Deuteronomio 1 - Chayahuita (Shahui)

Insëquësona Moisësë pënëantarinsoꞌ

¹ Moisësësoꞌ, israiroꞌsa camaicaso marëꞌ Cosoi acorin. Ina acorahuaton, yaꞌipi israiroꞌsaꞌ, pënëantarin. Arapa inotëroquë nicasoiꞌ, naporoíchin pënënin huachi. Inasoꞌ noꞌpaꞌ Cortaniiꞌ quëran, piꞌi pipirinso parti quëparitërin. Ina roꞌtë chachin Moapo canonamatë itopi antaꞌ. Aꞌnatëran Sopë ninano nisahuaton, Paran ninano yaꞌhuërin. Aꞌnatëraontaꞌ, Tohuiro, Napan, Asiroto, Tisaapa, inapita ninanoroꞌsa yaꞌhuërin.

² (Sinai motopi quëran huarëꞌ shonca aꞌna tahuëri quëran pochin Catisi Parnia ninanoquë canpi. Itomoroꞌsa noꞌpanëntaquëchin ira yaꞌhuërinso paꞌtohuachinara, napopi. Inataquëchin napoaponahuëꞌ, naꞌa motopiroꞌsa yaꞌhuërin.)

³ Israiroꞌsa Iquipito quëran pipipisoꞌ nani cara shonca iscon piꞌi nisapi. Ina nisahuaton, shonca yoqui aꞌna tahuëriraꞌ naniso chachin Moisësëri israiroꞌsa shaꞌhuitaantarin. Yaꞌipi Sinioro pënëntërinsoꞌ shaꞌhuitaantarin.

⁴ Coꞌhuara pënënchátëraponhuëꞌ, israiroꞌsaso amororoꞌsa canapi. Isipon ninanoquë Sicon copirno sontaronënpitarë chachin canapi. Asotaroto, Itërii, inapita ninanoroꞌsaquëntaꞌ, Oco copirno sontaronënpitarë chachin canapi. Inapitasoꞌ Pasan parti yaꞌhuëpi.

⁵ Moaporoꞌsa noꞌpanënquë nicasoiꞌ, Moisësëso caniaritërin israiroꞌsa pënënacasoꞌ. Inahuaso noꞌpanën, napotëranquëmaso chachin Cortaniiꞌ quëran piꞌi pipirinso parti quëparitërin. Naporoꞌ iso pochin pënëntërin:

⁶ Sinai motopiquë niꞌsëhuaꞌ, Sinioro napotërinpoaꞌ: “Nani huaꞌqui iso motopiquë yaꞌhuëramaꞌ.

⁷ Napoaton maꞌshanëma masahuatomaꞌ, motopiroꞌsa parti pacoꞌ. Amororoꞌsa yaꞌhuërinso parti paꞌsahuatomaꞌ, yaꞌyoraninsopita partinta paꞌtocoꞌ. Arapa parti itopiquëntaꞌ, pacoꞌ. Motopiroꞌsa parti, Niquipi parti, canonamatë parti, marë yonsan parti, yaꞌipi inaquëpita pacoꞌ. Inaquësoꞌ, cananoꞌsa yaꞌhuërin. Ina aquëtëntaꞌ, Nipano parti itopiquë paꞌsahuatomaꞌ, Iopiratisiiꞌ pancaiquë huarëꞌ pacoꞌ.

⁸ Nani yaꞌipi ina noꞌpaꞌ carinquëma quëtëranquëma huaꞌanëntamaso marëꞌ. Napoaton paꞌsahuatomaꞌ, ina noꞌpaꞌ máco huachi. Iráca shimashonëmapita Apraan, Isaco, Cacopo, inapita nani shaꞌhuitërahuë: ‘Caso Sinioroco niꞌto, quëtaranquëmaꞌ, itërahuë,’ itërinpoaꞌ,” tënin Moisësë.

^9-46 (-)