Deuteronomio 26 - Chayahuita (Shahui)

Yaꞌnan cayarinsopita Sinioro marëꞌ quëtacasoꞌ nininsoꞌ

^1-2 Naquëranchin Moisësëri israiroꞌsa nontaponahuëꞌ, aꞌnaya aꞌnaya pochin pënënarin: “Sinioroso Yosënënpoa niꞌton, noꞌpaꞌ quëtarinquën huaꞌanëntacaso marëꞌ. Inaquë yaꞌconaton iminpatan, yaꞌnan cayarinsopitaꞌton, masaran. Iꞌmëquë poꞌmorahuaton, insëquësona ina chinotacaso pëiꞌ acocaso Sinioro huayoninquë quëpaaran.

³ Insosona naporo corto huaꞌan nisarinquë quëpaaton: ‘Siniorosoꞌ Yosënëhuë niꞌton, shimashonëhuëpita iráca shaꞌhuitërin: “Caso Yosëco niꞌto, iso noꞌpaꞌ shiparimapita quëtarahuë,” itërin. Ina shaꞌhuirinso chachin, nani yaꞌconahuë,’ tosaran.

⁴ Nani ina shaꞌhuihuatan, corto huaꞌansoꞌ iꞌmëquë quënansoꞌ maꞌpaarinquën. Masahuaton, Sinioro artaronën notënanquë acoarin.

⁵ Nani Sinioro notënanquë acohuachina, iso pochin Sinioro nontaran: ‘Shimashonëhuëpitasoꞌ, Aran piyapiꞌsaꞌ. Caraíchin niꞌsoiꞌ, paatona patë patë́rantapi. Oshaquëran Iquipito roꞌtëquë yaꞌhuëcaiso marëꞌ paꞌmapi. Inaquë naꞌatona panca nacion tarancoantapi.

⁶ Napoaton iquipitoroꞌsasoꞌ: “Minsëhuachinënpoaꞌ,” taꞌtonaꞌ, aparisitërinacoi. Co quëꞌyatonacoirahuëꞌ, chiníquën asacatërinacoi.

⁷ Naporoꞌ Sinioro nontëranquën huachi: “Quëmasáchin Yosënquën. Shimashonëhuëipita chinotërinënquën. Nosoroatoncoi catahuacoi,” itërainquën. Napotohuatëinquën, natanancoi huachi. Aparisitërinacoiso niꞌsahuaton, yacatahuarancoi huachi.

⁸ Chiníquën nanantaton, ocoirancoi. Nisha nisha maꞌsha sacai nininsopita iquipitoroꞌsa aꞌnotëran. Co niꞌchinpisohuëꞌ aꞌnotaton, aꞌpayanan.

⁹ Nani nichaꞌërahuatoncoi, iso noꞌpaquë quënancoi. Isëquësoꞌ, co manta pahuaninhuëꞌ.

¹⁰ Napoaton noꞌpaꞌ quëtëranco quëran, shaꞌnahuësopita yaꞌnan cayarinsoꞌ quëshiaranquën,’ tosaran. Napotahuaton, Sinioro notënanquë iꞌmëquë quënansoꞌ acoaran. Nani acohuatan, isonahuaton ina chinotaran.

¹¹ Ina piquëran Sinioro marëꞌ pita nisaran. Quëmopinënpitarëꞌquën chachin nani maꞌsha Sinioro quëtërinquën. Ina yonquiaton, capa cancantaran. Naporo chachin nihuiroꞌsaꞌ, nisha piyapiroꞌsa yacaparinquëmasopita, inapitanta canpitarë chachin capa cancantapi antaꞌ,” itërin.

Diesmo acocaso yaꞌhuërinsoꞌ

¹² Naquëranchin Moisësëri israiroꞌsa nontaantarin: “Nani piꞌiquë aꞌnaya aꞌnayamaꞌ, shaꞌtëramasoꞌ manama quëran diesmo, Sinioro marëꞌ acocamaso yaꞌhuërin. Napoaponahuëꞌ, nani cara piꞌipi quëran pahuantopisopita quëtacaso marëꞌ aꞌna diesmonta acoaramaꞌ. Nihuiroꞌsaꞌ, nisha piyapiroꞌsa yacaparinquëmasopita, quëyoronoꞌsaꞌ, saꞌahuaroꞌsaꞌ, inapita marëꞌ acoaramaꞌ. Inapitanta yaꞌhuëpiquë noya coshatacaiso marëꞌ acoaramaꞌ.

¹³ Naporoꞌ aꞌnaya aꞌnayanquëmaꞌ, Sinioro nontatoma itapomaꞌ: ‘Nani quëma marëꞌ diesmo nininsoꞌ nisha acorahuë. Ina quëran nihuiroꞌsa quëtërahuë. Nisharoꞌsanta yacaparinacoisopita, inapotërahuë. Quëyoronoꞌsaꞌ, saꞌahuaroꞌsaꞌ, inapitanta quëtërahuë. Camairancoso chachin ninahuë. Co manta naniantërahuëꞌ shaꞌnahuësopita quëran diesmo ocoicaꞌhuasoꞌ.

¹⁴ Ina acorahuësoꞌ, co manta sëꞌhuarahuëꞌ. Co nichimiyantëraiquë tëranta capaꞌhuaso nohuantërahuëꞌ. Co oshanëhuëroꞌco nisahuasoco tëranta ina caꞌnahuëꞌ. Co chimipiroꞌsa marëꞌ tëranta ina acorahuëꞌ. Diesmo acocaso camaitëransoꞌ, yaꞌipi Sinioro natëranquën.

¹⁵ Quëmasoꞌ, inápaquë noya noya pëiquë yaꞌhuërëso pochin yaꞌhuëtëran. Inaquë yaꞌhuëaponahuëꞌ, isoroꞌpaquë yaꞌhuëraiso nitotëran. Israiroꞌsacoisoꞌ, quëma piyapinënpitacoi niꞌton, catahuamiatocoi. Noꞌpaꞌ quëtërancoisontaꞌ, nóya. Co manta pahuaninhuëꞌ. Shimashonëhuëpita shaꞌhuitëranso chachin ninin. Inantaꞌ, noya yonquirapiquëꞌ. Quëma nohuanton nani maꞌsha shaꞌnaisopita noya noyachin,’ tosaran,” itërin.

Sinioroíchin cancantacaiso marëꞌ huayoninsoꞌ

¹⁶ Naquëranchin Moisësëri israiroꞌsa nontaantarin: “Sinioroso Yosënënpoa niꞌton, ipora tahuëri yaꞌipi pënëntërinsopita, noꞌtëquën natëcamaso marëꞌ camairinquëmaꞌ. Camaitërinsopitantaꞌ, inapotocoꞌ. Yaꞌipi cancanëma quëran nisahuaton yaꞌipi huaꞌyanëma quëran inapita natëcoꞌ.

¹⁷ Nani quëma ipora shaꞌhuiran: ‘Siniorosoꞌ Yosënëhuë niꞌton, ina imato pënëntërinsopita, camaitërinsopita, aꞌchininsopita, inapita natëarahuë,’ tënan. Napoaton noꞌtëquën natëquëꞌ.

¹⁸ Sinioronta ipora nani shaꞌhuirin: ‘Canpitaso israiroꞌsanquëmaꞌ. Shaꞌhuitëranquëmaso chachin carinquëma huaꞌanëntëranquëmaꞌ. Yaꞌipi camairanquëmasopita natëcamaso yaꞌhuërin,’ tënin.

¹⁹ Inari yaꞌipi nacionoꞌsa ninin. Napoaponahuëꞌ, canpitaso noya noya acoarinquëmaꞌ. Catahuarinquëma niꞌton, naní quëran nohuitarinënquëmaꞌ. Naporahuaton noya nicatënënquëmaꞌ: ‘Ma noyacha israiroꞌsasoꞌ acorin paya,’ taponaꞌ. Siniorosoꞌ Yosë niꞌton, ina naporinso chachin nohuantarinquëma ina marëꞌ sacatamasoꞌ,” itërin.