Deuteronomio 24 - Chayahuita (Shahui)

Saꞌina tëꞌyatohuachinaꞌ, onpocaisona yaꞌhuërinsoꞌ

¹ Naquëranchin Moisësë israiroꞌsa nontaantarin: “Aꞌna quëmapi sanapi maponahuëꞌ, ichihuëꞌërinquë co costarinsohuëꞌ niꞌnin. Napohuachina tëꞌyatërinsoꞌ nitotacaiso marëꞌ, quiricaquë aninshitahuaton, ina sanapi quëtapon. Inapotahuaton aꞌpapon huachi.

² Soꞌin yaꞌhuërin quëran pipihuachina, nanitërin inasoꞌ, aꞌna quëmapi soꞌyataantacasoꞌ.

^3-4 Soꞌyaantapirinhuëꞌ, ina yaꞌhuërëꞌ chimininhuë nipon, yaꞌnan soꞌyatërinso pochinhuë nipon, nocaantarin. Nocanaton quirica aninshitahuaton aꞌpocaso marëꞌ quëtërin. Napohuachina, yaꞌnan maninsoari co huachi nanitërinhuëꞌ ina sanapi chachin maantacasoꞌ. Nani aꞌna quëmapi soꞌyataantaton, co huachi noyatërinhuëꞌ. Napopisopita Siniorori co quëꞌyarinhuëꞌ. Napohuatamasoꞌ, noꞌpaꞌ Sinioro quëtarinquëmaso tapiaramaꞌ,” itërin.

Nisha nisha natëcaiso marëꞌ pënëntërinsoꞌ

⁵ Naquëranchin Moisësëri israiroꞌsa nontaantarin: “Quëmapi nasha saꞌasahuachina, co ahuëtacaso marëꞌ quëpacaso yaꞌhuërinhuëꞌ. Co maꞌsha marëꞌ tëranta huaꞌanoꞌsari camaicaso yaꞌhuërinhuëꞌ. Saꞌarin quëran huarëꞌ, aꞌna piꞌira inapotaponaꞌ. Yaꞌipi ina piꞌi nanirinso chachin yaꞌhuërinquë yaꞌhuëaton, saꞌin acapacancanapon.

⁶ Aꞌna piyapi nihuihuachinquëmaꞌ: ‘Nihuirancosoꞌ pahuërëanco huarëꞌ, pëꞌsanto naꞌpinën cari taparahuë,’ ama itocosohuëꞌ. Ina quëtohuachinquënsoꞌ, co huachi nanitarinhuëꞌ onpo nanpicasoꞌ.

⁷ Aꞌnaquën Israiro capini nipirinhuëꞌ, nanitopi nipoꞌocaisoꞌ. Camaicaso marëhuë nipon, paꞌanacaso marëhuë nipon, inaporin. Inapoaso quënayatohuatamaꞌ, tëpamaso yaꞌhuërin. Inapotatomaꞌ, co noyahuëꞌ cancantopisopita acopitamaso yaꞌhuërin.

⁸ Piyapi chana caniori mapachina, Nihui huënton corto huaꞌanoꞌsa natëcaiso yaꞌhuërin. Camaitopisoꞌ, noꞌtëquënáchin natëchinaꞌ. Nani cari chachin inapita camairahuë, piyapiꞌsa inanpi caniori mapachina, maꞌsona onpotacaisoꞌ.

⁹ Iráca Iquipito quëran pipirahuatëhua huëcasëhuaꞌ, Siniorori Maria anaꞌintërinso yonquicoꞌ. Tëhuëtërin niꞌton, noꞌtëquën anaꞌintërin.

¹⁰ Iyaparima maꞌsha aꞌnanatomaꞌ, ina ayantinquëmaso nitotamaso marëꞌ, ama canpitaora chachin pëinënquë yaꞌconatomaꞌ, maꞌshanën matocosohuëꞌ.

¹¹ Aipiran ninacoꞌ. Inaora chachin, maꞌsona tëranta quëchinquëmaꞌ.

^12-13 Saꞌahuamia nininsoꞌ ayantinquëmaso nitotamaso marëꞌ aꞌmorinso quëtohuachinquëmaꞌ, ama mamiatocosohuëꞌ. Coꞌhuara tashiyátërasohuëꞌ quëtaantacoꞌ. Noya huëꞌëcaso marëꞌ quëtaantacoꞌ. Inapotohuatamaꞌ, catahuainquëmaso marëꞌ Yosë nontarin. Sinioronta inaporamaso marëꞌ, noya niꞌsarinquëmaꞌ.

^14-15 Sacatoroꞌsa noꞌtëquën pahuërëcoꞌ. Nisha piyapiꞌsa yacaparinquëmasohuë nipon, Israiro piyapihuë nipon camaihuatamaꞌ, naporo tahuëri chachin pahuërëcoꞌ. Saꞌahua niꞌton, nanpicaso marëꞌ coriqui nohuantarin. Coꞌsoꞌ pahuërëhuatamahuëꞌ, anaꞌintaꞌhuanquëmaso marëꞌ, nontarinaco. Nontohuachinaco, co noyahuëꞌ nicatoma oshahuanarama niꞌton, anaꞌintaranquëmaꞌ.

¹⁶ Aꞌnaya aꞌnaya oshanën marëꞌ noꞌtëquën anaꞌintacaso yaꞌhuërin. Aꞌna piyapi tëhuërinso marëꞌ, co paꞌpin co aꞌshin anaꞌintacaso yaꞌhuërinhuëꞌ. Inapochachin paꞌpinhuë nipon, aꞌshinhuë nipon tëhuërinso marëꞌ co huiꞌnin anaꞌintacaso yaꞌhuërinhuëꞌ.

¹⁷ Nisha piyapiroꞌsaꞌ, saꞌahuaroꞌsaꞌ, inapita nosoroatoma ama maꞌsha onpotocosohuëꞌ. Quëyoronoꞌsa nihuihuachinquëmaꞌ, ayantinquëmaso nitotamaso marëꞌ, ama aꞌmorinso matocosohuëꞌ.

¹⁸ Iquipitoroꞌsa canpitasoꞌ, huaꞌanëntatënquëma asacatërinënquëmaꞌ. Sinioronënpoasoꞌ Yosë niꞌton, ina quëran ocoirinpoaꞌ. Ama ina naniantatomarahuëꞌ, ipora camairinquëmasopita natëcoꞌ.

¹⁹ Trico tonpohuë nipon sipata tonpohuë nipon, iminëmaquë manamasoꞌ naniantohuatamaꞌ, ama yonípoma paantacosohuëꞌ. Tananpitoco pahuantopisopitari mainaꞌ. Nisharoꞌsahuë nipon, saꞌahuaroꞌsahuë nipon, quëyoronoꞌsahuë nipon, inapitari mainaꞌ. Inapohuatamaꞌ, Sinioro noya nicatënquëma nani maꞌsha ninamaquë catahuamiatarinquëmaꞌ.

²⁰ Oripo huayo mapatamaꞌ, taꞌamënquë naꞌhuëtëramasopitasoꞌ, ama ayantatoma maantacosohuëꞌ. Tananpitoco pahuantopisopitari mainaꞌ. Nisharoꞌsahuë nipon, saꞌahuaroꞌsahuë nipon, quëyoronoꞌsahuë nipon, inapitari mainaꞌ.

²¹ Inapochachin oparonëmanta sënahuatamaꞌ, naꞌhuëtëramasopitasoꞌ, ama ayantatoma maantacosohuëꞌ. Tananpitoco pahuantopisopitari mainaꞌ. Nisharoꞌsahuë nipon, saꞌahuaroꞌsahuë nipon, quëyoronoꞌsahuë nipon, inapitari mainaꞌ.

²² Iquipitoroꞌsa canpitasoꞌ, yaꞌhuëpiquë huaꞌanëntatënënquëma asacatërinënquëmaꞌ. Napoaton ama ina naniantatomarahuëꞌ, ipora camairanquëmasopita natëcoꞌ.