Deuteronomio 31 - Chayahuita (Shahui)

Cosoi, Moisësë yaꞌhuërënamën huaꞌan yaꞌconinsoꞌ

¹ Naquëranchin Moisësëri yaꞌipi israiroꞌsa nontaton itapon:

² “Nani caso pasa cato shonca piꞌipitërahuë. Co huachi nanitërahuëꞌ áquë paꞌsápaꞌhuasoꞌ. Naporahuaton Sinioro chachin nani shaꞌhuitërinco: ‘Quëmasoꞌ co Cortaniiꞌ pëntontaranhuëꞌ,’ itërinco.

³ Napoaponahuëꞌ, Sinioronënpoaso Yosë niꞌton, quëchitahuaton quëpaarinquëmaꞌ. Paꞌnamaquë nacionoꞌsa quënanamasoꞌ, inari ataꞌhuantëraꞌpiapon. Canpitari noꞌpanëna macacamaso marëꞌ inapotapon. Siniorori nani huayonin niꞌton, piyapinëhuë Cosoi itërëhuasoꞌ, huaꞌanëma nisarin.

⁴ Iso yonsan quëran amororoꞌsa copirnonënapitasoꞌ: Sion, Oco, inapita nipirinahuëꞌ, Sinioro catahuarinpoa niꞌton, piyapinënpitarë chachin ataꞌhuantërëhuaꞌ. Inapochachin aquëtëran nacionoꞌsa yaꞌhuërinsopitanta nitarin.

⁵ Sinioro nohuanton inapita nacionoꞌsa nani minsëhuatamaꞌ, yaꞌipi camairanquëmaso chachin nitamaso yaꞌhuërin.

⁶ Ama tëꞌhuatoma nisha nisha cancantocosohuëꞌ. Inapitarëꞌquëma niahuëhuatamaꞌ, ama manta paꞌyancosohuëꞌ. Sinioronënpoasoꞌ Yosë niꞌton, catahuararinquëmaꞌ. Co onporonta patarinquëmahuëꞌ. Co naniantarinquëmahuëꞌ,” itërin Moisësëri.

⁷ Ina quëran Moisësësoꞌ, Cosoi përarin. Naporoꞌ yaꞌipi israiroꞌsa niꞌtonënquë, huaꞌan acocaso marëꞌ shaꞌhuitërin: “Ama tëꞌhuaton, nisha nisha yonquiquësohuëꞌ. Siniorori shimashonënpoapita iráca: ‘Caso Yosëco niꞌto, iso noꞌpaꞌ shiparimapita quëtarahuë,’ itërin. Naporinso chachin quëmari isopita quëparahuaton, ina noꞌpaꞌ ahuaꞌanëntaran.

⁸ Sinioro chachin quëchintaton noꞌtëquën quëpaarinquën. Co onporonta patarinquënhuëꞌ. Co naniantarinquënhuëꞌ. Napoaton ama manta tëꞌhuatëquësohuëꞌ,” itërin Moisësëri.

Nihuitopiso ayatacaso piꞌiquë, Yosë pënëntërinso quirica nontacaso yaꞌhuërinsoꞌ

⁹ Yaꞌipi isopita pënëntërinsoꞌ, Moisësëri quiricaquë ninshitërin. Ninshitahuaton Nihui huënton corto huaꞌanoꞌsaꞌ, yaꞌipi Israiro ansianoꞌsaꞌ, inapitari tapacaiso marëꞌ quëtërin. Corto huaꞌanoꞌsasoꞌ, Yosërëꞌ anoyatopiso caposonën quëpanaꞌpiroꞌsaꞌ.

¹⁰ Ina quëtahuaton, pënënin: “Nani canchisë piꞌi nanihuachina, canpitaso israiroꞌsanquëma ninihuiramasoꞌ ayatamaso yaꞌhuërin. Imënamëaꞌhuaroꞌsa pitaquë napoaramaꞌ.

¹¹ Insëquësona chinotamacoso marëꞌ cari huayonarahuë. Inaquë iso quirica nontopisoꞌ, yaꞌipiya quëran natanacaiso yaꞌhuërin.

¹² Naporoꞌ yaꞌipi Israiro quëmapiꞌsaꞌ, sanapiꞌsaꞌ, huaꞌhuaroꞌsaꞌ, inapita niyontonaponaꞌ. Nisharoꞌsanta ninanonëmaquë yacaparimasopita, huëcaponaꞌ. Huëcatonaꞌ, pënëntërahuëso nontopisoꞌ natanacaiso yaꞌhuërin. Ina quëran tëꞌhuatatonaco, noya nicainacosoꞌ nitotapi. Inapoatona yaꞌipi camaitërahuëso natëcaiso marëꞌ natanacaiso yaꞌhuërin.

¹³ Inapohuatamaꞌ, huiꞌnamapitanta co manta nitotopirinahuëꞌ, nitotapi. Nitotatona noya nicatonaco, pënëntërahuësopita, chiminaiquë huarëꞌ natëapi. Cortaniiꞌ pëntontohuatamaꞌ, inaquë noꞌpaꞌ yaꞌhuërinso masaramaꞌ. Inaquë napoaramaso huachi,” itërin Moisësëri.

Yatonitaton, Siniorori Moisësë anitotërinsoꞌ

¹⁴ Ina quëran Siniorori, Moisësë itapon: “Niꞌquëꞌ, nani ora naniarin chiminamaso huachi. Napoaton Cosoi amatahuaton, catonquëma chachin chinotëramacoso nëꞌmëtë pëiquë pacoꞌ. Inaquë camaiarahuë maꞌsona Cosoi nicacasoꞌ,” itërin Yosëri. Napotohuachina cato chachin inaquë paꞌpi.

¹⁵ Inaquë nicasoi yaꞌcoana pëtëcha, naporopi chitoro ninin quëran Siniorori yaꞌnotërin.

¹⁶ Naporoꞌ Siniorori Moisësë itapon: “Co huaꞌquiya quëranhuë quëmasoꞌ chiminapon. Aꞌnapitaso noꞌpaꞌ quëtarahuëquë yaꞌconpachinaꞌ, nisha cancantapi. Inapoatonaꞌ, nisha nisha mamanshiroꞌsa yaꞌhuëhuanoꞌsari moshapisoꞌ, moshatona aꞌpoaponaco. Inapitaroꞌco nani anoyatopirahuëꞌ, napoatona anoyatërahuëso tapiaponaꞌ.

¹⁷ Napoaponahuëꞌ, inapopiso marëꞌ carinta chiníquën noꞌhuito tananpitarahuë. Manta tëranta yaꞌhuëpachinantaꞌ, co huachi inapita yonquiarahuëꞌ. Paꞌpi parisitatona naporo huarëꞌ: ‘Tëhuënchachin Sinioro aꞌporinpoa niꞌton, poꞌsarëhuaꞌ,’ tëcaponaꞌ.

¹⁸ Napopirinahuë tëranta caso aquë aquëtë co tahuërëtarahuëꞌ. Nisha nisha mamanshiroꞌsa moshatonaꞌ, paꞌpi co noyahuëꞌ nipiso marëꞌ, napotarahuë.

¹⁹ Iporaso huachi quëmari Moisësë iso cantanën anitotaranquënso ninshitëquëꞌ. Ina quëran israiroꞌsa yonquinëna quëran nitotatonaꞌ, cantacaiso marëꞌ aꞌchintëquëꞌ. Co natëhuatamacohuëꞌ, anaꞌintaranquëmaꞌ itërahuëso yonquicaiso marëꞌ, aꞌchintëquëꞌ. Nani quëmari aꞌchintëran niꞌton: ‘Coꞌchi inaso nitotëraihuë paya,’ co tosapihuëꞌ.

²⁰ Iráca shimashonënapita, shaꞌhuitërahuë: ‘Caso Yosëco niꞌto, iso noꞌpaꞌ shiparimapita quëtarahuë,’ itërahuë. Napotërahuëso chachin, inaquë ayaꞌcoanahuë. Inaquëso co manta pahuaninhuë niꞌton, inaquë yaꞌconatonaꞌ, natëaquë huarëꞌ coshataponaꞌ. Coshatatona amonpachinaꞌ, nisha nisha mamanshiroꞌsa tahuërëtaponaꞌ. Inapoatona nocanaponaco. Napoatona inapitaroꞌco anoyatërahuësoꞌ, tapiaponaꞌ.

²¹ Napoaponahuëꞌ, aꞌporinacoso marëꞌ paꞌpi parisitohuachinaꞌ, naporo iso cantanën aꞌchintëransoari ayonquiarin huachi: ‘Tëhuënchachin nani cantanën quëran shaꞌhuitopirinpoahuëꞌ,’ tëcapona huachi. Shiparinanta iso cantanën nitotatonaꞌ, cantapona niꞌton, yonquiapi antaꞌ. Coꞌhuara shaꞌhuitëranquëmasoꞌ noꞌpaquë poꞌmoyatërasocohuëꞌ, nani nitotërahuë co noyahuëꞌ nicacaisoráchin cancantopisoꞌ. Napoaton iso cantanën aninshitaranquën,” itërin Siniorori.

²² Naporo tahuëri chachin Moisësë iso canta ninshitërin. Nani ninshitahuaton, israiroꞌsa aꞌchintërin nitotacaiso marëꞌ.

²³ Ina quëran Yosësoꞌ, Cosoi yaꞌhuërëꞌ tahuërëtahuaton itapon: “Ama tëꞌhuatonahuëꞌ, chiníquën cancantëquëꞌ. Israiroꞌsa noꞌpaꞌ quëtaꞌhuasoꞌ nani shaꞌhuitërahuë. Nani quëma huayonanquën israiroꞌsa ina noꞌpaquë poꞌmoamasoꞌ. Carinquën catahuaranquën inapotaran,” itërin.

^24-25 Yaꞌipi isopita pënëntërinsoꞌ, Moisësëri aꞌna soꞌnanpi quiricaquë ninshitërin. Nani ninshitahuaton nihuiroꞌsa quëtërin. Inahuasoꞌ, Siniororëꞌ anoyatopiso caposonën quëpanaꞌpiroꞌsaꞌ. Inapita quëtahuaton shaꞌhuitërin:

²⁶ “Pënëntërinsoꞌ quirica ninshitërahuëso macoꞌ. Masahuatomaꞌ, Siniororëꞌquënpoa anoyatërëhuaso caposonën pirayan acocoꞌ. Inaquë yaꞌhuëcaso marëꞌ acocoꞌ. Inaquë yaꞌhuëaton, co natëtohuatamahuëꞌ Sinioro anaꞌintiinquëmaso yaꞌhuërinso ayonquiarinquëmaꞌ.

²⁷ Nani co natantochináchinhuëꞌ cancantëramasoꞌ, nitotërahuë. Niꞌcoꞌ. Nanpichinapo chachinta Sinioro co natëtomarahuë tëhuëtëramaꞌ. Aquëtë huarëꞌ nisarama chiminpatosoꞌ.

²⁸ Yaꞌipi ansianoꞌsaꞌ, yaꞌipi huaꞌanoꞌsanëmaꞌ, inapita isëquë quëcoꞌ. Canpita shaꞌhuitaranquëmaso chachin inapitanta shaꞌhuichi. Nani natanamaco niꞌton, noꞌtëquën shaꞌhuitaranquëmaꞌ. Piꞌiroꞌtëꞌ, isoroꞌpaꞌ, inapita yaꞌhuërinso niꞌnëhuaꞌ. Inapochachin shaꞌhuitaranquëmasontaꞌ, noꞌtëquën nisarin. Ina niꞌton: ‘Co shaꞌhuitërinpoahuëꞌ,’ co tosaramahuëꞌ.

²⁹ Carimaso ipora nani camairanquëmaꞌ, noꞌtëquën imacamaso marëꞌ. Napoaponahuë nani chiminpato, ina aꞌporahuatoma nitapicancanaramaꞌ. Ina marëꞌ aꞌna tahuëri Yosë anaꞌintatënquëma aparisitarinquëmaꞌ. Sinioro niꞌsápirinquëmahuëꞌ, co noyahuëꞌ nisarama niꞌton, chiníquën anoꞌhuitaramaꞌ,” itërin Moisësëri.

Moisësë cantarinsoꞌ

³⁰ Ina quëran Moisësësoꞌ, Siniorori canta anitotërinsoꞌ, yaꞌipi israiroꞌsa niyontonpiquë aꞌchintërin: