Deuteronomio 19 - Chayahuita (Shahui)

Nonpinatona shaꞌhuirapisopita maꞌsona onpotacaiso yaꞌhuërinsoꞌ

¹⁵ Naquëranchin Moisësëri israiroꞌsa nontaantarin: “Aꞌna tahuëri yaꞌhuëramaquë co noyahuëꞌ nicatonaꞌ, tëpataponahuë nipon, ihuataponahuë nipon. Ina marëꞌ aꞌna piyapi aꞌpiramaꞌ. Napoaponahuëꞌ, aꞌna yaꞌpiriáchin shaꞌhuirapihuachin, co anaꞌintacaso yaꞌhuërinhuëꞌ. Cato yaꞌpihuë nipon, cara yaꞌpihuë nipon ina chachin shaꞌhuirapihuachinaꞌ, naporo huarëꞌ anaꞌintacaso yaꞌhuërin.

¹⁶ Aꞌnaquën co noyahuëꞌ cancantaton, aꞌna piyapi yanonpinapiton shaꞌhuirapirin: ‘Iso quëmapi Sinioro tëhuëtaton naꞌinpiro ninin,’ tapon.

¹⁷ Napohuachina cato chachin, Sinioro chinotacaso pëiquë paꞌsapi. Corto huaꞌanoꞌsaꞌ, coisëroꞌsaꞌ, inapitari natanacaiso marëꞌ paꞌsapi.

^18-19 Coisëroꞌsari, cato chachin naniarin quëran huarëꞌ natanaponaꞌ. Natanapi quëran: ‘Co noꞌtëquën shaꞌhuirapirinhuëꞌ, nonpinapiárin,’ topachinasoꞌ, inasá anaꞌintacaiso yaꞌhuërin. Shaꞌhuirapirinsoꞌ maꞌsona onpotacaisoꞌ nohuantërinso chachin, inasá nitacaiso yaꞌhuërin. Inapotatoma co noyahuëꞌ cancantopisopita, acopitamaso yaꞌhuërin.

²⁰ Napotopiso aꞌnapita israiroꞌsanta natantohuachinaꞌ, tëꞌhuatapi huachi. Tëꞌhuatatona co huachi nohuantapihuëꞌ, ina pochin paꞌpi co noyahuëꞌ nicacaisoꞌ.

²¹ Insosona co noyahuëꞌ nipachina, ama nosorocosohuëꞌ. Tëpatohuachina, inanta tëpacaso yaꞌhuërin. Aꞌna piyapi yaꞌpirin tapirayahuachin, inanta tapirayacaso yaꞌhuërin. Natëquën nipantohuachin, inanta inapotacaso yaꞌhuërin. Nantënahuë nipon, imirinahuë nipon tapihuachin, inanta inapotacaiso yaꞌhuërin,” itërin.