Deuteronomio 33 - Chayahuita (Shahui)

Israiroꞌsa Moisësëri noya yaꞌhuëcaiso marëꞌ shaꞌhuitërinsoꞌ

^1-2 Moisësësoꞌ, Yosëri anitotërinso shaꞌhuinaꞌpi. Coꞌhuara chimiyantërasohuëꞌ, israiroꞌsa noya yaꞌhuëcaiso marëꞌ shaꞌhuitaton iso pochin shaꞌhuitërin: “Sinai motopiquë niꞌsëhuaꞌ, Sinioro huëcapairinpoaꞌ. Itomo motopiroꞌsa parti quëran huarëꞌ, piꞌi aꞌpininso pochin, noya nicacasoꞌ anitotërinpoaꞌ. Paran ninano motopiroꞌsa quëran huarëꞌ, huënaratërinso imaquirëhuaꞌ. Ina naꞌhuëtahuaton, Miripa-Catisë quëran huarëꞌ noya quëninpoaꞌ. Inchinan quëran sëꞌquëatë pochin, pënëntërinso nanan quëshirinpoaꞌ. Chiníquën nanantërin niꞌton, naporo panca pën niꞌnëhuaꞌ.

³ Canpoasoꞌ israiroꞌsanpoaꞌ, Sinioro nosoromiatërinpoaꞌ. Inasáchin imapatëhuaꞌ, paꞌpoyarinpoaꞌ. Inasáchin canpoaso chinotërëhuaꞌ. Maꞌpitaso camairinpoasopita ninëhuaꞌ.

⁴ Ca Moisësëco, pënëntërinsoꞌ maꞌpatërahuë. Tatanpo maꞌsha ayananpirinso manëso pochin, Cacopo shinpitanpoa maꞌpatërëhuaꞌ. Noya noya niꞌton, ina canpoasoꞌ naꞌcon naꞌcon nohuantërëhuaꞌ.

⁵ Yaꞌipi Israiro huëntonoꞌsanpoa niyontonëhuaquë, pënëntërinso nanan quëtërinpoaꞌ. Huaꞌanënpoapitanta inaquë niꞌsoiꞌ, quëtërinpoaꞌ. Naporoꞌ Siniorosoꞌ, copirnonënpoa yaꞌconin,” tënin.

⁶ Nopino huënton israiroꞌsa yonquiaton, Moisësë tapon: “¡Nopino huënton israiroꞌsasoꞌ, ama taꞌhuantatonaraihuëꞌ yaꞌhuëꞌinaꞌ! ¡Ama napoaponahuë naꞌamiachinasohuëꞌ. Chini chiníquën nanantohuachinaꞌ!” tënin.

⁷ Cota huënton israiroꞌsanta yonquiaton, tapon: “Cota huënton israiroꞌsa nontohuachinquën, noya natanaton Sinioro catahuaquëꞌ. Niaꞌpopiso piquëran quëma nohuanton aꞌnapita israiroꞌsarëꞌ, aꞌna huëntoíchin niantaꞌinaꞌ. Chini chiníquën nanantaton paꞌpoyaquëꞌ. Catahuaquë ama inimiconënpitari minsëinasohuëꞌ,” itërin.

⁸ Nihui huënton israiroꞌsanta yonquiaton, tapon: “Orin, Tomin, inapitaso quëmaquën ninin Sinioro. Quëmari corto huaꞌanoꞌsa quëtëran. Inahuasoꞌ, quëmasáchin cancantërinën. Masa, itopiquë tënirahuaton, Miripa iꞌsha itopiquë chiníquën pënënan. Inaquë chachin piyapinënpita marëꞌ, iꞌsha naꞌpi quëran ocoitëran.

⁹ Inahuasoꞌ, camaitëranso natëpi. Israiroꞌsarëꞌquën anoyatëranso imamiatapi. Quëmopinëna quëran, ina naꞌcon naꞌcon cancantopi. Ina marëꞌ paꞌpinaꞌ, aꞌshinaꞌ, inapita niponaraihuëꞌ: ‘Coꞌchi onporonta niꞌnaihuë paya,’ itopi. Iinaꞌ, oshinaꞌ, inapitantaꞌ, ‘Coꞌchi nohuitëraihuëꞌ paya,’ itopi. Huiꞌnina tëranta nisapirinhuëꞌ: ‘Ahuën, inpitaso nimara,’ itopi.

¹⁰ Inahua mini israiroꞌsa aꞌchintapi. Pënëntëransopita, aꞌchinansopita, inapita aꞌchintapi. Chinotëranquënso pëi artaroꞌsaquë, yonarin pochin pimóchin aꞌpëpi. Maꞌsharoꞌsanta quëma marëꞌ tëpapisoꞌ, ahuiquitapi.

¹¹ Quëma marëꞌ sacatopi niꞌton, catahuaquë noya noya sacachinaꞌ. Napopisoꞌ nicaton noya cancantëquëꞌ. Ahuëatë nipanpitërëso pochin, yaꞌipi inimiconënpita nitëquëꞌ. Noꞌhuipisopitari ama naquëranchin huaniantaꞌinasohuëꞌ,” itërin.

¹² Mincamin huënton israiroꞌsanta yonquiaton, tapon: “Mincamin huënton israiroꞌsasoꞌ, Siniorori nosororin. Napoaton inahuasoꞌ, sano yaꞌhuaponaꞌ. Chini chiníquën nanantërinsoari paꞌpoyarápon. Motopiaꞌhuanënpitaquë yaꞌhuëaton, paꞌpoyarápon,” tënin.

¹³ Cosi huënton quëran pipipisopita israiroꞌsanta yonquiaton, tapon: “Cosi huënton quëran pipipisopita israiroꞌsaꞌ, Sinioro catahuaquëꞌ. Noꞌpanëna noya noya niin. Poroncayo inápa quëran anotërinsoari noya noya shipichin. Acoporoquë iꞌ yaꞌhuërinsontaꞌ, noya noya nininso yaꞌhuëchin. Iꞌshanaroꞌsa quëran, iroꞌsaquë pipirinsoꞌ.

¹⁴ Cosi shinpita shaꞌtopisoꞌ, noya noyachin. Nani piꞌiquë cayacaiso nipisopita, noya noya mainaꞌ. Tahuërinën nanihuachina napoꞌinaꞌ.

¹⁵ Huaꞌhuayátërahuë nitërinsoꞌ mainaꞌ. Iráca motopiroꞌsaꞌ notohuaroꞌ yaꞌhuërinso pochin shaꞌpisopitantaꞌ, notohuaroꞌ mainaꞌ. Ina mapisopitasoꞌ, yaꞌhuëmiachin. Motopiroꞌsaꞌ, motopiaꞌhuaroꞌsaꞌ, inapita yaꞌhuërárinso pochin niin.

¹⁶ Noya noya cosharo nininsopita noꞌpanënaquë noyachin. Quëmari Sinioro Cosi shinpita catahuaquëꞌ. Yonquirapirahuëso chachin yaꞌhuëchinaꞌ. Quëmari chachin iinpita huaꞌanën nicacaso marëꞌ, Cosi huayonan. Ca huayonancoso pochachin, nitëran. Sarsa nara huëyaponahuëꞌ, co huiquitërinhuëꞌ nininquë yaꞌnotëranco. Yaꞌnotatonco cantaꞌ, israiroꞌsa ocoiaꞌhuaso marëꞌ camairanco. Quëmasoꞌ noyasáchin yonquirapirancoi.

¹⁷ Toro yaꞌnan huiꞌnahuaninsoꞌ, noya noyatërin. Tanan ohuacanta chini chiníquën ninin. Inapitasoꞌ pomonëna quëran patatatonaꞌ, chinitërinsopita aꞌpapi. Inapita pochin Cosi huiꞌninpita huëntonoꞌsa nisapi. Huaꞌhuayátërahuë sontaroꞌsa Iprain huëntonquë yaꞌhuapon. Mamasisi huëntonquënta napoapon. Yaꞌipi nisha nisha piyapiroꞌsa minsëaponaꞌ. Isoroꞌpaꞌ nanirinquë huarëꞌ aꞌpaponaꞌ,” tënin.

¹⁸ Saporono, Isacaro, Inapita huëntonoꞌsanta yonquiaton, tapon: “Saporono huënton israiroꞌsamasoꞌ paꞌana marëꞌ marë paꞌtohuatamaꞌ, capa cancantocoꞌ. Isacaro huënton israiroꞌsamantaꞌ, capa cancantocoꞌ. Huaꞌhuayátërahuë pëꞌtahuatatoma canpitasoꞌ, nëꞌmëtë pëiroꞌsaquë yaꞌhuëapomaꞌ.

¹⁹ Aꞌnapita Israiro huëntonoꞌsa përaponaꞌ: ‘Huëco paꞌahua Sinioro chinotërëhuaso motopiquë, ina chinotahuaꞌ,’ taponaꞌ. Inaquë paatonaꞌ, Sinioro marëꞌ maꞌsha tëpatona chinotaponaꞌ. Paꞌanai marëꞌ, marë paꞌtohuachinaꞌ, nisha nisha nacion nonshinanoꞌsaquë maꞌsha paꞌanatona canaponaꞌ. Ina canapi quëran noya yaꞌhuëaponaꞌ,” tënin.

²⁰ Caro itopisoꞌ Israiro huëntonta yonquiaton, tapon: “Caro itopisoꞌ Israiro huëntonsoꞌ, quëmari Sinioro naꞌcon naꞌcon noꞌpaꞌ quëtaran. Ina marëꞌ noya yonquirapitënën chinotarinën. Paꞌpiniꞌ paya yaꞌtorahuaton piyapi ninarin. Tëparahuaton tanpaquën, motën, inapita paꞌsa paꞌsatërin. Inapochachin Caro huënton sontaroꞌsasoꞌ, inimicoroꞌsa nitaponaꞌ.

²¹ Yaꞌipi Israiro huënton huaꞌanoꞌsari Canaan noꞌpaꞌ patomataponaꞌ. Naporoꞌ Caro itopisoꞌ Israiro huëntonsoꞌ, noya noya noꞌpaꞌ mapon. Huaꞌan marëꞌ pochin nininsoꞌ mapon. Israiroꞌsa Canaanquë yaꞌconpachinaꞌ, inapita quëchitaponaꞌ. Inahuasoꞌ, quëma nohuantëransoꞌ Sinioro nicaponaꞌ. Camaitëransopita natëtonaꞌ, Israiro huëntonquë noꞌtëquënáchin nisapi,” itërin.

²² Tano itopisoꞌ Israiro huëntonta yonquiaton, tapon: “Tano itopisoꞌ Israiro huëntonsoꞌ, paꞌpiniaꞌhua pochin nisarin. Paꞌpinisoꞌ yamapintohuachina, niitaton maꞌsha manin. Ina pochachin inahuantaꞌ, Pasan parti quëran pipitonaꞌ, inimicoroꞌsa ahuëaponaꞌ,” tënin.

²³ Nipitari itopisoꞌ Israiro huëntonta yonquiaton, tapon: “Nipitari itopisoꞌ Israiro huëntonsoꞌ, Siniorori nóya niꞌnin. Paꞌpi notohuaroꞌ inari catahuarin. Sor parti yonsanquë huarëꞌ panca sono nininsoꞌ huaꞌanëntapon,” tënin.

²⁴ Asiri itopisoꞌ Israiro huëntonta yonquiaton tapon: “Asiri itopisoꞌ Israiro huëntonsoꞌ, Siniorori nóya catahuain. Aꞌnapita Cacopo shinpita quëran, naꞌcon naꞌcon nosoroaton catahuain. Paꞌpi notohuaroꞌ oripo narahuanatonaꞌ, ina tomaquë nantëna nipaꞌmorantëinaꞌ.

²⁵ Ama inimicoroꞌsari yaꞌcontacaso marëhuëꞌ, ninanonëna yaꞌcoanaroꞌsantaꞌ, noyá acoꞌinaꞌ. Chiníquën niꞌtona yaꞌhuëmiatacaiso marëꞌ nóya acoinaꞌ. Huaꞌnamia quëran, shaꞌpi huaꞌna quëran, ina quëranpita nipiso acoinaꞌ.

²⁶ Israiroꞌsanpoáchin noya noya Yosë chinotërëhuaꞌ. Co aꞌna ina pochin nininhuëꞌ. Cahuarioquë yaꞌmitërëso pochin, chiníquën nanantaton chitoro aipi catahuainpoaso marëꞌ oꞌmarin.

²⁷ Yaꞌhuëmiatërinso Yosë chachin paꞌpoyarinpoaꞌ. Chini chiníquën nanantaton catahuarinpoaꞌ. Co onporonta sanpataponhuëꞌ. Ina catahuarinpoa niꞌton, inimicoroꞌsa nicatonpoa taꞌananpirinënpoaꞌ. Nani inapita ataꞌhuantacaso marëꞌ nanan quëtërinpoaꞌ.

²⁸ Israiroꞌsanpoasoꞌ, co manta tëꞌhuatarihuarahuëꞌ yaꞌhuëarihuaꞌ. Shiparinpoapitantaꞌ, napoaponaꞌ. Shaꞌpatëhuaꞌ, notohuaroꞌ tricoro yaꞌhuëapon capacasoꞌ. Notohuaroꞌ oparo yaꞌhuëapon oꞌocasoꞌ. Co onporonta oꞌnan pahuantarinpoahuëꞌ.

²⁹ ¡Mainacha canpoasoꞌ israiroꞌsanpoa ninëhua paya! Co inso nacion tërantaꞌ, canpoa pochin nininhuëꞌ. Sinioro chachin nichaꞌërinpoaꞌ. Ina chachin paꞌpoyarinpoaꞌ. Catahuarinpoaꞌ, napotërinpoaꞌ. Inimiconënpoapita, sahuëninënpoa quëran minsërëhuaꞌ. Ina pochachin Sinioronta catahuarinquëmaꞌ, inimicoroꞌsa minsëaramaꞌ. Inimiconëma ahuërapiramahuëꞌ, co nanitatonaraihuëꞌ moshaponëmaꞌ: ‘Ama huachi niahuëaꞌhuasohuëꞌ. Nohuantëramasoꞌ natancoi quëchinquëmaꞌ,’ itaponënquëmaꞌ. Inapotatoma atapanapoma huachi,” itërin Moisësë israiroꞌsa nontaton.