Deuteronomio 12 - Chayahuita (Shahui)

Aꞌnaíchin chinotacaso pëi yaꞌhuëcaso yaꞌhuërinsoꞌ

¹ Naquëranchin Moisësëri israiroꞌsa nontaantarin: “Isontaꞌ, Yosë pënëntërin. Inasoꞌ, shimashonënpoapitarinta chinotopi. Ina camaitërin niꞌton, chiminaquë huarëꞌ natëcoꞌ. Inachachin noꞌpaꞌ quëtarinpoaꞌ. Inaquë yaꞌhuëhuatamaꞌ, yaꞌipi natëcoꞌ.

² Inaquë yaꞌhuëpisopitasoꞌ, itohua itohua yaꞌhuëtopi mamanshinëna moshacaisoꞌ. Aꞌnaquën motopiroꞌsaquë, aꞌnaquënso nipirinhuëꞌ, motopiaꞌhuaroꞌsaquë, aꞌnapitaso panca taꞌan nararoꞌsanaquë, inaquëpita chinotopi. Nisha nisha piyapiroꞌsa inaquë yaꞌhuëpisoꞌ, nani minsëhuatamaꞌ, chinotopisopitantaꞌ, yaꞌipi ataꞌhuantamaso yaꞌhuërin.

³ Mamanshi chinotacaiso marëꞌ artaroroꞌsa nipisoꞌ, ohuatamaso yaꞌhuërin. Naꞌpiroꞌsantaꞌ, chinotai marëꞌ nipisoꞌ, paꞌparaꞌpiacoꞌ. Nararoꞌsanta ina marëꞌ nipisoꞌ, ahuiquitocoꞌ. Mamanshinënanta inapotocoꞌ. Ama incari tëranta inapita yonquicaiso marëhuëꞌ inapotocoꞌ.

^4-5 Canpitaso nipirinhuëꞌ, co inapita pochin Yosë chinotaramahuëꞌ. Inaquësáchin chinotaramaꞌ. Noꞌpaꞌ mapatamaꞌ, aꞌna huënton aꞌna huënton huaꞌanëntaramaꞌ. Insosona Sinioro huayoninquë, inaquë chinotacaso pëi acoaramaꞌ. Inaquë paꞌsahuatoma canpitaso chinotaramaꞌ.

⁶ Inaquë canpitasoꞌ, Sinioro noya nicatoma maꞌsharoꞌsa tëpapomaꞌ. Aꞌnaquën yaꞌipi ahuiquitapomaꞌ. Aꞌnaquënsoꞌ, piꞌpian ahuiquitapomaꞌ. Nani maꞌsha quëran diesmoroꞌsantaꞌ, inaquë quëparamaꞌ. Catahuatacaiso marënta camaitopisoꞌ, inapotocoꞌ. Maꞌsona Sinioro quëtamasoꞌ shaꞌhuitohuatamaꞌ, quëpamaso yaꞌhuërin. Canpitaora nohuanton maꞌsha yaquëtohuatamaꞌ, inanta quëpacoꞌ. Ohuacaroꞌsaꞌ, ohuicaroꞌsaꞌ, inapitanta yaꞌnan huaꞌhuatopisoꞌ, inapotocoꞌ. Yaꞌipi inapita inaquë quëpataramaꞌ.

⁷ Inaquë Sinioro yonquiatomaꞌ: Saꞌamaꞌ, huiꞌnamaꞌ, quëmopiroꞌsaꞌ, inapita coshataramaꞌ. Sacatëramaquë, pëꞌtahuatëramaquë, inaquëpita Yosë catahuamiatërinquëmaꞌ. Ina yonquiatoma capa cancantaramaꞌ.

⁸ Co ipora naporëhuaso pochin, inaquëso nisaramahuëꞌ. Isëquësoꞌ, insëquë tëranta Sinioro maꞌsha yaquëtohuatama quëtaramaꞌ.

⁹ Iporaso Yosë noꞌpaꞌ quëtërinpoaquë, co yaꞌconchátërarëhuahuëꞌ. Sinioro noꞌpaꞌ quëtohuachinquëmaꞌ, sano cancantaramaꞌ. Inaquë natëcamaso marëꞌ pënënaranquëmaꞌ.

^10-11 Cortaniiꞌ pëntontohuatamaꞌ, Sinioro noꞌpaꞌ quëtarinquëmaquë yaꞌhuëmiataramaꞌ. Yaꞌipi inimicoroꞌsa minsërahuatomaꞌ, sano cancantarama huachi. Naporoꞌ insëquësona Siniorori huayonin niꞌton, ina chinotacaso nëꞌmëtë pëi acoaramaꞌ. Inaquë ipora camairanquëmasopita Sinioro quëshiaramaꞌ. Ina noya nicatoma maꞌsharoꞌsa tëpapomaꞌ. Aꞌnaquën noyá ahuiquitapomaꞌ. Aꞌnaquënsoꞌ, piꞌpian ahuiquitapomaꞌ. Nani maꞌsha quëran diesmoroꞌsantaꞌ, inaquë quëpatapomaꞌ. Catahuatamaso marënta camaitopisoꞌ, quëpapomaꞌ. Maꞌsona Sinioro quëtacasoꞌ shaꞌhuitohuatamaꞌ inanta quëpatapomaꞌ.

¹² Naporo tahuëriꞌsaꞌ, Sinioro marëꞌ pita nisaramaꞌ. Huiꞌnamaꞌ, piyapinëmaꞌ, inapitanta canpitarë chachin capa cancantaponaꞌ. Nihuiroꞌsanta canpitarë yaꞌhuërinsoꞌ, naporo capa cancanchinaꞌ. Inapitasoꞌ co canpita pochin noꞌpaꞌ mapihuëꞌ niꞌton, ichicapacancancoꞌ.

¹³ Niꞌcona insëquë tëranta Sinioro marëꞌ maꞌsha tëparahuatoma ahuiquitotamaꞌ.

¹⁴ Inso huëntonquësona Sinioro huayoninquë, ina chinotacaso nëꞌmëtë pëi acohuatamaꞌ, inaquëráchin inapocoꞌ. Yaꞌipi ipora camairanquëmasopita, inaquë nicoꞌ.

¹⁵ Napoaponahuëꞌ, nosha capamaso marësoꞌ, nanitërama insëquë tëranta yaꞌhuëramaquë tëpamasoꞌ. Sinioro nohuanton naꞌa pëꞌtahua yaꞌhuëtohuachinquëmaꞌ, nayaramaquë tëparamaꞌ. Ina noshinënsoꞌ, yaꞌipiya quëran nanitapi capacaisoꞌ. Co oshanëna inquiaponaraihuë tëranta noya caꞌsapi. Nisha nisha yoroꞌsa noshinën pochin nitapi. Aꞌnapita tanan maꞌsharoꞌsa pochin nitapi.

¹⁶ Huënainënso nipirinhuëꞌ, ama caꞌcosohuëꞌ. Iꞌsha oporëso pochin noꞌpaquë opocoꞌ.

¹⁷ Trico, huino, tomaꞌ, inapita quëran diesmo ocoicoꞌ. Ohuacaꞌ, ohuica, inapitanta yaꞌnan huaꞌhuatopisoꞌ, inapotocoꞌ. Maꞌsona tëranta Sinioro quëtamasoꞌ shaꞌhuitohuatamaꞌ, ocoicoꞌ. Canpitaora nohuanton yaquëtëramasonta inapotocoꞌ. Inapita ocoiramasoꞌ, co yaꞌhuëramaquë capamaso yaꞌhuërinhuëꞌ.

¹⁸ Insëquësona Siniorori huayonin niꞌton, ina chinotacaso nëꞌmëtë pëi acoramaꞌ. Inaquësáchin inasoꞌ, quëpatoma caꞌsaramaꞌ. Huiꞌnamaꞌ, piyapinëmaꞌ, inapitanta canpitarë chachin capa cancantaponaꞌ. Nihuiroꞌsanta canpitarë yaꞌhuërinsoꞌ, naporo capa cancanchinaꞌ. Sacatëramaquë, pëꞌtahuatëramaquë, inaquëpita Yosë catahuarinquëmaso yonquiatomaꞌ, capa cancantaramaꞌ.

¹⁹ Sinioro noꞌpaꞌ quëtarinquëmaquë yaꞌhuapoma pochin ama nihuiroꞌsa naniantocosohuëꞌ. Catahuaco ama pahuanchinasohuëꞌ.

²⁰ Sinioro shaꞌhuitërinquëmaso chachin, ina nohuanton aꞌna tahuëri aquëtë huarëꞌ noꞌpaꞌ quëtaantarinquëmaꞌ. Naporoꞌ nosha nayahuatamaꞌ, noya capamaso yaꞌhuërin.

²¹ Sinioro noꞌpaꞌ quëtarinquëmasoꞌ, aꞌna tahuëri aquëtë huarëꞌ huaꞌanëntaramaꞌ. Napoaton aꞌnaquëma Yosë chinotacaso nëꞌmëtë pëi acorama quëran, áquë yaꞌhuarama huachi. Napohuatamaꞌ, inaquëranchin nanitërama ohuacanëmaꞌ, tëpatoma capamasoꞌ. Ohuicanëmantaꞌ, Sinioro nohuanton yaꞌhuëtohuachinquëma inapotamaso yaꞌhuërin. Shaꞌhuitëranquëmaso chachin co chinotacaso nëꞌmëtë pëiquë quëpamaso yaꞌhuërinhuëꞌ.

²² Ina noshinënpitasoꞌ, yaꞌipiya quëran nanitopi capacaisoꞌ. Co oshanëna inquiaponaraihuë tërantaꞌ, nisha nisha yoroꞌsa noshinën pochin nitapi. Aꞌnapita tanan maꞌsharoꞌsa pochin nitapi.

²³ Huënainënso nipirinhuëꞌ, ama caꞌcosohuëꞌ. Huënainëni maꞌsha ananpirin niꞌton, ama inaso caꞌcosohuëꞌ.

²⁴ Iꞌsha oporëso pochin opoco noꞌpaquë paꞌin.

²⁵ Co huënainën caꞌpatamahuëꞌ, noya yaꞌhuëaramaꞌ. Huiꞌnamapitanta noya yaꞌhuëaponaꞌ. Noya ninamaso marëꞌ Yosë noya niꞌsarinquëmaꞌ.

²⁶ Sinioro marëꞌ acoramasopitaso nipirinhuëꞌ, ina quëtamaso yaꞌhuërin. Maꞌsona quëtamasoꞌ shaꞌhuitëramasopitantaꞌ, Sinioro huayoninquë chachin quëpatoma quëtapomaꞌ.

²⁷ Inaquë tëparahuatomaꞌ, Sinioro artaronënquë yaꞌipi ahuiquitapomaꞌ. Ina maꞌsharoꞌsa huënainënsoꞌ, artaro aipi opopomaꞌ. Noshinënso napoaponahuëꞌ, noya capamaso yaꞌhuërin.

²⁸ Yaꞌipi ipora shaꞌhuitëranquëmasopita, paꞌyatatoma natëcoꞌ. Inapohuatama noya yaꞌhuëaramaꞌ. Huiꞌnamapitanta noya yaꞌhuëaponaꞌ. Noya ninamaso marëꞌ Yosë noya niꞌsarinquëmaꞌ,” itërin.

Ama mamanshi moshacaiso marëhuëꞌ pënëantarinsoꞌ

²⁹ Naquëranchin Moisësë israiroꞌsa nontaantarin: “Sinioro catahuarinquëma niꞌton, nisha nisha nacionoꞌsa noꞌpanëna mataramaꞌ. Inapita Siniorori ataꞌhuantohuachin, canpitari yaꞌhuërëtarama huachi.

³⁰ Inapitasoꞌ nisha nisha mamanshiroꞌsa moshapi. Niꞌcona canpitanta inapita nonanatomaꞌ, mamanshinëna moshapatotamaꞌ.

³¹ Ama Sinioro aꞌpocosohuëꞌ. Ama ina yaꞌhuërënamën, mamanshiroꞌsa moshacosohuëꞌ. Inaquë yaꞌhuëpisopitasoꞌ, inapoatonaꞌ co Sinioro costarinsohuëꞌ nipi. Aꞌnaquënsoꞌ, huiꞌninapitaquë huarëꞌ pënquë ahuiquitopi. Mamanshinëna moshacaiso marëꞌ napopi. Ama canpitaso Yosë chinotohuatamaꞌ, ina pochin nicosohuëꞌ.

³² Yaꞌipi camairanquëmasopita, noꞌtëquën natëcoꞌ. Ama ina apancatocosohuëꞌ. Naporahuaton ama aꞌna nananya tëranta apahuantocosohuëꞌ,” itërin.