Deuteronomio 13 - Chayahuita (Shahui)

Yanishacancantopisopita anaꞌintacaso yaꞌhuërinsoꞌ

¹ Naquëranchin Moisësëri israiroꞌsa nontaantarin: “Aꞌna tahuëri pënëntonaꞌpihuë nipon, maꞌsona tapon huaꞌnapiso shaꞌhuinaꞌpihuë nipon, yaꞌnotaponquëmaꞌ. Yaꞌnotatënquëmaꞌ: ‘Caso maꞌsha sacai nininsoꞌ nicacasoꞌ, nanitaparahuë,’ itatënquëma shaꞌhuitarinquëma maꞌsona nicacasoꞌ.

² Ina naporinso chachin nipachina shaꞌhuitaponquëmaꞌ: ‘Aꞌnaquën yosëroꞌsa co nohuichátëraramahuëꞌ. Huëco paꞌahua inapitanta chinotahuaꞌ,’ itaponquëmaꞌ.

³ Napotohuachinquëmaꞌ, ama natëtocosohuëꞌ: ‘¿Tëhuënchachin taꞌma yaꞌipi cancanëna quëran, yaꞌipi huaꞌyanëna quëran nosororinaco ti?’ taꞌton, Sinioro tëniarinquëmaꞌ.

⁴ Siniorosoꞌ Yosë niꞌton, inaíchin noya nicatoma imacoꞌ. Camairinquëmasopita natëcoꞌ. Nohuantërinsoꞌ nitotatomaꞌ, ina inachachin nicoꞌ. Inasáchin cancantatoma yaꞌipi cancanëma quëran chinotocoꞌ.

⁵ Siniorosoꞌ Yosë niꞌton, Iquipito quëran nichaꞌërinquëmaꞌ. Inaquë canpitasoꞌ, chiníquën asacatatënënquëma aparisitërinënquëmaꞌ. Inapotopirinënquëmahuëꞌ, inasáchin chinotamaso marëꞌ ocoirinquëmaꞌ. Ina pënëntonaꞌpi yanishacancantërinquëmasoꞌ, tëpamaso yaꞌhuërin. Maꞌsona tapon huaꞌnapiso shaꞌhuinaꞌpihuë nipon, inapotohuachinquëma tëpamaso yaꞌhuërin. Inso tëranta co noyahuëꞌ cancantaton inapotohuachinquëmaꞌ, tëparahuatoma acopitocoꞌ.

⁶ Iporasoꞌ aꞌnaya aꞌnayanquëma shaꞌhuitaranquëmaꞌ. Tapona aꞌna tahuëri yanishacancantarinënquën. Iyaparinhuë nipon, huiꞌnanhuë nipon, saꞌan nosororansohuë nipon, nipayaransohuë nipon, yainapotarinquën. Ina marëꞌ poꞌoana quëran: ‘Huëquë paꞌa iso mamanshi chinotaꞌa. Inasoꞌ co nohuitërëhuëꞌ. Co tatanpoa tëranta nohuitërinhuëꞌ,’ itarinënquën.

^7-8 Yaꞌconaramaso noꞌpaquë, nisha nisha mamanshiroꞌsa yaꞌhuërin moshapisoꞌ. Inaquë yaꞌhuëpatamaꞌ, inapita huáncana yaꞌhuëaramaꞌ. Aꞌnaquën yaꞌcaria. Aꞌnaquënso áquëꞌ. Itohua itohua yaꞌhuëapon. Inapita moshapiso moshacaiso marëꞌ shaꞌhuitohuachinën, ama natëtëquësohuëꞌ. Naporinso co natanacaso tëranta yaꞌhuërinhuëꞌ. Co huachi nosoroaranhuëꞌ. Naporinso marëꞌ shaꞌhuirapiquëꞌ.

⁹ Tëpamaso yaꞌhuërin. Quëmariꞌton caniaritaran naꞌpiquëtacasoꞌ. Ina quëran, aꞌnapita israiroꞌsanta inapotaponaꞌ.

¹⁰ Tëpama huarëꞌ naꞌpiquëtamaso yaꞌhuërin. Sinioro imaran quëran yanishacancantërinquën niꞌton, inapotaran. Siniorosoꞌ Yosë niꞌton, Iquipito quëran nichaꞌërinquën. Inaquë quëmasoꞌ chiníquën asacatatënën aparisitapirinënquënhuëꞌ, ina ocoirinquën.

¹¹ Inapotatoma tëpahuatamaꞌ, yaꞌipi israiroꞌsa nitotapi. Nitotohuachinaꞌ, tëꞌhuatapi huachi ina pochin paꞌpi co noyahuëꞌ nininsoꞌ nicacaisoꞌ,” itërin.

^12-18 (-)