Daniel 9 - Chayahuita (Shahui)

Naniri israiroꞌsa marëꞌ Yosë nontërinsoꞌ

^1-2 Papironiaroꞌsasoꞌ, Asoiro huiꞌnin Tario itopisori huaꞌanëntarin. Inahuasoꞌ, Mitia piyapiroꞌsaꞌ. Ina Tario ipora huarëꞌ aꞌna piꞌipíchin huaꞌanëntasoꞌ, caso Irimiasë ninshitërinsoꞌ quirica nontato, naꞌcon yonquirahuë. Inasoꞌ pënëntonaꞌpi, ninoton aninshitërin: “Quirosarin ninanosoꞌ ataꞌhuantohuachinaꞌ, canchisë shonca piꞌipi naꞌpiroꞌsaraꞌ yamorápon,” tënin. Siniorori anitotërin niꞌton, ina pochin aninshitërin.

³ Naporo tahuëriꞌsa naꞌcon Yosë nontërahuë. Saꞌcatën aꞌmosahuato, huariano aipi huënsërahuë. Inapoato ayono ninahuë.

⁴ Nontohuatora: “Quëmasoꞌ Sinioro chini chiníquën nanantaton, yaꞌipi nanitaparan. Maꞌsona shaꞌhuitohuatancoi, noꞌtëquën nonan. Nosoroatënën camaitëransopita natëhuachinën, quëmarinta nosororansoꞌ aꞌnotëran.

⁵ Tëhuënchachin quiyasoꞌ co noyahuëꞌ nicatoi oshahuanai. Co costaransohuëꞌ ninai. Co quëma yaꞌhuëransohuë pochin cancantatoi yaꞌhuërai. Camaitëransopita, shaꞌhuiransopita, inapita aꞌporai.

⁶ Pënëntonaꞌpiroꞌsasoꞌ piyapinënpita nipirinahuëꞌ, co natëraihuëꞌ. Inapitasoꞌ quëmari nanan quëtëran niꞌton, copirnonëhuëipita pënënpi. Huaꞌanoꞌsanëhuëipita, shimashonëhuëipita, yaꞌipi israiroꞌsaꞌ, inapita pënënpi.

⁷ Quëmasoꞌ noya coisë pochin nicaton, noꞌtëquën anaꞌintërancoi. Ina marëꞌ quiyasoꞌ yaꞌipi cotioroꞌsacoi tapanai. Quirosarinquë yaꞌhuëpisopita, aꞌnapita israiroꞌsa yaꞌcaria yaꞌhuëpisoꞌ, áquë yaꞌhuëpisoꞌ, quëma nisha nisha noꞌparoꞌsaquë tëꞌyatërancoi. Yaꞌipicoi oshahuanai niꞌton, inapotërancoi.

⁸ Copirnonëhuëipita, huaꞌanoꞌsanëhuëipita, shimashonëhuëipita, inapita pochachin quiyantaꞌ, tapanai. Co natëtëinquënhuëꞌ oshahuanaiso marëꞌ naporai.

^9-10 Quëmaso napoaponahuëꞌ, Yosënëhuëinquën niꞌton, nosorocoi. Nosoroatoncoi nichaꞌëcoi. Quiyasoꞌ co natëtëinquënhuë, pënënancoisopita co natanaihuë pochin ninai. Pënëntonaꞌpiroꞌsa quëran aꞌchintopirancoihuëꞌ, co natëraihuëꞌ.

¹¹ Yaꞌipi israiroꞌsacoi aꞌchintërancoisopita co natëraihuëꞌ. Camaitëransopitantaꞌ, co natëcaꞌhuaiso nohuantëraihuëꞌ. Iráca Moisësë pënëntërinsoꞌ quiricaquë shaꞌhuitërancoi: ‘Caso Yosëco niꞌton, shaꞌhuitaranquëmaꞌ. Iso quirica quëran pënënanquëmasopita co natëhuatamacohuëꞌ, paꞌpi chiníquën aparisitaranquëmaꞌ,’ itërancoi. Co quëma natëtëinquënhuëꞌ panca tëhuërai niꞌton, naporanso chachin iporasoꞌ parisitarai.

¹² Poꞌpin anaꞌintatoncoi, shaꞌhuitërancoiso ananiran. Yaꞌipicoi, copirnonëhuëi quëran huarëꞌ paꞌpi chiníquën anaꞌintërancoi. Co intohua tëranta isoroꞌpaquë, Quirosarinquë parisitopiso pochin parisichinpihuëꞌ.

¹³ Moisësë pënëntërinsoꞌ quiricaquë ninshitërinso pochachin paꞌpi chiníquën parisitërai. Inapoapiraihuëꞌ, co chinotërainquënhuëꞌ. Co noyahuëꞌ ninaisopitanta co aꞌporaihuëꞌ. Noꞌtë nanan aꞌchintërancoisontaꞌ, co imaraihuëꞌ.

¹⁴ Quëmaso Sinioro Yosënëhuëinquën niꞌton, noya coisë pochin ninan. Napoaton poꞌpin parisiaꞌhuaiso aꞌpatiirancoi. Quëmasoꞌ noyasáchin nipiranhuëꞌ, quiyaso co yanatërainquënhuëꞌ.

¹⁵ Quëmaso Sinioro Yosënëhuëinquën. Chiníquën nanantaton piyapinënpitacoi Iquipito quëran ocoirancoi. Inapotatoncoi sacóshin nahuinan. Quiyaso napoaponahuëꞌ, co noyahuëꞌ nicatoi oshahuanai.

¹⁶ Quëmasoꞌ noyanquën ninansoꞌ nitotërai. Quirosarinquë yaꞌhuëpisopita paꞌpi noꞌhuiton anaꞌintëran. Inapotëranso sanoaton, catahuaantaquëꞌ. Inaso ninanoꞌ, quëma ninanonën. Inaquë chinotiinënquënso marëꞌ pëi acoran. Aꞌnapita nacionoꞌsa ina pirayan yaꞌhuëpisoꞌ, Quirosarinquë yaꞌhuëpisopita yonquiatona tëhuapi. Quiyaora tëhuënëhuëiquë, inapotërinacoi. Shimashonëhuëipitanta tëhuëpi niꞌton, inapotërinacoi.

¹⁷ Quëmaso Sinioro Yosënëhuëinquën. Caso piyapinënco nipirahuëꞌ nontaranquënsoꞌ natanco. Natanatonco pëinën nishinahuën acopisoꞌ yonquiquëꞌ. Catahuaantahuatancoi: ‘¡Ma noyacha Siniorori catahuarin paya!’ taꞌtonaꞌ, piyapiroꞌsa paꞌyatarinën.

¹⁸ Nosoroatoncoi Sinioro nontaranquënsoꞌ natanquëꞌ. Quirosarinquë pëinën yaꞌhuërin niꞌton, inaquë chinotopirainquënhuëꞌ, ataꞌhuantopi. Ina nicaton catahuacoi: ‘Noya ninaiso marëꞌ Sinioro aꞌpaniarincoi,’ co tënaihuëꞌ. Paꞌpi nosororancoisoꞌ yonquiatoi nontarainquën.

¹⁹ ¡Sinioro onpopionta natancoi! Tëhuëtopirainquënhuëꞌ, nichaꞌëcoi. Nontaranquënsoꞌ natanaton, catahuacoi. Noya nicatënënquën paꞌyatiinënso marëꞌ catahuacoi. Quëma pëinënsoꞌ, Quirosarinquë yaꞌhuërin. Ina ninanonta yonquiaton catahuacoi. Piyapinënpitacointa chinotërainquënso yonquiaton, aꞌnaroáchin catahuacoi,” itërahuë.

Canchisë shonca simana nininsoꞌ

²⁰ Ina pochin nontato oshanëhuë Yosë shaꞌhuitërahuë. Israiroꞌsa oshanënanta shaꞌhuitërahuë. Quirosarin marënta nontërahuë.

^21-22 Ina pochin nontasoco, aꞌnara anquëni huaꞌan yanponahuaton huëcapairinco. Iracanta huaꞌnarahuëquë quënanahuëso chachin huëꞌnin. Panca tëhuërënahuasoꞌ Yosë marëꞌ maꞌsha tëpapisoꞌ ahuiquitopi. Naporo ora pochin yaꞌnotahuatonco: “Naniri. ¿Yaꞌhuëaran? Yosë nani yonquirin catahuainquëmasoꞌ. Ina noꞌtëquën ayonquicaꞌhuanquënso marëꞌ oꞌmarahuë.

²³ Yosë nontëransoꞌ caniaritasënquën chachin, inaso aꞌpanirinquën. Inasoꞌ nosoromiatërinquën niꞌton, anitotaꞌhuanquënso marëꞌ aꞌpaimarinco. Iporasoꞌ noya huëratëhuanaton natanquë noꞌtëquën nitotamaso marëꞌ.

²⁴ Quirosarin ninanoꞌ, israiroꞌsaꞌ, inapita Yosëri anaꞌintërinsoꞌ, canchisë shonca simana pahuanarin nanicasoꞌ. Ina nápo simana nanihuachin, nichaꞌësarinquëmaꞌ. Co noyahuëꞌ nicatoma Yosë tëhuëtëramaꞌ, co natantochináchinhuëꞌ cancantatoma oshahuanamaꞌ. Inapopiramahuëꞌ, nichaꞌësarinquëmaꞌ. Ina piquëranso huachi noyasáchin nicatoma yaꞌhuapomaꞌ. Naporo huachi huaꞌnaton niꞌnansopita naniarin. Pënëntonaꞌpiroꞌsanta Yosë nohuanton anitotërinëmasoꞌ, nanipon. Naporo huachi Noya Noya nininsoꞌ, Yosë marëꞌ acoaponaꞌ.

²⁵ Isonta nitotahuaton, noya yonquiquëꞌ: Quirosarin noya acoantacaiso marëꞌ nanan yoꞌpi quëran, huaꞌan Yosëri huayoninso yaꞌconaquë huarëꞌ, canchisë simana nisahuaton, saota shonca cato simana huaꞌquiapon. Quirosarin pairanën, cachiroꞌsaꞌ, inapita anoyatasoiꞌ, naꞌcon parisitacaisoꞌ yaꞌhuëapon.

²⁶ Saota shonca cato simana piquëran huaꞌan Yosëri huayoninso tëpaponaꞌ. Quirosarin ninanoꞌ, Yosë chinotacaso pëiꞌ, inapita naquëranchin ataꞌhuantaantaponaꞌ. Aꞌnara copirno piyapinënpitarë chachin huëcaton inapotapon. Panca paquiiꞌ aꞌnaroáchin mëntarinso pochin taꞌhuantacaisoꞌ canquipon. Quira nicacaisoꞌ, niataꞌhuantacaisoꞌ, inapitasoꞌ, tahuëri taꞌhuantaquë huarëꞌ imapon.

²⁷ Aꞌna simana marëꞌ ina copirnosoꞌ, notohuaroꞌ piyapiꞌsarëꞌ anoyatapon. Napoaponahuë ina simana huancanarahuasoꞌ, Yosë marëꞌ maꞌsha ahuiquitacaisoꞌ, acopitapon. Maꞌsha Yosë marëꞌ quëcacaisontaꞌ, inapotapon. Artaro maꞌsha Sinioro marëꞌ ahuiquitopiso notënanquë, paꞌpi co noyahuëꞌ nininso nicatonaꞌ, tapiaponaꞌ. Ina piquëranso napoaponahuëꞌ, Yosëri chachin naponaꞌpi ataꞌhuantapon huachi,” itërinco.