanta co nohuitopihuëꞌ. Inapotatënquëma tënirinquëmaꞌ. Naporahuaton, natëtochináchin cancantamaso marëꞌ napotërinquëmaꞌ.

¹⁷ ‘Quiyaora sacatatoi yaꞌipi isopita maꞌsha canarai,’ ama tocosohuëꞌ.

¹⁸ Sinioro achinirinquëma niꞌton, sacatatoma nani maꞌsha maꞌpatëramaꞌ. Shimashonënpoapitarëꞌ anoyataton, shaꞌhuitërinsoꞌ nanicaso marëꞌ catahuarinquëmaꞌ. Ama ina naniantocosohuëꞌ.

¹⁹ Napotopiranquëmahuëꞌ, ina naniantatoma nisha nisha mamanshiroꞌsa moshahuatamaꞌ, iporaquëranchin shaꞌhuitaranquëmaꞌ: Tëhuënchachin naꞌcon naꞌconquëma taꞌhuantarama tënahuë.

²⁰ Noyaroꞌpaquë yaꞌconapoma pochin, Siniorori nisha nisha nacionoꞌsa ataꞌhuantërapon. Inapochachin canpitanta co ina natëhuatamahuëꞌ, ataꞌhuantarinquëmaꞌ,” itërin.