Deuteronomio 18 - Chayahuita (Shahui)

^1-13 (-)

Pënëntonaꞌpi Moisësë pochin yaꞌhuaantacaso nininsoꞌ

¹⁴ Naquëranchin Moisësëri israiroꞌsa nontaantarin: “Nisha nisha piyapiꞌsa noꞌpanëna mataramasopitasoꞌ, pënoton paꞌyatopi. ‘Aꞌna tahuëri maꞌsona onpocaisoꞌ nito shaꞌhuirahuë,’ topisopitanta natëpi. Canpitaso nipirinhuëꞌ, Sinioronënpoa Yosë niꞌton, co inapita pochin natëcamasoꞌ nohuantërinhuëꞌ.

¹⁵ Canpitaso nishataramaꞌ. Sinioro chachin aꞌnara Israiro quëmapi acoarin pënëntacaso marëꞌ. Naporahuaton, maꞌsona aꞌna tahuëri onpocasoꞌ shaꞌhuicaso marëꞌ acoarin. Cá pochachin nisarin. Ina huachi canpita shiparimapita natëcaiso yaꞌhuërin.

¹⁶ Ina mini canpitaso yaꞌipinquëmaꞌ, Sinai motopiquë Sinioro shaꞌhuitëramaꞌ: ‘Sinioronënpoasoꞌ Yosë niꞌton, ama huachi iso pochin nontaantaꞌincoisohuëꞌ. Co huachi naquëranchin pën niꞌcaꞌhuaiso nohuantëraihuëꞌ. Ama chiminaꞌhuaiso marëhuëꞌ naporai,’ tënamaꞌ.

^17-18 Ina natanaton, Sinioro tënin: ‘Noꞌtëquën napopi. Ca nohuanto aꞌnara Israiro quëmapi acoarahuë quëma pochin pënëntacaso marëꞌ. Inari maꞌsona camaitërahuësopita, nohuantërahuësopita, inapita shaꞌhuitarinquëmaꞌ.

¹⁹ Inasoꞌ yaꞌhuërënamëhuë shaꞌhuiarin niꞌton, insosona co natëhuachinhuëꞌ, anaꞌintomiataꞌhuaso yaꞌhuërin.

²⁰ Aꞌnaquënso napoaponahuëꞌ, nonpinatonaꞌ: “Sinioro chachin aꞌparinco niꞌton, shaꞌhuitaranquëmaꞌ,” taponaꞌ. Nonpinatona naporapi niꞌton, inapitaso tëpamaso yaꞌhuërin. Aꞌnaquëntaꞌ, mamanshi moshacamaso marëꞌ pënënpachinquëmaꞌ, inanta tëpamaso yaꞌhuërin.

²¹ Canpitaso nimara maꞌsona shaꞌhuitohuachinquëmaꞌ, nisha nisha yonquiapomaꞌ: “¿Onpo nitotatëcha: Inasoꞌ, Sinioro nohuanton shaꞌhuitarinpoaꞌ, tëcarihuaꞌ?” tapomaꞌ. Napohuatama iso yonquicoꞌ:

²² Camairahuësopita, maꞌsona onpocaso shaꞌhuihuachinaꞌ, tëhuënchachin inapoarin. Ina quëran nitotaramaꞌ. Napoaponahuë co inapohuachinhuëꞌ, co ca nohuanton naporinhuëꞌ. Inahuara nohuanton napopi. Napopisopita co tëꞌhuatamaso yaꞌhuërinhuëꞌ,’ tënin Sinioro,” itërin.