Deuteronomio 4 - Chayahuita (Shahui)

Noꞌtëquën natëtacaiso marëꞌ pënëninsoꞌ

¹ Moisësëri israiroꞌsa nontaton itapon: “Iporaso huachi, Sinioro pënëntërinsoꞌ natëcoꞌ. Camairinquëmasopitantaꞌ, natëcoꞌ. Nani yaꞌipi carinquëma aꞌchintëranquëmaꞌ. Ama topinan quëran natanatomarahuëꞌ, ina nohuantërinso nicoꞌ. Inapohuatamaꞌ, noya nanpitoma Yosë quihuitërinpoasoꞌ noꞌpaquë yaꞌconatoma huaꞌanëntaramaꞌ. Shimashonënpoapita shaꞌhuitërinso chachin quëtarinpoaꞌ.

² Sinioroso Yosënënpoa niꞌton, natëcaso marëꞌ naꞌcon camairinquëmasoꞌ, nani shaꞌhuitëranquëmaꞌ. Ama ina apancatocosohuëꞌ. Naporahuaton ama aꞌna nananya tëranta apahuantocosohuëꞌ.

³ Nani niꞌnama Pioro motopiquë Sinioro anaꞌintërinpoasoꞌ. Yaꞌhuëhuanoꞌsa mamanshinëna Paaro itopisoꞌ, quëmopinënpoa moshatapatopi niꞌton, tiquirin.

⁴ Canpitaso nipirinhuëꞌ, co inapoatomarahuëꞌ inasáchin cancantërama niꞌton, Sinioro iporahuanta nanpicasoꞌ quëtarinquëmaꞌ.

⁵ Yaꞌipi Sinioronënpoa pënëntërinsoꞌ, camaitërinsoꞌ, inapita shaꞌhuitërincosoꞌ nani aꞌchintëranquëmaꞌ. Noꞌpaꞌ manamaquë yaꞌhuëhuatamaꞌ, yaꞌipi inapita natëcoꞌ.

⁶ Natëtatomaꞌ, ina inachachin nicoꞌ. Inapohuatamaꞌ, nisha nisha piyapiꞌsa naꞌcon nitotatoma yonquínahuanoꞌsa ninamasoꞌ, nitotapi huachi. Ina nitotohuachinaꞌ: ‘¡Ma noyacha inapitaso pënëntërinso nanan yaꞌhuëtopi paya! Napoaton naꞌcon nitotatonaꞌ, yonquínahuanoꞌsa nipi,’ tosapi.

⁷ ¡Co inso nacion tërantaꞌ, canpoa pochin Yosë imapihuëꞌ! Inahuasoꞌ, mamanshinënari catahuacaso marëꞌ nontopirinahuëꞌ, co catahuarinhuëꞌ. Canpoaso nipirinhuëꞌ, onporosoꞌ nontohuatëhuara, aꞌnaroáchin aꞌpanirinpoaꞌ.

⁸ Tëhuënchachin mini co aꞌna nacion tëranta canpoa pochin yaꞌhuërinhuëꞌ. Aꞌnapitaso co canpoa pochin noꞌtëquënáchin pënëntërinso nanan yaꞌhuëtopihuëꞌ. Camaitërinso nanan tëranta co yaꞌhuëtopihuëꞌ. Inapita canpitasoꞌ, ipora yaꞌipi aꞌchintaranquëmaꞌ.

⁹ Niꞌcona nani maꞌsha niꞌnamasopita naniantotamaꞌ. Aꞌchintëranquëmasopitanta yonquirácoꞌ. Ipora aꞌchintëranquëmasopita ama naniantatomarahuëꞌ, huiꞌnamapitanta aꞌchintocoꞌ. Shiparimapitanta inapotocoꞌ,” itërin.

Sinai motopiquë Yosëri nontërinso ayonquiantarinsoꞌ

¹⁰ Ina quëran itaantarin: “Iráca Sinai motopi notënanquë niꞌsëmaꞌ, Sinioro nontatonco napotërinco: ‘Israiroꞌsa ayontonquë nonahuësoꞌ natanacaiso marëꞌ. Noya nicatonaco chiminai huarëꞌ imainacoso marëꞌ pënënarahuë. Ina quëran huiꞌninapitanta aꞌchintohuachinaꞌ, inahuanta imasarinaco,’ itërinco.

¹¹ Canpitaso naporoꞌ, motopi nanimarinquë yaꞌcaritëramaꞌ. Ina motopi quëransoꞌ, panca pën inápaquë huarëꞌ pipirarin niꞌnamaꞌ. Ina pën quëran chachin yaráton chitoro pochin yaꞌnorin.

¹² Naporoꞌ Siniorosoꞌ, pën huáncana quëran nontërinpoaꞌ. Noninsoꞌ mini natanapomarahuëꞌ, co manta quënanamahuëꞌ.

¹³ Shonca nanan pënëninpoa quëran, Sinioro canpoarë anoyatërinso anitotërinpoaꞌ. Inapita cato naꞌpitëaꞌhuaquë ninshitërin. Ina quëtahuatonpoa camairinpoa noꞌtëquën natëcaso marëꞌ.

¹⁴ Pënëntërinsopita, camaitërinsopita, inapita aꞌchintaꞌhuanquëmaso marëꞌ canta camairinco. Noꞌpaꞌ quëtarinquëmaquë yaꞌconpatama natëcamaso marëꞌ, aꞌchintaranquëmaꞌ,” itërin.

Ama mamanshi moshacaiso marëhuëꞌ pënëninsoꞌ

^15-18 Moisësësoꞌ, israiroꞌsa nontaton itaantapon: “Sinai motopiquë Siniorosoꞌ, pën huáncana quëran nontërinpoaꞌ. Noninsoꞌ mini natanapomarahuëꞌ, naporo co manta quënanamahuëꞌ. Niꞌcona nitapicancanatoma mamanshi nipatamaꞌ. Quëmapi, sanapi, maꞌsharoꞌsaꞌ, anpiantëhuanoꞌsaꞌ, samiroꞌsaꞌ, inapita pochin yaꞌnorinso nitamaꞌ.

¹⁹ Piꞌiroꞌtënta nëꞌpëhuatamaꞌ, niꞌcona piꞌi, yoqui, tayoraroꞌsaꞌ, inapita quënanatoma moshachináchin cancantotamaꞌ. Inapitasoꞌ yaꞌipi piyapiꞌsa aꞌpintacaso marëꞌ acorin. Canpoaso nipirinhuëꞌ, Yosëíchin chinotacaso yaꞌhuërin.

²⁰ Canpitasoꞌ, Sinioro Iquipito quëran ocoirahuatënquëma huaꞌanëntërinquëmaꞌ. Huaꞌnamia asoquicaso marëꞌ ornoquë aꞌpërahuatëꞌ, asoquirëꞌ. Inapochachin canpitanta Iquipitoquë parisitápiramahuëꞌ, ocoirinquëmaꞌ. Napoaton ina piyapinënpita ninama huachi.

²¹ Napoaponahuëꞌ, canpita naꞌin quëran cantaꞌ, noꞌhuirinco: ‘Caso Yosëco niꞌto, co Cortaniiꞌ pëntontahuaton noyaroꞌpaquë yaꞌconaranhuëꞌ,’ itërinco. Inasoꞌ noꞌpaꞌ, canpitari huaꞌanëntarama huachi.

²² Napoaton caso iso Moapo noꞌpaquë chachin chiminarahuë. Co Cortaniiꞌ pëntontarahuëꞌ. Canpita tëhuënchinsoꞌ pëntontatomaꞌ, ina noyaroꞌpaꞌ huaꞌanëntaramaꞌ.

^23-24 Napoaponahuëꞌ, niꞌcona Siniororëꞌquënpoa anoyatërëhuaso naniantotamaꞌ. Ama manta mamanshi nicatoma moshacosohuëꞌ. Nani Sinioro anitotërinpoaꞌ, ama aꞌnaratipita nonanacaso marëhuëꞌ. Sinioronënpoasoꞌ paꞌpi aꞌpitërinpoaꞌ. Co natëhuatamahuëꞌ, noꞌhuitënquëmaꞌ pënquë ahuiquitërëso pochin anaꞌintarinquëmaꞌ.

²⁵ Noyaroꞌpaquë yaꞌconpatamaꞌ, huaꞌqui yaꞌhuëapoma pochin, huiꞌnamapita yaꞌhuëtarinquëmaꞌ. Shiparimapitanta yaꞌhuëtohuachinquëmaꞌ, mashotarama huachi. Co naporo tëranta mamanshi nicacaso yaꞌhuërinhuëꞌ. Sinioro naniantotamaꞌ. Ama manta nonanatomaꞌ, moshacosohuëꞌ. Co Sinioro natëtomahuëꞌ inapohuatamaꞌ, paꞌpi co noyahuëꞌ nisaramaꞌ. Ina marëꞌ chiníquën noꞌhuiarinquëmaꞌ.

²⁶ Piꞌiroꞌtëꞌ, isoroꞌpaꞌ, inapita yaꞌhuërinso niꞌnëhuaꞌ. Inapochachin shaꞌhuitaranquëmasontaꞌ, noꞌtëquën nisarin. Cortaniiꞌ aquëtëran noꞌpaꞌ yaꞌhuërinsoꞌ macatoma huaꞌanëntopiramahuëꞌ, mamanshi moshacaso marëꞌ nipatamaꞌ, co huaꞌqui inaquë yaꞌhuëaramahuëꞌ. Naꞌcon naꞌconquëma chiminaramaꞌ.

²⁷ Nisha nisha nacionoꞌsaquë Sinioro nohuanton, quëpaponënquëmaꞌ. Inaquënta napoaponahuëꞌ, naꞌcon naꞌconquëma chiminaramaꞌ. Caraíchinquëma co chiminaramahuëꞌ.

²⁸ Inaquë quëpahuachinënquëmaꞌ, nisha nisha mamanshiroꞌsa piyapiꞌsari nipisoꞌ moshaaramaꞌ. Aꞌnaquën nara quëran, aꞌnaquënso naꞌpi quëran nipi niꞌton, co manta quënantopihuëꞌ, co natantopihuëꞌ, co coshatopihuëꞌ, co niipihuëꞌ. Napoaponahuëꞌ, canpitaso moshatapataramaꞌ.

²⁹ Napoaponahuëꞌ, inaquë niꞌsëma yaꞌipi cancanëma quëran, nisahuaton yaꞌipi huaꞌyanëma quëran Sinioro nontohuatamaꞌ, natanatënquëma catahuaarinquëmaꞌ.

^30-31 Nisha nisha parisitápatomaꞌ, mamanshi chinotëramaso aꞌpoaramaꞌ. Ina aꞌpoatoma Sinioroíchin chinotocoꞌ. Napohuatamaꞌ, inaso nóya nichinapon chachin, co aꞌpoarinquëmahuëꞌ. Co ataꞌhuantarinquëmahuëꞌ. Noya cancantaantahuatamaꞌ, shimashonëmapitarëꞌ anoyatërinso yonquiaton catahuantarinquëmaꞌ: ‘Caso Yosëco niꞌto, noꞌtëquën nontëranquën,’ itërin niꞌton, catahuarinquëmaꞌ.

^32-38 Shimashonëmapita nosoroaton huayoninquëmaꞌ. Chiníquën nanantaton Iquipito quëran nichaꞌërinquëmaꞌ. Aꞌnapitaso canpita quëran chini chiníquënoꞌsaꞌ. Napopirinahuëꞌ, canpitari yaꞌhuërëtamaso marëꞌ inapitaso noꞌpanëna quëran Yosëri aꞌpararin. Ipora tahuëriꞌsa napoarinso chachin aꞌpararin. Inta nipachin yonquiricoꞌ: Coꞌhuara canpita yaꞌhuëyátërasënquëmahuëꞌ, yaꞌnan piyapi Yosëri ninin quëran huarëꞌ napopisoꞌ yonquiricoꞌ. Naporahuaton nisha nisha piyapiꞌsa isoroꞌpaquë yaꞌhuëpisopita natanicoꞌ. Natanpiramahuëꞌ: ¡Co onporo tëranta inahuasoꞌ, canpoa Yosë catahuamiatërinpoaso pochin catahuarinsoꞌ, shaꞌhuitaponënquëmahuëꞌ! Canpoasoꞌ, Yosë chachin pën huáncana quëran nontërinpoaso natanëhuaꞌ. Natanarihuarahuë co chiminëhuahuëꞌ. ¡Co inso nacionquë tëranta inapopihuëꞌ! Canpoasoꞌ, aꞌnapita nacionoꞌsa quëran Yosë huayoninpoaꞌ. Huayonatonpoaꞌ, acorinpoaꞌ piyapinënpita nicacaso marëꞌ. Ina marëꞌ iquipitoroꞌsa Yosëri tëniton, aparisitërin. Nisha nisha maꞌsha sacai nininsopita aꞌnotërin. Ina, yaꞌhuërënamënpoa iquipitoroꞌsa ahuëaton, aꞌpayanin. Inapoaton chiníquën nanantërinsoꞌ aꞌnotërinpoaꞌ. ¡Tëhuënchachin co intopa tëranta Yosë pochin mamanshiroꞌsa nipihuëꞌ! ‘Sinioroíchin Yosësoꞌ. Co aꞌna ina pochin yaꞌhuërinhuëꞌ,’ taꞌcamaso marëꞌ nani maꞌsha ninin. Inápa quëraonta pënënainquëmaso marëꞌ nontërinquëmaꞌ. Isoroꞌpaquëntaꞌ, panca pën aꞌnotërinpoaꞌ. Ina huáncana quëran nontërinpoasonta natanëhuaꞌ.

³⁹ Napoaton noya yonquirahuatomaꞌ: ‘Sinioroíchin Yosësoꞌ. Inápaquë huaꞌanëntërinso pochachin isoroꞌpaquënta huaꞌanëntarin. Co aꞌna ina pochin yaꞌhuërinhuëꞌ,’ tocoꞌ.

⁴⁰ Yaꞌipi pënëninquëmasopita natëcoꞌ. Camairinquëmasopitantaꞌ, natëcoꞌ. Inapita ipora tahuëri carinquëma shaꞌhuitaranquëmaꞌ. Inapohuatamaꞌ, Yosë noꞌpaꞌ quëtarinquëmaquë noya yaꞌhuëaramaꞌ. Naporahuaton huaꞌqui tahuëri niꞌsaramaꞌ. Shiparimapitanta noya yaꞌhuëaponaꞌ. Co incari tëranta ina noꞌpaso osërëtarinquëmahuëꞌ,” itërin Moisësëri.

^41-49 (-)