Deuteronomio 10 - Chayahuita (Shahui)

Naquëranchin anoyatopiso shaꞌhuirinsoꞌ

¹ Naquëranchin Moisësëri israiroꞌsa nontaantarin: “Catapini shonca tahuëri tashirë chachin Yosë nontërahuë piquëran, inaso itaponco: Cato naꞌpitëaꞌhuaroꞌsa iꞌhua paꞌpaaransopita pochachin tapaquëꞌ. Aꞌna caposontaꞌ, nontë quëran niquëꞌ. Inapita nisahuaton, nontaancoso marëꞌ iso motopiquë huënantaquëꞌ.

² Inaquë iꞌhua naꞌpitëaꞌhuaroꞌsa paꞌpaaranquë ninshitërahuëso chachin ninshitaantarahuë. Nani ninshitohuato, caposoquë taparan.

³ Sinioro naporinso chachin, acasia nara itopi quëran caposo ninahuë. Ina nisahuato, cato naꞌpitëaꞌhuaroꞌsanta taparahuë. Nani tapahuatora, motopiꞌpaꞌ quëpantarahuë.

^4-5 Inaquë Siniorori shonca pënëntërinsopita ninshitërin. Yaꞌnan ninshitërinso pochachin ninshitaantarin. Naporoꞌ niyontonëhuaquë, motopi quëran pënëninquëmaso chachin inaquë ninshitërin. Pën huáncana quëran naporo nontërinpoaꞌ. Nani ninshitahuaton quëtohuachincora, nohuaramarahuë. Ina quëran caposoquë naꞌpitëaꞌhuaroꞌsa quëtërincosoꞌ poꞌmorahuë. Sinioro camairincoso chachin poꞌmorahuë. Ipora iso quirica ninshitasoco huarënta inaquë yaꞌhuëarin.

^6-9 (-)

¹⁰ Inapoato iꞌhua pochachin catapini shonca tahuëri tashirë chachin, motopiꞌpaꞌ yaꞌhuërahuë. Inaquë canpita marëꞌ Sinioro nontërahuë. Nontohuatëra, naquëranchin natanatonco, co ataꞌhuantërinquëmahuëꞌ.

¹¹ Naporoꞌ itaponco: ‘Paꞌmaton, israiroꞌsa quëpaquëꞌ. Paatona shimashonënapita noꞌpaꞌ quëtaꞌhuaso shaꞌhuitërahuëquë yaꞌcoinaꞌ,’ itërinco,” itërin.

Israiroꞌsa maꞌsona nicacaiso yaꞌhuërinsoꞌ

¹² Naquëranchin Moisësëri israiroꞌsa nontaantarin: “Israiroꞌsanquëma ninamasoꞌ, noya natancoꞌ. Maꞌsona noya nicacasoꞌ Sinioro nohuantërinsoꞌ shaꞌhuichinquëmaꞌ. Ina tëꞌhuatatë noya niꞌcasoꞌ nohuantërin. Noya nicatë natëcasoꞌ. Yaꞌipi cancanënpoa quëran, yaꞌipi huaꞌyanënpoa quëran nosoroatëꞌ, chinotacaso nohuantërin.

¹³ Yaꞌipi camaitërinsopita, pënëntërinsopita, inapita natëcasoꞌ nohuantërin. Inapohuatëhua Yosë noya nicatonpoaꞌ, catahuarinpoaꞌ.

¹⁴ Sinioronënpoasoꞌ Yosë niꞌton, yaꞌipi piꞌiroꞌtë huaꞌanëntërin. Yaꞌipi inaquë yaꞌhuërinsopitanta huaꞌanëntërin. Isoroꞌpanta nisahuaton, yaꞌipi yaꞌhuërinsopitarë chachin huaꞌanëntërin.

¹⁵ Inaso niponahuëꞌ, shimashonëmapita nosoroaton huayonin. Canpitaso inapita shinpitanquëma niꞌton, huayoninquëmaꞌ. Aꞌnapita piyapiroꞌsa quëran noya noya nicatënquëma napotërinquëmaꞌ. Ipora naporamaso chachin ninin.

¹⁶ Co natantochináchinhuëꞌ cancantëramasoꞌ, aꞌpoco huachi. Siniororëꞌquënpoa anoyatërëhuasoꞌ, cancanëma quëran natëtochináchin cancantocoꞌ.

¹⁷ Siniorosoꞌ Yosë niꞌton, yaꞌipi yosëroꞌsa quëran chini chiníquën nanantërin. Yaꞌipi huaꞌanoꞌsantaꞌ, huaꞌanëntërin. Co incari tëranta inasoꞌ, camaiaponhuëꞌ. Chini chiníquën nanantaton, paꞌpi tëꞌhuatoro yaꞌnorin. Yaꞌipi piyapiꞌsa napopináchin niꞌnin. Co incari tëranta inasoꞌ: ‘Pahuërëꞌinquën, ama anaꞌintocosohuëꞌ’ co itaponhuëꞌ.

¹⁸ Saꞌahuaroꞌsaꞌ, quëyoronoꞌsaꞌ, inapita noꞌtëquën catahuarin. Nisha piyapiroꞌsa yacaparinpoasopitantaꞌ, nosoroaton cosharoꞌ, aꞌmocaisoꞌ, inapita quëtërin.

¹⁹ Canpitantaꞌ, Iquipitoquë nisha piyapi pochin ninamaꞌ. Napoaton nisharoꞌsa nosorocoꞌ.

²⁰ Siniorosoꞌ Yosë niꞌton, noya niꞌcoꞌ. Noya nicatomaꞌ, inasáchin cancanëma quëran huarëꞌ chinotocoꞌ. Inasáchin cancantocoꞌ. Natëinëmaso marëꞌ shaꞌhuihuatamaꞌ, Yoscoarëꞌ taꞌtoma shaꞌhuicoꞌ.

²¹ Inasoꞌ nóya niꞌton, canpoasoꞌ inasáchin chinotërëhuaꞌ. Inaíchin Yosë imarëhuasoꞌ. Catahuainpoaso marëꞌ, paꞌpi huëhuëpiro nininsopita maꞌsha aꞌnorin, canpitanta niꞌnamaꞌ.

²² Canchisë shonca yaꞌpíchin iráca shimashonënpoapita Iquipitoquë yaꞌhuëcaiso marëꞌ paꞌmapi. Iporaso nipirinhuëꞌ, Yosë catahuarinpoa niꞌton, inápaquë tayora yaꞌhuërinso pochin, naꞌarëhuaꞌ,” itërin Moisësëri.