Deuteronomio 25 - Chayahuita (Shahui)

¹ Aꞌnaquëma nanan yaꞌhuëtohuachinquëmaꞌ, coisëroꞌsa sacatërinquë pacoꞌ. Inapita noyá natanarinquëmaꞌ. Insosona tëhuëhuachin, noꞌtëquën anaꞌintacaso shaꞌhuitapi. Co tëhuërinsopitasohuëꞌ nipirinhuëꞌ, co anaꞌintaponahuëꞌ.

² Tëhuënaꞌpi huihuicaiso nipachin, coisë camaitapon noꞌpaquë apiꞌpatonaꞌ, huihuicaisoꞌ. Inapotatona tëhuërinso marëꞌ ina niꞌtonënquë chachin noꞌtëquën anaꞌintapi.

³ Huihuihuachinasoꞌ, ama inso tëranta catapini shoncaro aquëtë huihuiinasohuëꞌ. Ama naꞌcon naꞌcon aparisitatona atapanacaso marëhuëꞌ, inayara huihuiinaꞌ.

⁴ Toro asacatohuatamaꞌ, aꞌcacoꞌ. Iꞌnataton toꞌnorayahuachin, ama tonpoanantocosohuëꞌ. Tananpitocoꞌ piꞌpian piꞌpian coshachin,” itërin.

Co huiꞌnahuanyátërasoihuëꞌ chiminpachinaꞌ, onpocaisona yaꞌhuërinsoꞌ

⁵ Naquëranchin Moisësëri israiroꞌsa nontaantarin: “Aꞌna tahuëri nanitopi pocacaisoꞌ: Cato quëmapiꞌsa ina noꞌparáchin huaꞌanëntaponahuëꞌ, aꞌnaso co huiꞌnahuanyátërasohuëꞌ, saꞌin ayananpirin. Inapohuachin, sanapisoꞌ co nisha quëmapiri masarinhuëꞌ. Soꞌinco iini chachin maantacaso yaꞌhuërin. Inapohuachina, noꞌtëquën nisarin.

⁶ Yaꞌnan quëmapiaꞌhua huiꞌnahuaninsoꞌ, iinco apoarin. Ama iinco nininën Israiro huënton quëran ayacaso marëhuëꞌ inapoarin.

⁷ Napoaponahuëꞌ, coꞌsoꞌ imoroëni yamapachinhuëꞌ, sanapiso huaꞌanoꞌsa sacatërinquë paꞌsarin. Inaquë ansianoꞌsa shaꞌhuitapon: ‘Inachintërëhuaso aꞌpoaton, imoya co yamanincohuëꞌ. Co nohuantërinhuëꞌ iinco nininën Israiro huëntonquë yaꞌhuëcasoꞌ,’ itapon.

^8-9 Napohuachina, ansianoꞌsari amatahuatona macacaso marëꞌ nontaponaꞌ. Nani nontopirinahuëꞌ co nohuantohuachinhuëꞌ, imoroëni ansianoꞌsa niꞌtonënquë, aꞌnara sapatën ocoitahuaton ipirayatapon. Inapotahuaton itapon: ‘Quëmapisoꞌ, iinco nosoroaton yaꞌhuërënamën huiꞌnahuanacaso yaꞌhuërin. Coꞌsoꞌ yainapohuachinhuëꞌ poꞌtacaso yaꞌhuërin,’ itarin.

¹⁰ Inapotohuachina, naní quëran israiroꞌsari ina quëmapi quëmopinënpita apoyataponaꞌ: ‘Sapatën ocoitopisoꞌ quëmopinënpita,’ itaponaꞌ,” itërin Moisësë.

^11-19 (-)