Deuteronomio 6 - Chayahuita (Shahui)

Yosë naꞌcon naꞌcon nohuantërinsoꞌ

¹ Naquëranchin Moisësëri israiroꞌsa nontaton itapon: “Yosë camairinco niꞌton, pënëntërinsopita, camaitërinsopita, inapita natëcamaso marëꞌ apira shaꞌhuitaantaranquëmaꞌ. Yosë noꞌpaꞌ quëtarinquëmaquë yaꞌhuëhuatamaꞌ, inapita noꞌtëquën natëcoꞌ.

² Ina pochin mini Sinioro noya nicatë natëcaso yaꞌhuërin. Pënëntërinsopita, camaitërinsopita, inapita chiminaquë huarëꞌ natëcoꞌ. Naporahuaton huiꞌnamapita, shiparimapita, inapitanta natëchinaꞌ. Inapohuatamaꞌ, huaꞌqui tahuëri niꞌsaramaꞌ.

³ Napoaton yaꞌipi israiroꞌsanquëma noꞌtëquën natëcamaso marëꞌ shaꞌhuitaranquëmaꞌ. Natëhuatamaꞌ, Yosë noꞌpaꞌ quëtarinquëmaquë noya yaꞌhuaramaꞌ. Inaquësoꞌ, co manta pahuaninhuëꞌ. Naporahuaton naꞌcon naꞌcon naꞌasaramaꞌ. Shimashonënpoapita Siniorori shaꞌhuitërinso chachin nisarin.

^4-5 Iporasoꞌ, yaꞌipi israiroꞌsanquëma natancoꞌ. Yosëíchin huaꞌanëntërinpoaꞌ. Inasáchin natërëhuaꞌ. Inasoꞌ Sinioro niꞌton, ina naꞌcon naꞌcon nosorocaso yaꞌhuërin. Yaꞌipi cancanëma quëran, huaꞌyanëma quëran, chinirama quëran, yaꞌipi inaquëranpita nosoromiatocoꞌ.

⁶ Inapita ipora shaꞌhuitëranquëmasoꞌ, yonquinëma quëran nitotocoꞌ.

⁷ Huiꞌnamapitantaꞌ, apira apira ina aꞌchintocoꞌ. Pëinëmaquë yaꞌhuëhuatamaꞌ, shaꞌhuitocoꞌ. Iratasëmanta inapotocoꞌ. Yahuëꞌëpatamaꞌ, capayatohuatamaꞌ, naporonta aꞌchintamaso yaꞌhuërin.

⁸ Inapita camairinpoasoꞌ, ninshitëramaquë ninshitahuatomaꞌ, pëꞌtoaꞌhuayaquë poꞌmocoꞌ. Ina quëran ahuënan tanpanëmaquë nitonpotocoꞌ. Tëꞌyamaquëhuë nipon inapotocoꞌ. Ina quëran yonquiamaso marëꞌ napoaramaꞌ.

⁹ Pëinëma yaꞌcoanaquëntaꞌ, ina nanan ninshitocoꞌ. Onëroꞌsaquënta ninshitocoꞌ,” itërin.

Natëtacaiso marëꞌ pënëninsoꞌ

¹⁰ Naquëranchin Moisësëri israiroꞌsa pënëantarin: “Shimashonënpoapita Apraan, Isaco, Cacopo, inapita nani shaꞌhuitërin: ‘Caso Yosëco niꞌto, iso noꞌpaꞌ quëtaranquëmaꞌ,’ itërin. Shaꞌhuitërinso chachin Sinioronënpoa inaquë ayaꞌcoaninquëmaꞌ. Inaquësoꞌ, panca ninanoroꞌsa noyápiachináchin yaꞌhuërin. Co canpitari ninamahuëꞌ.

¹¹ Pëinënaquënta notohuaroꞌ nani maꞌsha yaꞌhuërin. Noya noya nininsopita yaꞌhuërin. Co canpitari sacatatoma acoramahuëꞌ. Posoroꞌsanta nani yaꞌhuërin. Co canpitari ihuaramahuëꞌ. Oparoroꞌsaꞌ, oripororoꞌsaꞌ, inapitanta yaꞌhuërin. Co canpitari shaꞌnamahuëꞌ. Ina canpitasoꞌ, co sacaiyátërahuëꞌ macatoma natëaquë huarëꞌ capomaꞌ, oꞌopomaꞌ.

¹² Inapoapomarahuëꞌ, ama Sinioro naniantocosohuëꞌ. Canpitaso Iquipitoquë parisitapiramahuëꞌ, nichaꞌërinquëmaꞌ.

¹³ Sinioroíchin chinotocoꞌ. Inasáchin natëcaso yaꞌhuërin. Inasoꞌ huaꞌanëntërinpoaꞌ. Maꞌmarësona tëranta natëtacaiso marëꞌ shaꞌhuihuatamaꞌ, Yoscoarëꞌ taꞌtoma shaꞌhuicoꞌ.

¹⁴ Yaꞌyoranimasopita piyapiꞌsasoꞌ, nisha nisha mamanshiroꞌsa moshatona yaꞌhuëpi. Ama canpitasoꞌ, inapita moshacosohuëꞌ.

¹⁵ Sinioronënpoasoꞌ Yosë niꞌton, niꞌsárinpoaꞌ. Inasoꞌ, paꞌpi aꞌpitërinpoaꞌ. Ina naniantatoma mamanshi moshahuatamaꞌ, noꞌhuitënquëma nanitërin anaꞌintiinquëmasoꞌ. Ina nohuanton naꞌcon naꞌconquëma chiminaramaꞌ.

¹⁶ Ama Yosë tënicosohuëꞌ. Ama ina camaicosohuëꞌ. Ina nohuantërinsoráchin yonquicaso yaꞌhuërin. Ama huachi catoro Masaquë naporamaso pochin niantacosohuëꞌ. Noꞌhuichinquëmaꞌ.

¹⁷ Siniorosoꞌ Yosë niꞌton, camairinquëmasopita, noꞌtëquënáchin natëcoꞌ. Pënëntërinsonta noꞌtëquën natëcoꞌ.

¹⁸ Sinioro nohuantërinsoráchin nicoꞌ. Maꞌpitasona noya nicacasoꞌ nani shaꞌhuitërinpoaꞌ. Inapita natëhuatamaꞌ, nani tahuëri catahuarinquëmaꞌ. Shimashonënpoapita nontaton: ‘Caso Yosëco niꞌto, shiparimapita iso noꞌpaꞌ quëtarahuë,’ itërin. Shaꞌhuitërinso chachin Sinioronënpoa noyaroꞌpaꞌquë ayaꞌcoaninquëmaꞌ.

¹⁹ Inapohuatamaꞌ, shaꞌhuitërinpoaso chachin, yaꞌipi inimicoroꞌsa ina nohuanton taꞌananpiarinquëmaꞌ.

^20-21 Aꞌna tahuëri huiꞌnamaꞌ: ‘¿Maꞌta tapon isopita camaitërinsoꞌ, pënëntërinsoꞌ, inapita Sinioro shaꞌhuitërinpoa natëcaso marëꞌ?’ itohuachinënquëmaꞌ: ‘Quiyasoꞌ Iquipitoquë, copirno camaiatoncoi aparisitápirincoihuëꞌ. Sinioro chiníquën nanantaton ina quëran ocoirincoi.

²² Ocoincoiso marëꞌ nani maꞌsha ninin. Iquipito copirno piyapinënpitarë chachin anitotacaso marëꞌ paꞌpi huëhuëpiro nininsopita, maꞌsha aꞌnorinso niꞌnai.

²³ Inapoaton Iquipito quëran ocoirahuatonpoaꞌ, shimashonënpoapita noꞌpaꞌ quëtacasoꞌ shaꞌhuitërinquë quëninpoaꞌ. Ina quëtërinpoa niꞌton, ina noꞌpaquë ipora yaꞌhuëarëhuaꞌ.

²⁴ Ina quëran Sinioro shaꞌhuitërinpoa yaꞌipi camaitërinsopita natëcaso marëꞌ. Naporahuaton ina paꞌyatatëhua noya niꞌcasoꞌ shaꞌhuitërinpoaꞌ. Inapohuatëhua nani tahuëri catahuarinpoaꞌ. Ina nohuanton, ipora nanpirëhuaso pochin, noya yaꞌhuëáparihuaꞌ.

²⁵ Napoaton inapita camairinpoasoꞌ, noya yonquiatëhua natëahuaꞌ. Siniorosoꞌ, niꞌsárinpoaꞌ. Ina natëhuatëhuaꞌ, shaꞌhuitërinpoaso chachin noya nisarëhuaꞌ,’ itahuaꞌ,” itërin Moisësëri.